༄༅། །གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས་སློབ་དཔོན་

མི་འཇིགས་པ་སྦྱིན་པ་དཔལ་གྱིས་

མཛད་པ་བཞུགས་སོ།།

࿈

༄༅། །རྒྱ་གར་སྐད་དུ། ཙཏུརཱ་སཱིཏཱིསིདྡཱ་པྲ་བྲྀཏྟེབྲྀཏཱཎཏ། བོད་སྐད་དུ་གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས། བླ་མ་དམ་པ་རྣམས་ལ་ཕྱག་འཚལ་ལོ།། དུས་གསུམ་སངས་རྒྱས་རྣམས་དང་བརྒྱུད་པའི་བླ་མ་མཁའ་སྤྱོད་གཤེགས་པ་རྣམས།། དངོས་ཀྱི་བླ་མ་མཆོག་གི་དངོས་གྲུབ་བརྙེས་པའི་མི་འཇིགས་པའི་དཔལ་ལ།། ལུས་ངག་ཡིད་གསུམ་དྭང་བས་ཞབས་ཀྱི་པདྨོ་དག་ལ་གུས་བཏུད་ནས།། ལཱུ་ཧི་པ་སོགས་གྲུབ་ཐོབ་བརྒྱད་ཅུ་རྩ་བཞིའི་ཡང་དག་ལོ་རྒྱུས་བྲི།།

༡༽ལཱུཧིཔཱའི་ལོ་རྒྱུས། 

དེ་ལ་གུརུལཱུཧིཔཱའི་ལོ་རྒྱུས་ནི། འདིར་ལཱུཧི་ཞེས་བྱ་བ་ནི་ཉའི་རྒྱུ་ལྟོ་གསོལ་བ་ལས་མཚན་དུ་བཏགས་པ་སྟེ། དེ་ཡང་སིངྒ་ལཱའི་གླིང་གི་རྒྱལ་པོ་གཅིག་ལ་རྒྱལ་སྲིད་ཀྱང་རྣམ་ཐོས་ཀྱི་བུ་དང་མཉམ་པ། རྒྱལ་པོའི་ཁང་བཟང་ཐམས་ཅད་ནི་རིན་པོ་ཆེ་དང་། མུ་ཏིག་དང་། གསེར་དངུལ་ལ་སོགས་པས་བརྒྱན་པ་ཡོད་ལ། སྲས་ཀྱང་གསུམ་མངའ་བ་ལས། ཡབ་རྒྱལ་པོ་གྲོངས་ནས་དུས་རེ་ཞིག་གི་ཚེ། རྩིས་མཁན་རྣམས་ལ་སྲས་གང་གིས་རྒྱལ་སྲིད་ཟིན་པ་རྩིས་བྱས་པས། དེ་ན་རེ། སྲས་བར་པས་རྒྱལ་སྲིད་བཟུང་ན་ཆབ་སྲིད་བརྟན་པ་དང་། འཁོར་འབངས་སྐྱིད་པ་ལ་སོགས་པའི་ཡོན་ཏན་ཡོད་དོ་ཟེར་བ་དང་། ཡབ་ཀྱིས་རྒྱལ་སྲིད་དེ་ལ་གཏད། དེ་ནས་གཅེན་དང་། གཅུང་དང་། འབངས་ཐམས་ཅད་ཀྱིས་ཀྱང་རྒྱལ་ཚབ་ཏུ་དབང་བསྐུར་བ་དང་། དེས། རྒྱལ་སྲིད་མ་འདོད་ནས་བྲོས་པར་བརྩམས་པ་ལས། གཅེན་དང་། གཅུང་དང་། འབངས་རྣམས་ཀྱིས་དེ་བཟུང་ནས་གསེར་གྱི་སྒྲོག་གི་ལྕགས་སུ་བཅུག་པ་དང་། རྒྱལ་བུ་དེས་འཁོར་དང་བཙོན་བསྲུང་ཀུན་ལ་གསེར་དང་དངུལ་ལ་སོགས་པའི་བྱ་དགའ་བྱིན་ནས། མཚན་ལ་གོས་ཚེམ་བུ་ཅན་གྱོན་ཏེ། སྐྱེལ་མ་ལ་ཡང་གསེར་དངུལ་ལ་སོགས་པའི་བརྔན་པ་བྱིན་ནས། རྒྱལ་པོ་རཱ་མ་ལའི་ཡུལ་རཱ་མེ་ཤྭ་རར་ཕྱིན་པ་དང་། སྟན་དར་ཟབ་ལས་བྱས་པ་བོར་ནས་ཀྲྀཥྞ་སཱ་རའི་སྟན་བཏིངས་ནས་རྒྱལ་ས་སྤངས་ནས་ཐལ་བའི་ནང་དུ་ཉལ་ལོ། །རྒྱལ་བུ་དེ་གཟུགས་བཟང་ཞིང་བལྟ་ན་སྡུག་པས། ཀུན་གྱིས་བཟའ་བ་དང་བཅའ་བ་ལ་སོགས་པའི་མི་བྲལ་བ་ཉིད་དུ་སྦྱིན་ནོ། །དེ་ནས་རྡོ་རྗེ་གདན་དུ་བྱོན་པས་དེར་མཁའ་འགྲོ་མས་རྗེས་སུ་གཟུང་སྟེ། གདམས་པ་བསྟན་ཏོ། །རྒྱལ་པོ་བཞུགས་ས་པ་ཌ་པུ་ཏྲར་བྱོན་ནས། མི་ཀུན་གྱིས་ཟས་བྱིན་པ་ཟ་ཞིང་། དུར་ཁྲོད་དུ་ཉལ་གིན་འདུག་པ་ལས། ཉིན་གཅིག་ཚོགས་འདུས་སུ་བྱོན་ནས་ཆང་འཚོང་མའི་གནས་སུ་ཕྱིན་པ་དང་། ཆང་འཚོང་མའི་གཙོ་མོ་དེ་ནི་འཇིག་རྟེན་གྱི་མཁའ་འགྲོ་མ་ཞིག་ཡིན་པས། དེས་རྒྱལ་བུ་ལ་བལྟས་ནས་འདིའི་འཁོར་ལོ་བཞིའི་དྲི་མ་ལ་སོགས་པ་ཐམས་ཅད་ནི་དག་ནས་འདུག་པ་ལ། སྙིང་ག་ན་སྲན་མ་ཙམ་ཞིག་རིགས་ཀྱི་རྟོག་པ་མ་དག་པར་འདུག་གོ་ཞེས་ཟེར་རོ། དེ་ནས་བུད་མེད་དེས་རྫ་མའི་ནང་དུ་ཟས་རུལ་བ་བླུགས་ནས་བྱིན་པ་དང་། རྒྱལ་བུས་དེ་བསྐྱུར་བས་མཁའ་འགྲོ་མ་དེ་ཁྲོས་ནས། ཁྱོད་ཀྱིས་ཟས་བཟང་ངན་གྱི་རྣམ་རྟོག་མ་སྤངས་ན་ཆོས་ག་ལ་འོང་ཞེས་སྨྲས་པས། རྒྱལ་བུ་དེས་རྣམ་རྟོག་དང་མཚན་མ་ནི་བྱང་ཆུབ་ཀྱི་གེགས་སུ་འདུག་སྙམ་ནས། རྣམ་རྟོག་དང་མཚན་མ་སྤངས་ཏེ། ཉ་པས་གངྒཱ་ནས་ཉ་བསད་པའི་རྒྱུ་མ་ས་ལ་བསྐྱུར་བ་རྣམས་བླངས་ནས། དེ་ཟ་ཞིང་ལོ་བཅུ་གཉིས་ཀྱི་བར་དུ་བསྒྲུབས་སོ། །ཉའི་རྒྱུ་མ་ཟ་བ་ཉ་འཚོང་པའི་བུད་མེད་ཀུན་གྱིས་མཐོང་ནས། ཐམས་ཅད་ཀྱི་ལཱུཧི་པཱ་ཞེས་སྨྲས་པ་དང་། ཕྱོགས་མཚམས་ཐམས་ཅད་དུ་ལཱུ་ཧི་པ་ཞེས་གྲགས་ཏེ། དེའི་མིང་དང་དངོས་གྲུབ་ཐོབ་བོ།། འདིའི་འཕྲོས་དཱ་རིཀཱཔཱ་དང་། ཊིངྒི་པཱའི་སྐབས་སུ་ཡང་འབྱུང་ངོ་།། གྲུབ་ཆེན་ལཱུཧི་པཱའི་རྣམ་པར་ཐར་པ་རྫོགས་སོ།། 

༢༽གུརུལཱིལཱཔཱ། 

གུརུལཱིལཱཔའི་ལོ་རྒྱུས་ནི། རྒྱ་གར་ལྷོ་ཕྱོགས་ཀྱི་རྒྱལ་པོ་གཅིག་སེངྒེའི་ཁྲི་ལ་བཞུགས་པའི་ཚེ། ཡུལ་གཞན་ཞིག་ནས་རྣལ་འབྱོར་པ་ཞིག་དེའི་ཐད་དུ་བྱོན་པ་དང་། རྒྱལ་པོ་ན་རེ། ཁྱོད་རྒྱལ་ཁམས་ཐམས་ཅད་དུ་འཁྱམས་པ་ཉོན་རེ་མོངས། གསུང་པས། རྣལ་འབྱོར་པ་ན་རེ་བདག་མི་སྡུག་སྟེ། ཁྱོད་རང་ཉོན་མོངས་སོ།། དེ་ཅི་ཏེ་ན་ཉིད་རྒྱལ་སྲིད་ཤོར་གྱི་དོགས། འབངས་རྣམས་མ་མགུའི་དོགས་པས་ཉིད་རང་སྡུག་བསྔལ་ལོ།། བདག་ནི་མེའི་ནང་དུ་འཆོངས་ཀྱང་མི་ཚིག་དུག་ཟོས་ཀྱང་མི་འཆི། རྒས་པ་དང་། འཆི་བའི་སྡུག་བསྔལ་མེད་དེ། བཅུད་ལེན་གྱི་གདམས་ངག་ཡོད། གསུང་པས། རྒྱལ་པོ་དད་ནས་དངོས་ཀྱི་ཉིད་བཞིན་དུ་རྒྱལ་ཁམས་འགྲིམ་པར་ནི་མི་ནུས་མོད། འོན་ཀྱང་རང་གི་རྒྱལ་སར་སྟན་ལ་འདུག་ནས་སྒོམ་པར་ནུས་ན། དངོས་ལ་ཉིད་ཀྱི་གདམས་ངག་ཅིག་ཞུ། བྱས་ནས་ཕྱག་བྱས་པས། སློབ་དཔོན་གྱིས་གནང་སྟེ། ཀྱཻའི་རྡོ་རྗེའི་དབང་བསྐུར། གདམས་ངག་བྱིན་ནས་དྲན་པ་གཅིག་པའི་ཏིང་ངེ་འཛིན་བསྒོམ་དུ་བཅུག་གོ །དེ་ནས་རྒྱལ་པོ་རང་ཉིད་ཀྱི་སེངྒེ་ཁྲི་ལ་ཟ་འོག་གིས་སྤྲས་པའི་སྟན་ནང་ཚངས་ཅན་དང་། སྔས་ལ་སོགས་པའི་སྟེང་དུ་བཙུན་མོ་དང་བློན་པོའི་ཚོགས་དང་། རོལ་མོའི་བྱེ་བྲག་སྣ་ཚོགས་པས་བསྐོར་ནས་བསྒོམས་པས་མཚན་ཡང་ལོངས་སྤྱོད་པའམ། སྒེག་པ་ལ་སོགས་པས་ལཱིལཱཔ་ཞེས་གྲགས་སོ།། གདམས་ངག་དངོས་ནི་ཕྱག་གཡས་པའི་སོར་གདུབ་ལ་མ་ཡེངས་པར་བསྒོམ་པའོ། །དེ་མི་འགྱུར་བར་འདུག་བྱས་པས། དེའི་ནང་དུ་དགྱེས་པ་རྡོ་རྗེའི་ལྷ་ཚོགས་བསྒོམ་པའི་གདངས་ངག་བྱིན་པ་དང་། དེ་ཡང་མི་འགྱུར་བར་འདུག་གོ་ཟེར་བ་ན། བསྐྱེད་རྫོགས་ཟུང་འཇུག་ཏུ་བསྒོམས་པས་རྟོགས་པ་རང་ཤུགས་སུ་ཤར་ནས་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། མངོན་པར་ཤེས་པ་ལ་སོགས་པའི་ཡོན་ཏན་དུ་མ་དང་ལྡན་ནོ།། དེས་ན་བླ་མའི་གདམས་ངག །རང་གི་བརྩོན་པ། སྔ་མའི་ལས་འཕྲོ་དང་གསུམ་འཛོམས་ན་འདོད་ཡོན་མ་སྤངས་ཀྱང་གྲོལ་ལོ།། དེས་ཀྱང་འགྲོ་དོན་དཔག་ཏུ་མེད་པ་མཛད་ལ། མིང་དུ་ལཱིལཱཔཱ་ཞེས་ཕྱོགས་མཚམས་ཐམས་ཅད་དུ་གྲགས་ཤིང་། མཐར་མཁའ་སྤྱོད་དུ་གཤེགས་སོ།། གུ་རུ་ལཱིལཱཔཱའི་ལོ་རྒྱུས་རྫོགས་སོ།། 

༣༽གུརུཝིརཱུཔཱ།

གུརུཝིརཱུཔཱའི་ལོ་རྒྱུས་ནི། ཤར་ཕྱོགས་རཱཇཱདེབཔཱལའི་ཡུལ་ཏྲིཔུརར་སྐུ་འཁྲུངས། སཽམཔུརཱི་ཞེས་བྱ་བའི་གཙུག་ལག་ཁང་དགེ་འདུན་སྟོང་གི་སྐུ་འཚོ་ཡོད་པའི་ཆོས་འཁོར་ཆེན་པོ་ཅིག་ཡོད་པ་ལ། ཝིརཱུཔ་རྟེན་དགེ་སློང་ཡིན་ཡང་། དབང་བསྐུར་ཞུས་ནས་རྡོ་རྗེ་ཕག་མོའི་བཟླས་པ་ལོ་བཅུ་གཉིས་ཀྱི་བར་དུ་འབུམ་ཕྲག་བརྒྱ་ལན་གཉིས་བཟླས་པས། རྨི་ལམ་གྱི་རྟགས་ཙམ་ཡང་མ་བྱུང་ནས། ཐུགས་མུག་སྟེ་འཕྲེང་བ་ཆབ་ཁང་དུ་བསྐྱུར་ནས་ཅི་བདེར་བཞུགས། དགོང་ཁ་མཆོད་པའི་དུས་སུ་འཕྲེང་བ་མེད་པའི་རྟོག་པ་བྱུང་བ་དང་། ཌཱ་ཀཱི་མས་འཕྲེང་བ་ལག་པར་བྱིན་ནས་གསུང་གི་སྣང་བ་འདི་ལྟར་བྱིན་ཏེ། རིགས་ཀྱི་བུ་ངས་བྱིན་གྱིས་བརླབས་ཀྱི་ཁྱོད་ཡི་མ་མུག་པར་རྣམ་རྟོག་དང་མཚན་མ་ཐམས་ཅད་སྤོངས་ལ་སྒྲུབ་པ་གྱིས་ཤིག། སེམས་ཉིད་གཉུག་མར་གནས་པ་དེ།།

རྡོ་རྗེ་ཕག་མོའི་ངོ་བོ་ཡིན།།

རང་ལ་ཡོད་ཀྱང་གཞན་ལ་རེ།།

ཤིན་ཏུ་མི་མཁས་བྱིས་པའི་ངང་།།

སེམས་ཉིད་ཡིད་བཞིན་ནོར་བུ་དེ།།

རྣམ་པར་རྟོག་པས་མ་གོས་པར།།

ཆོག་ཤེས་སྒྲུབ་པ་དམ་པ་ཡིན།། 

ཞེས་ཟེར་རོ།། དེ་ནས་ཡང་ལོ་བཅུ་གཉིས་བསྒྲུབས་པས། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་གཡོག་པོས་ཤ་དང་ཆང་ཉོས་ཤིང་དྲངས། དེ་ནས་གཙུག་ལག་ཁང་གི་ཕུག་རོན་ཡོད་པ་བསད་ནས་ཤ་བྱས་ཏེ་ཟོས་པ་དང་། ཕུག་རོན་རྣམས་ཟད་ནས། དགེ་འདུན་གྱིས་ངེད་ཀྱི་མཆོད་གནས་སུས་ཟོས་བྱས་པས། དེ་ན་ཡོད་པའི་བཙུན་པ་ཀུན་གྱིས་ངེད་ཀྱིས་མ་ཟོས་ཟེར། བྲང་ཁང་ཀུན་བལྟས་པས་ཝིརཱུཔའི་བྲང་ཁང་བལྟར་བཏང་བ་དང་། སྐར་ཁུང་ནས་བལྟས་པས། དེ་ཆང་འཐུང་ཞིང་ཕུག་རོན་གྱི་ཤ་ཟ་བ་མཐོང་ནས། དགེ་འདུན་གྱི་གཎྜི་བརྡུངས་ཏེ་གནས་ནས་དབྱུང་བར་བྱས་པ་དང་། ཝིརཱུཔས་ཆོས་གོས་དང་ལྷུང་བཟེད་སྐུ་གཟུགས་ཀྱི་སྤྱན་སྔར་ཕུལ། ཕྱག་བྱས་ཏེ་སྒོ་ལ་མ་ཕྱིན་པ་དང་། གཙུག་ལག་ཁང་དེའི་རྩ་ན་མཚོ་ཆེན་པོ་ཞིག་ཡོད་པ་ལ། དགེ་སློང་གཅིག་གིས་ཁྱོད་ལམ་གང་ལ་འགྲོ་བྱས་པས། ང་ཁྱེད་ཀྱིས་བསྐྲད་པ་ལ་ལམ་ལ་བཟའ་གཏད་ཅི་ཡོད། གསུངས་ནས་ཆུ་དེའི་ཐོག་ན་ཕར་པདྨའི་འདབ་མ་ལ་ཞབས་བཞག་ནས་པདྨའི་མེ་ཏོག་ཆུར་མ་ནུབ་པར་བཅད་དེ་སངས་རྒྱས་ལ་མཆོད་པ་བྱས་ནས་ཕ་མཐར་སོང་ངོ་།། སཽམཔུརཱིའི་མི་ཀུན་འགྱོད་པ་སྐྱེད་སྐྱེས་ཏེ། ཞབས་ལ་འཇུས་ཏེ་ཕྱག་བྱས་ནས། ཁྱེད་ཀྱིས་ཕུག་རོན་ཅི་ལ་བསད་བྱས་པས། ངས་མ་བསད་པ་ཡོད་ཟེར། གཡོག་པོས་ཕུག་རོན་གྱི་གཤོག་པའི་དུམ་བུ་རྣམས་ཁྱེར་འོངས་པ་དང་། སློབ་དཔོན་གྱིས་སེ་གོལ་ཅིག་རྟོག་པར་མཛད་པས་གཤོག་དུམ་དེ་དག་ཕུག་རོན་ཉིད་དུ་སོང་ནས། དེ་ཡང་སྔར་བས་ཀྱང་ཆེ་བ་དང་བཟང་བར་བྱས་ཏེ་ནམ་མཁའ་ལ་འཕུར་ནས་སོང་བ་ཀུན་གྱིས་མཐོང་ངོ་།། དེ་ནས་ཝིརཱུཔས་དགེ་སློང་གི་རྟགས་བསྐྱུར་ནས་རྣལ་འབྱོར་པའི་སྤྱོད་པ་མཛད་དེ། གངྒཱའི་འགྲམ་དུ་ཕྱིན་ནས་གངྒཱའི་ལྷ་མོ་ལ་བཟའ་བཏུང་བླངས་པས་མ་སྟེར་བས། སློབ་དཔོན་ཁྲོས་ནས་ཆུ་ཡར་མར་དུ་རྦད་ཀྱིས་བཅད་ནས་ཕ་མཐར་གཤེགས་སོ།། དེ་ནས་ཀནསཏའི་གྲོང་ཁྱེར་དུ་ཆང་འཚོང་མ་ལས་ཆང་ཉོས་པ་དང་། དེས་ཆང་ཕོར་བ་གང་དང་འབྲས་སྡེར་མ་གང་བྱིན་པ་ལ་ལོངས་སྤྱོད་དོ།། དེ་ནས་ཞག་ཕྱེད་གསུམ་གྱི་བར་དུ་ཉི་མ་འགྲོར་མ་འདོད་པ་དང་། ཡུལ་དེའི་རྒྱལ་པོ་ཧ་ལས་ནས། འདི་འདྲ་བ་སུའི་རྫུ་འཕྲུལ་ཡིན་ཞེས་ཡོངས་སུ་བསྒྲགས་པར་བྱས་པ་དང་། ཉི་མའི་ལྷ་མོས་རྒྱལ་པོའི་རྨི་ལམ་དུ། རྣལ་འབྱོར་པ་ཅིག་གིས་བདག་ཆང་འཚོང་མ་ལ་གཏའ་མར་བཅུག་ནས་ཡོད་ཅེས་ལུང་བསྟན་པས། རྒྱལ་པོ་དང་སྐྱེ་བོའི་ཚོགས་ཀྱིས་ཆང་རིན་བརྩིས་པས་བྱེ་བར་སོང་བ་སོ་སོར་བཅལ་ནས་ཝིརཱུཔ་དེ་ཉིད་དུ་མི་སྣང་བར་གྱུར་ཏོ།། དེ་ནས་ཨིནྡྲ་ཞེས་བྱ་བའི་མུ་སྟེགས་ཀྱི་ཡུལ་དུ་ཕྱིན་པ་དང་། དེའི་ཡུལ་ན་དབང་ཕྱུག་ཆེན་པོའི་སྐུ་ཁྲུ་བརྒྱད་ཅུ་རྩ་གཅིག་པ་ཞིག་འདུག་པ་དེ། ལ་ཕྱག་གྱིས་ཟེར་བ་ལ། ང་ཕོ་བོ་ཡིན་པས་ནུ་བོ་ལ་ཕྱག་བྱེད་པའི་ལུགས་མེད་བྱས་པས། དེའི་རྒྱལ་པོ་ལ་སོགས་པ་ཀུན་གྱིས་འོ་ན་ཁྱོད་གསོད་པ་ཡིན་ཞེས་ཟེར་བ་དང་། སློབ་དཔོན་ན་རེ། ངས་འདི་ལ་ཕྱག་བྱས་ན་སྡིག་པ་འོང་བས་ཕྱག་མི་བྱེད་པ་ཡིན་ཞེས་སྨྲས་པ་དང་། རྒྱལ་པོ་དེའི་སྡིག་པ་ང་ལ་ཤོག་ཅིག་ཟེར་བ་དང་། སློབ་དཔོན་གྱིས་ཕྱག་ཐལ་མོ་བྱས་པས། མཧཱ་དེ་ཝའི་རྟེན་དེ། ཕྱེད་ཚལ་དུ་གས་པ་དང་། བར་སྣང་ནས་སྒྲ་ཞིག་བྱུང་ནས། སློབ་དཔོན། ང་ནི་དམ་བཅས་པ་བཞིན་ཉན་ནོ་ཟེར། སློབ་དཔོན་གྱིས་འོ་ན་མནའ་བོར་བྱས་པས། མནའ་བོར་བས་ལྷགས་པ་ཡང་སླར་འབྱོར་རོ།།

དེ་ནས་མཧཱ་དེ་ཝའི་རྟེན་གྱི་མཆོད་པའི་ཡོ་བྱད་རྣམས་སློབ་དཔོན་ལ་ཕུལ་ནས། དེ་ནང་པ་སངས་རྒྱས་པ་གཞན་གྱི་འཚོ་བ་བྱས་ནས་ད་དུང་ཡང་ཡོད་ཟེར་རོ།། དེ་ནས་སློབ་དཔོན་རྒྱ་གར་ཤར་ཕྱོགས་དེ་ཝཱི་ཀོ་ཊིར་བྱོན། ཡུལ་དེའི་མི་ཐམས་ཅད་ཕྲ་མེན་མར་སོང་ནས། ཕྲ་མེན་མ་གཅིག །གྲོང་ཁྱེར་གྱི་ཕྱི་རོལ་ལམ་ཁར་བསྡད་ནས་ལམ་དེ་ནས་ཡོང་ཚད་ལ་ཕྲ་མེན་གྱི་སྔགས་ཀྱིས་བཏབ་ཀྱིན་གཏོང་བ་ཆོས་ལུགས་ཡིན་པ་ལ། སློབ་དཔོན་གྱིས་སྔོན་ལ་བྱོན་ནས་གཙུག་ལག་ཁང་ཞིག་ཏུ་ཉལ་བར་བྱས་ནས་འདུག་པ་དང་། བྲམ་ཟེའི་ཕྲུ་གུ་ཞིག་ཕྱི་ནས་ཡོང་བ་སྔགས་བཏབ་ནས་བཏང་བས། གྲོང་དེར་ཟས་ནི་རྙེད་ལ་ཉལ་ས་ནི་མ་རྙེད་པ་དང་། དེ་ནང་པ་སངས་རྒྱས་པ་ཞིག་དང་འཕྲད་ནས། དེས་བྲམ་ཟེའི་ཕྲུ་གུ་ལ་སྨྲས་པ། ཡུལ་འདི་ན་ཐམས་ཅད་ཕྲ་མེན་མར་སོང་ནས་མི་མེད་ཅིང་། དེ་ཀུན་གྱིས་བར་ཆད་བྱེད་པ་ཡིན་པས་གཙུག་ལག་ཁང་ཕ་གིར་སོང་ལ་འདུག་ཟེར་ནས་དེར་ཕྱིན་པ་དང་། དེར་སློབ་དཔོན་ཝི་རཱུ་པ་དང་མཇལ་ཏེ་དེས་བྲམ་ཟེ་དེ་ལ་སྔགས་དང་བྱིན་གྱིས་རླབས་བྱས་ཏེ་བོར། མཚན་ལ་ཕྲ་མེན་མ་ཀུན་འཚོགས་ནས་མཆོད་པའི་ཡོ་བྱད་ཅི་ཡོད། ཟེར་བ་ལ། ཐམས་ཅད་ཀྱིས་ཤ་སྣའི་ཚོགས་གཞན་ཀུན་ཡོད་དེ་ཤ་ཆེན་མ་རྙེད་ཟེར་བ་དང་། དེའི་ནང་ནས་གཅིག་ན་རེ། ངས་ཤ་ཆེན་གཉིས་ཁུག་ནས་ཡོད་ཟེར་བ་ལ། གཙོ་མོས་ཁྱེར་ལ་ཤོག་ཟེར་ནས་ལེན་པར་བརྩམས་པ་ན། བྲམ་ཟེ་ཕྲུ་གུ་ལ་ཝི་རཱུ་པས་བྱིན་རླབས་མཛད་ཡོད་པས་དེ་འཁོར་མ་ནུས། ལེན་པར་ཡང་ཡང་བཏབ་བས། མཐར་ཝི་རཱུ་ར་ཤིང་མགལ་ཞིག་གི་སྟེང་ན་ཡོད་པ་མཐོང་ནས་ཤིང་དང་བཅས་པ་འཁྱེར་ནས་འོངས་པ་ལ། ཕྲ་མེན་ཀུན་གྱིས་ཕྱག་ཚང་བྱེད་དུ་བྱུང་བ་དང་། ཝི་རཱུ་པས་ཁོ་པའི་ཆང་ཀུན་འཐུང་། ཕྲན་མེན་ཀུན་གྱིས་ཝི་རཱུ་པ་བསད་པར་བྱ་སྙམ་ཐམས་ཅད་ཀྱིས་གད་རྒྱངས་ཀྱི་སྒྲ་བསྒྲགས་པ་དང་། སློབ་དཔོན་གྱིས་ཁྲོ་བོའི་གད་མོ་བཅུ་གཉིས་བགད་པས་ཕྲ་མེན་མ་ཐམས་ཅད་བརྒྱལ་བར་བྱས། ཕྱིས་ཕྲ་མེན་ཐམས་ཅད་དམ་ལ་བཏགས་ནས་ཕྱིན་ཆད་སྐྱབས་འགྲོ་བྱེད་པ་དང་། ང་ལ་དད་པའི་སེམས་ཅན་ལ་གནོད་འཚེ་མ་བྱེད་པར་འདུག་ཅིག །སྐྱབས་འགྲོ་དང་། སེམས་བསྐྱེད་མི་བྱེད་པའི་རིགས་ཀྱི་ལུས་མ་མི་གནོད་པའི་ཁྲག་ཁྱོར་བ་རེ་ཙམ་འཐུངས་ཤིག །བརྒྱ་ལ་དམ་ལས་འདས་ན་འཁོར་ལོ་འདིས་རྐེ་ཆོད་ཅིག །བྱང་གི་གནོད་སྦྱིན་འདིས་ཁྲག་འཐུང་ཤིག་གསུངས། ད་ལྟ་ཡང་གནོད་སྦྱིན་དང་། འཁོར་ལོའི་གཟུགས་ནམ་མཁའ་ལ་ཡོད་དོ།། སྲུང་མའི་འཁོར་དུ་བྱས་ནས་དམ་ལ་བཏགས་ཏེ་སློབ་དཔོན་གཞན་དུ་གཤེགས་སོ། །སླར་ཡང་ཕྱིར་ལོག་ནས་དེ་ཝཱི་ཀོ་ཊར་བྱོན་པ་དང་། ལམ་ཁར་མ་ཧཱ་དེ་ཝ་དང་། ལྷ་མོ་ཨུ་མ་གཉིས་ཀྱིས་སྤྲུལ་པའི་གྲོང་ཁྱེར་འབུམ་ཚོ་ཕྱེད་དང་ལྔ་ལེགས་པར་སྤྲུལ་ནས་ཝིརཱུཔ་ལ་སུམ་ཅུ་རྩ་གསུམ་ལ་སོགས་པ་ལྷའི་གནས་ཐམས་ཅད་ནས་ཞལ་ཟས་བླངས་ཏེ་མཆོད་པ་རྒྱ་ཆེན་པོ་བྱས་སོ།། དེ་ནས་ཚིགས་སུ་བཅད་པ་གསུངས་པ། 

སོ་མ་པུ་རིའི་གཙུག་ལག་ཁང་ཆེན་དུ།། 

རབ་བྱུང་བསྙེན་རྫོགས་འདུལ་ཁྲིམས་ལེགས་པར་བསྐྱངས།།

སྔ་མའི་ལས་འབྲེལ་དབང་གིས་སྤྲུལ་པ་ཡི།། 

དབང་བསྐུར་བྱིན་རླབས་གདམས་པ་ཡང་དག་གནང་།། 

རྣམ་པར་རྟོག་པས་ལོ་ནི་བཅུ་གཉིས་སུ།།

བསྒྲུབས་པས་རྨི་ལྟས་ཙམ་ཡང་མ་བྱུང་ནས།།

ངལ་བའི་སེམས་ཀྱིས་གཤེ་ཞིང་ཕྲེང་བ་བསྐྱུར།།

དེ་ནས་མཁའ་འགྲོ་གསུང་གི་གནང་བ་བྱིན།།

དེ་ཡི་རྐྱེན་གྱིས་ཁམས་ཀྱི་ནུས་པ་བརྟས།།

འཁོར་བའི་མཚན་ཉིད་ཡང་དག་ལེགས་རྟོགས་ཏེ།།

རྟོག་མེད་སྤྱོད་པ་བདག་གིས་སྤྱད་བྱས་ནས།།

ཕལ་ཆེན་སྡེ་པའི་དགེ་འདུན་ཀུན་གྱིས་ཀྱང་།།

འཕྲུལ་བཅས་དག་ཏུ་རྟོགས་ནས་གནས་ནས་ཕྱུང་།།

དེ་དག་ཀུན་གྱི་རྟོག་པ་འཇོམས་སླད་དུ།།

ཆུ་ལ་བྱིང་བ་མེད་པར་བསམ་གཏན་བྱས།།

གངྒཱ་གྱེན་ལ་བསྒྱུར་ནས་སྣ་ཚོགས་ཟོས།།

ཉི་མ་གཏེ་བར་བཅུག་ནས་འདོད་ཡོན་སྤྱད།།

ཕྱི་པའི་ལྷ་རྟེན་བཀས་ནས་ང་རྒྱལ་བཅག།

དེ་ཝཱི་ཀོ་ཊར་ཕྲ་མེན་ཚོགས་རྣམས་བཏུལ།།

མཧཱ་དེ་ཝས་ཡོན་ཏན་མངོན་ཕྱུང་ནས།།

གྲོང་ཁྱེར་སྤྲུལ་ནས་བདག་ལ་བསྙེན་བཀུར་བྱས།།

དེ་ཙམ་སྤྱོད་པ་བདག་གི་མ་སྤྱད་ན།།

མཚན་བཅས་ཆོས་ལ་མོས་པར་ག་ལ་འགྱུར།། ཞེས་གསུངས་ཏེ། ལོ་བདུན་བརྒྱ་ནས་མཁའ་སྤྱོད་དུ་གཤེགས་སོ།། གུ་རུ་ཝི་རཱུ་པའི་ལོ་རྒྱུས་རྫོགས་སོ།།

༤༽ཌོམབྷིཔཱ། 

གུརུཌོམབྷིཔཱའི་ལོ་རྒྱུས་ནི། ཡུལ་མགངྷ་རིགས་རྒྱལ་རིགས། དངོས་གྲུབ་དགྱེས་པ་རྡོ་རྗེ་ལས་བརྙེས་སོ།། དེ་ཡང་བླ་མ་ནག་པོ་སྤྱོད་པས་དབང་བསྐུར། གདམས་ངག་གནང་ནས་དོན་ཉམས་སུ་བླངས་པ་དང་། འབངས་རྣམས་ལ་བུ་གཅིག་པའི་བསམ་པ་བཞིན་དུ་དགོངས་པས། མི་རྣམས་ཀྱིས་རྒྱལ་པོ་ཆོས་ཀྱི་སྒོར་ཞུགས་པ་ནི་མ་ཚོར། རང་གཞན་གྱིས་འབངས་རྣམས་ལ་བྱམས་པར་འདུག་པས། རྒྱལ་པོ་འདི་ནི་ཆོས་པ་འདྲ་བ་ཞིག་འདུག་གོ་ཞེས་འབངས་རྣམས་མཐུན་པར་སྨྲའོ།། དེའི་དུས་རྒྱལ་པོས་བློན་པོ་ལ་སྨྲས་པ། འོ་སྐོལ་གྱི་ཡུལ་འདིར་རྐུན་མོ་དང་འཇིགས་པས་མི་ཀུན་ལ་འཕྲོག་འཇོམས་བྱེད་པ་དང་། རང་གི་བསོད་ནམས་ཀྱི་ལས་འཕྲོས་དབུལ་བ་དང་། ཕོངས་པ་ཤིན་ཏུ་མང་བས། འདི་ཀུན་འཇིགས་པ་དང་། ཕོངས་པ་ལས་བསྐྱབས་པའི་ཕྱིར་མཁར་བའི་ཅོང་ཆེན་པོ་བརྡུངས་ལ་ཤིང་གི་སྡོང་པོ་ཆེན་པོ་ལ་ཐོགས་ལ་ཞོག་ཅིག །གནོད་པ་དང་ཕོངས་པ་མཐོང་ན་ཅོང་དེ་རྡུང་ཤིག །དེ་མ་ཡིན་པར་མ་རྡུངས་ཤིག །ཅེས་རྒྱལ་པོས་བློན་པོ་ལ་སྨྲས་ན། བློན་པོས་ཀྱང་དེ་བཞིན་དུ་བྱས་ཏེ། མ་ག་ངྷ་ར་ཕོངས་པ་དང་འཇིགས་པ་ཐམས་ཅད་རྒྱུན་ཆད་པར་བྱས་སོ།། 

དུས་རེ་ཞིག་ན་རྒྱལ་སར་རིགས་ངན་གྱི་གླུ་མཁན་ཚན་ཅིག་འོངས་ནས་རྒྱལ་པོ་ལ་གླུ་དང་རོལ་མོ་འབུལ་ཅིང་འདུག་པ་དང་། གླུ་མཁན་དེ་ལ་བུ་མོ་ལོ་བཅུ་གཉིས་ལོན་པ་འཇིག་རྟེན་གྱི་ཆོས་ཀྱིས་མ་གོས་པ་བཞིན་སྡུག་ཅིང་མདོག་ལེགས་པ་ལྟ་ན་སྡུག་ཅིང་ཡིད་དུ་འོང་བ་པདྨ་ཅན་གྱི་ཡོན་ཏན་ཐམས་ཅད་ཚང་བ་ཞིག་འདུག་པ་ལ། རྒྱལ་པོས་རིགས་ངན་གླུ་མཁན་དེ་ལ་གསུངས་པ་ཁྱོད་ཀྱི་བུ་མོ་དེ་ང་ལ་བྱིན་ཅིག །དེ་ན་རེ། ཉིད་མགདྷའི་རྒྱལ་པོ་གྲོང་ཁྱེར་འབུམ་ཚོ་བརྒྱད་ལ་དབང་བྱེད་ཅིང་། རྒྱལ་པོའི་འབྱོར་པས་བྲེལ་བ་མེད་པའི་རྒྱལ་པོ་ཆེན་པོ་ལགས་ན། དངོས་ཅག་རིགས་དམན་ཞིང་སྐྱེ་བོའི་ཚོགས་ཐམས་ཅད་ཀྱིས་སྨད་ཅིང་སྤང་བར་བྱ་བ་ལགས་ན། དེ་འདྲའི་བཀའ་སྩལ་གྱི་གནས་མ་ལགས་སོ།། ཞེས་ཞུས་པ་དང་། རྒྱལ་པོས་གལ་གྱིས་བཅུན་ནས་རྒྱལ་པོས་བུ་མོ་དང་མཉམ་པའི་གསེར་བགར་ནས་ཕ་མ་ལ་བྱིན་ཏེ་བུ་མོ་རྒྱལ་པོས་ཁྱེར་རོ།།

དེ་ནས་ལོ་བཅུ་གཉིས་ཀྱི་བར་ཕྱག་རྒྱར་བསྟེན་པ་མིས་མ་ཚོར་བ་ལ་ལོ་བཅུ་གཉིས་ནས་ཚོར་ཏེ། རྒྱལ་པོས་རིགས་ངན་མ་བླངས་སོ།། ཞེས་མ་ག་དྷའི་ཕྱོགས་ཐམས་ཅད་དུ་བསྒྲགས་པ་དང་། རྒྱལ་པོས་སྲས་ལ་སོགས་པ་ལ་རྒྱལ་སྲས་གཏད་ནས་རིགས་ངན་མ་དང་གཉིས་ནགས་གསེབ་ཏུ་བསྒྲུབས་པ་ལ་ལོ་བཅུ་གཉིས་ལོན་པ་དང་། སྲས་དང་འབངས་རྣམས་ཀྱིས་རྒྱལ་སྲིད་མ་ཟིན་པར་ཡུལ་ཁམས་སྔར་བས་བསོད་ནམས་འགྲིབ་པ་ལ། མི་ཀུན་གྱིས་གྲོས་བྱས་ཏེ་སྔར་གྱི་རྒྱལ་པོ་ཉིད་བཙལ་ལ་རྒྱལ་སྲིད་བྱེད་དགོས་ཟེར་ནས། མི་འགའ་བལྟར་བཏང་བས་དེའི་བཞུགས་སར་ཕྱིན་ནས་བལྟས་པ་དང་། རྒྱལ་པོ་ནི་ཤིང་སྡོང་གཅིག་གི་དྲུང་ན་བཞུགས། བུ་མོ་ཆུ་ལེན་དུ་སོང་བ་ན་མཚོའི་ཁ་ལ་པདྨའི་འདབ་མའི་སྟེང་ན་ཆུ་ལ་མི་ནུབ་པར་ཕྱིན་ནས། ཆུ་འདོམ་བཅོ་ལྔ་ཙམ་གྱི་འོག་ནས་ཆུ་བླངས་ཏེ་རྒྱལ་པོ་ལ་དྲངས་པ་དང་། མི་དེ་ཀུན་ངོ་མཚར་སྐྱེས་ནས་ཡུལ་དུ་ལོག་སྟེ་དེའི་གཏམ་བྱས་སོ།། དེ་ནས་རྒྱལ་འབངས་ཀུན་གྱིས་རྒྱལ་པོ་སྤྱན་འདྲེན་པར་བཏང་ནས་སྤྱན་དྲངས་པས། ནགས་ནས་ཡབ་ཡུམ་གཉིས་སྟག་མོ་གྲུས་མ་ལ་ཞོན། དུག་སྦྲུལ་ལ་ལྕག་བྱས་ཏེ་འོངས་པས་མི་ཀུན་ངོ་མཚར་སྐྱེས་ནས་ཉིད་ཀྱིས་རྒྱལ་སྲིད་བཟུང་ན་ཟིན་པས་གཟུང་འཚལ་ཅེས་ཞུས་པས། རྒྱལ་པོ་ན་རེ། ང་རིགས་ངན་ཡིན་པས་རྒྱལ་སྲིད་བྱེད་དུ་ག་ལ་རུང་། འོན་ཀྱང་ཤི་ཕན་ཆད་རིགས་བཟང་ངན་གྱི་རྟོག་པ་ཆད་པ་ཡིན་པས། མེར་སྲེགས་ཤིག་དང་། དེ་ནས་སྐྱེས་པ་དང་གཟོད་བྱ་ཟེར། དེ་ནས་ཡུལ་མི་རྣམས་ཀྱིས་ཙནྡན་གོ་ཤཱིརྵའི་ཤིང་གིས་ཡབ་ཡུམ་གཉིས་བསྲེགས། ཤིང་མངས་ནས་ཞག་བདུན་མེ་མ་ཤི་བ་དང་། དེ་ནས་བལྟས་ཙམ་ན། པདྨའི་སྡོང་པོའི་གོང་བུ་ཁ་བྱེ་བའི་ནང་ན་ཡབ་ཡུམ་གཉིས་རང་བྱུང་གི་སྐུར་གྱུར་ནས་ཟིལ་པ་ཕྲོམ་མེར་དགྱེས་རྡོར་ཡབ་ཡུམ་དུ་གྱུར་པ་མཐོང་བས། མ་ག་དྷའི་མི་ཐམས་ཅད་དད་ནས་མིང་དུ་ཡང་སློབ་དཔོན་ཌོཾ་བི་པ་ཞེས་གྲགས་སོ།། 

དེ་ནས་རྒྱལ་པོས་བློན་པོ་ལ་སོགས་པ་ཐམས་ཅད་ལ་སྨྲས་པ། ཁྱེད་ཅག་ཐམས་ཅད་ཀྱི་ང་བཞིན་བྱེད་ནུས་ན་རྒྱལ་སྲིད་བྱེད། དེ་ལྟར་མི་ནུས་ན་མི་བྱེད་གསུངས་པས། ཐམས་ཅད་ཧ་ལས་ནས་འདི་འདྲ་བ་ག་ལ་ནུས། ཟེར་ནས་འདུག་གོ །སླར་ཡང་རྒྱལ་པོས་གསུངས་པ། རྒྱལ་སྲིད་ནི་མནོག་ཆུང་ལ་ཉེས་དམིགས་ཆེ་བར་འདུག་པས་ང་ནི་ཆོས་ཀྱི་རྒྱལ་སྲིད་བྱེད་པ་ཡིན། གསུངས་ནས་དེ་ཉིད་ནས་མཁའ་སྤྱོད་ཀྱི་གནས་སུ་འགྲོ་བའི་དོན་ལ་གཤེགས་སོ།། གུརུཌོཾབིཔཱའི་ལོ་རྒྱུས་རྫོགས་སོ།། །།

༥༽གུརུཤཝརིཔཱ།

གུརུཤབརིཔཱའི་ལོ་རྒྱུས་ནི། རིམནྟྭཝིཀྲམ། ཞེས་བྱ་བའི་རི་ལ་དཔལ་ཤ་ཝ་རི་པཱ་ཞེས་པའི་རྔོན་པ་ཞིག་ཡོད་པ་ལ། དེའི་ལས་སུ་སྲོག་ཆགས་མང་པོ་བསད་ཅིང་ཟས་སུ་ཤ་ཟ། དུས་རྟག་ཏུ་འཚོ་བའི་ཕྱིར་སེམས་ཅན་མང་པོ་ལ་གནོད་ཅིང་འཚེ་བའི་སྡིག་པ་འབའ་ཞིག་བྱེད་པ་དེ་ལ། འཕགས་པ་སྤྱན་རས་གཟིགས་ཀྱིས་གཟིགས་ནས་སྙིང་རྗེ་སྐྱེས་ཏེ། དེ་འདུལ་བའི་དོན་དུ་ཤ་ཝ་རི་པཱ་འདྲ་བའི་རྔོན་པ་ཞིག་ཏུ་སྤྲུལ་ནས་དེའི་གན་དུ་ཕྱིན་པ་དང་། ཤ་ཝ་རི་པཱས་དྲིས་པ་ཁྱོད་སུ་ཡིན། དེས་སྨྲས་པ་ང་ཡང་ཤ་ཝ་རི་པཱ་ཡིན་བྱས་པས། ཁྱོད་ཀྱི་ཡུལ་གང་ནས་ཡིན། ཟེར་བ་ལ། ཐག་རིང་པོ་ན་ཡོད་ཅེས་སྨྲས་སོ།། ཤ་ཝ་རི་པཱས་སྨྲས་པ། ཁྱོད་ཀྱི་མདའ་གཅིག་གི་ཤ་ཝ་དུ་སོད་དྲིས་པས། སྤྲུལ་པས་སྨྲས་པ། སུམ་བརྒྱ་གསོད་བྱས་པས། ཤ་ཝ་རི་པཱ་ན་རེ། འོ་ན་མདའ་དེ་འདྲ་བ་ང་ལ་ཡང་སློབས་ཤིག་ཟེར་བ་ལ། ནངས་པར་སྤྲུལ་པ་དེས་ཤ་ཝ་རི་པཱ་ཁྲིད་དེ་ཐང་ཆེན་པོ་ཞིག་ལ་ཕྱིན་ནས་སྤྲུལ་པའི་ཤ་ཝ་ལྔ་བརྒྱ་ཙམ་བསྟན་ནས། དེ་ཤ་ཝ་རི་པཱས་མཐོང་བ་དང་། སྤྲུལ་པ་ལ་དྲིས་པ། ཁྱོད་ཀྱི་མདས་ཤ་ཝ་དུ་སོད། དེས་སྨྲས་པ། ལྔ་བརྒྱ་པོ་ཐམས་ཅད་སོད། ཤ་ཝ་རི་པཱ་ན་རེ། བཞི་བརྒྱ་བོར་ལ་བརྒྱ་སོད་བྱས་པས། འཕགས་པའི་སྤྲུལ་པས་ཤ་ཝ་བརྒྱ་མདའ་གཅིག་གིས་བསད་ནས། ཤ་ཝའི་རོ་གཅིག་ཤ་ཝ་རི་པཱ་ལ་བསྐུར་བས། དེ་མ་ཐག་པར་ཤ་ཝ་རི་པཱ་ང་རྒྱལ་ཆག་སྟེ། ཁྱིམ་དུ་འོང་ནས་སྤྲུལ་པ་ལ་སྨྲས་པ། དེ་འདྲ་བའི་འཕོང་གི་སྟོབས་དེ་བདག་ལ་སློབས་བྱས་པ་དང་། སྤྲུལ་པས་སྨྲས་པ། དེ་སློབ་པ་ལ་ཟླ་བ་གཅིག་ཤ་མི་ཟ་བ་ཞིག་དགོས་བྱས་པས། དེ་ནས་ཤ་ཝ་རི་པཱས་སེམས་ཅན་ལ་གནོད་འཚེ་སྤངས་སོ།། སྤྲུལ་པས་ཞག་བདུན་ནས་དེའི་གམ་དུ་ཕྱིན་ནས་སྨྲས་པ། ཁྱེད་ཅག་ཞིག་ཅི་ཟོས། དེ་ན་རེ། ཤིང་ཐོག་ཟོས་ཟེར་རོ། །དེ་ནས་སྤྲུལ་པས་སྨྲས་པ། ད་ཁྱེད་ཅག་གི་སེམས་ཅན་ལ་བྱམས་པ་དང་སྙིང་རྗེ་སྒོམས་ཤིག་བྱས་ནས། སྤྲུལ་པ་ཕྱིན་ཏོ།། ཟླ་བ་གཅིག་པོ་ན་དེར་གཤེགས་པ་དང་། ཤ་ཝ་རི་པཱ་ན་རེ། ད་ཤ་བ་གཤོར་བའི་ཆོས་ཤོད་ཟེར་བ་ལ། སྤྲུལ་པས་དེར་མཎྜལ་ཞིག་མཛད་ནས་མེ་ཏོག་བཀྲམ་སྟེ། ཤ་ཝ་རི་པཱ་བཟའ་མི་གཉིས་ལ་ལྟོས་ཤིག་དང་གསུངས། དེ་གཉིས་ཀྱིས་བལྟས་པ་དང་། སྤྲུལ་པས་དེ་གཉིས་ལ་ཅི་མཐོང་དྲིས་པའི། དེ་གཉིས་ཀྱི་མཎྜལ་གྱི་ནང་དུ་དམྱལ་བ་ཆེན་པོ་བརྒྱད་དང་། ཁོ་རང་གཉིས་ཀྱང་དེར་འཚེད་པ་མཐོང་བས། འཇིགས་ཤིང་སྐྲག་ལ་དངངས་ཤིང་འདར་ནས་སྐད་མ་ཐོན་པ་ན། སྤྲུལ་པས་ཡང་དང་ཡང་དུ་དྲིས་པས། སེམས་ཅན་དམྱལ་བ་འདི་འདྲ་བ་གདའ་ཞུས་པས། སྤྲུལ་པས་ཁྱེད་དེར་སྐྱེ་བ་ལ་མི་འཇིགས་སམ་གསུངས་པས། དེ་དག་ན་རེ། འཇིགས་ལགས་ཏེ། དེ་ལས་ཐར་པའི་ཐབས་མཆིས་ལགས་སམ་ཞུས་པས། དེ་ཡོད་དེ་ཁྱེད་ཀྱིས་སྒྲུབ་ནུས་སམ་གསུངས་པས། ནུས་ཟེར་དེ་ནས་སྤྲུལ་པས་ཤ་ཝ་རི་པཱ་བཟའ་མི་གཉིས་ལ་ཆོས་བཤད་དེ། སྲོག་བཅད་པའི་རྣམ་པར་སྨིན་པས་ནི་སེམས་ཅན་དམྱལ་བར་སྐྱེ་བ་ཡིན་ལ། དེའི་བྱེད་པ་རྒྱུ་མཐུན་ནི་སྲོག་གཅོད་སྙིང་འདོད་པ་ཡིན་ཅིང་། དབང་གི་འབྲས་བུ་ནི་ཚེ་ཐུང་བ་ཡིན་ལ། སྐྱེས་བུ་བྱེད་པའི་འབྲས་བུ་ནི་གཟི་བརྗིད་ངན་པ་ཡིན་ནོ། །སྲོག་གཅོད་པའི་ལས་སྤངས་པས་བྱང་ཆུབ་ཐོབ་པ་ཡིན་ལ། བྱེད་པ་རྒྱུ་མཐུན་ནི་སྲོག་གཅོད་སྙིང་མི་འདོད་པ་དང་། དབང་གི་འབྲས་བུ་ཚེ་རིང་བ་ཡིན་ལ། སྐྱེས་བུ་བྱེད་པའི་འབྲས་བུ་ནི་གཟི་བརྗིད་དང་ལྡན་པ་ཡིན་ནོ། །ཞེས་སོགས་མི་དགེ་བ་བཅུའི་ཉེས་དམིགས་དང་། དགེ་བ་བཅུའི་ཕན་ཡོན་བཤད་པས་ཤ་ཝ་ར་པཱ་འཁོར་བ་ལ་སྐྱོ་བ་སྐྱེས་ནས་ཆོས་ལ་མི་ཕྱེད་པའི་དད་པ་བརྟན་པོ་ཐོབ་པར་གྱུར་ཏོ།། 

དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་གདམས་ངག་གནང་ནས་རི་བོ་དནྟིར་གཤེགས་པ་དང་། ཤ་ཝ་རི་པཱས་ལོ་བཅུ་གཉིས་སུ་རྣམ་པར་མི་རྟོག་པའི་སྙིང་རྗེ་ཆེན་པོ་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས། སྙིང་རྗེ་ཆེན་པོས་ཆོས་ཉིད་ལས་ལངས་ཏེ། འཕགས་པའི་སྤྱན་ལམ་དུ་ཕྱིན་པ་དང་། འཕགས་པ་ཤ་ཝ་རི་པཱ་ལ་ཡོན་ཏན་གྱི་བསྔགས་པ་དུ་མ་བརྗོད་ནས། རིགས་ཀྱི་བུ། རྩའི་མེ་ཤི་བ་དང་འདྲ་བའི་ཕྱོགས་གཅིག་པའི་མྱ་ངན་ལས་འདས་པ་ནི་མཆོག་མ་ཡིན་ལ། ཁྱོད་ཀྱིས་སེམས་ཅན་གྱི་དོན་དུ་འཁོར་བར་འདུག་ལ་སེམས་ཅན་བསམ་གྱིས་མི་ཁྱབ་པའི་དོན་གྱིས་ཤིག་ཅེས་གསུངས་པས་ཤ་ཝ་རི་པཱ་རང་གི་ཡུལ་དུ་བྱོན་ནས་བཞུགས་སོ།། མཚན་དུ་དཔལ་ཤ་ཝ་རི་པཱ་ཞེས་པའམ། རྨ་བྱའི་གཤོག་པ་གྱོན་ནས་འདུག་པས་རྨ་བྱའི་གོས་ཅན་ཞེས་པའམ། དུས་རྟག་ཏུ་རི་ལ་བཞུགས་པས་རི་ཁྲོད་མགོན་པོ་ཞེས་ཀྱང་ཟེར་ཏེ་མཚན་གསུམ་དུ་གྲགས་སོ།།

སྐལ་པ་དང་ལྡན་པ་རྣམས་ལ་བརྡའ་དང་། མགུར་ལ་སོགས་པས་དོན་མཛད་དེ། བྱམས་པའི་བསྟན་པ་མ་ཤར་གྱི་བར་དུ་སྐུ་འདི་ཉིད་ཀྱིས་འཛམ་བུའི་གླིང་འདིར་བཞུགས་སོ།། གུརུཤཝརིཔཱའི་ལོ་རྒྱུས་རྫོགས་སོ།།

༦༽གུརུསརཧཔཱ། 

གུརུསརཧཔཱ་ཡི་ལོ་རྒྱུས་ནི། རིགས་བྲམ་ཟེ། ཡུལ་རྒྱ་གར་ཤར་ཕྱོགས་ཀྱི་གྲོང་ཁྱེར་རཱ་ཛཱི་ཞེས་བྱ་བའི་བྱེ་བྲག །ས་རོ་ལི་ཞེས་བྱ་བ་ཡིན་ལ། མཁའ་འགྲོ་མའི་སྲས་ཡིན་པས། མཁའ་འགྲོ་ཉིད་ཡིན་ནོ། །འདི་བྲམ་ཟེ་ཡིན་ཡང་སངས་རྒྱས་པའི་ཆོས་ལ་དད་ནས་སློབ་དཔོན་དཔག་ཏུ་མེད་པ་ལ་ཆོས་མཉན་པས་གསང་སྔགས་ཀྱི་ཆོས་ལ་ཡིད་ཆེས་ནས། བྲམ་ཟེ་དང་སངས་རྒྱས་པ་གཉིས་ཀའི་སྡོམ་པ་བསྲུང་བ་ལ། ཉིན་བྲམ་ཟེའི་ཆོས་ལུགས་བྱེད། མཚན་སངས་རྒྱས་པའི་ཆོས་ལུགས་སུ་བྱེད་ཅིང་། ཆང་ཡང་གསོལ་བས་ན་བྲམ་ཟེ་ཀུན་གྱིས་ཚོར་ནས། དེ་བསྐྲད་པའི་ཕྱིར་བྲམ་ཟེ་ཐམས་ཅད་འདུ་ནས། རྒྱལ་པོ་རཏྣ་པཱ་ལ་ལ་ཞུས་པ། ཁྱེད་རྒྱལ་པོ་ཡིན་ན་ཡུལ་དུ་ཆོས་ལུགས་འཆོལ་བ་བྱེད་དུ་འཇུག་པ་རིགས་སམ། ས་ར་ཧ་འདི་ཡུལ་ས་རོ་ལིའི་གྲོང་ཁྱེར་ཁྲི་ཚོ་ཕྱེད་གཉིས་ཀྱི་གཙོ་བོ་ཡིན་པ་ལ། ཆང་འཐུངས་ནས་རིགས་ཉམས་པར་བྱས་པ་ཡིན་པས་སྐྲོད་ཅིག་བྱས་པས། རྒྱལ་པོས་སྨྲས་པ། ཁྲི་ཚོ་ཕྱེད་དང་གཉིས་ལ་དབང་བྱེད་པ་འདི་སྐྲོད་དུ་མི་འདོད་ཟེར་ནས། རྒྱལ་པོས་ས་ར་ཧའི་གན་དུ་བྱོན་ནས་སྨྲས་པ། ཁྱེད་བྲམ་ཟེ་ཡིན་པ་ལ་ཆང་འཐུང་པ་འདི་མ་ལེགས་སོ་བྱས་པས། ས་ར་ཧ་ན་རེ། ངས་ཆང་འཐུངས་བ་མེད། འོན་ཀྱང་མནའ་འདོར་བ་ཡིན་པས། བྲམ་ཟེ་ཀུན་དང་། མི་ཐམས་ཅད་བསྡུས་ཤིག་ཟེར་དེ་ནས་ཐམས་ཅད་བསྡུས་པ་དང་། ས་ར་ཧ་པཱས་ངས་ཆང་འཐུངས་ལ་ལག་པ་ཚིག་ལ། མ་འཐུངས་ན་མ་ཚིག་ཅེས་ཟེར་ནས་མར་ཁུ་ཁོལ་མའི་ནང་དུ་ལག་པ་བཅུག་པས་མ་ཚིག་པ་དང་། རྒྱལ་པོས་ཆང་འཐུངས་པ་དེ་བདེན་ནམ་བྱས་པས། བྲམ་ཟེ་ཀུན་ན་རེ། བདེན་ཏེ་འཐུངས་ཟེར། ཡང་སྔར་བཞིན་སྨྲས་ནས་ཟངས་ཞུན་འཐུངས་པས་མ་ཚིག་པ་དང་། ཡང་འཐུངས་ཟེར། འོ་ན་ཆུའི་ནང་དུ་ཞུགས་དང་། གང་ནུབ་ནས་འདུག་པ་དེས་འཐུངས་པ་ཡིན་ལ། མ་ནུབ་པ་དེས་འཐུངས་པ་མ་ཡིན་ནོ་ཞེས་སྨྲས་ནས། བྲམ་ཟེ་གཞན་ཞིག་དང་གཉིས་ཆུའི་ནང་དུ་ཞུགས་པ་ན་ས་ར་ཧ་མ་ནུབ། གཅིག་ཤོས་ནུབ་པ་དང་། ས་ར་ཧ་པཱས་ངས་མ་འཐུངས་ཟེར་རོ། །ཡང་སྲང་ལ་བསྒོར། གང་ལྕི་བས་མ་འཐུངས་པ་ཡིན་ལ། ཡང་བ་དེས་འཐུང་བ་ཡིན་ནོ། །ཞེས་སྨྲས་ནས། དེ་བཞིན་བྱས་པས་ས་ར་ཧ་པཱ་ལྕི་ནས་ངས་མ་འཐུང་ཟེར་རོ། །དེ་བཞིན་དུ་མི་དང་ལྗིད་མཉམ་པའི་ལྕགས་ཀྱི་རྡོག་གསུམ་དང་བཀར་ས་ཀྱང་ས་ར་ཧ་ལྕི་བ་དང་། དྲུག་ལས་ཀྱང་ས་ར་ཧ་ལྕི་ན། རྒྱལ་པོས་སྨྲས་པ། ཁོ་འདྲ་བའི་ནུས་པ་ཡོད་ན་ཆང་འཐུང་ན་ཡང་འཐུང་ཤིག་ཅེས་སྨྲས་པས། བྲམ་ཟེ་ཐམས་ཅད་དང་། རྒྱལ་པོས་ཀྱང་ཕྱག་བྱས་གདམས་ངག་ཞུས་པས། རྒྱལ་པོ་དང་བཙུན་མོ་དང་། འབངས་ཐམས་ཅད་ལ་མགུར་གསུངས་པས་དོ་ཧ་སྐོར་གསུམ་དུ་གྲགས་སོ།།

བྲམ་ཟེ་རྣམས་ཀྱིས་རང་གི་ཆོས་ལུགས་སྤངས་ཏེ་སངས་རྒྱས་ཀྱི་བསྟན་པ་ལ་ཞུགས་ཤིང་། རྒྱལ་པོ་འཁོར་དང་བཅས་པས་ཀྱང་གྲུབ་པ་ཐོབ་བོ། །དེ་ནས་ས་ཧས་བྱན་མོ་ལོ་བཅོ་ལྔ་ལོན་པ་ཞིག་ཡོད་པ་ཁྲིད་ནས་ཡུལ་གཞན་དུ་ཕྱིན་པ་དང་། དགོན་པ་ཞིག་ཏུ་འདུག་ནས་ཁྱོས་སྒྲུབ་པ་བྱེད། ཆུང་མས་བྱན་བླངས་ཀྱིན་བསྐྱལ་ལོ། །ཐེངས་གཅིག་ལ་ཕུག་གི་ཚོད་མ་ཟ་ཟེར་ནས་ཆུང་མས་མ་ཧེའི་ཞོ་དང་ལ་ཕུག་སྦྱར་ནས་འདྲེན་དུ་ཕྱིན་པ་དང་། སློབ་དཔོན་ཏིང་ངེ་ལ་བཞུགས་འདུག་པས་མ་བླངས་ལོག་དེ་ནས་ས་ར་ཧ་པས་ལོ་བཅུ་གཉིས་ཀྱི་བར་དུ་ཏིང་ངེ་འཛིན་ལས་མ་བཞེངས། དེ་ནས་བཞེངས་པ་དང་། ཆུང་མ་ལ་ལ་ཕུག་གི་ཚོད་མ་ག་རེ། བྱས་པས། བྱན་མོ་ན་རེ། ཁྱོད་ལོ་བཅུ་གཉིས་སུ་ཏིང་ངེ་འཛིན་ལས་མ་བཞེངས་པས་ད་ལྟ་ག་ན་ཡོད། ད་ནི་དཔྱིད་ཀྱི་དུས་སུ་སོང་ནས་མེད་དོ་ཞེས་སྨྲས་པ་དང་། དེར་ས་ར་ཧས། ཆུང་མ་ལ། ང་རི་ལ་སྒྲུབ་པ་ལ་འགྲོ་བ་ཡིན་སྨྲས་པས། ཆུང་མ་ན་རེ། ལུས་དབེན་པ་ནི་དབེན་པ་མ་ལགས། སེམས་མཚན་མ་དང་རྣམ་པར་རྟོག་པས་དབེན་པ་ནི་དབེན་པའི་མཆོག་ལགས་ཏེ། ཁྱོད་ཀྱིས་ལོ་བཅུ་གཉིས་སུ་ཏིང་ངེ་འཛིན་ལ་བཞུགས་ཀྱང་། མཚན་མ་ཕྲ་མོ་ལ་ཕུག་གི་རྟོག་པ་མ་ཆོད་ན་རི་ཁར་ཕྱིན་པས་ཅི་ལ་ཕན་སྨྲས་པས། ས་ར་ཧ་པས་དེ་བདེན་དགོངས་ཏེ། མཚན་མ་དང་རྣམ་པར་རྟོག་པ་སྤངས་ཏེ། གཉུག་མའི་དོན་ཉམས་སུ་བླངས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་འགྲོ་དོན་དཔག་ཏུ་མེད་པ་མཛད། མཐར་ཆུང་མ་དང་གཉིས་ཀ་མཁའ་སྤྱོད་དུ་གཤེགས་སོ།། གུ་རུ་ས་ར་ཧ་པའི་ལོ་རྒྱུས་རྫོགས་སོ།།

༧༽ཀཾཀརིཔཱ།

གུརུཀཾཀརི་པཱའི་ལོ་རྒྱུས་ནི། ཡུལ་མཱགྷཧཱར་རིགས་དམངས་རིགས་སོ། །དེ་ཡང་ཡུལ་མཱ་གྷཱ་ཧ་རའི་ཁྱིམ་བདག་ཞིག་གིས་རང་གི་རིགས་དང་མཉམ་པའི་ཆུང་མ་བླངས་ནས། ཁྱིམ་དུ་འདོད་པའི་ཡོན་ཏན་གྱི་རོ་ཉམས་སུ་མྱོང་བར་བྱེད་ཀྱིན་འདུག་ལ། ཐར་པའི་ལམ་དགེ་བའི་ཆོས་ལ་ནི་བློ་བག་ཙམ་ཡང་མ་ཞུགས་པར་འཇིག་རྟེན་འདི་འབའ་ཞིག་དོན་དུ་གཤེར་ཞིང་འདུག་པའི་ཚེ། དེའི་ཆུང་མ་ལ་འདུས་བྱས་ཀྱི་ལས་ཀྱི་སླེབས་ནས་ཤི་བར་གྱུར་པ་དང་། དེས་ཆུང་མའི་རོ་དུར་ཁྲོད་དུ་བསྐྱལ་ནས་རོ་བློས་གཏོང་མ་ནུས་པར་རོའི་རྩར་ངུ་ཡིན་འདུག་གོ། དེའི་གམ་དུ་ལེགས་པར་རྟོགས་པའི་རྣལ་འབྱོར་པ་ཞིག་བྱོན་ནས། ཁྱིམ་བདག་དེ་ལ། ཁྱོད་དུར་ཁྲོད་འདི་ན་ཅི་བྱེད་ཀྱིན་འདུག་ཅེས་སྨྲས་པ་དང་། ཁྱིམ་བདག་ན་རེ། རྣལ་འབྱོར་པ། བདག་གི་སྐྱིད་སྡུག་འདི་ཉིད་ཀྱིས་མ་གཟིགས་སམ། མིག་བཏོན་པའི་ལོང་བ་ཁྱིམ་ཐབ་དང་བྲལ་བའི་དཔལ་ཟད་པ་འཇིག་རྟེན་ན་བདག་ལས་སྡུག་པ་དང་། ཉོན་མོངས་པ་སུ་མཆིས། ཞེས་ཞུས་པ་དང་། རྣལ་འབྱོར་པས་ཁྱིམ་བདག་ལ་སྨྲས་པ། སྐྱེས་པའི་མཐའ་འཆི་བ། འདུས་པའི་མཐའ་འབྲལ་བ། འདུས་བྱས་ཐམས་ཅད་ནི་མི་རྟག་པ་ཡིན། འཁོར་བས་སོང་བ་ཐམས་ཅད་ནི་སྡུག་བསྔལ་བ་ཡིན་པས། འཁོར་བ་སྡུག་བསྔལ་གྱི་རང་བཞིན་ལ་ཁྱོད་མི་སྐྱོ་འམ་ཁྱོད་མི་རོ་ས་རྡོ་འདྲ་བ་ཞིག་བསྲུངས་ནས་ཅི་བྱེད་དེ་བས་ཁྱོད་རང་ཆོས་གྱིས་ལ་སྡུག་བསྔལ་སྤོངས་བྱས་པས། རྣལ་འབྱོར་པ། འཁོར་བ་སྐྱེ་འཆིའི་སྡུག་བསྔལ་ལས་ཐར་པའི་ཐབས་ཡོད་ན་སྩོལ་ཅིག་ཟེར་བ་ལ། རྣལ་འབྱོར་པས་དེ་ལས་ཐར་པའི་ཐབས་བླ་མའི་མན་ངག་ཡོད་བྱས་པས། ཁྱིམ་བདག་གིས་དེ་བདག་ལ་གནང་བར་ཞུས། ཟེར་ནས། རྣལ་འབྱོར་པས་དེ་ལ་དབང་བསྐུར་ཏེ། བདག་མེད་ཐིག་ལེའི་གདམས་ངག་བྱིན་པ་དང་། ཁྱིམ་བདག་ན་རེ། ཇི་ལྟར་བསྒོམ། ཟེར་བ་ལ། རྣལ་འབྱོར་པས་ཤི་བའི་ཆུང་མའི་རྣམ་པར་རྟོག་པ་སྤོངས་ལ། བདག་མེད་པའི་ཆུང་མ་བདེ་བ་དང་སྟོང་པ་གཉིས་སུ་མེད་པར་སྒོམས་ཤིག་བྱས་ནས་སྒོམ་དུ་བཅུག་པས། ལོ་དྲུག་ན་ཐ་མལ་པའི་ཆུང་མའི་རྣམ་རྟོག་བདེ་བ་དང་སྟོང་བའི་ངང་དུ་སྟོར་ནས། དེའི་སེམས་ཀྱི་དྲི་མ་དག་སྟེ། བདེ་ཆེན་འོད་གསལ་གྱི་རྟོག་པའི་ཉམས་སྐྱེས་པ་དང་། ཁྱིམ་བདག་དེས་དཔེར་ན་ལང་ཏང་གི་དུག་དྭངས་པས་འཁྲུལ་པ་སངས་པ་ལྟར། མ་རིག་འཁྲུལ་པའི་དུག་དྭངས་པས་ཕྱིན་ཅི་མ་ལོག་པའི་བདེན་པའི་དོན་མཐོང་སྟེ་དངོས་གྲུབ་ཐོབ། མིང་ཡང་རྣལ་འབྱོར་པ་ཀཾ་ཀ་རི་པཱ་ཞེས་བྱ་བར་ཕྱོགས་མཚམས་ཐམས་ཅད་གྲགས་སོ།། རང་གི་ཡུལ་མཱ་གྷ་ཧཱ་རར་སྐྱེ་འགྲོ་དུ་མ་ལ་ཆོས་བསྟན་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀཾཀརིཔཱའི་ལོ་རྒྱུས་རྫོགས་སོ།།

༨༽མཱིན་པཱ། 

གུརུམཱིནཔཱའི་ལོ་རྒྱུས་ནི། ཡུལ་རྒྱ་གར་ཤར་ཕྱོགས། རིགས་ཉ་པ། བླ་མ་མཧཱ་དེ་ཝ། དངོས་གྲུབ་འཇིག་རྟེན་པའི་དངོས་གྲུབ་ཐོབ་བོ།། དེ་ཡང་རྒྱ་གར་ཤར་ཕྱོགས་ཀཱམརཱུཔའི་ཕ་ཚན་ན་རྒྱ་མཚོ་ཨིཏ་སཱིཏ་བྱ་བ་ན། ཉ་པ་ཀུན་ཉ་གཤོར་ནས་དུས་རྟག་ཏུ་ཚོང་འདུས་སུ་འཚོང་བ་ཡིན་ན། ཉིན་གཅིག་ཉ་པ་གཅིག་གིས་རས་བལ་གྱི་སྲད་བུ་ལ་ལྕགས་ཀྱུ་བཏགས་ནས་དེའི་རྩེ་མོར་ཤ་དང་བཅས་ཏེ་ཆུར་བསྐྱུར་པ་དང་། ཉ་ཆེན་པོ་ཞིག་ཟིན་པས་འཐེན་པ་དང་། ཉས་ཕར་དྲུད་དེ་ཉ་པ་རྒྱ་མཚོར་ནུབ། དེར་ཉ་པ་དེ་ཉ་ཆེན་པོ་ཞིག་གིས་མིད་པ་ལ་ལས་ཀྱི་དབང་གིས་མ་ཤི་བར་ཡོད་པ་ན། དེའི་དུས་སུ་དབང་ཕྱུག་ཆེན་པོ་ལ་ལྷ་མོ་ཨུ་མས་ཆོས་ཞུས་པས། དབང་ཕྱུག་ཆེན་པོ་ན་རེ། ངའི་ཆོས་འདི་གང་རུང་རུང་ལ་བཤད་པ་མ་ཡིན་གྱི་ཤིན་ཏུ་གསང་བ་ཡིན་པས། རྒྱ་མཚོའི་ནང་དུ་ཁང་པ་བརྩེགས་ཤིག་དེར་བཤད་དོ་ཟེར་ནས་དེ་བཞིན་བྱས་སོ། །དེའི་ནང་དུ་ལྷ་མོ་ཨུ་མ་ལ་ཆོས་བཤད་པ་ན། དེའི་དུས་སུ་ཁང་པའི་འོག་ཏུ་ཉ་དེ་འོངས་པ་ལ། ཆོས་ཀྱི་འཕྲོ་ལ་ལྷ་མོ་གཉིད་ལོག་པ་དང་དུས་མཚུངས་ནས། དབང་ཕྱུག་ཆེན་པོས་ལྷ་མོ་ཨུ་མ་ལ་གོའམ་བྱས་པས། ཉ་པས་གོ་ལག་བྱས་ཀྱིན་ཆོས་ཉན་པ་དང་། ཆོས་ཐོན་པ་དང་ལྷ་མོ་གཉིད་སད་དེ། ཆོས་ཤོད་བྱས་པས། དབང་ཕྱུག་ཆེན་པོ་ན་རེ། ངས་ཆོས་བཤད་ཟིན་བྱས་པས། ལྷ་མོ་ན་རེ། དངོས་ཀྱིས་ཆོས་འདི་ཙམ་བར་དུ་ཐོས། དེ་ནས་གཉིད་ཀྱིས་མྱོས་ནས་མ་ཐོས་བྱས་པ་ལ། དབང་ཕྱུག་ཆེན་པོས་འོ་ན་ཐོས་ལགས་ཟེར་བ་དེ་སུ་ཡིན་ཟེར་བ་ལ། ལྷ་མོས་དེ་སྐད་ཟེར་བ་དེ་བདག་མིན་སྨྲས་པས། དབང་ཕྱུག་ཆེན་པོས་མངོན་ཤེས་ཀྱིས་གཟིགས་པས། ཁང་པའི་འོག་གི་ཉའི་ལྟོ་བ་ན་མི་ཞིག་འདུག་པས་དེས་ཆོས་ཉན་པར་མཐོང་ནས། དེའི་བསམ་པ་ལ་འདི་ངའི་སློབ་མར་སོང་བས་དམ་ཚིག་གཅིག་ཡིན་སྙམ་དུ་དགོངས་ནས། དེར་ཉ་པ་ལ་དབང་བསྐུར་ཆོས་བཤད་ནས་ཉ་པ་དེས་ལོ་བཅུ་གཉིས་ཉའི་ལྟོ་བར་སྒྲུབ་པ་བྱས་པ་དང་། དེ་ནས་ཡུལ་ཤྲི་ཏ་པུ་རི་ཞེས་བྱ་བའི་ཉ་པ་ཞིག་གིས་ཉ་ཆེན་པོ་དེ་བཟུང་ནས་བཏོན་ཏོ།། ཉ་པས་བསམ་པ་ལ་ཆེན་པོ་འདི་ལྗིད་ལུགས་ལ་བལྟས་ན་འདི་ཁོག་པ་ན་གསེར་དང་དངུལ་ལ་སོགས་པའི་རྫས་འགའ་བྱུང་ཡང་སྲིད་སྙམ་སྟེ། ཉའི་ལྟོ་བ་བཤགས་པས་དེ་ན་མི་ཞིག་འདུག་པ་ལ། ཁྱོད་སུ་ཡིན། བྱས་པས། དེ་ན་རེ། བདག་ཀྱང་ཉ་པ་ཡིན་པ་ལ་རྒྱལ་པོ་འདི་ཞེས་བྱ་བའི་དུས་སུ་ཉ་འདིར་ཁྱེར་ཏེ་མིད་པ་ཡིན་ཟེར་བ་ལ། མི་ཀུན་གྱིས་རྩིས་པས་ལོ་བཅུ་གཉིས་ལོན་པར་འདུག་པས། མི་ཐམས་ཅད་ངོ་མཚར་སྐྱེས་ཏེ། མིང་དུ་ཡང་རྣལ་འབྱོར་པ་མཱི་ན་པཱ་ཞེས་བྱ་བར་གྲགས་སོ།། དེ་ནས་མི་ཐམས་ཅད་ཀྱིས་མཆོད་པ་དང་། མཱི་ན་པཱས་ས་ལ་གར་བྱས་པས་རྐང་པ་ས་ལ་ནུབ། རྡོའི་སྟེང་དུ་གར་བྱས་པས་ཀྱང་དེ་ལ་འདམ་ལྟར་བྱིང་བས་ཀུན་ངོ་མཚར་སྐྱེས་སོ།། དེ་ནས་མཱི་ན་པཱའི་ཞལ་ནས།། 

སྔར་བསགས་ལས་ཀྱི་འབྲེལ་བ་དང་།།

དུས་འདིར་ཆོས་ལ་མོས་པ་ཡིས།།

ཡོན་ཏན་ཕུན་ཚོགས་འདི་ལྟར་བྱུང་།།

ཨེ་མ་རང་སེམས་རིན་པོ་ཆེ།། 

ཞེས་གསུངས། དེ་ནས་ལོ་ལྔ་བརྒྱར་སེམས་ཅན་གྱི་དོན་མཛད་དོ། །མཚན་ཡང་མཱི་ན་པཱ་དང་། རྡོ་རྗེའི་ཞབས། ཨ་ཅིནྟ་པཱ་སྟེ། བསམ་གྱིས་མི་ཁྱབ་པ་གསུམ་དུ་གྲགས་ཤིང་། དང་པོར་འཇིག་རྟེན་གྱི་དངོས་གྲུབ་ཐོབ་ནས་རིམ་གྱིས་ས་ལམ་བགྲོད་དེ། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །གུརུམིནཔཱའི་ལོ་རྒྱུས་རྫོགས་སོ།།

༩༽གོརཀྵ།

 གུརུགོརཀྵཱའི་ལོ་རྒྱུས་ནི། ཡུལ་རྒྱ་གར་ཤར་ཕྱོགས་ན་རྒྱལ་པོ་ལྷ་སྐྱོང་ཞེས་བྱ་བ་ལ་སྲས་ཤིག་བལྟམས་པ་ལས། དེ་ལོ་བཅུ་གཉིས་ལོན་པ་ན་དེའི་ཡུམ་སྙུང་ནས་འགུམ་པ་ལ་ཐུག་པའི་ཚེ། ཡུམ་གྱི་སྲས་ལ་ཞལ་ཆེམས་གསུངས་པ། སེམས་ཅན་གྱི་བདེ་སྡུག་ཐམས་ཅད་ནི་ལས་དགེ་སྡིག་ལས་འབྱུང་བས་ན། ཁྱོད་སྲོག་ལ་བབ་ཀྱང་སྡིག་པའི་ལས་མ་བྱེད་ཅིག་ཅེས་གསུངས་ནས་ཡུམ་གྲོངས་སོ། །དེ་ནས་ཡབ་རྒྱལ་པོ་ལ་འབངས་རྣམས་ཀྱིས་ཞུས་པས། ཡུལ་གཞན་གྱི་བཙུན་མོ་ཞིག་བཞེས་དགོས་ཟེར་ནས། དེས་ཀྱང་བཙུན་མོ་བཞེས་ནས་ཞག་འགའ་ལོན་པ་ན། རྒྱལ་པོ་ནགས་གསེབ་ཅིག་ཏུ་སྐྱོ་གསང་ལ་གཤེགས་པའི་ཤུལ་དུ། རྒྱལ་མོས་ཁང་བཟང་གི་སྟེང་དུ་ཡོངས་ནས་བལྟས་པས། དེ་ན་རྒྱལ་བུ་བཞུགས་པ་མཐོང་ནས་ཆགས་པ་སྐྱེས་ཏེ། དེར་ཕོ་ཉ་བཏང་ནས་འདིར་གཤེགས་པར་ཞུ་བྱས་པས། རྒྱལ་བུ་དེ་མ་འདོད་པ་དང་། རྒྱལ་མོ་སྐྱེངས་ནས་བསམ་པ། འདིས་ང་ལ་བརྙས་པ་འདི་འདྲ་བྱས། འདི་ལས་དགྲ་སྙིང་ན་བ་མི་ཡོང་བས། འདི་ཐབས་སྣ་ཚོགས་ཀྱི་སྒོ་ནས་བསད་པར་བྱ་དགོས་སྙམ་ནས། རང་གི་འཁོར་ཀུན་ལ་འདི་གསོད་ཅིག །སྨྲས་པས། དེ་རྣམས་ན་རེ། འདི་བསད་པས་མི་ཡོང་སྟེ། རྒྱལ་པོའི་སྲས་ཀྱི་དམ་པ་ཡིན་ཟེར་བས། མོས་སྒྱུ་བྱས་ཏེ། རང་གི་ལུས་ཐམས་ཅད་བྲད་ནས་ཁྲག་ཕྱུང་། གོས་ཐམས་ཅད་བྲལ་ཏེ་མལ་དུ་ཞུགས་ནས་འདུག་པ་དང་། རྒྱལ་པོ་བྱོན་ནས་བཙུན་མོ་ལ་ཅིས་ཉེས་དྲིས་པས། མོ་ན་རེ། ཉིད་ཀྱི་སྲས་ཀྱི་བདག་གི་ལུས་མ་ལེགས་པ་བྱས་པས་འདི་ལྟར་དུ་གྱུར་ཏོ་ཟེར་ནས། རྒྱལ་པོ་ན་རེ། ཁྱོད་ལ་འདི་འདྲ་བ་བྱས་ན་རྒྱལ་བུ་འདི་གསོད་ཟེར་ཏེ། གཤེད་མ་གཉིས་བསྐོས་ནས་འདི་ནགས་གསེབ་ཏུ་ཁྲིད་ལ་རྐང་ལག་རྣམས་ཆོད་ལ་ཤོག་གསུངས་པས། གཤེད་མ་གཉིས་ཀྱི་བསམ་པ། འདི་གསོད་པ་ནི་མ་ལེགས་ན་རང་གི་བུ་བསད་ནས་འདི་གསོ་དགོས་སྙམ་ནས། རྒྱལ་བུ་ལ་སྨྲས་པ། ཉིད་གསོད་པ་ནི་བདག་གིས་མི་ཕོད་ལ། རང་གི་བུ་ཉིད་ཀྱི་དོན་དུ་གསོད་ཞེས་བྱས་པས། རྒྱལ་བུ་དེ་ན་རེ། དེ་ནི་མི་རུང་སྟེ། བདག་རང་སོད་ཅིག །བདག་གི་མ་ཡི་ཞལ་ཆེམས་སུ་ལུས་དང་སྲོག་གི་ཕྱིར་ཡང་སྡིག་པའི་ལས་མ་བྱེད་གསུངས་པས། ཡབ་ཀྱིས་ཇི་ལྟར་བཀའ་སྩལ་པ་ལྟར་གྱིས་ཤིག་གསུངས་སོ། །དེ་ནས་ཤིང་རྐང་པ་གཅིག་པའི་ཙར་བསྙལ་ནས། གཤེད་མས་རྐང་ལག་བཅད་དེ་དེ་དག་རང་གི་ཁྱིམ་དུ་སོང་ངོ་།། དེ་ནས་ཕྱོགས་དེར་རྣལ་འབྱོར་པ་ཆེན་པོ་ཨ་ཅིནྟ་བྱ་བ་ཞིག་གིས་རྒྱལ་བུ་དེ་ལ་དབང་བསྐུར་གདམས་ངག་བྱིན་ནས། དེ་ནས་རྒྱང་གྲགས་གཅིག་ཙམ་ན་ཡོད་པའི་བ་རྫི་རྣམས་ཀྱི་ནང་དུ་རྣལ་འབྱོར་པ་དེས་བྱོན་ཏེ། དེ་རྣམས་ལ་ཕ་གིའི་བྱ་རྒོད་ལྡིང་བའི་འོག་ན་ཤིང་རྐང་པ་གཅིག་པའི་དྲུང་ན་མི་ཡན་ལག་བཅད་པ་ཞིག་ཡོད་པས། དེའི་གན་དུ་སུ་འགྲོ་ནུས། གསུངས་པས། དེ་རྣམས་ཀྱི་ནང་ནས་སྤོས་འཚོང་གི་རིགས་ཀྱི་ཁྱེའུ་ཞིག་ན་རེ། བདག་གིས་ནུས་ཟེར་རོ།། འོན་ཀྱང་བདག་གིས་ཉིད་ཀྱི་བྱ་བ་བསྒྲུབ་ཀྱིས་དངོས་ཀྱི་བྱ་བ་ཉིད་ཀྱིས་སྒྲུབས་ཤིག་ཟེར་ནས། བ་ལང་རྣམས་རྣལ་འབྱོར་པ་ལ་གཏད་དེ། བྱ་རྒོད་ལྡིང་བ་མཚན་མར་བྱས་ནས་ཕྱིན་པས། ཤིང་རྐང་གཅིག་པའི་དྲུང་ན་དེ་འདུག་པ་མཐོང་ནས་ལོག་ཕྱིན་ཏེ་རྣལ་འབྱོར་པ་ཨཅིནྟ་ལ་དེ་བཞིན་དུ་འདུག་གོ་བྱས་པས། རྣལ་འབྱོར་པས་བ་ལང་རྫི་ལ་ཁོང་ལ་བཟའ་བཏུང་ཅི་ཡོད་བྱས་པས། བདག་ལ་བ་ལང་འཚོ་བའི་དེད་དཔོན་ཞིག་གིས་ནང་ནུབ་ཁོལ་གྱི་བཟའ་བཅའ་དུམ་རེ་སྟེར་བས་དེའི་ཕྱེད་དེ་ཁོང་ལ་སྐྱེལ་ལོ་ཞུས་པས། དེ་རུང་། ཅོ་རཱངྒ་སྲོལ་ཅིག་གསུངས། ཁོས་ཤིང་དེ་རང་གི་འཁོར་དུ་ལོ་མའི་ཁང་པ་ཕུབ། ཟས་སྦྱིན་ཞིང་མི་གཙང་བའི་ལྗིན་རྫབ་ཐམས་ཅད་ལག་གིས་བླང་ཞིང་བསལ་ཏེ། ལོ་བཅུ་གཉིས་སུ་དེ་ལྟར་བྱས་སོ།། དེ་ནས་དེ་དུས་གཅིག་གི་ཚེ་དེར་ཕྱིན་པས། དེ་ལངས་ནས་འདུག་པ་མཐོང་བས། ངོ་མཚར་ནས་དྲིས་པས། དེའི་ཞལ་ནས། 

ཐབས་མཁས་བླ་མ་དམ་པ་ཡིས། །

དབྱིངས་དང་རིག་པ་ངོ་སྤྲད་པས། །

ཆོས་རྣམས་ངོ་བོ་གཅིག་ཏུ་རྟོགས། །

བདེ་སྡུག་མེད་པ་ངོ་མཚར་ཆེ།། 

ཞེས་གསུངས་ནས། དངོས་འདི་བཞིན་དུ་རྐང་པ་ལག་པ་གསར་དུ་སྐྱེས་སོ་ཞེས་གསུངས་ཏེ་བར་སྣང་ལ་འཕགས་ནས་བ་ལང་རྫི་ལ་ངས་གདམས་ངག་སྦྱིན་ནམ།། བྱས་པས། བ་ལང་རྫི་ན་རེ། གདམས་ངག་མི་འདོད། བདག་གི་སློབ་དཔོན་ཞིག་ཡོད་པ་དེས་ཁྱེད་ལ་བསྙེན་བཀུར་གྱིས་གསུངས་ནས་ཉིད་ལ་འདི་ཙུག་བསྙེན་བཀུར་བྱས་པ་ཡིན་ནོ་ཞེས་བྱས་ཏེ། བ་ལང་རྫི་དེ་སླར་ལོག་ནས་བ་ལང་སྐྱོང་གིན་འདུག་པ་དང་། རྣལ་འབྱོར་པ་ཨ་ཅིནྟ་བ་ལང་སྐྱོང་གི་གན་དུ་འོངས་པ་དང་། བ་ལང་རྫིས་སྔར་གྱི་གཏམ་བྱས་པས་ཤིན་ཏུ་དགྱེས་པར་གྱུར་ཏོ།། ཨ་ཅིནྟས་བ་ལང་རྫི་ལ་དབང་བསྐུར་གདམས་ངག་བྱིན་ནས་ཡུལ་གཞན་དུ་གཤེགས་སོ། །བ་ལང་རྫིས་ཀྱང་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་ཡོད་པའི་ཚེ། བླ་མ་དེར་བྱོན་ནས་སེམས་ཅན་འབུམ་ཕྲག་བརྒྱ་མ་གྲོལ་གྱི་བར་དུ་སངས་མ་རྒྱ་ཞིག། གསུངས་པས། དེས་ཀྱང་སེམས་ཅན་བྱུང་ཚད་ལ་དབང་བསྐུར་བྱས་པས། མ་ཧཱ་དེ་ཝས། ཁྱོད་སེམས་ཅན་བྱུང་ཚད་ལ་དབང་བསྐུར་མ་བྱེད་པར་གང་གསོལ་བ་འདེབས་པ་དེ་ལ་གྱིས། སེམས་ཅན་མ་དད་པ་དང་། ཤེས་རབ་མེད་པ་ལ་མི་རུང་བ་ཡིན་བྱས་པས། དེ་མན་ཆད་ལུང་བསྟན་པ་ལྟར་མཛད་དོ།།

གདུལ་བྱ་མང་དུ་སྒྲོལ་ཞིང་བ་ལང་སྐྱོང་བར་བྱེད་པ་ཡིན་པས་མཚན་ལ་གོ་རཀྵཱ་ཞེས་ཕྱོགས་ཐམས་ཅད་དུ་གྲགས་ཤིང་། ད་ལྟ་ཡང་ལས་འཕྲོ་ཡོད་པ་ལ་དབང་བསྐུར་ལ། ལས་དག་པས་དུས་བཟང་ལ་ཌ་མ་རུའི་སྒྲ་ཙམ་ཐོས་ཤིང་། གཞན་གྱིས་ནི་མི་ཐོས་ཤིང་མི་སྣང་བའི་ཚུལ་དུ་བཞུགས་སོ།། གུརུགོརཀྵཱཔཱའི་ལོ་རྒྱུས་རྫོགས་སོ།།

༡༠༽ཙཽརངྒཱཔཱ། 

གུརུཙཽརངྒ་པཱའི་ལོ་རྒྱུས་ནི། གོང་དུ་བརྗོད་མ་ཐག་པའི་རྒྱལ་བུ་ཡན་ལག་བཅད་ཅིང་ཤིང་རྐང་གཅིག་པའི་དྲུང་དུ་གནས་པ་དེ་ཡིན་ལ། དེ་ལ་ཨ་ཅིནྟ་པས་དབང་དང་རླུང་བུམ་པ་ཅན་ལ་སོགས་པ་གནང་། གྲུབ་པའི་དུས་ན་ལུས་ཀྱང་སྔོན་བཞིན་དུ་འགྱུར་རོ། །ཞེས་ལུང་བསྟན་ནས་གཤེགས་སོ།། དེས་ཀྱང་བསྒོམས་པས་ལོ་བཅུ་གཉིས་ལོན་པ་ན། རྒྱལ་པོའི་ཚོང་པ་མང་པོས་གསེར་དངུལ་མན་ཤེལ་ལ་སོགས་པ་རིན་པོ་ཆེ་མང་དུ་ཁྱེར་ནས་འོངས་ཏེ་རྒྱལ་བུ་ཡོད་ས་དེར་ཆོམ་རྐུན་སོགས་བྱུང་དོགས་ཀྱིས་མཚན་མོ་འོངས་ནས་ཤིང་དེའི་རྩ་ནས་མར་ཕྱིན་པ་ན། རྒྱལ་བུ་དེས་ཚོང་པ་རྣམས་ཀྱི་རྐང་པའི་སྒྲ་ཐོས་ནས་སྨྲས་པ། དེ་སུ་ཞིག །ཚོང་པ་དེ་དག་གིས་འདི་ཆོམ་རྐུན་ཡིན་སྙམ་ནས། དེས་ནོར་བཅོམ་ཡོང་བའི་འཇིགས་པས་གཡོ་བྱས་ཏེ། ངེད་རྣམས་སོལ་བྱེད་མཁན་ཡིན་ནོ། །སྨྲས་པ་དང་། རྒྱལ་བུ་དེས། དེ་བཞིན་དུ་གྱུར་ཅིག །ཅེས་སྨྲས་སོ།། དེ་ནས་ཚོང་པ་དེ་རྣམས་རང་གི་གནས་སུ་ཕྱིན་པ་དང་། གསེར་སོགས་དངོས་པོ་རྣམས་སོལ་བར་གྱུར་པ་མཐོང་ནས། ཀུན་ཧ་ལས་ཏེ། འདི་ལྟ་བུར་གྱུར་པ་ནི་ཅི་ཡིན། སྙམ་དུ་སེམས་པར་བྱེད་དོ།། དེ་ནས་དེ་རྣམས་ཀྱི་ནང་ནས་བློ་དང་ལྡན་པ་ཞིག་གིས་སྨྲས་པ། ནུབ་མོ་འོང་དུས་ལམ་དུ་སུ་ཡིན་འདྲི་མཁན་དེ་བདེན་ཚིག་གྲུབ་པ་ཞིག་ཡིན་པ་གོར་མ་ཆག། དེ་འདྲ་བ་དེ་སུ་ཞིག་ཡིན་ལྟར་འདེང་ཟེར་ནས། སླར་དེ་རྣམས་ཀྱིས་དེར་ཕྱིན་པ་ན། ཤིང་གཅིག་གི་དྲུང་ན་ཡན་ལག་བཅད་པའི་མི་དེ་འདུག་པ་མཐོང་ནས། དེ་ལ་སྔར་གྱིས་ལོ་རྒྱུས་རྣམས་བྱས་ཏེ་སླར་བདེན་ཚིག་འདོར་དུ་བཅུག་པས། རྒྱལ་བུ་ན་རེ། ངས་ལན་པ་མིན་ནམ། ཡིན་ན་ཁྱེད་རྣམས་ཀྱི་ནོར་རྣམས་སྔ་མ་ཁོ་ན་ལྟར་གྱུར་ཅིག་ཅེས་བརྗོད་ནས། ཚོང་པ་རྣམས་ལོག་སྟེ་རང་གི་ནོར་རྣམས་སྔ་མ་ཁོ་ན་ལྟར་གྱུར་པར་མཐོང་སྟེ། ཡ་མཚན་སྐྱེས་ནས་རྒྱལ་བུ་དེ་ལ་མཆོད་པའི་ཕྱིར་དེ་ཡོད་སར་ཕྱིན་ནས་ལོ་རྒྱུས་བྱས་པས། རྒྱལ་བུ་དེས་སྔར་གྱི་བླ་མས་ལུང་བསྟན་པ་དེ་དྲན་ཏེ། དེ་ལྟ་ན་བདག་གི་ལུས་ཀྱང་སྔ་མ་ལྟར་གྱུར་ཅིག་ཅེས་བརྗོད་པས། དེ་ལྟར་གྱུར་ཏོ། །དངོས་གྲུབ་ཐམས་ཅད་ཐོབ་ནས་རྫུ་འཕྲུལ་བསྟན་ལ། གདམས་ངག་ལ་གནག་པས་འགྲོ་བ་ལ་གདམས་ངག་ནི་མ་བསྟན། འོན་ཀྱང་ཤིང་ལ་བསྟན་པས་ཤིང་འཆི་མེད་དུ་གྱུར་པས་ད་ལྟ་ཡང་ཡོད་ཟེར་རོ།། འཆི་མེད་བརྙེས་པའི་ཙཽརངྒའི་ལོ་རྒྱུས་རྫོགས་སོ།། །།

༡༡༽ཝཱིནཱཔཱ།

གུརུཝཱིནཱཔཱའི་ལོ་རྒྱུས་ནི། ཝཱིནཱཔཱ་ཞེས་བྱ་བ་བསྒྱུར་ན་པི་ཝང་ཞབས་བྱ་བའོ། །འདིའི་ཡུལ་གྷ་ཧུར། རིགས་རྒྱལ་རིགས། བླ་མ་ནི་བུ་དྷྭ་པཱ། དངོས་གྲུབ་ནི་དགྱེས་པ་རྡོ་རྗེ་ལས་ཐོབ་པ་ཡིན་ནོ། །དེ་ཡང་ཡུལ་གྷ་ཧུ་རའི་གཽཊའི་རྒྱལ་པོ་ལ་སྲས་གཅིག་ཡོད་པ། ཕ་མ་དང་། འབངས་རྣམས་ཤིན་ཏུ་གཅེས་པར་གྱུར་ནས། མ་མ་བརྒྱད་ལ་སོགས་པ་ལ་གཏད་དེ་སྐྱེད་བསྲིངས་པ་དང་། རྒྱལ་བུ་དེ་སྐུ་སྐྱོས་འབུལ་བའི་རོལ་མོ་མཁན་དུ་མ་དང་རྟག་ཏུ་ལྷན་ཅིག་ཏུ་བསྡད་པས། ཤེས་པ་གོམས་པའི་སྟོབས་ཀྱིས། ཏཾ་བུ་རའི་སྒྲ་ལ་བློ་རྩེ་གཅིག་ཏུ་ཞུགས་ཤིང་པི་ཝང་སྒྲེང་བ་ལས། འཇིག་རྟེན་བྱ་བ་གཞན་ལ་བློ་སྣང་ཡེ་མི་འཇུག་པས། དེའི་ཡབ་ཡུམ་དང་བློན་པོའི་ཚོགས་དང་འབངས་ཐམས་ཅད་ཀྱང་དེ་ལ་ཁ་ཟེར་བར་བྱེད། རྒྱལ་བུ་འདི་ནི་ཡབ་རྒྱལ་པོའི་རྒྱལ་ཚབ་ཀྱི་ཆེད་དུ་སྐྱེད་བསྲིངས་པ་ཡིན་ལ། རྒྱལ་སྲིད་ཀྱི་བྱ་བ་མི་བྱེད་པར་པི་ཝང་གི་སྒྲ་ལ་ཆགས་པས་ཅི་བྱེད་ཅེས་གླེང་བ་ན། རྒྱལ་བུ་དེའི་གན་དུ་ལེགས་པར་སྦྱངས་པའི་རྣལ་འབྱོར་པ་བུདྡྷ་པཱ་བྱོན་པས་རྒྱལ་བུ་དད་པར་གྱུར་ཏེ། རྣལ་འབྱོར་པ་དེ་ལ་ཕྱག་དང་བསྐོར་བ་བྱས་ནས་སྲོང་པོར་སྨྲ་བའི་གཏམ་སྣ་ཚོགས་བྱས་སོ།། རྣལ་འབྱོར་པ་དེས་རྒྱལ་བུ་དེའི་ཐད་དུ་ཅུང་ཞིག་གཞུགས་ནས། རྒྱལ་བུ་དེ་འདུལ་བའི་དུས་ལ་བབ་པར་གཟིགས་ནས། རྣལ་འབྱོར་པས་རྒྱལ་བུ་ལ་རྒྱལ་བུ་ཁྱོད་ཆོས་མི་བྱེད་དམ། བྱས་པ་ལ། རྒྱལ་བུ་དེ་ན་རེ། རྣལ་འབྱོར་པ་བདག་ཆོས་བྱེད་པ་ལགས་ཏེ། བདག་གིས་རོལ་མོ་ཏཾ་བུརཱ་འདི་སྤོང་བར་མི་ནུས་པར་འདུག་པས། འདི་མ་སྤངས་པར་ཆོས་སྒྲུབ་པའི་ཐབས་མཆིས་ན་བདག་ཆོས་བྱེད་ལགས་སོ། །ཞེས་ཞུས་པས། རྣལ་འབྱོར་པ་ན་རེ། ཆོས་བྱེད་པའི་དད་པ་དང་བརྩོན་འགྲུས་ཡོད་ན་པི་ཝང་མ་སྤངས་པར་ཆོས་སྒྲུབ་པའི་ཐབས་དང་གདམས་ངག་བདག་ལ་ཡོད། བྱས་པས། དེས་དེ་ཞུ་ཟེར་ནས། རྣལ་འབྱོར་པས་དེ་ལ་རྒྱུད་མ་སྨིན་པ་སྨིན་པར་བྱེད་པའི་དབང་བསྐུར། བསྒོམ་པའི་གདམས་ངག་ནི། རྒྱལ་བུ་ལ་འདི་སྐད་དུ། ཏཾ་བུ་རའི་སྒྲ་རྣ་བར་ཐོས་པའི་རྣམ་རྟོག་དོར་ལ། སེམས་ཀྱི་དམིགས་པ་དང་སྒྲའི་རྣམ་རྟོག་གཉིས་གཅིག་ཏུ་གྱིས་ལ་སྒོམས་ཤིག་བྱས་ནས། དེས་ན་དེ་ལྟར་བསྒོམས་པས་ལོ་དགུ་ནས་སེམས་ཀྱི་དྲི་མ་དག་སྟེ། མར་མེ་ལྟ་བུའི་འོད་གསལ་གྱི་ཉམས་སྐྱེས་ནས་ཕྱག་རྒྱ་ཆེན་པོ་ཐོབ། མངོན་པར་ཤེས་པ་ལ་སོགས་པའི་ཡོན་ཏན་གྱི་ཆོས་དུ་མ་རྒྱུད་ལ་སྐྱེས་ནས། མིང་དུ་ཡང་རྣལ་འབྱོར་པ་ཝཱིནཱ་ཎཱ་པཱ་ཞེས་བྱ་བར་ཕྱོགས་ཐམས་ཅད་དུ་གྲགས་ཤིང་། གྷ་ཧུར་གཽ་ཊའི་གྲོང་ཁྱེར་གྱི་སྐྱེ་བོའི་ཚོགས་ཐམས་ཅད་ལ་ཆོས་དཔག་ཏུ་མེད་པ་བསྟན། མཐར་རྟོགས་པ་བརྗོད་པ་ལ་སོགས་པ་གསུངས་ནས། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཝཱིཎཱཔཱའི་ལོ་རྒྱུས་རྫོགས་སོ།། །།

༡༢༽གུརུཤཱནྟིཔཱ། 

གུརུཤཱནྟིཔཱའི་ལོ་རྒྱུས་ནི། མ་ག་དྷའི་གྲོང་ཁྱེར་ན་རྒྱལ་པོ་དེ་ཝ་པཱ་ལས་རྒྱལ་སྲིད་མཛད་པའི་དུས་སུ་ཝི་ཀྲམ་ཤཱ་ིལར་བྲམ་ཟེའི་རིགས་ལས་རབ་ཏུ་བྱུང་བའི་སློབ་དཔོན་ཆེན་པོ་རཏྣ་ཀ་ར་ཤཱནྟི་ཞེས་བྱ་བ་རིག་པའི་གནས་ལྔ་ལ་མཁས་པའི་སློབ་དཔོན་ཆེན་པོ་ཞིག་བྱུང་སྟེ། དེ་མཁས་ཤིང་བཙུན་པའི་ཡོན་ཏན་གྱི་སྙན་པ་ཕྱོགས་མཚམས་ཐམས་ཅད་དུ་ཁྱབ་པར་གྱུར་པ་དང་། དེའི་དུས་སུ་སིངྒ་ལའི་གླིང་གི་རྒྱལ་པོ་ཀ་པིན་བྱ་བ་རང་གི་བསོད་ནམས་ལས་འདོད་ཡོན་གྱིས་བྲེལ་བ་མེད་པ་ཞིག་བཞུགས་པ་ལས། སིངྒ་ལའི་གླིང་དུ་སངས་རྒྱས་ཀྱི་བསྟན་པ་སྔར་མ་བྱུང་ཞིང་འཛམ་བུའི་གླིང་གི་མི་འོངས་པ་ཀུན་ལས་སངས་རྒྱས་ཀྱི་ཆོས་ཀྱི་ཡོན་ཏན་ཐོས་ལ། ཆོས་སྟོན་པའི་གང་ཟག་དང་ནི་མ་འཕྲད་པའི་དུས་དེར་མ་ག་དྷ་ན་སློབ་དཔོན་ཆེན་པོ་ཤཱནྟི་པཱ་བྱ་བ་མཁས་པ་ཆེན་པོ་ཞིག་བཞུགས་པ་ཐོས་ནས། རྒྱལ་པོ་ཀ་པིན་ལ་སོགས་པ་སིངྒ་ལའི་གླིང་གི་སྐྱེ་བོ་ཐམས་ཅད་ཀྱིས་སྐུ་སྐྱོས་དང་སྤྱན་འདྲེན་གྱི་ཕོ་ཉ་བཏང་སྟེ། ཝི་ཀྲམ་ཤཱི་ལར་མཐར་གྱིས་ཕྱིན་ནས། ཕོ་ཉ་བས་ནང་པར་སློབ་དཔོན་ལ་ཕྱག་བྱས། སིངྒ་ལའི་རྒྱལ་པོ་ལ་སོགས་པས་བསྐུར་བའི་སྐུ་སྐྱོས་གསེར་དང་དངུལ་དང་མུ་ཏིག་དར་ཟབ་ལ་སོགས་པ་ཕུལ་ནས་འདི་སྐད་དུ། རྒྱལ་པོ་ལ་སོགས་པས་ཞུ་བ། དངོས་ཅག་གླིང་ཕྲན་མཐའ་འཁོབ་ཏུ་ནི་སྐྱེས། མ་རིག་པའི་མུན་པ་ནི་འཐིབས། འདོད་ཆགས་ཀྱི་མེས་ནི་བསྲེགས། ཞེ་སྡང་གྱི་མཚོན་ཀྱིས་ནི་གཙེས། ལོག་པའི་རྙོག་པས་ཤེས་རབ་ཀྱི་སྣང་བ་ནི་གཡོགས། ཐེག་པ་ཆེན་པོའི་ཆོས་ཀྱི་ཐར་ལམ་ནི་སྟོར་ནི། བདག་ཅག་རྣམས་ལ་ཐུགས་རྗེ་ཆེན་པོས་དགོངས་ནས་སིངྒ་ལའི་གླིང་འདིར་འགྲོ་དོན་ལ་མི་གཤེགས་སུ་མི་རུང་ཞུ་ཡིན་གདའ། ཞེས་ཞུས་པས། སློབ་དཔོན་གྱིས་དགོངས་པ་མངོན་དུ་མཛད་ནས་གཤེགས་པར་ཞལ་གྱིས་བཞེས་སོ།། དེ་ནས་སློབ་དཔོན་ཤཱནྟི་པས་འཁོར་སློབ་མའི་ཚོགས་ཉིས་སྟོང་ཙམ་དང་། སྡེ་སྣོད་ཀྱི་གླེགས་བམ་རྣམས་རྟ་དང་གླང་པོ་ལ་སོགས་པ་ལ་བཀལ་ནས་ཆས་ཏེ། ནཱ་ལནྡཱ་དང་། ཨཻཽ་ཌ་ཡནྟ་པཱུ་རི་དང་། རྒྱལ་པོའི་ཁབ་དང་། རྡོ་རྗེ་གདན་ལ་སོགས་པའི་གྲོང་རྣམས་རིམ་གྱིས་བགྲོད་ནས། སིངྒ་ལའི་གླིང་གི་རྒྱ་མཚོའི་འགྲམ་དུ་ཕྱིན་པ་དང་། སྔོན་ལ་ཕོ་ཉ་བཏང་སྟེ། ཕྱི་ནས་སློབ་དཔོན་འཁོར་དང་བཅས་པ་རྣམས་གྲུར་ཞུགས་ནས་བྱོན་པ་དང་། ཕོ་ཉ་བས་སློབ་དཔོན་ཕེབས་ཀྱི་ཡོད་དོ་བྱ་བའི་གཏམ་སྨྲས་པས། རྒྱལ་པོ་ཀ་པིན་དང་། བློན་པོ་དང་སྐྱེ་བོའི་ཚོགས་ཐམས་ཅད་ཀྱིས་ས་དང་པོ་ཐོབ་པ་ཙམ་གྱིས་དགའ་བ་སྐྱེས་ཏེ། དེ་ཐམས་ཅད་ཀྱིས་རང་རང་གི་འཇིག་རྟེན་བྱ་བ་བློས་བཏང་སྟེ། རྒྱ་མཚོའི་ཕྱོགས་སུ་ཡིད་གཏད་ནས་ཞག་བདུན་ལོན་པ་དང་། གདུགས་དང་གླང་པོ་ལ་སོགས་པའི་རྟགས་ཐམས་ཅད་མཐོང་ནས་སྐྱེ་བོའི་ཚོགས་ཐམས་ཅད་རབ་ཏུ་དགའ་སྟེ། རང་གི་ཡུལ་ནས་རྒྱ་མཚོའི་བར་ཐམས་ཅད་དུ་ནི་ཕྱག་དར་བྱས། དར་ལ་སོགས་པས་ས་གཞི་ཐམས་ཅད་གཡོགས་ནས་དེ་ལ་སློབ་དཔོན་ལ་སོགས་པ་ཐམས་ཅད་ཀྱིས་ཞབས་བཞག་ནས་གཤེགས་པ་ལ། རྒྱལ་པོ་ཀ་པིན་འཁོར་དང་བཅས་པ་ཐམས་ཅད་ཀྱིས་མེ་ཏོག་དང་། བདུག་སྤོས་ལ་སོགས་པ་ཐམས་ཅད་ཀྱིས་རྒྱ་ཆེར་མཆོད་དེ། སློབ་དཔོན་དགྱེས་པའི་གནས་ལམ་ལ་སོགས་པ་ཀུན་ཕུལ་ནས་ལོ་གསུམ་གྱི་བར་དུ་སྡེ་སྣོད་ཀྱི་ཆོས་མང་དུ་བཤད་དོ།། 

དེ་ནས་སློབ་དཔོན་ཤཱནྟི་པཱ་འཁོར་བཅས་ཡུལ་དབུས་སུ་ཆས་པ་དང་། རྒྱལ་པོ་ཀ་པིན་ལ་སོགས་པ་ཐམས་ཅད་ཀྱིས་རྟ་དང་གླང་པོ་དང་གསེར་དངུལ་དང་མུ་ཏིག་ལ་སོགས་པ་དཔག་ཏུ་མེད་པ་ཕུལ་ནས་ཡུལ་དབུས་སུ་ལོག་པ་ལ་ལམ་གཉིས་ཡོད་པའི་རིང་ཤོས་ནས་ཆས་སོ།། དེ་ནས་རཱ་མེ་ཤྭ་ར་བྱ་བ་རྒྱལ་པོ་རཱ་མ་ཎས་ལངྐ་པུ་རིར་ཆུང་མ་འཚོལ་བར་འགྲོ་བའི་དུས་སུ་ས་དེར་དབང་ཕྱུག་ཆེན་པོའི་རྟེན་ལྷ་ཁང་བྱས་ནས་ཡོད། དེའི་མིང་དུ་ཡང་རཱ་མེ་ཤྭ་རའི་ཡུལ་བྱ་བ་དེར་ཕྱིན་པ་དང་། དེ་ནས་ཡུལ་དབུས་སུ་འགྲོ་སྐབས་བར་ན་མི་གྲོང་མེད་པའི་ལམ་ཞག་བདུན་འགྲོ་དགོས་པ་ཡོད་པ་ལ། འཁོར་རྣམས་ལ་སློབ་དཔོན་གྱིས་ཞག་བདུན་གྱི་ཆས་ཁྱེར་ཅིག་གསུངས་ནས། དེ་བཞིན་དུ་བྱས་ཏེ་ཕྱིན་ནས་ཞག་བཞིའི་ལམ་དུ་ཕེབས་པ་ན། སྐལ་ལྡན་ཏོག་ཙེ་པ་དང་མཇལ་ཏེ། དེའི་ལོ་རྒྱུས་ནི་ཁོ་རང་གི་སྐབས་སུ་སྟོན་ནོ། །དེ་ནས་སློབ་དཔོན་འཁོར་དང་བཅས་པ་ཝི་ཀྲམ་ཤཱིལར་བྱོན་པ་དང་། སློབ་དཔོན་ཤིན་ཏུ་བགྲེས་པར་གྱུར་པས་སྤྱན་ལོང་ཞིང་ལུས་པོས་སྦྱོར་མི་བཟོད་ནས། སློབ་མ་རྣམས་ཀྱི་མ་ཧེའི་ཞོ་ལ་ཁ་ར་བཏབ་ནས་འདྲེན་པ་ལས། གཞན་ཁ་ཟས་རགས་པ་རྣམས་སྤངས་ནས་ཕྲ་བ་བསྟེན་ནོ།། ཡོངས་གྲགས་སུ་སློབ་དཔོན་གྱིས་ལོ་བརྒྱ་རྩ་བཞེས་པའི་དུས་སུ། སློབ་དཔོན་ནི་ལོ་བཅུ་གཉིས་སུ་རྟོག་པའི་ངང་ལ་གནས་ལ། ཏོག་ཙེ་པས་རྣམ་པར་མི་རྟོག་པ་བསྒོམས་པས་ལོ་བཅུ་གཉིས་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ་གཉུག་མའི་ཆོས་ཉིད་ལ་གནས་སོ།། 

དེ་ལས་བཞེངས་པ་ལས། སློབ་དཔོན་ཤཱ་ནྟི་པཱ་ལ་ནི་སློབ་མ་རྣམས་ཀྱིས་བསྙེན་བསྐུར་བྱེད་ལ། ཏོག་ཙེ་པ་ལ་ནི་མཁའ་འགྲོ་མ་ཀུན་དང་། ལྷའི་དབང་པོ་བརྒྱ་བྱིན་ལ་སོགས་པས་བདུད་རྩི་སྤྱི་བོ་ཚངས་པའི་བུ་ག་ནས་མར་བླུགས་ནས་ཚིམ་པར་བྱས་སོ།། ལྷ་དང་མཁའ་འགྲོ་མ་ཐམས་ཅད་ན་རེ། འདི་ནི་རྡོ་རྗེ་སེམས་དཔའ་དངོས་ཡིན་ཟེར་རོ།། ཏོག་ཙེ་པའི་བྱིན་རླབས་ཀྱིས་ལྷའི་འདོད་ཡོན་ཐམས་ཅད་བྱུང་ངོ་། ཏོག་ཙེ་པས་བླ་མའི་གདམས་ངག་མ་ཐོབ་བར་ལ་ཕྱི་རོལ་གྱི་རི་བརྐོས་ལ། ཐོབ་ནས་སེམས་ཀྱི་རི་བོ་བརྐོས་པས་དངོས་གྲུབ་ཐོབ་གསུངས་སོ།། དེ་ནས་ལྷའི་དབང་པོ་བརྒྱ་བྱིན་ལ་སོགས་པའི་ལྷ་རྣམས་ཀྱིས་སུམ་ཅུ་རྩ་གསུམ་ལ་སོགས་པའི་ལྷ་གནས་སུ་སྤྱན་དྲངས་པ་ལ། ཏོག་ཙེ་པ་གཤེགས་སུ་མ་བཞེད་ནས། དེའི་ཞལ་ནས་བདག་ནི་བླ་མ་ལ་ཕྱག་འཚལ་བ་ཡིན་ཏེ། སངས་རྒྱས་པས་ཀྱང་བླ་མ་བཀའ་དྲིན་ཆེ་ལ། དེ་ཅི་སྟེ་ན། 

བླ་མ་སངས་རྒྱས་བླ་མ་ཆོས།།

དེ་བཞིན་བླ་མ་དགེ་འདུན་ཏེ།།

དམ་པ་གསུམ་ལ་སྐྱབས་སུ་མཆི།།

དམ་པའི་བྱིན་གྱིས་བརླབ་ཏུ་གསོལ།།

ཅེས་གསུངས་ནས། ཡེ་ཤེས་ཀྱི་སྤྱན་གྱིས་གཟིགས་ན་ཡུལ་གཉིས་ཀྱི་བར་ཟླ་བ་དྲུག་གི་ལམ་ཡོད་ཀྱང་སྐད་ཅིག་ལ་ཝི་ཀྲམ་ཤི་ལར་བྱོན་ནས། ཡེ་ཤེས་ཀྱི་ལུས་ཀྱིས་བླ་མ་ལ་ཕྱག་དང་བསྐོར་བས་བསྙེན་བཀུར་མཛད་པ་ལ། བླ་མ་འཁོར་དང་བཅས་པས་མ་མཁྱེན་ནས་ཡང་ཏོག་ཙེ་པས་རྣམ་སྨིན་གྱི་ལུས། དངོས་སུ་བསྟན་ནས་ཕྱག་དང་བསྐོར་བ་གྲངས་མེད་པ་མཛད། ཞབས་ལ་མགོ་བོས་གཏུགས་པ་དང་། ཤཱནྟི་པས་སུ་ཡིན་དྲིས་པ་ན། བདག་བླ་མའི་སློབ་མ་ཡིན་ཞེས་ཞུས་པ་ན། བདག་ལ་སློབ་མ་དཔག་ཏུ་མེད་པ་ཡོད་པས་ངོ་མ་ཟིན་གསུངས་པས། སླར་བདག་ཏོག་ཙེ་པ་ལགས་ཞུས་པས། དཔོན་སློབ་གཉིས་བརྡས་མཇལ་ནས། ཡིད་ཕེབས་པའི་གཏམ་མང་དུ་མཛད་ནས། བླ་མས་སློབ་མ་ལ་ཁྱོད་ཀྱིས་ཡོན་ཏན་གྱི་ཆོས་ཅི་ཐོབ། གསུངས་པས་ཏོག་ཙེ་པས་དངོས་གྱི་བླ་མའི་གདམས་ངག་ཉམས་སུ་བླངས་པས་ཕྱག་རྒྱ་ཆེན་པོ་ཆོས་ཀྱི་སྐུ་ཐོབ་ནས་མཆི་ཞུས་པས། བླ་མའི་ཞལ་ནས་ངས་ནི་སྨྲ་བ་གཙོ་བོར་བྱས་ཤིང་སྒྲུབ་པ་གཙོ་བོར་མ་བྱས་པས། དོན་དང་མ་ཕྲད་ལ། ཁྱོད་ཀྱིས་ནི་སྒྲུབ་པ་གཙོ་བོ་བྱས་ཤིང་སྨྲ་བ་གཙོ་བོར་མ་བྱས་པས་དོན་དང་མཇལ་ནས་འདུག་ཅིང་། ངས་ཁྱོད་ལ་གདམས་ངག་སྦྱིན་པ་ཡང་བརྗེད་ནས་འདུག་ད་ཁྱོད་ཀྱིས་ང་ལ་གདམས་ངག་ཀྱང་སྟོན། ཡོན་ཏན་གྱི་ཆོས་ཅི་ཡོད་པའང་སྟོན་ཅིག་གསུངས་པས། ཏོག་ཙེ་པས། དབེན་པའི་ས་ཕྱོགས་སུ་བླ་མ་ལ་ཆོས་ཀྱི་སྐུའི་ཡོན་ཏན་དུ་མ་ཡང་བསྟན། སྔར་བླ་མ་རང་གི་གདམས་ངག་ཀྱང་ཡར་ཕུལ། བླ་མས་ཀྱང་དགུང་ལོ་བཅུ་གཉིས་སུ་གདམས་ངག་ཉམས་སུ་བླངས་པས། བླ་མ་རཏྣ་ཀ་ར་ཤཱནྟི་པས་ཀྱང་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས། འགྲོ་བའི་དོན་མཛད་དེ་མཁའ་སྤྱོད་དུ་གཤེགས་སོ།། གུརུརཏྣཱཀརཤཱནྟི་པཱའི་ལོ་རྒྱུས་རྫོགས་སོ།། །།

༡༣༽གུརུཏནྟིཔཱ། 

གུརུཏནྟིཔཱའི་ལོ་རྒྱུས་ནི། སཻན་དྷོ་ན་གར་བྱ་བ་ན། ཐགས་མཁན་ཞིག་ལ་བུ་མང་དུ་ཡོད་པ་ལས། དེ་རྣམས་ཀྱི་ཕས་ཡུལ་དེར་ཐགས་ཀྱི་ལས་བྱས་པས་དེ་འབྱོར་པ་དཔག་ཏུ་མེད་པ་དང་ལྡན་པར་གྱུར་ཏོ།། དེར་བུ་རྣམས་ལ་རིགས་དང་འཚམས་པའི་མནའ་མ་བླངས་ཏེ་འགྲོགས་པས། ཡུལ་དེར་ཐག་མཁན་གྱི་རིགས་རྒྱུད་དཔག་ཏུ་མེད་པ་འཕེལ་བར་གྱུར་ཏོ།། དུས་ཀྱི་རིམ་པས་ཐགས་མཁན་དེའི་བྱན་མོ་ནི་ཤི། ཐགས་མཁན་རང་གི་ལོ་བརྒྱད་ཅུ་རྩ་དགུ་ལོན་པ་ན་རྒས་ཤིང་འཁོགས་པས་ལུས་ཀྱིས་སྦྱོར་མི་བཟོད་པ་དང་། མནའ་མ་ཀུན་གྱི་གན་དུ་གསོ་རེས་བྱེད་ཅིང་ཡོད་པ་ལས། དེ་རྒས་པའི་སྤྱོད་ལམ་ལ་ཀུན་གྱིས་འཕྱའ་ཞིང་བཞད་གད་དུ་བྱེད་པ་དང་། དེར་མནའ་མ་ཀུན་གྱིས་གྲོས་བྱས་པ། འོ་སྐོལ་གྱི་གྱོས་པོ་རྒན་པོ་འདི་མིས་མཐོང་ན་ཞེ་ལྡོག་ལ། རང་རེ་ཀུན་ཀྱང་སྡིག་གསོག་པར་འདུག་པས། སྐྱེད་མོས་ཚལ་དུ་རྩའི་སྤྱིལ་པོ་བྱས་ཏེ་དེར་བཞག་ལ། ཟ་མ་རེས་མོས་ཀྱི་བསྐྱལ་ལོ་ཟེར་ནས་ཐམས་ཅད་མཐུན་ཏེ་དེ་བཞིན་དུ་བྱས་སོ།། དེ་ནས་ལན་གཅིག་གི་ཚེ་བླ་མ་ཛཱ་ལན་དྷ་ར་པཱ་བྱ་བ་མཐར་གྱིས་ཡུལ་དེར་བྱོན་པ་དང་། ཐགས་མཁན་གྱི་བུ་ཆེ་ཤོས་ཀྱི་གན་དུ་བྱོན་ནས་བདག་ལ་ཟས་བྱིན་ཅིག་བྱས་པ་ལ། དེར་བཞུགས་ཤིག་ཟེར་ནས། ནང་དུ་གཡོས་སྣ་ཚོགས་བྱས་ཟིན་ནས། ཆུང་མ་ན་རེ་ཁྱོ་ལ་ད་ནང་དུ་སྤྱན་དྲོངས་ཤིག་ཟེར་ནས། དེ་བཞིན་བྱས་ཏེ། བླ་མ་ནང་དུ་བྱོན་ནས་ཟས་ཀྱི་བྱ་བ་གྲུབ་སྟེ། བླ་མ་ཛཱ་ལན་དྷ་ར་པཱ་གཞན་དུ་གཤེགས་པར་ཆས་པ་ལ། ཐགས་མཁན་ཀྱི་ཆུང་མས་བླ་མ་གཞན་དུ་མ་གཤེགས་པར་གནས་འདིར་གཟིམས་པར་ཞུ་ཞུས་པས། བླ་མས་བདག་མིའི་ནང་དུ་མི་ཉལ་གསུངས་པས། འོ་ན་དངོས་ཅག་གི་སྐྱེད་མོས་ཚལ་དུ་གཟིམས་པར་ཞུ་བྱས་ནས། སྐྱེད་མོས་ཚལ་དུ་སྤྱན་དྲངས་ཏེ། ཐགས་མཁན་གྱིས་མེ་མར་ལ་སོགས་པ་བསྐྱལ་ནས་དེར་བཞུགས་པ་ན། ཐགས་མཁན་རྒད་པོས་མིའི་སྒྲ་ནི་ཐོས། སུ་ཡིན་ནི་ཆ་མེད་ནས་དྲིས་པ། དེ་ན་སྒྲ་གྲགས་པ་དེ་སུ་ཡིན། སློབ་དཔོན་གྱིས་བདག་མགྲོན་པོ་ཆོས་པ་ཞིག་ཡིན། ཉིད་རང་སུ་ཡིན། སྨྲས་པ་དང་། དེ་ན་རེ། བདག་ཐགས་མཁན་རྣམས་ཀྱི་ཕ་ལགས་ཏེ། བདག་གཞོན་པའི་དུས་སུ་གནས་དང་ལོངས་སྤྱོད་ཀུན་གྱི་བདག་པོ་དངོས་ཡིན་ཀྱང་། ད་ལྟ་བུ་དང་མནའ་མ་ཀུན་གྱི་བདག་ལ་འཕྱ་སྨོད་ཅིང་། གཞན་གྱིས་མཐོང་གིས་དོགས་ནས་སྐྱེད་མོས་ཚལ་འདིར་སྦས་ནས་བཞག་པ་ཡིན་ལགས། འཁོར་བའི་ཆོས་ལ་སྙིང་པོ་མེད་པ་འདི་འདྲ་བ་ལགས་སོ། །ཞེས་སྨྲས་པ་ལ། ཛཱ་ལན་དྷ་རས་ཐགས་མཁན་ལ་གསུངས་པ། 

འདུས་བྱས་ཐམས་ཅད་ནི་མི་རྟག་པ། སྲིད་པར་སོང་བ་ཐམས་ཅད་ནི་སྡུག་བསྔལ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་ཞིང་བདེ་བ་ཡིན་པས། ཤི་རྒྱགས་ཀྱི་ཆོས་མི་དགོས་སམ། གསུངས་པས། ཐགས་མཁན་རྒན་པོ་དགོས་ཞུས་ནས། ཛཱལནདྷར་པས་ཐགས་མཁན་དེ་ལ་དགྱེས་རྡོར་གྱི་དཀྱིལ་འཁོར་དུ་བཅུག་ནས་དབང་སྐུར། གདམས་ངག་བྱིན་ནས་བསྒོམ་དུ་བཅུག་སྟེ། བླ་མ་གཞན་དུ་གཤེགས་སོ།།

ཐགས་མཁན་དེས་ཀྱང་བླ་མའི་གདམས་ངག་ཡིད་ལ་བྱས་ཏེ། སྔར་བཞིན་མནའ་མ་ལ་སོགས་པ་ཀུན་ལ་ཁ་མི་ཟེར་བར་ངག་བསྡམས་པར་བྱས་ནས་ལོ་བཅུ་གཉིས་སུ་སྒྲུབ་པ་བྱས་པས་ཡོན་ཏན་གྱི་རིགས་མང་པོ་ཐོབ་པ་མིས་མ་ཚོར་བ་ལ། དུས་གཅིག་ན་བུ་ཆེ་བ་དེས་ཟ་འོག་བཟང་པོ་ཞིག་བཏགས་ནས་དཀྲིས་བྱེད་པའི་བྱ་བ་ལ་གཡེངས་ཏེ་ཕ་ལ་ཟན་སྐྱེལ་བ་བརྗེད་པ་དང་། མཚན་མོ་མནའ་མས་དྲན་ནས་ཁྱོ་ལ་སོགས་པས་མ་ཚོར་བར་ཟས་སྐྱེལ་དུ་ཕྱིན་པ་ན། སྤྱིལ་པོའི་ནང་ན་མེ་མར་གྱི་སྣང་བ་ཆེན་པོ་དང་། བུ་མོ་བཅོ་ལྔ་ཙམ་གྱིས་བསྐོར། ཁ་ཟས་ཀྱི་རྣམ་པ་གྱ་ནོམ་པ་མང་པོ་དང་། མི་ཡུལ་དུ་མི་འབྱུང་བའི་གོས་དང་། རྒྱན་མང་པོ་ཐོགས་པར་མཐོང་ནས་རིངས་པར་ལོག་སྟེ། ཁྱོ་ལ་ཉིད་ཀྱི་ཕ་རྒན་བལྟར་འདོངས་བྱས་པས། ཁྱོས་ཕ་ཤི་བ་ཡིན་སྙམ་ནས་ངུས་པ་ན། མི་གཞན་ཡང་འོངས་ནས་སྐྱེད་མོས་ཚལ་དུ་བལྟར་ཕྱིར་པས། སྔ་མ་བཞིན་དུ་ཐམས་ཅད་ཀྱིས་མཐོང་ནས་ཡ་མཚན་སྐྱེས་ཏེ། ནང་དུ་ལོག་ནས་སྔར་གྱི་གཏམ་བརྗོད་པས་བུ་ལ་སོགས་པས་གཉེན་ཀུན་འདི་འདྲ་བ་མི་མ་ཡིན། འདྲེ་གཅིག་འདུག་ཟེར་ནས་བསྡད་དོ།། ནངས་པར་མི་ཀུན་གྱིས་ཐོས་ནས་སེན་དྷོ་ན་ག་རའི་མི་ཐམས་ཅད་ཀྱིས་བལྟར་ཕྱིན་ནས། ཕྱག་བྱས་པ་དང་། དེ་ཕྱིར་བྱུང་བ་ན་ལུས་བརྗེས་ཏེ། ལོ་བཅུ་དྲུག་ལོན་པའི་ན་ཚོད་དུ་གྱུར་ནས་སྐུ་ལས་འོད་ཟེར་དཔག་ཏུ་མེད་པ་བྱུང་བས། མི་ཀུན་གྱི་མིག་གིས་བལྟར་མི་བཟོད་པ་དང་། ལུས་མེ་ལོང་གཡའ་དག་པ་ལྟར་སོང་བ་སྣང་བ་ཐམས་ཅད་འོད་དུ་ཤར་ཏེ། མིང་ཡང་ཏནྟི་པཱ་ཞེས་ཕྱོགས་ཐམས་ཅད་དུ་གྲགས་སོ།། འགྲོ་དོན་དཔག་ཏུ་མེད་པ་མཛད་དེ། མཐར་སཻན་དྷོ་ན་ག་རའི་སྐྱེ་བོའི་ཚོགས་དཔག་ཏུ་མེད་པ་དང་བཅས་ཏེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། དེས་ན་རང་གི་དད་གུས་དང་བླ་མའི་གདམས་ངག་ཉམས་སུ་བླངས་ན། ན་ཚོད་རྒ་ན་ཡང་ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཏུ་རུང་བ་ཡིན་གསུངས། གུརུཏནྟིཔཱའི་ལོ་རྒྱུས་རྫོགས་སོ།། །།

༡༤༽གུརུཅམརིཔཱ། 

གུརུཅམ་རིཔཱའི་ལོ་རྒྱུས་ནི། ཅམརིཔཱ་ཞེས་བྱ་བ་ལྷམ་མཁན་ཏེ། དེའི་ཡུལ་རྒྱ་གར་ཤར་ཕྱོགས། ཝིཥྞུན་གར་བྱ་བའི་གྲོང་ཁྱེར་ན། བཟོ་རིག་མི་འདྲ་བ་བཅོ་བརྒྱད་ཚང་བར་ཡོད་པ་ལས། རིགས་ལྷམ་མཁན། དེ་ཝིཥྞུན་གར་ན་ལྷམ་གསར་རྙིང་གི་བཟོའི་ལས་བྱེད་ཅིང་། ལས་དེས་རྟག་ཏུ་འདའ་བར་བྱེད་པ་ཡིན་པས། དེའི་གམ་དུ་དགེ་སློང་ཞིག་འོངས་པ་ལ། དེས་ལྷམ་གྱིས་བཟོ་འཕྲོ་བོར་ནས་དགེ་སློང་དེའི་ཞབས་ལ་ཕྱག་བྱས་ཏེ་འབེལ་བའི་གཏམ་ལེགས་པར་བྱས་ནས། བདག་འཁོར་བ་ལ་སྐྱེས་ནས་ཆོས་ཤིག་བགྱིད་སྙམ་པ་ལ། དགེ་བའི་བཤེས་གཉེན་དང་མ་འཕྲད་པས་ད་དུང་ཆོས་སྒོར་མ་ཞུགས། ད་འདི་དང་ཕྱི་མ་གཉིས་ཀ་ལ་ཕན་པའི་ཆོས་ཤིག་ཞུ་ཞེས་ཞུས་པས། ཁྱོད་ཀྱི་ཆོས་སྒྲུབ་ནུས་ན་ངས་སྦྱིན་གྱི་གསུངས་པ་ལ། ལྷམ་མཁན་དེས་དགེ་སློང་ལ་བདག་རིགས་ངན་གྱི་ཁྱིམ་དུ་ཉིད་བཤོས་གསོལ་བར་གནང་ངམ་ཞུས་པས། དགེ་སློང་དེས་དོ་ནུབ་མཚན་ལ་འོངས་ནས་ཟའོ་གསུངས་པས། དེས་ཆུང་མ་སོགས་རང་གི་ཁྱིམ་གྱི་མི་ཀུན་ལ་དགེ་སློང་བྱོན་པའི་བརྡ་སྤྲད་དོ།། 

དེའི་མཚན་ལ་དེ་དེར་བྱོན་པས། ལྷམ་མཁན་གྱིས་སྟན་བཏིང་སྟེ་ཞབས་བཀྲུ་བ་ལ་སོགས་པ་བྱས་ནས་བཞེས་པ་གྱ་ནོམ་པ་དྲངས། ཆུང་མ་དང་བུ་མོ་ལ་སོགས་པ་ཡོ་བྱད་ཀུན་ཕུལ་ཏེ། བཀུ་མཉེས་ལ་སོགས་པའི་བསྙེན་བཀུར་བྱེད་དུ་གཞུག་པ་ན། དགེ་སློང་དགྱེས་ནས་ལྷམ་མཁན་ཆུང་མ་དང་བཅས་པ་ལ་དབང་བསྐུར། གདམས་ངག་བྱིན་ཏེ། དེ་ཡང་གདམས་ངག་དངོས་ནི། 

ཉོན་མོངས་རྣམ་རྟོག་ཀོ་བ་དེ།།

བྱམས་དང་སྙིང་རྗེའི་སྤང་ནང་དུ།།

བླ་མའི་གདམས་པའི་སྙུང་དང་ནི།།

ཆོས་བརྒྱད་སྤངས་པའི་རྒྱུས་སྐུད་ཀྱིས།།

ཡང་དག་ཉིད་དུ་བརྩེམས་པ་ན།།

ལྷུན་གྲུབ་འབྲས་བུའི་ལྷམ་འབྱུང་ངོ་།།

ངོ་མཚར་ཆེ་བའི་ཆོས་སྐུའི་ལྷམ།།

ལོག་པར་ལྟ་བས་དེ་མི་ཤེས།།

དགའ་བ་དང་མི་དགའ་བའི་སྤང་བླངས་མེད་པའི་སྐུད་པ་གྱིས། རྣམ་རྟོག་དང་མཚན་མ་ཐམས་ཅད་ཀོ་བར་གྱིས། སྙིང་རྗེའི་སྤང་ནང་དུ་སྤོངས། བླ་མའི་གདམས་ངག་དང་རང་གི་ཉམས་མྱོང་གི་སྙུང་གིས་ཚེམས་ལ། ལྷུན་འགྲུབ་ཆོས་སྐུའི་ལྷམ་བྱེད་པར་སྒོམས་ཤིག་ཅེས་པའི་གདམས་ངག་ཕོག་པས། ལྷམ་མཁན་དེ་ན་རེ། དེ་ལྟར་བསྒོམས་པ་ལ་རྟགས་ཅི་འབྱུང་། ཞུས་པས། བླ་མའི་ཞལ་ནས། དང་པོར་འཁོར་བ་ལ་སྐྱོ་བའི་རྟགས་འབྱུང་། དེ་ནས་འབྱུང་བ་རྣམས་རིམ་གྱིས་ཆོས་ཉིད་དུ་ཐིམ་པའི་རྟགས་འབྱུང་བ་ཡིན་གསུངས་ནས་རྣལ་འབྱོར་པ་དེ་མི་སྣང་བར་གྱུར་ཏོ།། ལྷམ་མཁན་གྱིས་རང་གི་ཁྱིམ་རྙིངས་སྤངས་ཏེ། དགོན་པར་གནས་པར་བྱས་ནས་བསྒོམས་པས། བླ་མས་གདམས་པ་བཞིན་རྟགས་རིམ་པར་འབྱུང་བ་དང་། དེ་ལ་རྟོགས་པ་འདི་ལྟ་བུ་སྐྱེས་ཏེ། རྩ་བའི་ཉོན་མོངས་པ་དྲུག་གཏི་མུག་དང་བཅས་པ་དཔེས་རྟོགས་ནས་བླ་མའི་གདམས་ངག་གི་ལྷམ་གྱོན་ཏེ། མ་རིག་པའི་ས་གཞི་ཐམས་ཅད་ཁྱབ་པར་བྱས་ནས་ལོ་བཅུ་གཉིས་བསྒྲུབས་པས། མ་རིག་པ་སོགས་དྲི་མ་ཐམས་ཅད་དག་སྟེ། ཕྱག་རྒྱ་ཆེན་པོའི་དངོས་གྲུབ་ཐོབ་པར་གྱུར་ལ། ལོ་བཅུ་གཉིས་ཀྱི་བར་དུ་ཉིན་མཚན་མེད་པར་ལྷམ་བཟོའི་དམིགས་པ་དང་། བླ་མའི་མན་ངག་གཉིས་མེད་དུ་བྱས་ནས་བསྒོམས་པས། ལྷམ་བཟོའི་ལས་ཐམས་ཅད་ནི་ཝི་ཤྭ་ཀརྨ་ལ་སོགས་པས་བྱས་པས། ཝི་ཥྞུ་ནཱ་གར་བས་ལྷམ་མཁན་སྒོམ་སྒྲུབ་བྱེད་ཡང་མ་ཚོར། ཡོན་ཏན་གྱི་ཚོགས་ཡོད་པ་ཡང་མ་ཤེས་པ་ན། དུས་གཅིག་ཁོ་རང་གི་བཟོ་ལ་མི་གཅིག་བལྟར་འོངས་པས། ལྷམ་མཁན་ནི་མཉམ་པར་བཞག་ནས་འདུག །བཟོ་བོ་ཝི་ཤྭ་ཀརྨས་བྱེད་པར་མཐོང་ནས་ངོ་མཚར་སྐྱེས་ཏེ། གཅིག་གིས་གཅིག་ལ་བརྒྱུད་ནས་མཐར་ཀུན་གྱིས་མཐོང་། དེར་ཐམས་ཅད་འདུས་ཏེ་གདམས་པ་ཞུ་བྱས་པས། བླ་མ་བསྟེན་པའི་ཕན་ཡོན་ལ་སོགས་པ་གསུངས་ལ། ཝིཥྞུ་ནཱ་ག་རའི་སེམས་ཅན་ལ་ཆོས་མང་དུ་བཤད་ནས། མིང་དུ་ཡང་རྣལ་འབྱོར་པ་ཅ་མ་ར་པཱ་ཞེས་ཕྱོགས་ཐམས་ཅད་དུ་གྲགས་ཤིང་། འགྲོ་དོན་དཔག་མེད་མཛད་ནས་མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཅམརིཔཱའི་ལོ་རྒྱུས་རྫོགས་སོ། །

༡༥༽གུརུཁདྒཔཱ།

གུརུཁདྒཔཱའི་ལོ་རྒྱུས་ནི། ཁདྒ་པཱ་བྱ་བ་ནི་རལ་གྲི་པཱ་ཞེས་བྱ་བ་ཡིན་ལ། ཡུལ་མ་ག་དྷཱ་པ། རིགས་དམངས་རིགས། བླ་མ་ཛོ་ཀི་ཡོ་གི་ཅརྤ་ཏྲི། དངོས་གྲུབ་ནི་ཐུན་མོང་གི་རལ་གྲིའི་དངོས་གྲུབ་ཐོབ་པའོ།། དེ་ཡང་ཡུལ་མ་ག་དྷ་ན་ཞིང་ལས་ཀྱིས་འཚོ་བའི་ཁྱིམ་པ་ཞིག་གིས་ཕའི་ལས་བོར་ནས་རྐུ་བའི་ལས་དུས་རྟག་ཏུ་བྱེད་པས། ཉིན་མཚན་དུ་རྐུ་བའི་བསམ་པ་རྩེ་གཅིག་ཏུ་གྱུར་པ་དང་། དུས་གཅིག་ན་ཁྱིམ་བདག་རྐུན་མ་དེས་མ་ག་དྷའི་གྲོང་ཁྱེར་དུ་རྐུར་ཕྱིན་པས་ཅི་ཡང་མ་ཐོབ་སྟེ་དུར་ཁྲོད་ཅིག་ནས་ཚུར་འོངས་པ་དང་། དུར་ཁྲོད་དེར་ཛོ་ཀི་ཡོ་གི་ཅརྤ་ཏྲི་བྱ་བ་དང་འཕྲད་ནས་ཉིད་འདི་ན་ཅི་མཛད་ཀྱིན་བཞུགས། ཞེས་ཞུས་པས། འཁོར་བའི་སྐྱེ་འཆིས་འཇིགས་ནས་འདི་ན་སྒོམ་བྱེད་ཅིང་འདུག་པ་ཡིན་བྱས་པས། རྐུན་མ་ན་རེ། སྒོམ་བྱས་པས་འབྲས་བུ་ཅི་འོང་བ་ཡིན། ཟེར་བས། ཛོ་ཀིའི་ཞལ་ནས་བསྒོམས་པའི་འབྲས་བུ་ནི་མངོན་ཀྱང་ཆོས་མི་བྱེད་དམ། གསུངས་པས། དེ་ན་རེ། ཆོས་ལ་མོས་ལྟ་མོས་ཏེ། དུར་ཁྲོད་དུ་སྒོམ་བྱེད་ཀྱིན་འདུག་པའི་ལོང་མེད། དུས་རྟག་ཏུ་རྐུ་བའི་ལས་བྱེད་པས་རྒྱལ་པོའམ་བློན་པོའམ་ཁྱིམ་བདག་ལ་སོགས་པའི་རྫས་རེ་ཞིག་བརྐུས་ནས་ཐོབ་སྲིད་ཀྱང་རྫས་ཀྱི་ཕྱི་ནས་དེ་ཀུན་དང་འཐབ་རྩོད་འབྱུང་བས་དེ་ཀུན་གྱིས་མི་ཐུབ་པའི་དངོས་གྲུབ་ཅིག་ཞུས་བྱས་པས། རྣལ་འབྱོར་པས་རྐུན་མ་ལ་དབང་བསྐུར་གདམས་ངག་བྱིན་ཏེ། དེ་ཡང་མ་ག་དྷཱའི་གྲོང་ཁྱེར་ན་གཽ་རི་ཤཾ་ཀ་ར་ཞེས་བྱ་བའི་ཕྱི་མཆོད་རྟེན་ནང་ལྷ་ཁང་། ནང་ན་འཕགས་པ་སྤྱན་རས་གཟིགས་ཀྱི་སྐུ་བྱིན་རླབས་ཅན་ཞིག་བཞུགས་ཀྱི། དེ་ལ་ཁྱོད་ཀྱིས་ཞག་བདུན་གསུམ་ཉི་ཤུ་རྩ་གཅིག་གི་བར་ལ་ཉིན་མཚན་ཀུན་ཏུ་ས་ལ་མ་འདུག་པར་བསྐོར་བ་གྱིས། ཟས་ཀྱང་སློང་ལ་ཟོ་ཞིག། སྐུའི་ཞབས་ཀྱི་འོག་ནས་སྦྲུལ་ཞིག་འོང་བར་མཐོང་ན་མ་འཇིགས་པར་མགོ་ནས་བཟུང་ཞིག་དང་། ཁྱོད་ཀྱི་དངོས་གྲུབ་ཐོབ་པ་ཡིན་ནོ།། ཞེས་གདམས་ངག་བྱིན་ནས་སྒྲུབ་ཏུ་བཅུག་གོ། རྐུན་མ་དེས་ཀྱང་རྣལ་འབྱོར་པས་བྱིན་པའི་གདམས་ངག་ཉམས་སུ་བླངས་ཏེ་དེ་བཞིན་དུ་སྒྲུབ་པ་བྱས་པས། ཞག་ཉི་ཤུ་རྩ་གཅིག་ནས་སྤྱན་རས་གཟིགས་ཀྱི་ཞབས་འོག་ནས་སྦྲུལ་ནག་པོ་ཆེན་པོ་ཞིག་བྱུང་ནས་དེའི་མགོ་ནས་གཟུང་བས། སྦྲུལ་རལ་གྲིར་སོང་བས་ཡེ་ཤེས་ཀྱི་རལ་གྲི་འོད་དང་བཅས་པ་ཞིག་ལག་ཏུ་ཐོབ་སྟེ། རྐུན་མའི་སེམས་ཀྱི་དྲི་མ་དག་སྟེ། རལ་གྲིའི་དངོས་གྲུབ་ཐོབ་པས། མིང་དུ་ཡང་རྣལ་འབྱོར་པ་ཁངྒ་པཱ་ཞེས་བྱ་བར་གྲགས་ལ། ཐུན་མོང་གི་དངོས་གྲུབ་བརྒྱད་ལས་རལ་གྲིའི་དངོས་གྲུབ་ཀྱང་ཐོབ་བོ། །ལུས་ངག་ཡིད་གསུམ་གྱི་འཁྲུལ་པའི་དྲི་མ་ཐམས་ཅད་དག་ནས་མ་ག་དྷ་བའི་སེམས་ཅན་ཐམས་ཅད་ལ་ཞག་ཉི་ཤུ་རྩ་གཅིག་ཏུ་ཆོས་བསྟན། མཐར་རྟོགས་པ་བརྗོད་པ་ཡང་གསུངས་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཁངྒཔཱའི་ལོ་རྒྱུས་རྫོགས་སོ། །

༡༦༽ནཱགཱརྫུན།

 གུརུནཱགཱརྫུན་སྟེ་སློབ་དཔོན་ཀླུ་སྒྲུབ་ཀྱི་ལོ་རྒྱུས་ནི། ཡུལ་རྒྱ་གར་ཤར་ཕྱོགས་ཀཱཉྩི་ཞེས་བྱ་བའི་བྱེ་བྲག་ཀཧོར་བྱ་བ་ཡིན་ལ། རིགས་བྲམ་ཟེ། དངོས་གྲུབ་སྒྲོལ་མ་ལས་ཐོབ་པ་ཡིན་ནོ། །དེ་ཡང་ཀཧོར་ན་གྲོང་ཁྱེར་ཁྲི་ཕྱེད་དང་གཉིས་ཡོད་པ། ཀུན་ལ་འཇོམས་པ་དང་འཕྲོག་པ་བྱས་པས། བྲམ་ཟེ་ཀུན་འདུས་ནས་འདིས་འོ་སྐོལ་ཐམས་ཅད་ལ་མི་འཚམས་པ་བྱས་པས། འདི་དང་འཐབ་པ་ལས་ཡུལ་གཞན་དུ་འཁྱམས་འགྲོ་བ་དྲག་ཅེས་གྲོས་བྱས་པའི་གཏམ་དེ་སློབ་དཔོན་གྱིས་གསན་ནས་བྲམ་ཟེ་ཀུན་ལ་མི་བཏང་ནས་ཁྱེད་རྣམས་ཡུལ་གཞན་དུ་མ་འགྲོ་ཞིག་ཡུལ་གཞན་དུ་སྡུག་བསྔལ་བར་འོང་བས། ཁྱེད་ཅག་ཀུན་ཁོ་བོའི་རྫས་འདི་རྣམས་ཁྱེར་ཅིག་གསུངས་ནས་ནོར་ཐམས་ཅད་སྦྱིན་པ་བཏང་ནས། སློབ་དཔོན་ཀཧོར་ནས་བྲོས་ཏེ་བསིལ་བ་ཚལ་གྱིས་ཕ་རོལ་ནཱལནྡཱ་ར་བྱོན་ནས་རབ་ཏུ་བྱུང་སྟེ། རིག་པའི་གནས་ལྔ་ལ་སྦྱངས་པས། མཁས་པའི་མཐར་ཐུག་པར་གྱུར་ཏོ།། དེ་ནས་བཤད་པ་ལ་སྐྱོ་ནས་སྒྲུབ་པ་མཛད་པས་སྒྲོལ་མའི་ཞག་གཟིགས་ཏེ། དཔལ་ནཱ་ལཱནྡཱ་པའི་ཆོས་སྐོར་དགེ་འདུན་བརྒྱ་ཕྲག་བཞུགས་པའི་འཚོ་བ་དང་། གནས་སྤངས་ཏེ་ཡུལ་གཞན་དུ་བྱོན་ནས་གྲོང་ཁྱེར་གཅིག་ཏུ་བསོད་སྙོམས་མཛད། སླར་རང་གི་གནས་སུ་ལོག་ནས་བདག་གི་བསམ་པ་འདི་འདྲ་བས་སེམས་ཅན་གྱི་དོན་མི་འགྲུབ་པས། ཡོན་ཏན་ཐོབ་པར་བྱས་ཏེ་འགྲོ་དོན་བྱ་སྙམ་དུ་དགོངས་ནས། རྒྱལ་པོའི་ཁབ་ཏུ་ཕྱིན་ནས་འབྱུང་པོ་ཁྱུ་མཆོག་གི་འབྱུང་མོ་བཅུ་གཉིས་ཀྱི་བཟླས་པ་བྱས་པས། ཞག་དང་པོ་ལ་ས་གཡོས། གཉིས་པ་ལ་ཆུ་བརྡོལ། གསུམ་པ་ལ་མེ་འབར། བཞི་པ་ལ་རླུང་ལངས། ལྔ་པ་ལ་མཚོན་གྱི་ཆར། དྲུག་པ་ལ་རྡོ་རྗེའི་ཆར། བདུན་པ་ལ་དངོས་སུ་འབྱུང་མོ་ཀུན་འདུས་ནས་བར་གཅོད་བྱས་པ་ལ། སློབ་དཔོན་གྱི་ཐུགས་དམ་ལ་གཡོ་བ་མེད་པས། བར་གཅོད་མ་ཚུགས་པ་དང་། གནོད་སྦྱིན་མོ་ཀུན་འོངས་ནས་ཁྱེད་ལ་ཅི་དགོས། ངེད་ཀྱིས་སྦྱིན་ཟེར་བ་ལ། གཞན་མི་དགོས་ངའི་འཚོ་བ་སྦྱོར་ཅིག་གསུངས་པས། དེ་རྣམས་ཀྱིས་འབྲས་ཕུལ་བཞི་དང་ཚོད་མ་ལྔ་རྟག་ཏུ་སྟེར་བ་དེ་བཞེས་ཀྱིན་སློབ་དཔོན་གྱིས་ལོ་བཅུ་གཉིས་སྒྲུབ་པ་མཛད་པས་འབྱུང་མོ་བརྒྱ་རྩ་བརྒྱད་དབང་དུ་འདུས་ནས། འགྲོ་དོན་བྱ་སྙམ་སྟེ། རི་གྷན་དྷཱ་ཤི་ལ་བྱོན་ནས་རི་དེ་གསེར་དུ་བསྒྱུར་ནས་འགྲོ་དོན་བྱ་སྙམ་སྟེ་རི་དེ་དང་པོར་ལྕགས་སུ་བྱས། དེ་ནས་ལྕགས་ཟངས་སུ་བྱས་ཙ་ན། འཕགས་པ་འཇམ་དཔལ་གྱི་ཞལ་ནས། འདི་ལ་སེམས་ཅན་ཀུན་རྩོད་པ་ཆེན་པོ་འབྱུང་བས་སྡིག་པ་གསོག་པར་འོང་། གསུངས་ནས་འཕྲོ་བཅད་དེ་བོར་བས། གྷན་དྷ་ཤི་ལ་དེ་ད་ལྟ་ཡང་ཟངས་མདོག་སྨུགས་པོར་ཡོད། དེ་ནས་ལྷོ་ཕྱོགས་དཔལ་གྱི་རི་བོར་བྱོན་པའི་ལམ་བར་དུ་གཙང་པོའི་འགྲམ་ཞིག་ཏུ་ཕྱིན་པ་ན། བ་ལང་རྫི་དུ་མ་དང་འཕྲད་ནས་ཆུའི་ལམ་དྲིས་པ་ན། དེ་རྣམས་ཀྱིས་ལམ་ངན་པ་ཆུ་སྲིན་དང་། ངམ་གྲོག་ཅན་གྱི་མི་བདེ་བའི་ལམ་བསྟན་པ་དང་། བ་ལང་རྫི་གཞན་ཞིག་འདུག་པ་དེ་འོངས་ནས་ལམ་འདི་ལེགས་པ་མ་ཡིན། ལམ་འདི་ནས་གཤེགས་ཟེར་ནས་དེས་སློབ་དཔོན་ཁུར་ནས་ཕྱིན་པས། ཆུའི་དཀྱིལ་དུ་སློབ་དཔོན་གྱིས་སྤྲུལ་པའི་ཆུ་སྲིན་ལ་སོགས་པའི་འཇིགས་པ་སྣ་ཚོགས་བསྟན་པས། བ་རྫི་ན་རེ། བདག་མ་ཤིའི་བར་དུ་མ་འཇིགས་ཤིག །ཟེར་བས། སློབ་དཔོན་གྱིས་སྤྲུལ་པ་བརྟུལ་ཏེ་སྐམ་སར་ཕྱིན་པ་དང་། སློབ་དཔོན་གྱིས་འཕགས་པ་ཀླུ་སྒྲུབ་ཡིན་ཏེ་ཁྱོད་ཀྱིས་ངོ་ཤེས་སམ། གསུངས་པ་ལ། དེ་ན་རེ། གཏམ་ནི་ཐོས་ངོ་མི་ཤེས་ཞུས་སོ།། སློབ་དཔོན་གྱིས་བ་ལང་རྫི་དེ་ལ་ཁྱོད་ཀྱིས་ང་ཆུ་ལས་བསྒྲལ་བའི་བརྔན་པ་ཅི་དགོས་པ་སྟེར་བ་ཡིན་གསུངས་པས། བ་ལང་རྫི་ན་རེ། བདག་རྒྱལ་པོ་འོང་བའི་ཐབས་ཤིག་ཞུ་ཟེར་བ་ལ། སློབ་དཔོན་གྱིས་ཕྱོགས་དེ་ན་ཤིང་སཱ་ལའི་སྡོང་པོ་གཅིག་ཡོད་པ་ལ་ཆུ་གཏོར་བས། ཤིང་དེ་དེ་མ་ཐག་གླང་པོ་ཆེར་གྱུར་ནས་རྒྱལ་པོའི་ཞོན་པ་བྱས། དམག་ཚོགས་དགོས་ཞུས་པས་གླང་ཆེ་མཁུན་པ་ན་དམག་འོང་བ་ཡིན་གསུངས་པ་དེ་བཞིན་དུ་བྱུང་སྟེ། རྒྱལ་པོའི་མིང་སཱ་ལ་བྷན་དྷ་ཞེས་བྱ་ལ། བཙུན་མོའི་མིང་སིན་དྷི་ཞེས་བྱ་བར་གྱུར་ཏོ། །གནས་གྲོང་ཁྱེར་བྷ་ཧི་ཏན་ཞེས་བྱ་བའི་ཡུལ་ཁྱད་པར་དུ་འཕགས་པ་ཞིག་གྲུབ་སྟེ། རྒྱལ་པོ་ལ་ཁྲལ་འཇལ་བའི་གྲོང་ཁྱེར་འབུམ་ཚོ་བརྒྱད་ཅུ་རྩ་བཞི་ལ་དབང་བྱེད་པའི་རྒྱལ་པོར་བྱས་ནས། སློབ་དཔོན་ལྷོ་ཕྱོགས་དཔལ་གྱི་རི་ལ་བྱོན་ནོ། །དེར་སློབ་དཔོན་སྒོམ་སྒྲུབ་མཛད་ཀྱིན་ཡུན་རིང་དུ་བཞུགས་པ་ལ། རྒྱལ་པོ་ས་ཱལ་ཝཱ་ཧ་ནས་བླ་མ་དྲན་ཏེ་དཔལ་གྱི་རི་བོར་འོངས་ནས། སློབ་དཔོན་ལ་ཕྱག་དང་བསྐོར་བ་བྱས་ཏེ། རྒྱལ་པོས་སློབ་དཔོན་ལ་ཞུས་པ། རྒྱལ་སྲིད་ནི་མནོག་ཆུང་ལ་ཉེས་པ་ཆེ་བར་འདུག་པས་བདག་མི་དགོས། བདག་སློབ་དཔོན་གྱི་སྤྱན་སྔར་སྡོད་པ་ལགས་ཞུས་པས། སློབ་དཔོན་གྱིས། རྒྱལ་སྲིད་མ་བསྐྱུར་བར་རིན་པོ་ཆེའི་ཕྲེང་བ་ལ་སློབ་དཔོན་གྱིས་ལ་རྒྱལ་སྲིད་སྐྱོངས། དུས་མ་ཡིན་པ་འཆི་བའི་འཇིགས་པ་མེད་པའི་བཅུད་ལེན་སྦྱིན་ཀྱི་གསུངས་པས། རྒྱལ་པོ་ན་རེ། སློབ་དཔོན་དང་ལྷན་ཅིག་ཏུ་འདུག་པའི་སྐབས་ཡོད་ན་རྒྱལ་སྲིད་དང་བཅུད་ལེན་དགོས། དེ་ལྟར་མ་ཡིན་ན་མི་དགོས། ཞེས་ཟེར་ནས་འགྲོར་མ་འདོད་པར་དེ་ཉིད་དུ་གནས་པར་གྱུར་པ་ན། དེ་ལ་སློབ་དཔོན་གྱིས་གདམས་པ་གནང་སྟེ། རང་ཡུལ་དུ་བཅུད་ལེན་བསྒྲུབས། ལོ་བརྒྱའི་བར་དུ་རྒྱལ་སྲིད་བཟུང་སྟེ་གནས་སོ།། 

དེའི་བར་འགྲོ་བ་རྣམས་འབྱོར་པ་དང་ལྡན། རིའི་བྱ་དང་རི་དྭགས་ཀུན་ཀྱང་བདེ་བར་འཚོ་བ་ལས་ལོ་བརྒྱ་ན་སློབ་དཔོན་གྱིས་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་པ་ལ། བདུད་དགའ་རབ་དབང་ཕྱུག་ཕྲག་དོག་སྐྱེས་ནས་བར་ཆད་ཀྱི་ལྟས་བཀྲ་མི་ཤིས་པ་སྣ་ཚོགས་བྱུང་སྟེ། ཉི་ཟླའི་སྣང་བ་མེད་པ་མོག་མོག་པོར་གྱུར་པ་དང་། ཤིང་ཐོག་ཐམས་ཅད་རང་བཞིན་གྱིས་འབྲུལ་བ་དང་། ཆར་ཆུ་དུས་སུ་མ་བབས་པས་སྲོག་ཆགས་རྣམས་མུ་གེས་གཟིར་བ་དང་། ནད་དང་མཚོན་གྱི་བསྐལ་པ་དར་བ་དང་། རྒྱལ་པོ་སཱ་ལ་ཝཱ་ཧན་འདི་སྙམ་སྟེ། འདི་དག་ནི་གཞན་མ་ཡིན་ཏེ་ངའི་བླ་མ་ལ་གནོད་པའི་ལྟས་ཡིན་སྙམ་རང་གི་སྲས་ཙན་ཊི་ཀུམཱར་བྱ་བ་ལ་རྒྱལ་སྲིད་བྱིན་ཏེ། འཁོར་ཉུང་ཟད་ཅིག་དང་བཅས་ཏེ་དཔལ་གྱི་རི་བོར་སློབ་དཔོན་གྱི་སྤྱན་སྔར་ཕྱིན་པ་དང་། བླ་མས། བུ་དོན་ཅི་ལ་འོངས་དྲིས་པ་ལ། རྒྱལ་པོ་ན་རེ། 

བདག་དང་སེམས་ཅན་སྐལ་བ་ཟད་གྱུར་ཏམ།།

རྒྱལ་བའི་བསྟན་པ་ཉམས་པར་གྱུར་ཏམ་ཅི།།

ནག་པོའི་ཕྱོགས་རྣམས་རྒྱལ་བ་གྱུར་པ་འམ།།

ཐུགས་རྗེ་ཆེན་པོ་ཟླ་བ་ལྟར་དཀར་ལ།།

ཆར་སྤྲིན་དང་འདྲའི་བདུད་ཀྱིས་བསྒྲིབས་སམ་ཅི།།

རྡོ་རྗེ་ལྟ་བུའི་བླ་མ་དམ་པ་ལ།།

འདུས་བྱས་རང་བཞིན་བྱུང་ངམ་སྡིག་ལྟས་རྣམས།།

འབྱུང་བས་བདག་ནི་འདིར་ནི་མཆིས་པ་ལགས།།

ཐུགས་རྗེ་ཆེན་པོས་དགོངས་ལ་བྱིན་གྱིས་རློབས། །

ཞེས་ཞུས་པས། སློབ་དཔོན་གྱིས་གསུངས་པ། སྐྱེས་པ་ཐམས་ཅད་འཆི་བ་ཡིན། །འདུས་པ་ཐམས་ཅད་བྲལ། བསགས་པ་ཐམས་ཅད་འཛད། འདུས་བྱས་ཀྱི་མཐའ་ཐམས་ཅད་མི་རྟག་པ་ཡིན་ན་དེ་ལ་མི་དགའ་བ་ཅི་ཡོད། ཁྱོད་རང་བཅུད་ལེན་ཁྱེར་ལ་སོང་ཞིག་གསུངས་པས། དེ་ན་རེ། བླ་མའི་རྩར་བཅུད་ལེན་ཟ་ཡིན་འདུག་ན་འདུག །བླ་མ་མི་བཞུགས་ན་བདག་ལ་བཅུད་ལེན་མི་དགོས་ཟེར་ནས་དེར་འདུག་གོ །དེ་ནས་སློབ་དཔོན་འཕགས་པས་དངོས་པོ་ཐམས་ཅད་སྦྱིན་པར་བཏང་བ་ལ། ལྷ་ཚངས་པས་བྲམ་ཟེ་ཞིག་ཏུ་སྤྲུལ་ནས་དབུ་བསླངས་པས། སློབ་དཔོན་གྱིས་ཀྱང་སྟེར་བར་ཞལ་གྱིས་བཞེས་པ་དང་། འདིའི་མ་དཔེ་ཀུན་ཏུ་མཐུན་པར་ཚངས་པའི་སྤྲུལ་པ་བྲམ་ཟེ་ཞིག་གིས་སློབ་དཔོན་གྱི་དབུ་བསླངས། ཞེས་བྱུང་ལ། པད་དཀར་ཆོས་འབྱུང་སོགས་ཆོས་འབྱུང་གཞན་ཀུན་ལས་མཐུན་པར། རྒྱལ་པོ་བདེ་སྤྱོད་ཀྱི་སྲས། གཞོན་ནུ་ནུས་ལྡན་༼འདིར་ཙན་ཌི་ཀུ་མཱ་ར་ཞེས་བཤད་པ་དེས༽ མ་ལས་གོས་སྲུབ་མེད་པ་ཞིག་སྦྱིན་པ་ན། བུས་དེ་མ་གྱོན་པར་བཞག མས་རྒྱུ་མཚན་དྲིས་པའི་ལན་དུ། རྒྱལ་པོའི་ཁྲི་ལ་འདུག་པའི་དུས་སུ་གྱོན་བྱས་པས། མས་བུ་ལ་རྒྱལ་སྲིད་མི་ཐོབ་པའི་རྒྱུ་མཚན་དུ། དེའི་ཕ་ཀླུ་སྒྲུབ་དང་སྐུ་ཚེ་མཉམ་ཚུལ་དང་། སློབ་དཔོན་བྱང་ཆུབ་སེམས་དཔའ་ཡིན་པས། དེའི་དབུ་ལེན་དགོས་ཚུལ་སོགས་སྨྲས་པ་རྒྱུ་མཚན་དུ་བྱས་ཏེ། རྒྱལ་བུ་གཞོན་ནུ་ནུས་ལྡན་ཉིད་ཀྱིས་སློབ་དཔོན་གྱི་དབུ་བསླངས་པར་བཤད་དོ།། རྒྱལ་པོ་སཱ་ལ་ཝཱ་ཧན་སློབ་དཔོན་འགྲོངས་པའི་སྡུག་བསྔལ་མ་བཟོད་ནས། སློབ་དཔོན་གྱི་ཞབས་ལ་སྤྱི་བོས་གཏུགས་ཏེ་གྲོངས་སོ། །མི་ཐམས་ཅད་ཀྱང་བྲམ་ཟེ་དེ་ལ་ཁ་ཟེར་བར་བྱེད་དོ། །དེའི་དུས་སུ་སློབ་དཔོན་གྱིས་དབུ་བྱིན་པས་གཞན་གང་གིས་ཀྱང་མ་ཆོད་པ་ན་རྩ་ཀུ་ཤ་གཅིག་གིས་རང་གི་དབུ་བཅད་ནས་ཚངས་པ་བྱིན་ནོ། །དེ་ནས་ཤིང་ཐམས་ཅད་ཀྱང་སྐམས། མི་ཐམས་ཅད་ཀྱི་བསོད་ནམས་ཀྱང་འགྲིབས་སོ། །སྔོན་གྱི་གནོད་སྦྱིན་མོ་ འདིར་སྔར་གྱི་གནོད་སྦྱིན་མོ་བརྒྱད་ཅེས་འབྱུང་ཡང་། དོན་ནི་སྔོན་འབྱུང་པོ་ཁྱུ་མཆོག་གི་འབྱུང་མོ་བཅུ་གཉིས་ཀྱིས་འཚོ་བ་སྦྱར་ནས་བསྒྲུབས་སྐབས་གྲུབ་པའི་འབྱུང་མོ་བརྒྱ་རྩ་བརྒྱད་པོ་དེ་རྣམས་ཡིན་ནོ།། བརྒྱད་ཀྱིས་སློབ་དཔོན་གྱི་སྐུ་ལུས་བསྲུང་ནས་ད་ལྟ་ཡང་ཡོད་དོ། །བླ་མའི་གདུང་འཚོབ་ཏུ་ཀླུའི་བྱང་ཆུབ་བཞུགས་ བླ་མའི་གདུང་ཚོབ་ཏུ་ཀླུ་བྱང་བཞུགས་པར་བཤད་པ་ནི། གསང་འདུས་འཕགས་ལུགས་པ་རྣམས་ཀྱིས་བཞེད་པ་དང་། སྔགས་ལུགས་སུ་སྣང་གི །གཞན་དུ་སློབ་དཔོན་གྱིས་བསྟན་པ་འཕགས་པ་ལྷ་ལ་གཏད་པར་བཤད་དོ།། པའི་འོད་ནུབ་མོ་འཕྲོ་བ་ཟ་རེར་ཙམ་ད་ལྟ་ཡང་ཡོད་དོ། །སློབ་དཔོན་གྱི་སྐུ་ལུས་དེ་རྒྱལ་བ་བྱམས་པའི་བསྟན་པ་ལ་སླར་བཞེངས་ནས་འགྲོ་བའི་དོན་མཛད་གསུངས་སོ། །གུ་རུ་ཀླུ་སྒྲུབ་ཀྱི་ལོ་རྒྱུས་རྫོགས་སོ།། །།

༡༧༽གུརུཀཎཧཔཱ།

 གུརུཀཎཧཔཱའི་ལོ་རྒྱུས་ནི། ཨཱ་ཅཱརྻཀཎཧཔཱ་བྱ་བ་སློབ་དཔོན་ནག་པོ་སྤྱོད་པ་བ། ཡུལ་སོ་མ་པཱུ་རི། བླ་མ་ཛཱ་ལན་དྷ་ར་པཱ། རིགས་ཡི་གེ་པ། དེ་རྒྱལ་པོ་ལྷ་སྐྱོང་གིས་བཞེངས་པའི་གཙུག་ལག་ཁང་སོ་མ་པཱུ་རིའི་དགེ་སློང་ཞིག་ཡིན་པ་ལ། བླ་མ་ཛཱ་ལན་དྷ་ར་པཱས་དབང་བསྐུར། དགྱེས་པ་རྡོ་རྗེའི་གདམས་པ་གནང་ནས་ལོ་བཅུ་གཉིས་བསྒྲུབས་པས། དུས་རེ་ཞིག་ན་ས་གཡོ་བར་བྱེད་ཅིང་། དགྱེས་པ་རྡོ་རྗེའི་ལྷ་ཚོགས་ཞལ་གཟིགས་པས་དགའ་བ་སྐྱེས་པ་ན། ཊཱ་ཀི་མས་རིགས་ཀྱི་བུ། འདི་ནི་མཚན་མ་ཁྱད་པར་ཅན་མ་ཡིན་པས་མ་སྙེམས་ཤིག །བདེན་པ་དེ་ཁོ་ན་ཉིད་རྟོགས་པ་མེད་པས་སོ་ཞེས་ཟེར། ཡང་ཕ་ཝང་ཞིག་ཡོད་པ་དེ་ལ་ཞབས་བཞག་པས་ཞབས་རྡོ་ལ་ནུབ་པ་དང་། སློབ་དཔོན་ང་རྒྱལ་སྐྱེས་ཏེ། ད་ནི་དངོས་གྲུབ་ཐམས་ཅད་ཐོབ་སྙམ་པ་དང་། ཡང་ཊཱ་ཀི་མས་བཟློག་གོ །ཡང་ཕྱིར་བྱུང་བ་དང་ཞབས་ཁྲུ་གང་ཙམ་གྱིས་ས་ལ་མི་རེག་པ་དང་། ང་རྒྱལ་སྐྱེས་པས་སྔར་བཞིན་ནོ། །གཞན་ཡང་ནམ་མཁའ་ལ་གདུགས་བདུན་དང་། ཌཱ་མ་རུ་བདུན་ནམ་མཁའ་ལ་འགྲོ་བ་དང་། རང་སྒྲ་འབྱུང་བ་ཐོས་ནས་ད་ནི་བདག་གིས་དངོས་གྲུབ་ཐོབ་སྙམ་ནས། སློབ་མ་ཀུན་ལ་ངས་གྲུབ་པ་ཐོབ་ནས་འགྲོ་དོན་ལ་སྲིན་ཡུལ་ལངྐ་པུ་རིའི་ཡུལ་དུ་འདེངས་ཤིག་གསུངས་ནས། སློབ་མ་འཁོར་གསུམ་སྟོང་དང་ལྷན་ཅིག་ཏུ་ཆས་ཏེ་ཕྱིན་པ་དང་། འཁོར་རྣམས་ཆུ་ཁར་བོར། ཀཎ་ཧ་པཱ་རང་རྒྱ་མཚོ་ལ་བྱིང་བ་མེད་པར་ཕྱིན་པ་ན། ཐུགས་ལ་བདག་གི་བླ་མ་ལ་ནུས་པ་མི་མངའ་བ་ལ་བདག་ལ་འདི་ལྟ་བུའི་ནུས་པ་ཡོད་སྙམ་པའི་ང་རྒྱལ་བྱུང་བས་ནུས་པ་ཉམས་ཏེ་དེ་ཉིད་དུ་ཆུར་ནུབ་ནས། ཆུའི་རླབས་ཀྱིས་མཐར་བཏོན་ནས་ནམ་མཁའ་ལ་བལྟས་པས། བླ་མ་ཛཱ་ལན་དྷ་ར་པཱ་ནམ་མཁའ་ལ་བྱོན་པ་མཐོང་ནས་བླ་མའི་ཞལ་ནས་ཀན་ཧ་པཱ་གར་ཕྱིན། ཅི་ཉེས་གསུངས་པས། ཀནྷ་པ་ངོ་ཚ་བཞིན་དུ་བླ་མ་ལ་ཞུས་པ། བདག་སྲིན་ཡུལ་ལངྐ་པུ་རིར་འགྲོ་དོན་ལ་ཆས་པ་ན། བླ་མ་པས་བདག་ནུས་མཐུ་ཆེ་སྙམ་པའི་ང་རྒྱལ་སྐྱེས་པས་ནུས་པ་ཉམས་ཏེ་ཆུར་ནུབ་པར་གྱུར་ཏོ། །ཞེས་ཞུས་པས། བླ་མའི་ཞལ་ནས། ད་འདིས་མི་ཕན་པའི་ངའི་ཡུལ་སཱ་ལི་པུ་ཏྲ་བྱ་བ་ན་ཆོས་ཀྱི་རྒྱལ་པོ་དྷརྨ་པཱ་ལ་བྱ་བ་བཞུགས། དེ་ན་ངའི་སློབ་མ་ཐགས་མཁན་ཞིག་ཡོད་ཀྱི། དེར་སོང་ལ་དེས་ཅི་སྨྲས་པ་བཞིན་གྱིས་ཤིག །གསུངས་པས། ཀནྷ་པཱས། དེ་བཞིན་བྱ་སྙམ་པས་དེ་ཉིད་དུ་གདམས་ངག་གང་ཡིན་པ་ཡིད་ལ་བྱས་པས། རྐང་པ་ས་ལ་མི་རེག་པ་དང་། གདུགས་དང་ཌཱ་མ་རུ་ནམ་མཁའ་ལ་འདུག་པ་དང་། ཕ་ཝང་ལ་རྐང་པ་བྱིང་ལ་སོགས་པ་སྔར་གྱི་ནུས་པ་རྣམས་ཐོབ་ནས་འཁོར་གསུམ་སྟོང་དང་བཅས་པ་ཡུལ་སཱའི་པུ་ཏྲར་བྱོན་པ་དང་། སློབ་མ་རྣམས་ཕྱོགས་གཅིག་ཏུ་བོར་ཏེ། སློབ་དཔོན་ཐགས་མཁན་འཚོལ་དུ་ཕྱིན་ཏོ།། ལམ་དུ་ཐགས་མཁན་མང་པོ་དང་འཕྲད་པ་ལ་སློབ་དཔོན་གྱིས་གཟིགས་པས། སྣལ་མ་ཆད་པ་ལ་རང་གིས་མཐུད་དགོས་པ་འདི་ཀུན་མ་ཡིན་ངེས་སྙམ་སྟེ། གྲོང་གི་མཐའ་ན་ཐགས་མཁན་ཞིག་འདུག་པའི་སར་ཕྱིན་ནས་བལྟས་པས། སྣལ་མ་ཆད་པ་ཐམས་ཅད་མཐུད་མ་དགོས་པར་རང་འབྱར་ལ་འགྲོ་བ་མཐོང་བས། འདི་ཡིན་པ་ངེས་སྙམ་ནས་ཞབས་ལ་ཕྱག་བཙལ། བསྐོར་བ་བྱས་པ་དང་། ཐགས་མཁན་གྱིས་སྨྲས་པ་ངས་ཅི་ཟེར་བ་བཞིན་ཉན་ནམ། ཟེར་བ་ལ་ཉན་བྱས་ཏེ། གཉིས་ཀ་དུར་ཁྲོད་དུ་ཕྱིན་ནས་མིའི་རོ་ཞིག་དང་འཕྲད་པ་ན། ཐགས་མཁན་དེ་ན་རེ། ཁྱོད་ཀྱིས་ཤ་ཟ་ནུས་སམ། ནུས་ན་ཟོ་ཞིག་ཟེར་བ་ལ། ཀཎ་ཧ་པཱས་གྲི་བཏོན་ནས་གཅོད་པར་བརྩམས་པ་ལ། ཐགས་མཁན་ན་རེ། ད་དུང་སྡོད་ཅིག་ཟེར་ནས། དེས་སྤྱང་ཀིར་སྤྲུལ་ནས་ཤ་ཟོས་སོ། །དེ་ནས་ཐགས་མཁན་ན་རེ། འདི་འདྲ་བར་སྤྲུལ་ནུས་པའི་དུས་སུ་གཟོད་ཤ་ཟ་བ་ཡིན་ཟེར་རོ།། དེ་ནས་ཐགས་མཁན་གྱིས་དྲི་ཆེན་རིལ་བུ་གསུམ་བཏང་ནས་ཀཎ་ཧ་པ་ལ་གཅིག་བྱིན་ནས་ཟོ་ཞིག་ཟེར་བ་ལ། ང་ལ་མིས་འཕྱ་བར་འོང་ཟེར་ནས་ཟར་མ་འདོད་པ་དང་། གཅིག་ཐགས་མཁན་རང་གིས་ཟོས། གཅིག་ནམ་མཁའི་ལྷ་རྣམས་ཀྱིས་ཁྱེར། གཅིག་ས་འོག་གི་ཀླུ་རྣམས་ཀྱིས་ཁྱེར་རོ། །དེ་ནས་གཉིས་ཀ་ཡུལ་དུ་ལོག་བྱོན་ནས། ཐགས་མཁན་གྱིས་པ་ཎ་ལྔས་ཆང་དང་བཟའ་བ་ཉོས་ནས་འདི་སྐད་དུ། ད་ཁྱོད་ཀྱི་འཁོར་ཀུན་སྦྲོན་ལ་ཤོག་ཅིག་རང་ཅག་ཚོགས་ཀྱི་འཁོར་ལོ་ཞིག་བྱ་དགོས་གསུངས་པ་ལ། ཀཎ་ཧ་པཱ་འདི་སྙམ་དུ་འདིས་མི་གཅིག་རང་ཡང་འགྲངས་པར་མི་འགྱུར་ན། ངེད་དཔོན་སློབ་དཔོན་སུམ་སྟོང་འདིས་ཇི་ལྟར་བྱ་སྙམ་པ་ནས་དཔོན་སློབ་ཀུན་བྱོན་པ་དང་། རྣལ་འབྱོར་པའི་བྱིན་རླབས་ཀྱིས་ལ་དུ་དང་འབྲས་ཆན་ལ་སོགས་པའི་འདོད་ཡོན་གྱིས་སྣོད་ཐམས་ཅད་གང་བར་གྱུར་ནས། ཞག་བདུན་ཀྱི་བར་དུ་ཚོགས་ཀྱི་ཡོད་བྱད་ལ་ལོངས་སྤྱད་ཀྱང་ཟད་པར་མ་གྱུར་པ་དང་། ཀཎ་ཧ་པཱས་ཉིད་ཅག་གི་བཟའ་བཏུང་རྒྱ་མཚོ་དང་འདྲ་བ་དངོས་ཅག་གི་འཚལ་རྔོ་མི་ཐོགས་ཟེར་ནས། ལྷག་རོལ་དོར་ཏེ་ཀཎ་ཧ་པཱ་འཁོར་དང་བཅས་པ་ཆས་པ་ན། ཐགས་མཁན་གྱིས་སྨྲས་པ། 

ཀྱེ་མ་བྱིས་པའི་སྐྱེ་བོ་རྣམས།།

རང་གིས་རང་ཉིད་ཕུང་བར་འགྱུར།།

ཐབས་དང་ཤེས་རབ་བྲལ་བ་ཡི།།

རྣལ་འབྱོར་པ་དག་དེ་བཞིན་ནོ།།

ད་གཞན་དུ་ཕྱིན་ཡང་མི་ཕན། གདུགས་དང་ཌཱ་མ་རུ་སོགས་དངོས་གྲུབ་ཕྲ་མོ་ཡིན། ད་དུང་ཆོས་ཉིད་མ་རྟོགས་པས་སྒྲུབ་པ་གྱིས་བྱས་པས། ཀ་ཎ་ཧ་པཱ་དེ་མ་འདོད་ནས་བྷ་དྷོ་ཀོར་ཞེས་བྱ་བའི་ཡུལ་དུ་ཕྱིན་པ་དང་། ཤར་ཕྱོགས་སོ་མ་པཱུ་རིའི་གཙུག་ལག་ཁང་ནས་དཔག་ཚད་བརྒྱ་ཙམ་གྱི་ཕ་རོལ་ན་ཡོད་པའི་གྲོང་ཁྱེར་ཞིག་གི་འགྲམ་དུ་བྱོན་པ་ན། དེ་ན་ལཱི་ཅཱི་བྱ་བའི་ཤིང་ཐོག་ཡོད་པའི་ཤིང་དྲུང་ན་བུ་མོ་ཞིག་འདུག་པ་ལ། ཀཎ་ཧ་པཱས་ང་ལ་ཤིང་ཐོག་བྱིན་ཅིག་གསུངས་པས། བུ་མོ་དེས་སྟེར་དུ་མ་འདོད་པ་དང་། སློབ་དཔོན་གྱིས་ལྟ་སྟངས་ཀྱིས་ཤིང་ཏོག་ས་ལ་ཕབ། བུ་མོས་སླར་ལྟ་སྟངས་ཀྱིས་ཤིང་ཏོག་དེ་དག་ཤིང་ལ་སྦྱར་བ་དང་། ཀཎ་ཧ་པཱ་ཁྲོས་ནས་བུ་མོ་ལ་སྔགས་བཟླས་པས་བུ་མོའི་ཡན་ལག་ཐམས་ཅད་ནས་ཁྲག་འཛག་སྟེ་ས་ལ་འགྱེལ་པ་དང་མི་ཀུན་འཕྱ་བར་གྱུར་ཏེ། སངས་རྒྱས་པ་བྱ་བ་ཐུགས་རྗེ་ཆེ་བ་ཡིན་པ་ལ། རྣལ་འབྱོར་པས་མི་བསད་ཟེར་བ་དང་། ཀཎ་ཧ་པཱ་སེམས་ཞི་ནས་བུ་མོ་ལ་སྙིང་རྗེའི་སེམས་སྔོན་དུ་བཏང་སྟེ་སྔགས་བརྟུལ། རང་གི་སྲུང་བ་ཡང་བཏང་བ་དང་། བུ་མོས་ཀཎ་ཧ་པཱ་ལ་སྔགས་བཏབ་པས། ཀཎ་ཧ་པཱ་ཡང་སྟེང་འོག་ཏུ་ཁྲག་སྐྱུགས་ནས་ན་བར་གྱུར་པ་དང་། ཀཎ་ཧ་པཱ་ལ་བྷན་དྷེ་བྱ་བའི་མཁའ་འགྲོ་མ་ཞིག་ཡོད་པ་ལ་སྨྲས་པ། བདག་གི་སྐྱུགས་པ་འདི་ལ་ཕན་པའི་སྨན་ལྷོ་ཕྱོགས་དཔལ་གྱི་རི་ལ་ཡོད་པས་དེ་ལོང་ལ་ང་ལ་བྱིན་ཅིག་སྨྲས་པ་དང་། བྷན་དྷེས་ལྷོ་ཕྱོགས་དཔལ་གྱི་རི་ལ་ཟླ་བ་དྲུག་གི་ལམ་ཡོད་པ་ཞག་དྲུག་ལ་བཅད་ནས་སྨན་བླངས་ཏེ། ཞག་བདུན་གྱིས་ངོ་ལ་ཡུལ་དུ་སླེབས་པའི་ལམ་ཁར་སྔར་གྱི་བུ་མོ་དེས་རྒན་མོ་ཞིག་ཏུ་སྤྲུལ་ནས་ངུ་ཡིན་བསྡད་པ་དང་། དེས་བྷན་དྷེས་ཁྱོད་ཅི་ལ་ངུ་བ་ཡིན་བྱས་པས། དེ་ན་རེ། ཅི་ལ་མི་ངུ་། རྣལ་འབྱོར་པ་ཀན་ཧ་པཱ་ཤི་ནས་མེད་པས་ངུ་བ་ཡིན་ཟེར་བ་དང་། མཁའ་འགྲོ་བྷན་དྷེས། འོ་ན་སྨན་གྱིས་དགོས་པ་མེད་སྙམ་ནས་སྨན་ས་ལ་སྐྱུར་བ་དེ་རྒན་མོས་ཁྱེར་རོ། མཁའ་འགྲོ་མ་ཁྱིམ་དུ་སླེབས་པ་ན་ཀཎ་ཧ་པཱ་མ་ཤི་བར་འདུག་པས། ཀཎ་ཧ་པས་སྨན་ག་རེ་ཟེར་བ་ན་སྔར་གྱི་གཏམ་བརྗོད་དེ་མེད་བྱས་སོ།། དེ་ནས་ཞག་བདུན་དུ་སློབ་མའི་ཚོགས་ལ་ཆོས་བཤད། འཕགས་མོ་དབུ་བཅད་མའི་གདམས་ངག་བྱིན་ནས། སློབ་དཔོན་གྱི་རྣམ་སྨིན་གྱི་ལུས་དེ་ཉིད་དུ་བོར་ནས་མཁའ་སྤྱོད་དུ་གཤེགས་སོ།། དེ་ནས་མཁའ་འགྲོ་མ་བྷན་དྷེ་ཁྲོས་ནས། ད་ཅིའི་བུ་མོ་དེ་བཙལ་ན། སྟེང་ལྷ་ཡུལ་དང་། འོག་ཀླུའི་ཡུལ་དང་། བར་མིའི་ཡུལ་གང་ནས་ཀྱང་མ་རྙེད་པ་ལས། ཤམ་བྷི་ལ་བྱ་བའི་ཤིང་ཞིག་གི་ནང་ན་འདུག་པ་ལ་མཁའ་འགྲོ་མས་དེ་བཟུང་ནས་སྔགས་བཏབ་སྟེ། ཡང་བསད་པར་གྱུར་ཏོ།། དེས་ན་ང་རྒྱལ་དང་། ཕྲག་དོག་ནི་བར་ཆད་ཡིན་པར་ཤེས་པར་བྱའོ།། གུརུཀཎཧཔཱའི་ལོ་རྒྱུས་རྫོགས་སོ།། །།

༡༨༽གུརུཀཎརིཔཱ། 

གུརུཀཎརིཔཱའི་ལོ་རྒྱུས་ནི། སྐྱེ་གནས་བཞི་ལས་བརྫུས་སྐྱེས་ཡིན། དཔལ་ནཱ་ལནྡཱའི་གཙུག་ལག་ཁང་ནས་ཕར་གཤེགས་ཏེ་རབ་ཏུ་བྱུང་བ་ཐམས་ཅད་ཀྱི་མཁན་པོ་མཛད་ནས་མཁན་བུ་འབུམ་ཡོད་པ་ལས། རང་ཉིད་ཀྱིས་སློབ་དཔོན་མང་པོ་ལས་གདམས་ངག་ཞུས་ཀྱང་རྟོགས་པ་མ་སྐྱེས་ནས། ཡུལ་ལྷོ་ཕྱོགས་ཀྱི་རྒྱུད་ན་སློབ་དཔོན་ཀླུ་སྒྲུབ་བཞུགས་པའི་གཏམ་ཐོས་ནས། དད་པ་དང་མོས་པ་ཁྱད་པར་ཅན་སྐྱེས་ནས་ལམ་དུ་ཞུགས་ཏེ་ཕྱིན་ཏོ། །རྒྱ་མཚོ་ཆེན་པོ་ཞིག་གི་འགྲམ་དུ་སླེབས་པ་ན་འཕགས་པ་འཇམ་དཔལ་གྱིས་ཉ་པ་ཞིག་ཏུ་སྤྲུལ་ནས་བཞུགས་པ་ཀ་ཎ་རི་པཱས་མཐོང་སྟེ། དེ་ལ་ཕྱག་དང་མཎྜལ་ཕུལ་ཏེ། བདག་ཡུལ་ལྷོ་ཕྱོགས་ཀྱི་རྒྱུད་ན་སློབ་དཔོན་ཀླུ་སྒྲུབ་བཞུགས་པའི་སར་འགྲོ་བ་ལགས་པས་བདག་ལ་ལམ་སྟོན་པར་ཞུ་ཞེས་སྨྲས་པ་དང་། དེ་ན་རེ། ཕ་གི་ནགས་འཐུགས་པོའི་ནང་ན་བཅུད་ལེན་སྒྲུབ་ཅིང་བཞུགས་སོ་ཞེས་ལུང་བསྟན་ནས་དེར་ཕྱིན་པས། སློབ་དཔོན་བཅུད་ལེན་གྱི་རྫས་བསགས་ནས་དེ་སྦྱོར་ཀྱིན་བཞུགས་པ་མཐོང་ནས་ཕྱག་བྱས། གསོལ་བ་བཏབ་ནས་རྗེས་སུ་གཟུང་བར་ཞུས་པས། གནང་སྟེ། གསང་བ་འདུས་པའི་དཀྱིལ་འཁོར་དུ་དབང་བསྐུར། གདམས་ངག་བྱིན་ནས་སློབ་དཔོན་གྱི་གམ་དུ་སྒོམ་གྱིན་བཞུགས་སོ། །དེ་ནས་ནགས་དེ་དང་ཧ་ཅང་མི་རིང་བ་ཞིག་ན་གྲོང་ཁྱེར་ཞིག་ཡོད་པ་ལ། དེར་དཔོན་སློབ་གཉིས་ཀ་བསོད་སྙོམས་ལ་བྱོན་པས། ཀ་ཎ་རི་པཱས་བསོད་སྙོམས་ཤིན་ཏུ་ཞིམ་པ་རྙེད་ལ། སློབ་དཔོན་གྱིས་ཞིམ་པ་མ་རྙེད་ནས། སློབ་དཔོན་གྱིས་གསུངས་པ། ཁྱོད་ཀྱི་འདི་ནི་བུད་མེད་ཆགས་ནས་སྟེར་བ་ཡིན་པས་མི་ཞིམ་པ་ཡིན་ནོ། །ཁྱོད་ཀྱིས་ཟས་ཞིམ་པོ་རྙེད་པ་མ་ལེགས། དེ་ཡང་ཤིང་གི་འདབ་མའི་སྟེང་དུ་མ་ལེན་པར་ཁབ་ཀྱི་རྩེ་ལ་ཆགས་པ་དེ་ལོང་གསུངས། དེ་བཞིན་དུ་བྱས་ཏེ་འབྲས་ཆན་རྡོག་མ་གཅིག་བླངས་ཏེ་ཟོས་པས། དེའི་ནང་པར་བུད་མེད་རྣམས་ཀྱིས་བག་ཕྱེ་ལ་ཁུར་བ་བྱས་ནས་དེའི་སྟེང་དུ་བཟའ་བ་ཞིམ་པོ་སྣ་ཚོགས་བཞག་སྟེ། ཁབ་ཀྱི་རྩེ་མོ་ལ་བཀལ་ནས་དྲངས་པས། དེ་བླ་མ་ལ་ཡང་དྲངས། ང་གིས་ཀྱང་གསོལ་བས་བླ་མས་ཞལ་ནས། ཁྱོད་ཀྱི་འདི་ཅི་ཙུག་བྱས་ནས་བླངས་པ་ཡིན་གསུངས། དེ་ན་རེ། བདག་གིས་བླ་མ་རང་གིས་གསུངས་པ་བཞིན་བྱས་ནས་བླངས་པ་ལགས་ཞུས་པས། འོ་ན་ཁྱོད་གྲོང་ཁྱེར་དུ་མ་འགྲོ་བར་ཁང་པའི་ནང་དུ་སྡོད་ཅིག །གསུངས་པས། དེ་བཞིན་བྱས་ཏེ་བསྡད་པ་ན། ཤིང་གི་ལྷ་མོས་ཁང་པའི་ནང་དུ་བཟའ་བ་ཞིམ་པོ་མང་པོ་དྲངས་ཏེ་རང་གི་གཟུགས་དངོས་སུ་བསྟན་ཕྱག་བཙལ་གཏམ་བྱས་སོ།། དེའི་བསོད་སྙོམས་ཀྱང་བླངས་ཏེ་བླ་མ་ལ་དྲངས་པས། ཁྱོད་ཀྱིས་འདི་འདྲ་བ་གང་ནས་རྙེད་གསུངས་པ་ལ། ཤིང་གི་ལྷ་མོས་དྲངས་པ་ཡིན་ཞུས་པས། སློབ་དཔོན་འཕགས་པས་བདེན་ནམ་སད་པའི་ཕྱིར་ཤིང་གི་ལྷ་མོའི་ཅན་དུ་བྱོན་ནས་བལྟས་པས། ལྷ་མོའི་གཟུགས་ནི་དངོས་སུ་མ་མཐོང་། དཔུང་པ་མན་ཆད་ཀྱི་ལག་པ་མཐོང་ནས། དེར་སློབ་དཔོན་གྱིས་ངའི་སློབ་མ་ལ་གཟུགས་དངོས་སུ་སྟོན་ལ། ང་ལ་མི་སྟོན་པ་ཅི་ཡིན་གསུངས་པས། ཤིང་དེ་ལས་སྒྲ་འདི་ལྟ་བུ་བྱུང་སྟེ། ཁྱོད་ལ་ད་དུང་ཉོན་མོངས་པའི་ཆ་ཤས་མ་སྤངས་པར་འདུག་ལ། ཁྱོད་ཀྱི་སློབ་མས་ཉོན་མོངས་པ་མ་ལུས་པ་སྤངས་པས་ང་མཐོང་ངོ་ཞེས་ཟེར་རོ།། དེར་མཁན་སློབ་གཉིས་བཀའ་བགྲོས་ནས་བཅུད་ལེན་གྱི་སྨན་བཟའ་དགོས་ཟེར་ཏེ། སློབ་དཔོན་གྱི་ཀ་ཎ་རི་པཱས་པཱ་བྱ་བ་ཨཱརྻ་དེ་ཝ་ལ་བྱིན། རང་ཉིད་ཀྱི་ཀྱང་གསོལ་ཏོ། །དེ་ནས་ཀ་ཎ་རི་པཱས་ཤིང་སྐམ་པོ་ཞིག་ལ་བཅུད་ལེན་གྱི་སྨན་བྱུགས་པས་ལོ་མ་སྐྱེས་པ་དང་། དེ་སློབ་དཔོན་གྱིས་གཟིགས་ནས་ཅུང་ཟད་བཞད་དེ། ཁྱོད་ཀྱིས་ངའི་བཅུད་ལེན་གྱི་སྨན་ཤིང་ལ་བྱུགས་ན། ད་ངའི་བཅུད་ལེན་ཁྱེར་ལ་ཤོག་གསུངས་པས། ཀ་ཎ་རི་པཱ་ན་རེ། བཞེད་ན་འབུལ་ཟེར་ནས། ཆུ་རྫ་མ་གང་གི་ནང་དུ་རང་གི་དྲི་ཆུ་བཏང་ནས་ཤིང་བུས་དཀྲུགས་པས། བཅུད་ལེན་གྱི་རྫས་སུ་སོང་བས་དེ་ཁྱེར་ནས་སློབ་དཔོན་གྱི་ཐད་དུ་ཕྱིན་ཏེ་ཕུལ་བ་དང་། སློབ་དཔོན་གྱིས་འདི་རེ་མང་གསུངས་ནས་ཤིང་སྐམ་པོ་ལ་གཏོར་བས། དེ་ལས་ལོ་མ་སྐྱེས་སོ། །དེ་ཡང་སློབ་དཔོན་གྱིས་སློབ་མ་ལ་རྟོགས་པ་སྐྱེས་སམ་མ་སྐྱེས་བརྟགས་པ་ཡིན་ནོ། །དེར་རྟོགས་པ་སྐྱེས་པར་གོ་ནས་སློབ་དཔོན་གྱིས་ད་ཁྱོད་འཁོར་བར་མ་འདུག་གཅིག་གསུངས་པས། དེ་ཐོས་པའི་མོད་ལ་བར་སྣང་ལ་གཤེགས་པར་ཆས་པ་ལ། སྔར་ནས་སློབ་དཔོན་ལ་བསྙེན་བཀུར་བྱེད་ཅིང་ཕྱག་ཕྱིར་འབྲངས་པའི་ཤིང་ལྷ་བུད་མེད་ཅིག་ཡོད་པ་ལ། སློབ་དཔོན་གྱིས་ཁྱོད་ཅི་འདོད་ནས་བདག་ལ་ཡུན་རིང་དུ་བསྙེན་བཀུར་བྱེད་པ་ཡིན། ཞེས་སྨྲས་པ་དང་། བུད་མེད་དེས། བདག་ལ་ཅི་ཡང་མི་དགོས་ཀྱི། ཁྱོད་ཀྱི་སྤྱན་ལ་ཆགས་ནས་འགྲོགས་པ་ཡིན་པས་སྤྱན་དགོས་ཟེར་བ་ལ། སློབ་དཔོན་རང་གི་སྤྱན་གཡས་པ་བཏོན་ནས་དེ་ལ་བྱིན་པས། ཕྱོགས་ཐམས་ཅད་དུ་ཨཱརྻ་དེ་ཝ་པ་མིག་གཅིག་པ་ཞེས་གྲགས། ཨཱརྻ་དེ་ཝ་ཀ་ཎ་རིས་དེས་བླ་མ་ཀླུ་སྒྲུབ་ཀྱིས་གདམས་ངག་ཉམས་སུ་བླངས་པས་སེམས་ཀྱི་དྲི་མ་དག །རྒྱུད་ཡོངས་སུ་གྲོལ་ནས་བླ་མའི་གསུང་ཐོས་པ་ཙམ་གྱིས་མོད་ལ་བར་སྣང་ལ་ཤིང་ཏཱ་ལ་བདུན་ཙམ་དུ་འཕགས་ནས་འགྲོ་བ་དུ་མ་ལ་ཆོས་བསྟན་པས་རྒྱུད་ཡོངས་སུ་སྨིན་པར་བྱས་ནས་རང་གི་འོག་ན་བླ་མ་བཞུགས་པ་ལ་རྐང་པ་ནམ་མཁའ་ལ་བསྟན་མགོ་ཐུར་དུ་ཕྱོགས་ནས་ཐལ་མོ་སྦྱར་ཏེ་བླ་མ་ལ་ཕྱག་བྱས་ནས་མེ་ཏོག་གི་ཆར་ཕབ་ནས་དེ་ཉིད་དུ་མི་སྣང་བར་གྱུར་ཏོ། །སློབ་དཔོན་ཨཱརྻདེཝའམ་གུརུཀཎརིཔཱ་སྟེ་མཚན་གཉིས་ལྡན་དེའི་ལོ་རྒྱུས་རྫོགས་སོ།། །།

༡༩༽གུརུཐཀནཔཱ།

གུརུཐཀནཔཱ་ཞེས་པ་རྫུན་སྨྲ་བ་ཞེས་བྱ་བ་ཡིན་ལ། དེའི་ལོ་རྒྱུས་ནི་ཡུལ་རྒྱ་གར་ཤར་ཕྱོགས། རིགས་དམངས་རིགས། ལས་ཀྱི་མཐས་འཚོ་བ་ཞིག་ཡིན། དེ་ཡང་དུས་རེ་ཞིག་གི་ཚེ་ན་ཤིང་སྡོང་པོ་ཞིག་གི་སྟེང་དུ་འདུག་ནས་གཞན་ལ་རྫུན་ཇི་ལྟར་སྨྲའམ་སྙམ་པའི་རྟོག་པ་ལ་ཞུགས་པ་དང་། དེའི་གན་དུ་ལེགས་པར་སྦྱངས་པའི་དགེ་སློང་ཞིག་འོངས་ནས། ཁྱོད་དེ་ན་ཅི་བྱེད་ཅིང་འདུག་གསུངས་པ་ལ། དེ་ན་རེ། འཕགས་པ་ཞུ་མ་འཚལ་ལོ། །དགེ་སློང་གི་ཞལ་ནས་ཁྱོད་རྫུན་མ་བྱེད་པར་སྨྲོས་ཤིག་རྫུན་སྨྲས་པར་གྱུར་ན་དེའི་རྣམ་པར་སྨིན་པས་སེམས་ཅན་དམྱལ་བར་སྐྱེ་བ་ཡིན་ལ། བྱེད་པ་རྒྱུ་མཐུན་ནི་རྫུན་སྨྲ་སྙིང་འདོད་པ་དང་། གཞན་ཡིད་མི་ཆེས་པ་ཡིན། དབང་གི་འབྲས་བུ་ནི་ཕྱིས་ལྕེ་ལ་ཞིང་རྨོ་བ་ཡིན་ནོ།། མྱོང་བ་རྒྱུ་མཐུན་གྱི་འབྲས་བུ་ནི་ཁ་ནས་དྲི་མི་ཞིམ་པ་བྲོ་བ་དང་། ངག་མི་བཙུན་པ་ཡིན། སྐྱེས་བུ་བྱེད་པའི་འབྲས་བུ་ནི་ཞིང་ཚ་སྒོ་ཅན་དང་འབྲས་བུ་མེད་པར་སྐྱེ་བ་ལ་སོགས་པའོ། །གསུངས་པས། སྐྱེས་བུ་དེས་རྫུན་གྱི་རྣམ་པར་སྨིན་པ་སྔར་མ་ཐོས་པ་དེ་ཐོས་པས་འཇིགས་ནས། དེ་ལ་བདེན་པར་སྨྲས་ཏེ། འཕགས་པ། བདག་ནི། ཋཱ་ཀ་ན་པཱ་ཞེས་བྱ་བ་ལགས་ཏེ། དུས་རྟག་ཏུ་རྫུན་གཅིག་ཏུ་སྨྲ་ཞིང་། བདེན་པ་སྐྲའི་རྩེ་མོ་བརྒྱར་བཤགས་པའི་ཆ་ཙམ་ཡང་མི་སྨྲ་བ་ལགས་སོ། །ད་ལྟར་ཡང་རྫུན་ཅི་སྨྲ་སེམས་པ་ལགས་ཟེར་བས། དགེ་སློང་གིས་ཁྱོད་ཆོས་ཤིག་མི་བྱེད་དམ། གསུངས་པས། དེ་ན་རེ། འཕགས་པ་ཆོས་ལྟ་བགྱིད་ལགས་ཏེ། དང་པོ་ནས་རྫུན་ལ་གོམས་པས་དེ་སྤོང་བར་བྱེད་མི་ནུས་ལགས་ཞེས་ཟེར་བ་ལ། དགེ་སློང་དེས་རྫུན་སྨྲས་ཀྱང་མི་སྟོ་བའི་གདམས་ངག་ཡོད་དོ་གསུངས་པས། དེ་དགའ་སྟེ་ཆོས་ཞུ་འཚལ། ཟེར་ནས་དགེ་སློང་གིས། དེའི་ཁམས་དང་བསམ་པ་དང་བག་ལ་ཉལ་དང་བསྟུན་ནས་རྣ་བའི་ཆུ་ཞུགས་པ་འབྱིན་པའི་གདམས་ངག་བཞིན་དུ་རྫུན་ཉིད་རྫུན་ཀྱི་གཉེན་པོར་བསྒོམ་པའི་གདམས་ངག་གི་སྔོན་དུ་དབང་བསྐུར་ནས་རྒྱུད་ཡོངས་སུ་སྨིན་པར་བྱས་ཏེ། གདམས་ངག་དངོས་ནི་འདི་སྐད་དུ། ཤེས་བྱའི་ཆོས་ཐམས་ཅད་ནི་གདོད་མ་ནས་རྫུན་ཡིན་ལ། ཁྱོད་ཀྱིས་མཐོང་བ་དང་ཐོས་པ་ལ་སོགས་པ་ཡུལ་དྲུག་དབང་པོ་དྲུག་གི་ཉམས་སུ་མྱོང་བ་ཐམས་ཅད་རྫུན་པ་ཡིན་པས། ཁྱོད་ཀྱི་ཐམས་ཅད་རྫུན་གཅིག་པུར་སྒོམས་ཤིག དེ་ཡང་།

སྣང་སྲིད་རྫུན་པའི་ཆོས་རྣམས་ལ།།

རྫུན་པར་མ་ཤེས་རྫུན་སྨྲ་ཟེར།།

ཤེས་དང་ཤེས་བྱ་ཐམས་ཅད་རྫུན།།

དེས་ན་ཚོགས་དྲུག་ཡུལ་དྲུག་ཀྱང་།།

རྫུན་ཏེ་བདེན་པ་ག་ལ་ཡོད།།

རྫུན་ལ་བདེན་པར་ཞེན་པ་ཡི།།

བདེན་པས་འཁོར་བའི་སྡུག་བསྔལ་མྱོང་།།

ཀྱེ་མ་བྱིན་པ་རྫུན་ཉིད་ལ།།

རྫུན་པར་མ་རྟོགས་བདེན་པར་བཟུང་།།

དེ་ཡིས་ཟོ་ཆུའི་ཁྱུད་མོ་ལྟར།།

ཡང་དང་ཡང་དུ་འཁོར་བར་འཁྱམས།།

དེས་ན་ཁྱོད་ཀྱིས་ཆོས་རྣམས་ཀུན།།

རྫུན་པ་ཉིད་དུ་ཡང་དག་སྒོམས།།

སྒྲ་ཉིད་རྫུན་པ་ཡིན་པ་ལྟར།།

གཟུགས་ལ་སོགས་པའང་དེ་བཞིན་ཏེ།།

དེར་འཛིན་པ་ཡང་རྫུན་དུ་སྒོམས།།

ཞེས་གསུངས་པས། དེས་ཐཱཀན་པས་ཤེས་བྱ་ཐམས་ཅད་རྫུན་དུ་བསྒོམས་པས་ལོ་བདུན་ན་སྣང་སྲིད་ཐམས་རྫུན་དུ་སྣང་བའི་རྟོགས་པ་སྐྱེས་ཏེ། ཆོས་ཐམས་ཅད་རྫུན་པར་རྟོགས་པར་ཡང་དག་གི་ཞེན་པ་ལོག་གོ །དེ་ནས་ཡང་བླ་མ་དེ་བྱོན་ཏེ། ཆོས་ཐམས་ཅད་རྫུན་པར་ཡང་མ་གྲུབ་སྟེ། མ་སྐྱེས་མ་འགག་པས་ཆོས་ཐམས་ཅད་རང་གི་ངོ་བོས་སྟོང་པར་སྒོམས། གསུངས་པས། དེས་ཀྱང་དེ་ལྟར་རྟོགས་སོ།།

རྣམ་རྟོག་ལམ་དུ་ལོངས་ནས་གྲུབ་པ་ཐོབ་སྟེ། ཕྱོགས་ཐམས་ཅད་དུ་བླ་མ་ཐཱ་ཀ་ན་ཞེས་གྲགས་ཞིང་། སྐལ་བ་དང་ལྡན་པ་དག་ལ་རྣ་བར་ཆུ་ཞུགས་པ་འབྱིན་པའི་གདམས་པ་བསྟན་ནས། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཐཱཀནཔའི་ལོ་རྒྱུས་རྫོགས་སོ།། །།

༢༠༽གུརུནཱརོཔཱ།

གུརུནཱརོཔའི་ལོ་རྒྱུས་ནི། ཆང་འཚོང་བའི་རིགས་ཡིན་ལ། རིགས་འཆོལ་ནས་རྒྱ་གར་ཤར་ཕྱོགས་སཱ་ལི་པུ་ཏྲ་བྱ་བར་ཤིང་བཏུས་ནས་འཚོང་བར་བྱེད་པའི་ཚེ། ཝིཥྞུནགར་བྱ་བ་ན་ཏིལླི་པ་བྱ་བའི་མཁས་པ་ཆེན་པོ་ཞིག་བཞུགས་བྱ་བའི་གཏམ་ཐོས་ནས། ཤིང་ཁུར་གཅིག་ཀྲྀཥྞསཱརའི་པགས་པ་ལ་བཙོངས་ནས་དེ་གྱོན་ཏེ་རྣལ་འབྱོར་པའི་ཆ་ལུགས་སུ་བྱས་ཏེ། མཐར་གྱི་སློབ་དཔོན་ཏི་ལོ་པ་འཚོལ་དུ་ཕྱིན་པ་དང་། ཝིཥྞུནགར་དུ་བྱོན་ནས་དྲིས་པ་ལ། སློབ་དཔོན་བྲོས་ཏེ་གཤེགས་ནས་མེད་ཟེར་བས། ནཱརོ་པས་ཡུལ་ཐམས་ཅད་དུ་བཙལ་ཀྱང་མ་རྙེད་དེ། མཐར་གྱིས་ཡུན་རིང་པོ་ལོན་པ་དང་། ལམ་ཀ་ཞིང་ཏུ་འཕྲད་དོ། །དེ་ནས་ནཱརོ་པ་ཕྱག་དང་བསྐོར་བ་ལ་སོགས་པ་བྱས་ཏེ། བླ་མ་ལ་སྐུ་ཁམས་བདེའམ། ཞེས་སྨྲས་པ་ན། ཏིལོཔཱ་ན་རེ། ཁྱོད་ཀྱི་བླ་མ་ང་མ་ཡིན་ལ། ངའི་སློབ་མ་ཡང་ཁྱོད་མ་ཡིན་ཟེར་ནས། ཁྲོ་ཡིན་བརྡེག་ཏུ་བྱུང་ཡང་སླར་དད་པར་གྱུར་ཏེ། རྫ་མའི་ནང་དུ་བསོད་སྙོམས་བླངས་ནས་བླ་མ་ལ་དྲངས་ཤིང་། བསོད་སྙོམས་གསོལ་ཏེ་སླར་ཁྲོ་བ་དང་བརྡེག་པ་ལ་སོགས་བྱེད་ཀྱང་ལྷག་པར་དད་པ་སྐྱེས་ཏེ། ལྷག་མ་ཟོས་ཤིང་ཕྱི་ནས་བསྐོར་བར་བྱེད་དོ།། དགོང་མོ་ས་སྲོས་པ་དང་དེར་འོངས་ནས་ཉལ། ཐོ་རངས་བསོད་སྙོམས་ལ་འགྲོ། དེ་ནས་བླ་མ་ལ་དྲངས་ཀྱིན་དེ་ལྟར་ལོ་བཅུ་གཉིས་སུ་སྐྱོ་བ་མེད་པར་བསྙེན་བཀུར་བྱས་ཀྱང་ཁྲོ་བ་མ་ཡིན་པ་ཐ་མལ་པའི་ཚིག་གཅིག་ཀྱང་གསུང་བ་མེད་པ་ན། དུས་གཅིག་གི་ཚེ་ཁྱིམ་བདག་གཅིག་བག་མ་ལེན་པའི་སར་གསོད་སྙོམས་ལ་ཕྱིན་པས། བཟའ་བ་མང་པོ་དང་ཁྱད་པར་ཚོད་མའི་རྣམ་གྲངས་བརྒྱད་ཅུ་རྩ་བཞི་ཙམ་གྱི་ནང་ནས་སྔོ་པཱལག་ཞེས་བྱ་བའི་ཚོད་མ་ཤིན་ཏུ་ཞིམ་པ་ཞིག་རྣམས་རྙེད་པ་ཁུར་ཏེ་བླ་མ་ལ་དྲངས་པས། ཏིལོ་པས་བཞེས་ནས་སྔོའི་ཚོད་མ་ལ་བླ་མ་ཤིན་ཏུ་དགྱེས་ནས། བུ་ཟས་འདི་འདྲ་བ་གང་ནས་རྙེད། སུས་བྱིན་པ་ཡིན། གསུངས་པས། ནཱ་རོ་པ་ས་དང་པོ་ཐོབ་པ་ཙམ་དུ་དགའ་བ་མཆོག་ཏུ་གྱུར་ནས་འདི་སྙམ་དུ་བདག་གི་བླ་མའི་དྲུང་དུ་ལོ་བཅུ་གཉིས་བསྡད་པ་ལ། ཁྱོད་སུ་ཡིན་ཙམ་ཡང་མ་གསུངས་པ་ལ། དེ་རིང་བུ་ཞེས་གསུངས་སོ་སྙམ་ནས་དགའ་བ་དང་། ཏིལོ་པས་བུ་ཚོད་མ་ཞིམ་པོ་དེ་ད་དུང་སློངས་ལ་ཤོག །གསུངས་པས། ལན་བཞི་སློང་དུ་ཕྱིན་པས་ཁྱིམ་དེའི་མི་ཀུན་ཀྱིས་དགའ་བཞིན་དུ་བྱིན་ནོ། །ལན་ལྔ་པ་ལ་ནཱ་རོ་པས་བསམ་པ། ད་ནི་སློང་བ་ཡང་ངོ་ཚ་ལ། མ་ཕྱིན་ན་ནི་བླ་མ་མི་དགྱེས་སྙམ་ནས། སླར་སློང་དུ་ཕྱིན་པ་ན་ཁྱིམ་གྱི་མི་ཀུན་ལས་ལ་ཡེངས་པའི་བར་ལ་ཚོད་མ་སྣོད་དང་བཅས་པ་བརྐུས་ནས་ཁྱེར་འོངས་ཏེ། བླ་མ་ལ་དྲངས་པས་བླ་མ་དགྱེས་ནས་བུ་བརྩོན་འགྲུས་བཟང་པོ་བྱ་བར་བཏགས། 

བྱིན་རླབས་དང་དབང་བསྐུར་ཏེ། རྡོ་རྗེ་འཕགས་མོའི་གདམས་པ་གནང་སྟེ་བསྒོམས་པས། ཟླ་བ་དྲུག་ན་དངོས་གྲུབ་ཐོབ་སྟེ། མཚན་ཡང་ནཱ་རོ་པ་ཞེས་ཕྱོགས་ཐམས་ཅད་དུ་གྲགས་ལ། ཕྱོགས་ཐམས་ཅད་ནས་མཆོད་པ་ལ་འོངས་པ་ལ་ཐུགས་ཀ་ནས་འོད་བྱུང་བ་ཐམས་ཅད་ཀྱིས་མཐོང་ཞིང་། ཐག་རིང་བ་ཟླ་བ་རེའི་ལམ་ནས་ཀྱང་མཐོང་བར་གྱུར་ཏོ།། དེ་ནས་གདུལ་བྱ་དཔག་ཏུ་མེད་པའི་དོན་མཛད་ནས། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུནཱརོཔའི་ལོ་རྒྱུས་རྫོགས་སོ།། །།

༢༡༽གུརུཤྱལིཔཱ།

 གུརུཤྱལིཔཱའི་ལོ་རྒྱུས་ནི། ཤྱལིཔཱ་བྱ་བ་སྤྱང་ཀི་པ་བྱ་བ་ཡིན་ལ། དེའི་ཡུལ་ནི་བི་གྷ་པུར་ཡིན་ལ་རིགས་ནི་ལས་ཀྱིས་འཚོ་བའི་དམངས་རིགས་ཡིན། དེ་ཡང་བི་གྷ་པུ་རིའི་གྲོང་ཁྱེར་དེ་དང་ཉེ་བ་ན་དུར་ཁྲོད་གཅིག་ཡོད་ལ། དུར་ཁྲོད་དང་ཉེ་བ་ན་གནས་པའི་སྐྱེས་བུ་ཞིག །མཚན་མོ་དུར་ཁྲོད་ན་སྤྱང་ཀི་ཀུན་ཚོགས་ནས་སྐད་འདོན་པ་ལ་ཤིན་ཏུ་འཇིགས་ནས། ཉིན་མཚན་མེད་པར་མི་དེ་སྤྱང་ཀིའི་འཇིགས་པ་ཡིད་ལ་བྱེད་ཀྱིན་འདུག་གོ་ཉིན་གཅིག་དེའི་གམ་དུ་དགེ་སློང་ཞིག་བྱོན་ནས་བསོད་སྙོམས་བྱས་པས། དེས་དགེ་སློང་དེའི་རྐང་པ་ལ་ཕྱག་བྱས་ནས། གསོང་པོར་སྨྲ་བའི་གཏམ་ལེགས་པར་བྱས་ཏེ། བཞེས་ཆབ་དྲངས་པ་དང་། དགེ་སློང་གིས་སྦྱིན་པའི་ཕན་ཡོན་ཀྱི་ཆོས་བཤད་པས། དེ་ན་རེ། འཕགས་པ་ཉིད་ཀྱི་སྦྱིན་པའི་ཕན་ཡོན་ཀྱི་ཆོས་ཀྱང་ངོ་མཚར་ཆེ་སྟེ། དེ་བས་ཀྱང་མི་འཇིགས་པའི་ཆོས་ཤིག་མངའ་ན་བདག་ལ་དེ་སྦྱིན་པར་མཛོད་ཅིག་ཞུས་པས། དགེ་སློང་གིས་ཁྱོད་འཁོར་བའི་སྡུག་བསྔལ་ལམ་དེ་མ་ཡིན་པ་ཅི་ལ་འཇིགས། བྱས་པས། མི་དེ་ན་རེ་འཁོར་བའི་སྡུག་བསྔལ་གྱི་འཇིགས་པ་ནི་ཐུན་མོང་དུ་ཀུན་ལ་ཡོད་ལ། བདག་ནི་མོས་པ་ཆོད་ཆུང་བས་གནས་དུར་ཁྲོད་དང་ཉེ་བའི་སྟོབས་ཀྱིས་སྤྱང་ཀིའི་སྐད་ཀྱིས་ཉིན་མཚན་དུ་འཇིགས་པ་རྒྱུན་མི་ཆད་པས། དེ་ལ་ཕན་པའི་ཆོས་མཆིས་ན་བདག་བགྱིད་ལགས་སོ་ཞེས་ཞུས་པས།།དགེ་སློང་དེས་འཇིགས་པ་དེ་ལ་ཕན་པའི་སྔགས་དང་གདམས་ངག་ང་ལ་ཡོད་ཀྱི། ཐོག་མར་དབང་བསྐུར་བགྱིས་གསུངས་ནས། དེས་དབང་ཡོན་དུ་གསེར་དངུལ་ལ་སོགས་པའི་རྫས་མང་པོ་ཕུལ་ནས་ཞུས་སོ། །གདམས་ངག་ནི་འཇིགས་པས་འཇིགས་པ་སྤོང་བའི་གདམས་ངག་སྟེ། འདི་ལྟ་སྟེ། ཁྱོད་དགྲ་ལ་སོགས་པ་ལ་མི་འཇིགས། སྤྱང་ཀིའི་སྐད་ལས་འཇིགས་ན། ཁྱོད་ཀྱིས་འཇིག་རྟེན་གྱི་སྒྲ་གྲགས་སོ་ཅོག་ཐམས་ཅད་སྤྱང་ཀིའི་སྐད་དང་དབྱེར་མེད་དུ་ཉིན་མཚན་མེད་པར་སྒོམས་ཤིག །གནས་ཀྱང་དུར་ཁྲོད་དུ་ཁང་བུ་གྱིས་ལ་སྡོད་ཅིག་ཅེས་གདམས་པ་བྱིན་པ་དང་། དེས་ཀྱང་དེ་བཞིན་དུ་བྱས་ཏེ་བསྒོམས་པས། སྒྲ་ཐམས་ཅད་གྲགས་སྟོང་དབྱེར་མེད་དུ་རྟོགས་པའི་ངང་དུ་སྤྱང་ཀིའི་སྒྲའི་འཇིགས་པ་སྟོར་བ་དང་། འཇིགས་པ་རང་གྲོལ་འཇིགས་མེད་བདེ་ཆེན་གྱི་ཉམས་སྐྱེས་ནས་ལོ་དགུར་བསྒོམས་པས། ལུས་སེམས་ཀྱི་དྲི་མ་དག་ནས་ཕྱག་རྒྱ་ཆེན་པོའི་དངོས་གྲུབ་ཐོབ་པར་གྱུར་ཏོ།། དེ་ནས་སྤྱང་ཀིའི་རོ་ཞིག་ཕྲག་པ་ལ་ཁུར་ཏེ། སྤྱོད་པ་བྱས་པས། ཕྱོགས་ཐམས་ཅད་དུ་རྣལ་འབྱོར་པ་ཤྱ་ལི་པཱ་བྱ་བར་གྲགས་སོ། །གདུལ་བྱ་ལ་སྣང་སྟོང་དབྱེར་མེད་ཀྱི་གདམས་པ་མང་པོ་བསྟན་ཏེ། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །གུརུཤྱ་ལིཔཱའི་ལོ་རྒྱུས་རྫོགས་སོ།། །།

༢༢༽གུརུཏིལླིཔཱ། 

གུརུཏིལླིཔའི་ལོ་རྒྱུས་ནི། ཡུལ་ལིཥྞུ་ན་ག་ར་བྱ་བ་ན་སློབ་དཔོན་ཏིལླི་པཱ་ཞེས་བྱ་བ་མཁས་པ་ཆེན་པོ་ཞིག་བཞུགས་སོ། །དེས་རྒྱལ་པོའི་མཆོད་གནས་མཛད་དེ། ཉི་མ་རེ་རེ་ལའང་གསེར་ཞོ་ལྔ་བརྒྱའི་སྐུ་འཚོ་མངའ་ཞིང་། འཁོར་སློབ་མ་དཔག་ཏུ་མེད་པ་ལ་ཆོས་འཆད་པ་ལ་སོགས་པས་གཡེང་བའི་ཚེ། དགོངས་པ་ལ་བདག་གི་སྐྱེ་བ་འདི་འདྲ་བའི་དོན་མེད་པས་ཅི་ཞིག་བྱ། སྙམ་ནས་ཡང་ནས་ཡང་དུ་བྲོས་པ་ལ་འཁོར་རྣམས་ཀྱིས་མ་བཏང་སྟེ། ཉིན་གཅིག་སློབ་དཔོན་གྱིས་ཆེས་གོས་བོར་ནས་གོས་ཚེམ་བུ་ཅན་ཞིག་བསྣམས། ཁྱིམ་དུ་ཡི་གེ་བྲིས་ནས་བོར་ཏེ། ང་ད་མི་ལོག་པས་བློག་ཏུ་མ་འོངས་ཤིག་བྱ་བ་བྲིས། ཁོང་གིས་ནུབ་མོ་བྲོས་ནས་གྲོང་ཁྱེར་ཀནཅར་བྱ་བའི་དུར་ཁྲོད་དུ་བཞུགས་ནས་ཟས་བསོད་སྙོམས་བླངས་ཤིང་སྒྲུབ་པ་བྱེད་པའི་ཚེ་ནཱ་རོ་པས་བསོད་སྙོམས་བླངས་ཤིང་བསྙེན་བཀུར་བྱས་ལ། དེས་འཚོ་བ་མཛད་དེ་བསྒྲུབས་པས་ལོ་བཅུ་ན་དྲི་མ་མ་ལུས་པ་དག་ནས། ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། ལྷ་ཡུལ་དུ་བྱོན་ནས་ལྷས་ཞལ་ཟས་ཀྱི་བསྙེན་བཀུར་བྱས་ལ། སྐུ་གསུང་ཐུགས་ཀྱི་དངོས་གྲུབ་ཐོབ་པས་ཕྱོགས་ཐམས་ཅད་དུ་ཏིལླི་ལོ་པཱ་བྱ་བར་གྲགས། དེས་གདུལ་བྱ་དཔག་ཏུ་མེད་པ་ལམ་ལ་བཀོད་ནས་འགྲོ་དོན་མཛད། མཐར་སྐུ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཏིལླི་པཱའི་ལོ་རྒྱུས་རྫོགས་སོ།། །།

༢༣༽གུརུཅཏྲཔཱ།

གུརུཅཏྲཔཱའི་ལོ་རྒྱུས་ནི། ཅཏྲཔཱ་བྱ་བ་ནི་ཆོས་ཀྱི་གླེགས་བམ་ཁུར་ནས་སློང་བ་ཞེས་བྱ་བ་ཡིན་ལ། དེ་ཡུལ་ནི་སཻནྡྷོནགར་བྱ་བར་སྒྲའི་པོ་ཏི་ལག་པར་ཁུར་ནས། དུས་རྟག་ཏུ་གཞན་ལ་སློང་བ་ཞིག་ཡིན་པ་ལ། དུས་གཅིག་གི་ཚེ་ལེགས་པར་སྦྱངས་པའི་རྣལ་འབྱོར་པ་ཞིག་དང་འཕྲད་པ་ན། དེ་ན་རེ་ཁྱོད་ཅི་བྱེད་ཅིང་འདུག་ཟེར་བས། སློང་མཁན་དེ་ན་རེ། བདག་འཚོ་བའི་ཕྱིར་དུ་སློང་ཞིང་གདའ་བྱས་པས། རྣལ་འབྱོར་པ་དེ་ན་རེ། ཁྱོད་ལ་ཕྱི་མའི་ལམ་མི་དགོས་སམ། གསུངས་པས། དེས་ལམ་ཇི་ལྟར་ཡིད་ལ་བྱ་ཞུས་པས། རྣལ་འབྱོར་པས་དགྱེས་རྡོར་གྱི་དཀྱིལ་འཁོར་དུ་དབང་བསྐུར་ནས་གདམས་པ་གསུངས་པ་ནི། 

སྡིག་པ་ཐམས་ཅད་མཐོལ་ཞིང་བཤགས།།

ཉིན་མཚན་རྟག་ཏུ་བདེ་བ་སྒོམས།།

སྔ་མ་ཅི་བྱས་རང་ལུས་ལྟོས།།

ཕྱི་མར་ཅི་འགྱུར་སེམས་ལ་རག། 

དེ་ལྟར་ཡུན་རིང་བསྒོམས་བྱས་ན།།

ཚེ་འདི་ཉིད་ལ་སངས་རྒྱས་ཐོབ།།

རྟགས་ཀྱང་རིམ་པར་འབྱུང་བར་འགྱུར།། 

ཞེས་བསྟན་པས། ཅཏྲཔས་དོན་མ་རྟོགས་ནས་བླ་མ་ལ་ཞུས་པས། བླ་མའི་ཞལ་ནས། སྡིག་པ་ནི་མ་རིག་པ་ཡིན་ལ། དེ་ལས་འཁྲུལ་པ་སྣ་ཚོགས་འབྱུང་བ་ཡིན་ནོ། །སྣང་སྲིད་ཕྱག་རྒྱ་ཆེན་པོར་རྟོགས་པའི་ལྟ་བས་སྡིག་པ་དག་པར་བྱེད་པ་ཡིན་ནོ། །ཉིན་མཚན་བདེ་བ་བསྒོམ་པ་ནི་སྙིང་རྗེ་རྒྱུན་དུ་བསྒོམས་ན་ཆོས་ཉིད་ཀྱི་བདེ་བ་རང་ལ་འཆར་བ་ཡིན་ཏེ། ཚེ་སྔ་ཕྱིའི་ལས་རྣམས་མངོན་ཞེན་གྱིས་མ་བཟུང་ན་ཤུགས་འབྱུང་གི་སྤྱོད་པ་མཐར་ཕྱིན་པ་ཡིན། ཕྱི་མ་ཅིར་འགྱུར་ཞེས་པ་ནི་བདེ་སྡུག་ཐམས་ཅད་སེམས་ལས་འབྱུང་བས། ད་དུང་ཡང་མངོན་ཞེན་ཡོད་དམ་མེད་གསུངས་པའོ།། དེ་ལྟར་ཡུན་རིང་ཞེས་པ་ནི་བརྩོན་འགྲུས་བསྐྱེད་དེ་མ་ཡེངས་པར་སེམས་ལ་བལྟ་བའོ། །དེ་ལྟར་རྒྱུན་དུ་བསྒོམས་ན་སེམས་ཀྱི་འཁྲུལ་པ་ལྡོག་ནས་ཚེ་འདི་ཉིད་ལ་འབྲས་བུ་སངས་རྒྱས་ཐོབ་པ་ཡིན་ནོ། །ཞེས་བླ་མས་གདམས་ངག་བྱིན་ཏེ། ཅཏྲ་པཱས་ཡུལ་སཻནྡྷོནགར་དུ་དེ་ལྟར་བསྒོམས་པས་ལོ་དྲུག་ན་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། མིང་དུ་ཡང་རྣལ་འབྱོར་པ་ཅཏྲཔཱ་ཞེས་ཕྱོགས་ཐམས་ཅད་དུ་གྲགས་ཤིང་། ལོ་བདུན་ནས་འཁོར་ལྔ་བརྒྱ་དང་བཅས་ཏེ། མཁའ་སྤྱོད་དུ་གཤེགས་སོ།། གུརུཅཏྲཔཱའི་ལོ་རྒྱུས་རྫོགས་སོ།། །།

༢༤༽གུརུབྷདྲཔཱ།

གུརུབྷདྲཔཱའི་ལོ་རྒྱུས་ནི། དེའི་ཡུལ་མ་ཎི་དྷར་ཞེས་བྱ་བ་ལ། ཡུལ་དེ་ན་བྲམ་ཟེ་ཞིག་ལ་འཁོར་དང་ལོངས་སྤྱོད་ཀྱི་འབྱོར་པ་དཔག་ཏུ་མེད་པས་དེ་དུས་རྟག་ཏུ་སེམས་གཡེང་བ་དང་བཅས་ཏེ་གནས་སོ། །དུས་གཅིག་གི་ཚེ་འཁོར་ཀུན་ཕྱིར་ཁྲུས་ལ་སོང་ནས་རང་ཉིད་གནས་ཁང་ན་འདུག་པའི་གམ་དུ་ལེགས་པར་སྦྱངས་པའི་རྣལ་འབྱོར་པ་ཞིག་འོངས་ནས་ཟན་བསླངས་པས། བྲམ་ཟེ་ན་རེ། ཁྱོད་མི་གཙང་བས་བདག་གི་གནས་འབགས་འགྲོ་ཞིང་། བདག་ལ་འཁོར་དང་མི་ཀུན་གྱིས་འཕྱ་འོང་བས་ཕྱིར་སོང་ཞིག་ཟེར་བ་ལ། རྣལ་འབྱོར་པས་མི་གཙང་བ་ཅི་ལ་ཟེར་གསུངས་པས། བྲམ་ཟེ་ན་རེ། ལུས་ཁྲུས་མ་བྱས་པ་གོས་མེད་པ་སྣོད་ཐོད་པ་ཐོགས་པ། ཟས་འབགས་པར་ཟ་བ་རིགས་ངན་པ་ལ་ཟེར་བས་མྱུར་དུ་སོང་ཞིག་ཟེར་བ་ལ། རྣལ་འབྱོར་པས་མི་གཙང་བ་དེ་མ་ཡིན། ལུས་དང་ངག་དང་ཡིད་རྣམས་མི་དགེ་བ་དང་བཅས་པ་མི་གཙང་བ་ཡིན་ལ། ལུས་ལ་ཁྲུས་བྱས་པས་སེམས་ཀྱི་དྲི་མ་དག་པ་མ་ཡིན། བླ་མའི་གདམས་ངག་གིས་སེམས་ཀྱི་དྲི་མ་བཀྲུས་ན་གདོད་དག་པ་ཡིན་ནོ། །ཡང་གསུངས་པ། 

ཐེག་ཆེན་རིགས་ལྡན་མཆོག་ཡིན་ལ།།

རྒྱལ་དང་བྲམ་ཟེ་དེ་ལྟ་མིན།།

ལུས་སོགས་དྲི་མ་མི་དགེ་བ།།

བརྒྱུད་ལྡན་བླ་མའི་གདམས་པ་ཡིས།།

བཀྲུས་ན་གཙང་བ་བླ་ན་མེད།།

ཆུ་ཡིས་བཀྲུས་པ་དེ་ལྟ་མིན།།

ཞེན་མེད་སྣོད་དང་ཁ་ཟས་མཆོག།

དཀར་གསུམ་ལ་སོགས་དེ་ལྟ་མིན།།

ཞེས་སོགས་གསུངས་པས་དད་པར་གྱུར་ནས། བྲམ་ཟེ་ན་རེ། ཁྱོད་ཀྱིས་བདག་ལ་དེའི་གདམས་ངག་ཅིག་བྱིན་ཅིག་ཟེར་བས། རྣལ་འབྱོར་པས་འོ་ན་བདག་ལ་ཟན་བྱིན་ཅིག །དེ་ལྟར་བྱའོ་སྨྲས་པས། བྲམ་ཟེ་ན་རེ། འདིར་བདག་ཆོས་ཉན་ན་འཁོར་དང་མི་ཀུན་མི་དད་པས། ཁྱོད་གང་དུ་བཞུགས་པ་དེར་བདག་མཆིས་ན། ཉིད་གང་དུ་བཞུགས། ཟེར་བས། ང་དུར་ཁྲོད་ན་འདུག་གི་དེར་ཆང་དང་། ཕག་ཤ་ཁྱེར་ལ་ཤོག །བྱས་པས། བྲམ་ཟེ་ན་རེ། ངེད་བྲམ་ཟེ་རྣམས་ཆང་དང་ཕག་ཤའི་མིང་ཡང་འདོན་མི་རུང་ན་འཁུར་དུ་ག་ལ་རུང་། ཟེར་བས། རྣལ་འབྱོར་པས་གདམས་ངག་དགོས་ན་ཁྱེར་ལ་ཤོག་གསུངས་པས། བྲམ་ཟེས་སྨྲས་པ། ཉིན་པར་མཆིར་མི་འཚལ་བས་མཚན་མ་དེ་ལྟར་མཆིའོ་ཞེས་ཟེར་ཏེ། བྲམ་ཟེ་དེས་རང་རྟགས་བསྒྱུར་ནས་ཚོང་དུས་སུ་ཕྱིན་ཏེ། ཆང་དང་ཕག་ཤ་ཉོས་ནས་དུར་ཁྲོད་དུ་ཕྱིན་ནས་རྣལ་འབྱོར་པ་ལ་དྲངས་པས། རྣལ་འབྱོར་པས་རང་གིས་ཀྱང་གསོལ། བྲམ་ཟེ་ལ་ཡང་བྱིན་ནས་བྱིན་རླབས་འཕོ་བའི་དབང་བསྐུར་མཛད་དེ། བྲམ་ཟེ་ལ་མཎྜལ་འབུལ་དུ་བཅུག བྲམ་ཟེ་དེའི་རིགས་ཀྱི་ང་རྒྱལ་བཅག་པའི་དོན་དུ་ཕྱག་དར་བྱེད་དུ་བཅུག་ནས་ལྟ་བའི་བརྡ་བསྟན་ལ། གནས་དེར་ཞལ་ཞལ་བྱེད་དུ་བཅུག་ནས་སྤྱོད་པའི་བརྡ་བསྟན། ཞལ་ཞལ་དེའི་ཁ་དོག་ནི་སྒོམ་པའི་བརྡའ་ཡིན། དེ་གསུམ་གཅིག་ཏུ་གྱུར་པ་ནི་འབྲས་བུའི་བརྡ་ཡིན་ནོ། །གསུངས་པས། གོང་གི་བརྡ་དེ་རྣམས་ཀྱི་དོན་ཡང་རྟོགས། སྣང་སྲིད་འཁྲུལ་པའི་རྣམ་འཕྲུལ་དུ་ཤེས། རིགས་ཀྱི་རྣམ་རྟོག་ཐམས་ཅད་དོར་ཏེ། རྣལ་འབྱོར་ལ་ཞུགས་ཏེ་བསྒོམས་པས། ལོ་དྲུག་ན་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། རྣལ་འབྱོར་པ་བྷ་དྲ་པཱ་ཞེས་ཕྱོགས་ཐམས་ཅད་དུ་གྲགས་སོ།། འགྲོ་དོན་མཛད་དེ་མཐར་འཁོར་ལྔ་བརྒྱ་དང་བཅས་ཏེ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུབྷདྲཔཱའི་ལོ་རྒྱུས་རྫོགས་སོ།། །།

༢༥༽གུརུདོཁན་ཊི།

གུརུདོཁཎྚིའི་ལོ་རྒྱུས་ནི། དོཁཎྚི་ཞེས་བྱ་བ་བསྒྱུར་ན་གཉིས་གཅིག་ཏུ་བྱེད་པ་ཞེས་བྱ་ལ། དེ་ཡང་ཡུལ་གནདྷཱར་བྱ་བར་སྤྲང་པོ་ཕྱག་དར་ཁྲོད་བསྡུས་པའི་རིགས་ཡིན། དེས་རྟག་ཏུ་གོས་རྙིང་པ་ཀུན་སྡུད་ཀྱིན་ལེགས་པར་བཙེམས་ནས་གྱོན་པར་བྱེད་དོ། །དུས་གཅིག་གི་ཚེ་ལེགས་པར་སྦྱངས་པའི་རྣལ་འབྱོར་པ་ཞིག་བྱོན་ནས། དེ་ལ་ཁྱོད་དོན་མེད་པའི་སྡུག་བསྔལ་འདི་འདྲ་བས་ཅི་བྱེད། དེ་བས་ཆོས་མི་བྱེད་དམ། གསུངས་པས། དེ་ན་རེ་བདག་ལ་ཆོས་སུས་སྟེར་ཟེར་བས། རྣལ་འབྱོར་པས་ངས་སྦྱིན་གསུངས་ནས་བདེ་མཆོག་གི་དཀྱིལ་འཁོར་ཏུ་དབང་བསྐུར། བསྐྱེད་རྫོགས་ཟུང་འཇུག་གི་གདམས་ངག་བྱིན་ནས། མི་དེས་དེ་བསྒོམས་པས་གོས་འཚེམ་པའི་རྟོག་པས་གེགས་བྱས་ཏེ་སྒོམ་དུ་མ་འདོད་པ་དང་། དེ་ན་རེ། རྣལ་འབྱོར་པ་བདག་རྟོག་པས་གཡེངས་ནས་སྒོམ་དུ་མི་འདོད་པར་འདུག་ཞུས་པ་ལ། རྣལ་འབྱོར་པས་དེ་ལ་རྟོག་པ་ལམ་འཁྱེར་གྱི་གདམས་ངག་འདི་ལྟར་གནང་སྟེ། 

ཆོས་རྣམས་དེ་བཞིན་ཉིད་ཀྱི་ངང་།།

འཚེམ་དང་བཙེམ་པར་བྱ་བ་མེད།།

ལྷ་དང་སྔགས་ཀྱང་དེ་བཞིན་ནོ།།

གསུམ་རྣམས་རྟོགས་པ་ཆོས་ཀྱི་དབྱིངས།།

ཞེས་གསུངས་པས། དེས་ཀྱང་དེ་ལྟར་བསྒོམས་པ་ན། གོས་འཚེམ་པའི་རྟོག་པ་དང་། ལྷ་དང་སྔགས་གསུམ་པོ་ཆོས་ཉིད་ཀྱི་ངང་དུ་སྟོར་ནས་བསྐྱེད་རྫོགས་ཟུང་འཇུག་གི་རྟོགས་པ་སྐྱེས་ཏེ། ལོ་བཅུ་གཉིས་ན་ཕྱག་རྒྱ་ཆེན་པོའི་དངོས་གྲུབ་ཐོབ་བོ།། དེ་ནས་འགྲོ་དོན་དཔག་མེད་མཛད་དེ་མཐར་མཁའ་སྤྱོད་དུ་གཤེགས་སོ།། གུརུདྷཱིཁནདྷིཔཱའི་ལོ་རྒྱུས་རྫོགས་སོ།། །།

༢༦༽གུརུཨཛོ་གིཔཱ།

གུརུཨཛོགིའི་ལོ་རྒྱུས་ནི། ཨཛོགི་བྱ་བ་ལེ་ལོ་ཅན་ནོ། །དེ་ཡང་ཡུལ་པཊལིཔུཏྲ་བྱ་བ་ན། ཁྱིམ་བདག་གཅིག་གི་བུ་ཞིག་ཤ་ཤིན་ཏུ་ཆེ་ནས་སྤྱོད་ལམ་རྣམ་པ་བཞི་གང་བྱེད་ཀྱང་ཉལ་ནས་བྱེད་པ་ཞིག་ཡོད་པ་ལ། ཕ་མ་དང་ཉེ་དུ་ཀུན་འདི་འདྲ་བའི་བུས་ཅི་བཏུབ་ཅེས་བརླ་བརྗོད་བྱེད་ཅིང་དུར་ཁྲོད་དུ་བསྐྱལ་ནས། དེས་དུར་ཁྲོད་དུ་ཉལ་ནས་བསྡད། དེར་རྣལ་འབྱོར་པ་ཞིག་བྱོན་ནས་དེས་དེ་མཐོང་བ་ན། སྙིང་རྗེ་སྐྱེས་ནས། གྲོང་ཁྱེར་ནས་བཟའ་བཏུང་བླངས་ཏེ་དེ་ལ་བྱིན་པ་དང་། དེས་ཟས་ཟ་བ་ལའང་མི་ལངས་པར་མཐོང་ནས། རྣལ་འབྱོར་པ་དེས་དེ་ལ་ཁྱོད་ཀྱིས་ཟས་ཟ་བ་ལའང་མི་ལངས་པར་འདུག་ན་འཇིག་རྟེན་གྱི་བྱ་བ་ཅི་ནུས་བྱས་པས། དེ་ན་རེ། ཅི་ཡང་མ་ནུས་པས་བདག་ཕ་མས་སྤངས་པ་ཡིན་ཟེར། རྣལ་འབྱོར་པས་དེ་ལ་འོ་ན་ཉལ་གྱིན་ཆོས་སྒྲུབ་ནུས་སམ། བྱས་པས། དེ་ན་རེ། ནུས་ཏེ་བདག་འདྲ་བ་ལ་ཆོས་སུས་སྟེར། ཟེར་རོ། །རྣལ་འབྱོར་པས་ངས་སྦྱིན་གསུངས་ཏེ། དགྱེས་རྡོར་གྱི་དཀྱིལ་འཁོར་དུ་དབང་བསྐུར། མི་ཟབ་པའི་རྫོགས་པའི་རིམ་པ་གདམས་ངག་ཏུ་བྱིན་ནས་སྟེང་སྒོའི་སྣ་རྩེར་ཐིག་ལེ་ཉུངས་ཀར་གྱི་འབྲུ་ཙམ་གྱི་ནང་དུ་སྟོང་གསུམ་འདུས་པར་སྒོམས་ཤིག་བྱས་པས། དེ་ན་རེ་དེ་ལ་རྟགས་ཅི་ལྟ་བུ་འབྱུང་བ་ལགས། ཟེར་བ་ལ། རྣལ་འབྱོར་པས་བསྒོམས་ཙ་ན་ཤེས་ཡོང་གི་གསུངས། དེ་ནས་དེས་ཀྱང་དེ་བཞིན་དུ་བསྒོམས་པས། ཡུངས་ཀར་དང་སྟོང་གསུམ་གྱི་དམིགས་པ་སྟོང་ཉིད་ཀྱི་ངང་དུ་སྟོར་ནས་སྟོང་ཉིད་ཕྱག་རྒྱ་ཆེན་པོའི་རྟོགས་པ་རྒྱུད་ལ་འཁྲུངས་སོ།།

དེས་ལོ་དགུར་བསྒོམས་པས་ཕྱག་རྒྱ་ཆེན་པོའི་དངོས་གྲུབ་ཐོབ་ནས་འགྲོ་དོན་མང་དུ་མཛད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཨཛོགིའི་ལོ་རྒྱུས་རྫོགས་སོ།། །།

༢༧༽གུརུཀལཔཱ།

 གུརུཀལཔཱའི་ལོ་རྒྱུས་ནི། ཀལཔཱ་ཞེས་པ་བསྒྱུར་ན་སྨྱོན་པ་ཞེས་བྱའོ།། དེའི་ཡུལ་ནི་རཱཇཔུརི་ཡིན། བླ་མ་ནི་རྒྱུད་ལེགས་པར་སྦྱངས་པའི་རྣལ་འབྱོར་པ་ཞིག་ཡིན། ཀལཔཱ་ནི་ཚེ་སྔ་མ་བཟོད་པ་བསྒོམས་པའི་འབྲས་བུ་གཟུགས་བྱད་ཤིན་ཏུ་མཚར་བ་ཞིག་ཡོད་ལ། རཱཇཔུ་རིའི་སྐྱེ་བོ་ཀུན་དེ་ལ་ལྟ་ཞིང་འབྲངས་པས། དེ་དེས་སྐྱོ་ནས་དུར་ཁྲོད་ཞིག་ཏུ་འདུག་ནས་ཡོད་པ་ལ། ལེགས་པར་སྦྱངས་པའི་རྣལ་འབྱོར་པ་ཞིག་དེར་བྱོན་ནས་ཁྱོད་དུར་ཁྲོད་ན་ཅི་བྱེད་ཅིང་འདུག་གསུངས་པས། མི་དེ་ན་རེ། བདག་མི་ཀུན་གྱིས་འདུག་ཏུ་མ་སྟེར་ནས་འདིར་འདུག་གིན་གདའ་ཞུས་པས། རྣལ་འབྱོར་པས་འོ་ན་ཁྱོད་ལ་ཆོས་མི་དགོས་སམ། གསུངས་པས། དེ་ན་རེ་ཆོས་དགོས་ཏེ་བདག་ལ་སུས་སྟེར་ཟེར། རྣལ་འབྱོར་པ་དེས། ཁྱོད་ལ་ཆོས་དགོས་ན་ངས་སྦྱིན་གྱིས་གསུངས་ནས། བདེ་མཆོག་གི་དཀྱིལ་འཁོར་དུ་དབང་བསྐུར། བསྐྱེད་རྫོགས་ཀྱི་དོན་སྒོམ་དུ་བཅུག་པས། དེས་བསྐྱེད་རྫོགས་ཟུང་འཇུག་ཏུ་རྟོགས་པའི་ནང་དུ་བདག་གཞན་གཉིས་སུ་དམིགས་པ་སྟོར་ནས་ཤུགས་འབྱུང་ལྷུག་པའི་སྤྱོད་པ་སྤྱད་པས། རཱཇཔུརིའི་མི་ཀུན་ན་རེ། སྨྱོན་པ་ཅིག་འདུག་ཟེར་བ་ལ། དེས་གསུངས་པ། བདག་དུ་བཟུང་བས་གཞན་སྣང་སྟེ།།

གཉིས་ཀྱི་རང་བཞིན་སྡུག་པར་བྱས།།

མཁས་པས་དེ་ལྟར་མཁྱེན་པ་ན།།

རྣམ་པར་རྟོག་པའི་ལྷ་ཚོགས་དང་།།

ཡི་གེ་ཨ་ཡ་ནང་ཉིད་དུ།།

མཁའ་ལ་འཇའ་ནི་ཡལ་བ་ལྟར།།

སྐྱེ་དང་འགག་པ་གནས་པ་གསུམ།།

སྨྱོན་པ་བདག་གིས་མ་སྤྱད་པས།།

གཉིས་མེད་ཤུགས་འབྱུང་སྤྱོད་པ་བདེ།།

གསལ་ལ་མ་འགགས་རྟོགས་པ་བདེ།།

ཚོགས་དྲུག་མ་འགགས་སྒོམ་པ་བདེ།།

རྩོལ་སྒྲུབ་མེད་པའི་འབྲས་བུ་བདེ།།

ཞེས་གསུངས་ནས་ཏཱ་ལ་བདུན་ཙམ་གྱི་ནམ་མཁའ་ལ་འཕགས་ནས་ཆོ་འཕྲུལ་སྣ་ཚོགས་བསྟན་ནོ།། དེ་མན་ཆད་བླ་མ་ཀལཔཱ་ཞེས་གྲགས་ལ། མཐར་མཁའ་སྤྱོད་དུ་གཤེགས་སོ།། གུརུཀལཔཱའི་ལོ་རྒྱུས་རྫོགས་སོ།། །།

༢༨༽གུརུདྷོཝིཔཱ།

གུརུདྷོཝིཔཱའི་ལོ་རྒྱུས་ནི། རིགས་ཁྲུས་མཁན། ཡུལ་སཱལིཔུཏྲནགར། དེ་ན་ཁྲུས་མཁན་ཕ་བུ་གཉིས་དུས་རྟག་ཏུ་ཁྲུས་ཀྱི་ལས་ཀྱིས་འཚོ་བར་བྱེད་པ་ལས། དུས་གཅིག་གི་ཚེ་དེའི་གན་དུ་ལེགས་པར་སྦྱངས་པའི་རྣལ་འབྱོར་པ་ཞིག་བྱོན་ནས་དེ་གཉིས་ལ་བཟའ་བ་བསླངས་པས། དེ་གཉིས་ཀྱིས་བསོད་སྙོམས་དྲངས་ཏེ། རྣལ་འབྱོར་པ་ལ་ན་བཟའ་བཀྲུ་རྒྱུ་མ་མཆིས་སམ། བདག་གིས་བཀྲུ་ཡི་ཟེར་བ་ལ། རྣལ་འབྱོར་པས་སོལ་བ་ཞིག་ལག་ཏུ་ཐོགས་ནས་འདི་བཀྲུས་ན་དྲི་མ་དག་ནུས་སམ། གསུངས་པས། ཁྲུས་མཁན་གྱི་བུ་དེ་ན་རེ། སོལ་བ་ནག་པོའི་རང་བཞིན་བཀྲུས་ཀྱང་དཀར་པོར་མི་འགྱུར་བ་མཆི་ཞུས་པས། རྣལ་འབྱོར་པས་ཁྱོད་ཀྱིས་ཕྱིའི་ཁྲུས་བྱས་ཀྱང་ནང་གི་དུག་གསུམ་གྱི་དྲི་མ་མ་དག་ན་ཕྱིའི་ཁྲུས་ཀྱིས་དག་པར་ངས་མ་མཐོང་། དེས་ན་ཁྱེད་ཅག་དུས་རྟག་ཏུ་ཁྲུས་བྱེད་མི་དགོས་པར་ལན་གཅིག་བཀྲུས་པས་ཆོག་པའི་གདམས་པ་ང་ལ་ཡོད་ན། དེ་ཁྱོད་ལ་མི་དགོས་སམ། གསུངས་པས། དེ་ན་རེ་དགོས་ཟེར། དེ་ནས་དེར་རྣལ་འབྱོར་པས་ཁྲུས་མཁན་གྱི་བུ་དེ་ལ་བདེ་མཆོག་གི་དཀྱིལ་འཁོར་ཏུ་དབང་བསྐུར་ཏེ་སྔགས་དང་། ཕྱག་རྒྱ་དང་། ཏིང་ངེ་འཛིན་གསུམ་གྱིས་བྱིན་གྱིས་བརླབས་ནས་གདམས་ངག་བྱིན། དེས་བསྒོམས་པས་ལོ་བཅུ་གཉིས་ནས་ཕྱག་རྒྱས་ལུས་ཀྱི་དྲི་མ་དག སྔགས་ཀྱིས་ངག་གི་དྲི་མ་དག །ཏིང་ངེ་འཛིན་གྱིས་སེམས་ཀྱི་དྲི་མ་དག་གོ། གདམས་ངག་ནི། 

འབར་བའི་ཕྱག་རྒྱའི་ཆུ་ཡིས་ནི།།

ལུས་ཀྱི་དྲི་མ་འཁྲུད་པ་ཡིན།།

ཨཱལིཀཱལི་ཆུ་ཡིས་ནི།།

ངག་གི་དྲི་མ་འཁྲུད་པ་ཡིན།།

དཔའ་བོ་ཡབ་ཡུམ་སྦྱོར་བ་ཡིས།།

སེམས་ཀྱི་དྲི་མ་དྲུང་འབྱིན་ཏོ།། 

ཞེས་གསུངས་པ་བཞིན་དུ། ལུས་ཕྱག་རྒྱ་ངག་བཟླས་པ་སེམས་བསྐྱེད་རྫོགས་དང་མ་བྲལ་བར་བསྒོམས་པས། ལུས་ངག་ཡིད་གསུམ་གྱི་དྲི་མ་དག་སྟེ། ཕྱག་རྒྱ་ཆེན་པོའི་དངོས་གྲུབ་ཐོབ་ནས་ཡོད་པའི་དུས་སུ། ཆུ་ལ་གོས་དྲི་མ་ཅན་བཏང་བ་བཀྲུ་མི་དགོས་པར་རང་དག་ཏུ་འགྲོ་བ་ཀུན་གྱིས་མཐོང་བས། ཡོན་ཏན་ཐོབ་པར་གཟོད་རྟོགས་ལ། དྷོཝིཔཱ་ཞེས་ཕྱོགས་ཐམས་ཅད་དུ་གྲགས་སོ། །གུརུདྷོཝིཔཱའི་ལོ་རྒྱུས་རྫོགས་སོ།། །།

༢༩༽གུརུཀཾཀནཔཱ། 

གུརུཀཾཀནའི་ལོ་རྒྱུས་ནི། ཡུལ་ཝིཥནུནགར། རིགས་རྒྱལ་རིགས་ཡུལ་དེ་ན་རྒྱལ་པོ་གཅིག་ལ་རྒྱལ་སྲིད་ཕུན་སུམ་ཚོགས་ཤིང་འདོད་པའི་ཡོན་ཏན་གྱིས་བྲེལ་བ་མེད་པ་ལ་ལོངས་སྤྱོད་ཅིང་གནས་པའི་ཚེ། དེའི་གམ་དུ་ལེགས་པར་སྦྱངས་པའི་རྣལ་འབྱོར་པ་ཞིག་བྱོན་ནས་བསོད་སྙོམས་བསླངས་པས། རྒྱལ་པོས་བཟའ་བ་དང་། བཅའ་བ་གྱ་ནོམ་པ་དྲངས་ནས། རྣལ་འབྱོར་པ་དེས་རྒྱལ་པོ་ལ་གསུངས་པ།རྒྱལ་པོ། རྒྱལ་སྲིད་ལ་སྙིང་པོ་མེད་ཅིང་། སྲིད་པར་སོང་བ་ཐམས་ཅད་སྡུག་བསྔལ་བ་ཡིན་ཏེ། སྐྱེ་རྒ་ན་འཆི་ཟོ་ཆུན་ལྟར་འཁོར་བ་ཡིན་ཞིང་། བྱེ་བྲག་གི་སྡུག་བསྔལ་ཟད་པ་མེད་ལ། མཐོ་རིས་ཀྱིས་བདེ་བའང་འགྱུར་བའི་སྡུག་བསྔལ་ཡིན། སྟོང་འཁོར་ལོས་བསྒྱུར་བའི་རྒྱལ་པོ་ཡང་ངན་སོང་དུ་ལྟུང་བ་ཡོད་ན། འདོད་ཡོན་སླུ་བྱེད་ཟིན་པ་དང་འདྲ་བ་ལ་མ་ཆགས་པར་རྒྱལ་པོ་ཆོས་མཛོད་ཅིག་གསུངས་པས། རྒྱལ་པོ་ན་རེ། འདོད་པའི་ཡོན་ཏན་མ་སྤངས་པར་ཆོས་སྒྲུབ་པའི་ཐབས་ཡོད་ན་ཆོས་བགྱིད་ཀྱི། དེ་མ་ཡིན་པར་གོས་ཚེམ་བུ་ཅན་དང་། ཟས་བསོད་སྙོམས་ཀྱིས་བདག་ལ་འཚོ་མི་ནུས་སོ།། ཞེས་སྨྲས་པ་དང་། རྣལ་འབྱོར་པས་དེས་སྨྲས་པ། གོས་ཚེམ་བུ་དང་། ཟས་བསོད་སྙོམས་ནི་མཆོག་ཡིན་པས། ཉིད་ཀྱང་དེ་འདྲ་བ་ལ་བསྟེན་དགོས་སོ།། ཞེས་སྨྲས་པ་ན་རྒྱལ་པོ་ན་རེ། གོས་ཚེམ་བུ་ཅན་སྐྱུག་བྲོ། ཁ་ཕོར་ཐོད་པ་དང་། ཟས་ལྷག་རོལ་སྐྱུག་བྲོ་བས། འདི་བདག་གིས་མི་ནུས་སོ་ཞེས་ཞུས་པ་དང་། རྣལ་འབྱོར་པ་དེས་སྨྲས་པ། ཁྱོད་ཀྱི་དེ་འདྲ་བའི་ང་རྒྱལ་དང་། རྒྱལ་སྲིད་བྱེད་པ་ནི་མཐར་ངན་སོང་གི་སྡུག་བསྔལ་ཉམས་སུ་མྱོང་བར་འགྱུར་བ་ཡིན་ལ། ངས་གོས་ཚེམ་བུ་ཅན་དང་། ཟས་ལྷག་རོལ་དང་། སྣོད་ཐོད་པ་ཁུར་ཡང་འབྲས་བུ་ཟག་པ་མེད་པའི་བདེ་བ་ཐོབ་པ་ཡིན་པས། འོ་སྐོལ་གྱི་རྒྱལ་སྲིད་ཁྱད་པར་ཆེ་བ་ཡིན། སྨྲས་ནས་རྒྱལ་པོ་ལ། འོན་ཀྱང་འདོད་ཡོན་མ་སྤངས་པར་ཆོས་སྒྲུབ་པའི་ཐབས་ང་ལ་ཡོད་ཀྱི། གསུངས་པས། རྒྱལ་པོ་ན་རེ། འོ་ན་བདག་ཆོས་བགྱིད་ལགས་པས། གནང་དགོས་ཞུས་པ་ལ། རྣལ་འབྱོར་པས་གདམས་པ། རྒྱལ་པོ་རང་གི་ལག་གི་གདུ་བུ་རིན་པོ་ཆེ་འབར་བ་ལ་ཞེན་པ་དང་། ང་རྒྱལ་བློས་ཐོང་ན་རིན་པོ་ཆེའི་འོད་དང་ཞེན་པ་མེད་པའི་སེམས་གཉིས་གཅིག་ཏུ་གྱིས་ལ་སྒོམས་ཤིག་ཅེས་གདམས་ངག་བྱིན་ཏེ། 

གདུ་བུ་འོད་ཟེར་ལེགས་འཕྲོ་བ།།

ལྟོས་ཤིག་རང་སེམས་ཉིད་ཀྱང་བདེ།།

ཕྱི་ཡི་རྐྱེན་སོགས་དུ་མ་ཡིས།།

ཁ་དོག་དུ་མ་འབྱུང་འགྱུར་ཡང་།།

དེ་ཡི་རང་བཞིན་འགྱུར་བ་མེད།།

དེ་བཞིན་སྣ་ཚོགས་སྣང་བ་ཡིས།།

དྲན་རྟོག་དུ་མ་འབྱུང་འགྱུར་ཡང་།།

སེམས་ཉིད་རིན་ཆེན་འབར་བ་བཞིན།། ཞེས་གསུངས་པ་ན། དེ་བཞིན་དུ་རྒྱལ་པོས་ཕྱག་གཡས་པའི་གདུ་བུ་ལ་སེམས་གཏད་ནས་བསྒོམས་པས་འདོད་ཡོན་གྱི་སྟེང་དུ་སེམས་ཉིད་ངོ་འཕྲོད་ནས་ཟླ་བ་དྲུག་ན་དངོས་གྲུབ་ཐོབ་སྟེ་ཡོད་པའི་ཚེ། རང་གི་འཁོར་རྣམས་ཀྱིས་སྒོ་གསེང་ནས་བལྟས་པས། ལྷའི་བུ་མོ་དཔག་ཏུ་མེད་པས་བསྐོར་བར་མཐོང་ནས་ངོ་མཚར་སྐྱེས་ཏེ། གདམས་པ་ཞུས་པས། དེའི་ཞལ་ནས། 

སེམས་ཉིད་རྟོགས་པ་རྒྱལ་པོ་ཡིན།།

བདེ་བ་ཆེན་པོ་རྒྱལ་སྲིད་ཡིན།།

ཟུང་དུ་འཇུག་པ་ལོངས་སྤྱོད་མཆོག།

རྒྱལ་པོ་དགོས་ན་དེ་ལྟར་གྱིས།། 

ཞེས་གསུངས་ནས་རང་གི་འཁོར་དང་། ཝིཥནགརའི་སྐྱེ་བོའི་ཚོགས་ཐམས་ཅད་དང་བཅས་ཏེ། ལོ་ལྔ་བརྒྱ་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་ཤིང་། མཚན་ཡང་གདུ་བུ་པཱ་ཞེས་ཡོངས་སུ་གྲགས་སོ།། གུརུཀཾཀན་པཱའི་ལོ་རྒྱུས་རྫོགས་སོ།། །།

༣༠༽གུརུཀམྦྷལ་པཱ།

གུརུཀམྦྷལ་པཱའི་ལོ་རྒྱུས་ནི། ཡུལ་ཀངྐརམ་བྱ་བ་ན། རྒྱལ་པོ་ཞིག་གྲོང་ཁྱེར་འབུམ་ཚོ་བརྒྱད་ཅུ་རྩ་བཞི་ལ་དབང་བྱེད་པ་དེ་ལ་སྲས་གཉིས་ཡོད་པ་ལ། དེའི་ཡབ་གྲོངས་པ་དང་། སྲས་ཆེ་བ་རང་བཞིན་བཟང་བས་འབངས་རྣམས་ཀྱིས་དེ་རྒྱལ་ཚབ་ཏུ་དབང་བསྐུར་བ་དང་། དེའི་བསོད་ནམས་ཀྱིས་སྐྱེ་བོའི་ཚོགས་ཐམས་ཅད་འབྱོར་པ་དང་ལྡན་པར་གྱུར་ནས། གསེར་ལ་སོགས་པའི་སྣོད་དུ་བཟའ་བ་ལོངས་སྤྱོད་པར་བྱེད་དོ།། རྒྱལ་བུ་དེས་རྒྱལ་སྲིད་བཟུང་ནས་ཟླ་བ་དྲུག་གི་བར་དུ་ཡུམ་དང་མ་འཕྲད་ན། དེར་ངའི་མ་གར་སོང་། འདིར་མི་འོང་བ་ཅི། ཞེས་སྨྲས་པས། འཁོར་གཞན་རྣམས་ཀྱིས་ཡབ་ཀྱི་མྱ་ངན་བྱེད་པས་འདིར་མ་གཤེགས་སོ་ཟེར་རོ། །དེ་ནས་ལོ་གཅིག་ལོན་པ་དང་། མ་དེར་འོངས་ནས་ངུས་པས། དེར་བུས་ཡུམ་ཅི་ལ་བཤུམ། བྱས་པས། མས་ང་ཁྱོད་རིན་པོ་ཆེའི་ཁྲི་ལ་འདུག་ཅིང་རྒྱལ་སྲིད་བྱེད་པ་ལ་མ་དགའ་ནས་ངུས་པ་ཡིན་ཟེར་བས། རྒྱལ་བུས་མ་ལ་ཞུས་པ་ཡུམ་མི་དགྱེས་ན་ནུ་བོ་ལ་རྒྱལ་སྲིད་འཛིན་དུ་བཅུག་ནས། བདག་རབ་ཏུ་བྱུང་བ་བགྱིད་ལགས་སམ། ཞུས་པས། མས་དེ་རུང་ཟེར། དེ་ནས་གཅུང་ལ་རྒྱལ་སྲིད་གཏད་དེ་རབ་ཏུ་བྱུང་། འཁོར་དགེ་སློང་སུམ་བརྒྱ་དང་བཅས་ཏེ་གཙུག་ལག་ཁང་ཞིག་ཏུ་བཞུགས་པ་ན། དེར་མ་འོངས་ནས་ཡང་ངུས་པ་དང་། སྲས་ཀྱིས་དེ་ལ་ཕྱག་བྱས་ཏེ། ཡུམ་ཅི་ལ་བཤུམ། བྱས་པས། མས་ཁྱོད་རབ་ཏུ་བྱུང་ཡང་རྒྱལ་པོའི་ཚུལ་ལྟར་འཁོར་དང་འདུ་འཛིའི་ནང་དུ་བཞུགས་པ་འདིས་མ་དགའ་བ་ཡིན་ཞེས་སྨྲས་པ་དང་། སྲས་ཀྱིས་འོ་ན་ཅི་ཙུག་བགྱི། ཞེས་ཞུས་པས། མས་དགོན་པར་འདུ་འཛི་སྤོངས་ལ་འདུག་ཅིག་ཟེར་བས། དེས་གཙུག་ལག་ཁང་སྤངས་ནས་དགོན་པར་ཤིང་དྲུང་ཞིག་གི་རྩར་འདུག་པ་དང་། དེར་ཡང་བཟའ་བ་ལ་སོགས་པ་བསོད་ནམས་ཀྱི་ལས་འཕྲོས་བྲེལ་བ་མེད་པར་གྱུར་པ་དང་། ཡང་དེར་ཡུམ་བྱོན་ནས་ངུས་པས། སྲས་ཀྱིས་ཡུམ་ལ་ཕྱག་བྱས་ཏེ། ཅི་ཙུག་བགྱི། ཞུས་པས། མ་ན་རེ་རབ་ཏུ་བྱུང་བ་ལ་འཚོ་བའི་ཡོ་བྱད་དོན་མེད་པ་བཅངས་ནས་ཅི་བྱེད། ཟེར་རོ། །དེ་ནས་དེས་ཆོས་གོས་དང་ལྷུང་བཟེད་ལ་སོགས་པ་ཀུན་བོར་ནས། རྣལ་འབྱོར་པའི་ཆ་ལུགས་སུ་བྱས་ཏེ་ཡུལ་ཁམས་གཞན་དུ་ཕྱིན་པ་ན། དེའི་མ་མཁའ་འགྲོ་མ་ཡིན་པས་ལམ་བར་དུ་སྲས་ལ་བདེ་མཆོག་གི་དཀྱིལ་འཁོར་ཏུ་དབང་བསྐུར་ནས་ཆོས་བཤད་པས། སྲས་དུར་ཁྲོད་དུ་ཐལ་བའི་ནང་དུ་ཉལ་གྱིན་ལོ་བཅུ་གཉིས་སུ་བསྒྲུབས་པས། ཕྱག་རྒྱ་ཆེན་པོའི་དངོས་གྲུབ་ཐོབ་སྟེ་ནམ་མཁའ་ལ་ཕྱིན་པ་དང་། ཡུམ་ཌཱཀི་མ་མང་པོ་དང་ལྷན་ཅིག་ནམ་མཁའ་ལ་འོངས་ནས་སྲས་ལ་སྨྲས་པ། ཁྱོད་སེམས་ཅན་ཀྱི་དོན་མི་བྱེད་པར་ནམ་མཁའ་ལ་འགྲོ་བ་ལ་ངོ་མཚར་ཆེ་རྒྱུ་ཅི་ཡོད། དེ་འདྲ་བྱ་དང་འདྲ་བ་ཡིན་པས་ད་འགྲོ་དོན་གྱིས་ཤིག་གསུངས། སྲས་ཀྱི་ནུབ་ཕྱོགས་ཨོ་རྒྱན་གྱི་ཡུལ་མཱལ་པུར་བྱ་བ་ན་གྲོང་ཁྱེར་འབུམ་ཚོ་ཕྱེད་དང་གསུམ་ཡོད་པར་ཕྱིན་པ་དང་། དེ་ན་ཡུལ་ཀརཝཱིར་ཞེས་བྱ་བ་ན་བྲག་ཕན་ཝ་ཞེས་བྱ་བའི་དགོན་པ་ན་ཏལ་རྩེ་ཕུག་བྱ་བའི་ཕུག་པ་ཡོད་པར་བཞུགས་ནས་སྒྲུབ་པ་བྱས་པས་ཕྲ་མེན་མ་ཀུན་གྱིས་ཚོར་ནས། ཕྲ་མེན་མ་གཅིག་གིས་གཅིག་ལ་སྦྲན་པ་དང་། ཕྲ་མེན་ཀྱི་གཙོ་མོ་པདྨཱ་དེ་ཝི་བྱ་བ་འཁོར་དང་བཅས་ཏེ་བར་ཆད་ལ་འོངས་པ་དང་། སློབ་དཔོན་ལྭ་བ་ནག་པོ་ཞིག་གྱོན་ནས་གྲོང་ཁྱེར་དུ་བསོད་སྙོམས་ལ་བྱོན་པའི་ལམ་དུ་ཕྲ་མེན་མའི་བུ་མོ་ཚན་གཅིག་དང་ཕྲད་ནས། དེ་རྣམས་ཀྱིས་སློབ་དཔོན་ལ་ཁྱེད་ལ་བདག་ཅག་བཞེས་པ་འདྲེན་པས། ངེད་ཀྱིས་ཁྱིམ་དུ་གཤེགས་པར་ཞུ་ཟེར་བ་ལ། སློབ་དཔོན་གྱིས་བདག་ཁྱིམ་གཅིག་ནས་མི་ཟ་བསོད་སྙོམས་བྱེད་པ་ཡིན་གསུངས་ནས། པདྨཱ་དེཝི་ལ་སོགས་པ་ལ་ལྭ་ཝ་བཅོལ་ནས་བྱོན་ནོ།། ཕྲ་མེན་མ་ཚན་པ་དེ་རྣམས་ཀྱིས་གྲོས་བྱས་ཏེ། རྫས་ལ་ནུས་པ་ཡོད་པ་ཡིན་པས་འདིའི་ལྭ་བ་བཟའ་དགོས་ཟེར་ནས་ཟོས། ལྷག་མ་མེ་ལ་བསྲེགས་པ་དང་། སློབ་དཔོན་ལོག་ནས་འོངས་ཏེ། ཕྲ་མེན་མ་ཀུན་ལ་ངའི་ལྭ་བ་བཅོལ་བ་བྱིན་ཅིག །གསུངས་ནས། ཕྲ་མེན་མས་ལྭ་བ་གཞན་ཞིག་བྱིན་པ་དང་། ང་རང་གི་ལྭ་བ་དགོས་གསུངས་ནས། ཕྲ་མེན་མས་གསེར་ལ་སོགས་པའི་བསླུས་མ་གཏད་ཀྱང་མ་བཞེས། སློབ་དཔོན་གྱི་རྒྱལ་པོའི་གམ་དུ་བྱོན་ནས་འདི་སྐད་དུ། ཁྱོད་རྒྱལ་པོ་ཡིན་ན་ཆོམ་རྐུན་ལ་སོགས་པ་མི་སྲུང་བ་ཅི་ཡིན། གསུངས་པས། རྒྱལ་པོ་ན་རེ། ཚོམ་རྐུན་གྱིས་སུ་བཅོམ། ཟེར་བ་ལ། སློབ་དཔོན་གྱིས་ཁྱོད་ཀྱི་ཕྲ་མེན་མ་ཀུན་གྱིས་ངའི་ལྭ་བ་ཁྱེར་ཟེར་བ་ལ། རྒྱལ་པོས་ཕྲ་མེན་མ་ཀུན་བཀུག་ནས་རྣལ་འབྱོར་བའི་ལྭ་བ་བྱིན་ཅིག་བྱས་ཀྱང་། བདག་ལ་མེད་ཟེར་ནས་མ་བྱིན། སློབ་དཔོན་ཏལ་རྩེ་ཕུག་ཏུ་བྱོན་ནས་སྒྲུབ་པ་བྱས། ཁྲོ་བོ་བཅུ་ལ་གཏོར་མ་བཏང་བ་དང་། ཕྲ་མེན་མ་དུམ་གཅིག་གིས་ཕུག་གི་ཆུ་སྐམས་པར་བྱས་པ་ན། སློབ་དཔོན་གྱིས་སའི་ལྷ་མོ་ལ་ཆུ་ཐོན་ཅིག་གསུངས་པས་ཆུ་བྱུང་ངོ་། །དེ་ནས་ཕྲ་མེན་མ་ཀུན་འདུས་ཏེ་གླིང་བཞི་རི་རབ་དང་བཅས་པ་ན་གནས་པའི་ཕྲ་མེན་མ་ཀུན་ལ་སྨྲས་པས་ཐམས་ཅད་ཀྱང་འོངས་པ་དང་། སློབ་དཔོན་གྱིས་ཐམས་ཅད་ལུག་ཏུ་བྱས་ཏེ་བོར་བས། རྒྱལ་མོ་ལ་སོགས་པ་ཀུན་ཀྱང་ལུག་ཏུ་སོང་བས། ཧ་ལས་ཏེ། སློབ་དཔོན་ལ་གསོལ་བ་བཏབ་པ་དང་། སློབ་དཔོན་གྱིས་ལུག་ཐམས་ཅད་ཀྱི་མགོའི་སྤུ་བྲེགས་ནས་བཏང་བས། བུད་མེད་ཐམས་ཅད་སྐྲ་བྲེགས་པ་ཤ་སྟག་ཏུ་སོང་ནས་ངུ་ཡིན་འདུག་གོ །ཡང་དེ་ཉིད་བཞུགས་པ་ལ་འདོད་ཁམས་ཀྱི་ལྷ་རྣམས་ཀྱིས་བྲག་བཅད་དེ་བཀྲོང་བར་བྱས་པ་ལ། ཡར་ལ་སྡིགས་མཛུབ་མཛད་པས་བྲག་ནམ་མཁའ་ལ་ཡེ་རེ་ཆགས་པ་ད་དུང་ཡང་ཡོད་དོ།། དེར་རྒྱལ་པོས་ཀྱང་ཕྲ་མེན་མ་འདི་ཙམ་གྱིས་མི་གཅིག་མ་ཐུབ་པ་ཅི་ཉེས། ད་བཟོད་པ་ཕུལ་ལ་དམ་ལ་གནས་པར་གྱིས་བྱས་ཀྱང་མ་ཉན་པ་ན། བླ་མས་ཕྲ་མེན་མ་རྣམས་སྟར་ལ་བརྒྱུས་ཏེ་གཤིན་རྗེའི་ཆོས་ཀྱི་རྒྱལ་པོ་ལ་གཏོད་པའམ། ངའི་བསྟན་པ་ལ་ཞུགས་ནས་དམ་ལ་གནས་པར་མི་བྱེད་ན། རྟ་རུ་བྱས་ཏེ་ཁྱེར་བ་ཡིན་ཞེས་གསུངས་པས། ཕྲ་མེན་མ་ཀུན་སློབ་དཔོན་གྱི་ནུས་པ་ལ་འཇིགས་ནས། སྐྱབས་སུ་སོང་ཞིང་དམ་ལ་གནས་པར་མཛད་དོ། །དེ་ནས་ཕྲ་མེན་མ་དག་གིས་ཟོས་པའི་ལྭ་བ་ཀུན་སྐྱུགས་ཏེ། སློབ་དཔོན་གྱིས་ལྭ་བའི་དུམ་བུ་ཀུན་བསྡུས་ནས་བསྒྲིགས་པས་སྔ་མ་ལས་བག་ཙམ་ཐུང་བ་ཞིག་བྱུང་བ་བསྣམས་ནས་གཤེགས་པས། མཚན་ཡང་ཀམྦལཔཱ་ཞེས་པའམ་ལྭ་བ་པ་ཞེས་གྲགས། ཤྲཱིཔྲབྷཱཏ་ཞེས་ཀྱང་བྱ་སྟེ། ལོ་དཔག་ཏུ་མེད་པར་འགྲོ་དོན་མཛད་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀམྦལཔཱའི་ལོ་རྒྱུས་རྫོགས་སོ།། །།

༣༡༽གུརུཊིངྒིཔཱ། 

གུརུཊིངྒིཔའི་ལོ་རྒྱུས་ནི། རིགས་བྲམ་ཟེ། ཡུལ་སཱའིཔུཏྲའི་རྒྱལ་པོ་ཨིནྡྲ་པཱལ་བྱ་བའི་བློན་པོ་ཡིན་ལ། རྒྱལ་པོ་དེ་འཁོར་བ་ལ་སྐྱོ་བ་སྐྱེས་ནས། བློན་པོ་དེ་དང་གཉིས་ཀ་དུར་ཁྲོད་ན་ལཱུཧིཔཱ་བཞུགས་པའི་གནས་སུ་ཕྱིན་ནས་སྒོ་བརྡུངས་པས། སློབ་དཔོན་གྱིས་སུ་ཡིན། གསུངས་པ་དང་། དེ་གཉིས་ཀྱིས་བདག་རྒྱལ་པོ་དང་། བློན་པོ་ཡིན་ནོ། །ཞེས་སྨྲས་པ་དང་། འོ་ན་ནང་དུ་ཤོག་གསུངས། དེ་གཉིས་ནང་དུ་ཕྱིན་པ་དང་དེ་གཉིས་ལ་སློབ་དཔོན་གྱིས་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར། དབང་ཡོན་དུ་ཁོ་རང་གཉིས་ཀྱི་ལུས་ཕུལ་ནས། གཞན་གྱི་ཡུལ་ཨོཊིསར་ཕྱིན་པ་དང་། དེར་དཔོན་སློབ་གསུམ་གྱིས་བསོད་སྙོམས་བྱེད་ཅིང་བསྡད། དེ་ནས་རྒྱལ་པོ་བཙོངས་པའི་ལོ་རྒྱུས་སོགས་དཱརིཀཱཔཱའི་རྣམ་ཐར་དུ་གསལ་ལ། སློབ་དཔོན་ལཱུཧི་པ་དང་བྲམ་ཟེའི་བློན་པོ་གཉིས་ཀྱིས་ཇཱ་ཡིན་ཏ་པུ་རར་ནང་པའི་རཱཇཱའི་རྩར་ཞག་བདུན་ནས་བརྟོལ་ཏེ། དེར་ཆང་འཚོང་མ་ཡོད་པའི་གན་དུ་ཕྱིན་ནས། ཆང་འཚོང་གཙོ་མོའི་སྒོ་བཙལ་ནས་ཁྱེད་ཀྱི་གཙོ་མོ་མི་མི་ཉོའམ། ཞེས་སྨྲས་པ་དང་། དེས་ནང་དུ་སྨྲས་པ་ན་ཉོ་ཟེར་ཞིང་། རིན་ཅི་དགོས་ཟེར་བ་ལ་སློབ་དཔོན་གྱིས་གསེར་ཏོ་ལ་སུམ་བརྒྱ་དགོས་གསུངས་པས། དེས་དེ་བཞིན་དུ་བྱས་ཏེ་བྲམ་ཟེའི་བུ་ཁྱེར་རོ། །སློབ་དཔོན་གྱིས་དེ་ལ་བཙིགས་སུ་ཁོ་རང་གཅིག་པུར་ཉལ་དུ་ཆུག་ལ་རིན་འཁོར་བ་དང་ཐོང་ཞིག་གསུངས་ནས་སློབ་དཔོན་གཤེགས་སོ།། དེ་ནས་སློབ་དཔོན་བྲམ་ཟེ་དེས་ཆང་འཚོང་མའི་ལས་ཁྱད་པར་ཅན་བྱས་པས་དགའ་ནས་གཙོ་འཁོར་ཀུན་ཇོ་བོ་ཟེར་རོ། །དེ་ནས་ཞག་གཅིག་གི་ཚེ་ཉིན་པར་ལས་བྱས་ནས་ཟས་ལ་མ་བསྒུགས་པར་མཚན་མོ་སྐྱེད་མོས་ཚལ་དུ་ཉལ་དུ་ཕྱིན་པ་དང་། ཆང་འཚོང་མས་ཟས་མ་བྱིན་པ་དེ་མཚན་མོ་དྲན་ནས་སྐྱེལ་དུ་བཏང་བ་ན། བྲམ་ཟེ་ལ་བུ་མོ་བཅོ་ལྔ་ཙམ་གྱིས་བསྙེན་བཀུར་ནི་བྱེད། རང་ཉིད་ཀྱི་ལུས་ཀྱི་སྣང་བ་ལ་འདུག་པ་མཐོང་པས། དེ་ཆང་འཚོང་མ་ལ་བསྙད་པས། དེ་འགྱོད་པ་སྐྱེས་ཏེ། དེས་སློབ་དཔོན་ལ་ཁྱེད་བདག་ཅག་གི་ལོ་བཅུ་གཉིས་སུ་བཀོལ་བའི་སྡིག་པ་བདག་ལ་ཡོད་པས། དེའི་དོན་དུ་ལོ་བཅུ་གཉིས་སུ་བདག་གི་མཆོད་གནས་མཛོད་ཅིག །བདག་བསྙེན་བཀུར་བྱེད་པ་ལགས་ཞེས་ཞུས་པས། དེ་མ་བཞེད་དེ། ཚང་འཚོང་མ་ལ་སོགས་པ་ཇཱཡནཏ་པུ་རིའི་སྐྱེ་བོའི་ཚོགས་ཐམས་ཅད་ལ་ཆོས་བཤད་ནས་གདམས་ངག་ཕོག་སྟེ། འཁོར་བདུན་བརྒྱ་དང་བཅས་པ་མཁའ་སྤྱོད་དུ་གཤེགས་སོ།། མཚན་ནི་འབྲས་རྡུང་བའི་ལས་བྱེད་པས་ཊཱིངྒི་པཱ་ཞེས་གྲགས་ལ། དེས་ཚིགས་སུ་བཅད་པ་གསུངས་པ།

རིག་བྱེད་འདོན་པའི་ཊིངྒི་པཱ།།

འབྲས་བརྡུང་བ་ཡི་བསམ་གཏན་ཅན།།

གཏུན་དུ་འབྲས་ནི་ལེགས་པར་བརྡུངས།།

ཕྱག་མས་འཐོར་བ་སྡུད་པར་བྱེད།།

བླ་མའི་གདམས་པས་འབྲས་དག་བརྡུངས།།

ལས་གཞན་དག་ནི་མི་བྱེད་པར།།

ནག་པོ་ཡི་ནི་འབྲས་དག་བརྡུངས།།

དང་པོ་དགེ་བས་སྡིག་པ་བརྡུངས།།

རྡོ་རྗེ་རིག་པའི་ཐོ་བ་ཡིས།།

ཟེར་ནི་ཉི་མ་ཟླ་བ་ཡིན།།

གཏུན་ཁུང་ཆོས་ཉིད་སྟོང་བ་རུ།།

སྤང་བླང་གཉིས་སུ་མེད་པར་བརྡུངས།།

ཧཱུཾ་སྒྲས་རྣམ་རྟོག་ཞོ་དཀྲོགས་པས།།

བདེ་བ་ཆེན་པོའི་མར་དག་འབྱུང་།།

རོ་ནི་གཉིས་སུ་མེད་པར་མྱོང་།།

ཞེས་གསུངས་སོ།། ཊིངྒིཔཱ་ཆང་འཚོང་མ་ལ་ཚོང་བའི་དགོས་པ་ནི་བྲམ་ཟེ་རྟོག་པ་ཆེ་བ་དེ་ཆང་འཚོང་གིས་ཉམས་འགྲོ་བས་རིགས་ཀྱི་ང་རྒྱལ་བཅག་པའི་ཕྱིར་དེར་བཙོངས་པ་ཡིན་ནོ།། ཞེས་གསུངས།། གུརུཊཱིངྒིཔཱའི་ལོ་རྒྱུས་རྫོགས་སོ།། །།

༣༢༽གུརུབྷནདྷེཔཱ།

གུརུབྷནདྷེཔའི་ལོ་རྒྱུས་ནི། བྷནདྷེནི་ནོར་ལྷ་འཛིན་པ་བྱ་བ་ཡིན་ལ། དེའི་ཡུལ་ནི་མཉམ་ཡོད། རིགས་ནི་ལྷ་རིགས། བླ་མ་ནི་སློབ་དཔོན་ནག་པོ་སྤྱོད་པ་ཡིན་ནོ།།

བྷན་དྷེ་པ་ནམ་མཁའ་ལ་གནས་པ་ལ། དུས་གཅིག་གི་ཚེ་འཕགས་པ་དགྲ་བཅོམ་པ་ཞིག་ཆོས་གོས་དང་། ལྷུང་བཟེད་དང་འཁར་གསིལ་དང་བཅས་པ་འོད་དང་གཟི་བརྗིད་དང་ལྡན་པ་ཞིག་ནམ་མཁའ་ལ་གཤེགས་པར་མཐོང་ནས། ངོ་མཚར་སྐྱེས་ཏེ་ལྷའི་བཟོ་བོ་ཝིཤྭཀརྨ་ལ་དྲིས་པ། རྗེའི་སྲས། འདི་འདྲ་བའི་ངོ་མཚར་ཅན་མཁའ་ལ་རྒྱུ་བ་འདི་ཅི་ལགས། སྨྲས་པས། ཝིཤྭཀརྨ་ན་རེ། འདི་ནི་ཉོན་མོངས་པ་སྤངས་པའི་འཕགས་པ་དགྲ་བཅོམ་པ་ཡིན་ཟེར་བས། བྷནདྷེ་པས་ཀྱང་དེ་འདྲ་བ་ཐོབ་པར་འདོད་ནས་འཛམ་བུའི་གླིང་དུ་སླར་འོངས་ནས། སློབ་དཔོན་ནག་པོ་སྤྱོད་པ་ལ་ཆོས་ཞུས། ནག་པོ་སྤྱོད་པས་གསང་བ་འདུས་པར་དབང་བསྐུར་ཏེ། རྣལ་འབྱོར་སྲུང་བའི་ཐབས་ཚད་མེད་པ་བཞིའི་གདམས་ངག་བྱིན་ནས། སྙིང་རྗེ་ལྟ་བ། དགའ་བ་སྒོམ་པ། བྱམས་པ་སྤྱོད་པ། བཏང་སྙོམས་འབྲས་བུར་བསྒོམས་པས། ཕྱིན་ཅི་ལོག་གི་འཁྲུལ་པའི་དུག་ཐམས་ཅད་དག་ནས། མཧཱ་མུདྲཱའི་འབྲས་བུ་ཐོབ་སྟེ། ཕྱོགས་མཚམས་ཐམས་ཅད་དུ་རྣལ་འབྱོར་པ་བྷནདྷེ་པཱ་ཞེས་གྲགས། དེ་ལ་ཝིཤྭཀརྨས་ཅི་བྱས་དྲིས་པས། དེའི་ཞལ་ནས། 

དམིགས་པ་མེད་པའི་ལྟ་བ་དང་།།

རྒྱུན་ཆད་མེད་པའི་སྒོམ་པ་དང་།།

ཕ་མ་ལྟ་བུའི་སྤྱོད་པ་དང་།།

ནམ་མཁའ་ལྟ་བུའི་འབྲས་བུ་བཞི།།།

ཐ་དད་མེད་པར་མངོན་དུ་མཐོང་།།

མངོན་པར་ཞེན་པ་ག་ལ་གྲུབ།།

ཨེ་མ་བླ་མ་ངོ་མཚར་ཆེ།།

མཁས་པས་རྟག་ཏུ་བསྟེན་པར་གྱིས།།

ཞེས་གསུངས། མཉམ་ཡོད་ལ་སོགས་པའི་གྲོང་ཁྱེར་ཆེན་པོ་དྲུག་ཏུ་ལོ་བཞི་བརྒྱའི་བར་དུ་འགྲོ་དོན་བསམ་གྱིས་མི་ཁྱབ་པ་མཛད་དེ། མཐར་འཁོར་བཞི་བརྒྱ་དང་བཅས་པ་ལུས་དེ་ཉིད་ཀྱི་མཁའ་སྤྱོད་དུ་གཤེགས་སོ།། གུརུབྷནདྷེཔཱའི་ལོ་རྒྱུས་རྫོགས་སོ།། །།

༣༣༽གུརུཏནདྷེཔཱ།།

 གུརུཏནདྷེཔཱའི་ལོ་རྒྱུས་ནི། ཏན་དྷེ་པཱ་བྱ་བ་ཆོ་ལོ་པ་བྱ་བ་ཡིན་ལ། ཡུལ་ཀཽ་ཤཱམ་བཱི་བྱ་བར་དམངས་རིགས་ཀྱི་གང་ཟག་ཅིག་རྟག་ཏུ་ཆོ་ལོ་རྩེ་བས་ཟས་ནོར་ཐམས་ཅད་ཟད་ནས་མེད་ཀྱང་། གོམས་པའི་སྟོབས་ཀྱིས་ཡང་ཆོ་ལོ་བརྩེས་པས་བཅལ་རྒྱུ་ཅི་ཡང་མེད་པས་མི་ཀུན་གྱིས་དེ་བརྡུངས་པ་ན། སྐྱོ་བ་སྐྱེས་ཏེ་དུར་ཁྲོད་དུ་ཕྱིན་ནས་འདུག་པ་དང་། དེར་རྣལ་འབྱོར་པ་ཞིག་བྱོན་ནས། ཁྱོད་འདི་ན་ཅི་བྱེད་ཀྱིན་འདུག གསུངས་པས། དེ་ན་རེ། བདག་ཆོ་ལོ་ལ་དགའ་བས་ནོར་རྫས་ཐམས་ཅད་ཤོར་ཏེ། ལུས་སེམས་སྡུག་བསྔལ་གྱིས་གདུངས་ཏེ་འདི་ན་གདའ། ཞེས་ཞུས་པས། རྣལ་འབྱོར་པས་ཁྱོད་ཆོས་མི་བྱེད་དམ། གསུངས་པས། དེ་ན་རེ། ཆོ་ལོ་སྤོང་བར་མི་ནུས་པས། དེ་མ་སྤངས་པར་ཆོས་བྱར་ཡོད་ན་བདག་བྱེད་ལགས་ཞུས་པས། རྣལ་འབྱོར་པས་དེ་ཡོད་གསུངས་ནས། དེ་ལ་དབང་བསྐུར། གདམས་ངག་ཏུ་ཆོ་ལོ་ནོར་རྫས་ཟད་ནས་སྟོང་བར་སོང་བ་བཞིན་དུ་ཁམས་གསུམ་ཐམས་ཅད་སྟོང་བར་བསྒོམས་ལ། ཁམས་གསུམ་སྟོང་པ་བཞིན་སེམས་ཉིད་ཀྱང་སྟོང་པར་སྒོམས་ཤིག་ཅེས་པ་སྟེ། 

ཆོ་ལོས་ནོར་རྣམས་ཟད་པ་ལྟར།།

རིག་པའི་ཆོ་ལོས་ཁམས་གསུམ་གྱི།།

རྣམ་རྟོག་ཐམས་ཅད་ཟད་པར་གྱིས།།

དེ་ཡིས་བདག་ཉིད་གདུངས་པ་ལྟར།། 

རྣམ་རྟོག་ཆོས་སྐུར་གདུང་བར་བྱ།།

དུར་ཁྲོད་དབེན་པར་ཉལ་བ་ལྟར།།

བདེ་ཆེན་ཀློང་དུ་ཉལ་བར་བྱ།། 

ཞེས་བསྟན་པ་བཞིན་དུ་བསྒོམས་པས། ཁམས་གསུམ་གྱི་རྟོག་པ་ཆོས་ཉིད་དུ་ནུབ། དེ་ལྟར་རྟོགས་པའི་རིག་པ་དེ་ཡང་རང་བཞིན་མེད་པར་གྱུར་ཏེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས། དེས་གསུངས་པ། 

དང་པོ་སྐྱོ་བ་མ་སྐྱེས་ན།།

ཐར་པའི་ལམ་དུ་ག་ལ་འཇུག།

དད་པའི་བླ་མ་མ་བསྟེན་ན།།

དངོས་གྲུབ་དམ་པ་ག་ལ་འཇུག།

ཅེས་གསུངས་ཏེ། ནམ་མཁའ་ལ་འཕགས་ནས་ལུས་དེ་ཉིད་ཀྱིས་མཁའ་སྤྱོད་ཀྱི་གནས་སུ་གཤེགས་སོ།། གུརུཏནདྷེཔཱའི་ལོ་རྒྱུས་རྫོགས་སོ།། །།

༣༤༽གུརུཀུཀྐུརིཔཱ།

 གུརུཀུཀྐུརིཔཱའི་ལོ་རྒྱུས་ནི། ཡུལ་ཀཔིལཝསྟུ་ན་བྲམ་ཟེ་ཞིག་སྔགས་ལ་དད་པ་སྐྱེས་ཏེ། རྣལ་འབྱོར་གྱི་སྤྱོད་པ་མཛད་ཅིང་། མཐར་གྱིས་ལྡོམ་བུ་ལ་བྱོན་ནས་ལུམ་བཱིནཱིའི་གྲོང་ཁྱེར་དུ་བྱོན་པའི་ལམ་ཁ་ན། ཁྱི་གུ་མོ་ལྟོ་མ་ཐེག་པ་ཞིག་འདུག་པས་དེ་ལ་བྱམས་པ་སྐྱེས་ནས་དེ་ཁྱེར་ཏེ་གྲོང་ཁྱེར་དུ་བྱོན་ནས་ཕྱོགས་བཞིར་གཟིགས་པ། ཕྱོགས་གཅིག་ན་བྲག་ཕུག་སྟོང་པ་ཞིག་འདུག་པ་དེར་ཁྱི་གུ་བོར་ཏེ་བསོད་སྙོམས་བླངས་ཀྱིན་དེར་བསྒྲུབས་པས། ལོ་བཅུ་གཉིས་ནས་འཇིག་རྟེན་པའི་དངོས་གྲུབ་མངོན་ཤེས་ལ་སོགས་པ་ཐོབ་པས། སུམ་ཅུ་རྩ་གསུམ་ལ་སོགས་པའི་ལྷ་རྣམས་ཀྱིས་སྤྱན་དྲངས་ཏེ་དེར་བྱོན་པའི་རྗེས་སུ་ཁྱི་གུ་ཕུག་པ་ཉིད་དུ་ལུས། མི་མེད་པར་ཁྱི་གུས་ས་བྲུས་པས་ཆུ་དང་བཟའ་བ་ལ་སོགས་པ་བྱུང་བ་ཟ་ཞིང་དེར་བསྡད་པ་དང་། རྣལ་འབྱོར་པ་དེ་ལ་ལྷ་རྣམས་ཀྱིས་མཆོད་པ་རྒྱ་ཆེན་པོ་བྱས་པ་ན། རྣལ་འབྱོར་པས་སྔར་གྱི་ཁྱི་གུ་དྲན་ཏེ་ལོག་པར་བརྩམས་པ་ལས། ལྷ་རྣམས་ན་རེ། ཡོན་ཏན་འདི་ཙམ་ཐོབ་ཀྱང་། ཁྱི་གུ་འདྲ་བའི་རྟོག་པ་མ་ཆོད་པ་འདི་མ་ལེགས་པས། འདི་ཉིད་དུ་བཞུགས་པར་ཞུ་ཟེར་ཡང་ཡང་བཀག་པ་ན། དུས་གཅིག་གི་ཚེ་མ་གསན་པར་བྲག་ཕུག་ཏུ་ལོག་ནས་བྱོན་ཏེ། ཁྱི་གུ་ལ་བྱིལ་བྱིལ་མཛད་པས། དེ་མཁའ་འགྲོ་མར་སོང་སྟེ་དེའི་ཞལ་ནས། 

ལེགས་སོ་ལེགས་སོ་རིགས་ཅན་ཁྱོད།།

བར་ཆད་དབང་དུ་མ་སོང་སྟེ།།

དངོས་གྲུབ་དམ་པ་ལེན་དུ་འོངས།།

སྔ་མའི་དངོས་གྲུབ་རྫུན་པ་སྟེ།། 

ལོག་པར་ལྟ་བ་དག་ལ་ཡོད།།

ངོ་མཚར་མིན་ཏེ་འགྱུར་བ་ཅན།།

ཟག་མེད་བདེ་ཆེན་མཆོག་ཉིད་ཀྱི།།

དངོས་གྲུབ་དམ་པ་མ་ཡིས་སྟེར།། ཞེས་གསུངས་ཤིང་། ཐབས་ཤེས་ཟུང་འཇུག་གི་བརྡའ་བསྟན་ནས། འགྱུར་མེད་ལྟ་བ་ཕྱིན་ཅི་མ་ལོག་པ་རྒྱུད་ལ་སྐྱེས་ཤིང་། དངོས་གྲུབ་མཆོག་ཐོབ་པས། དེ་མན་ཆད་ལུམབཱིནཱི་ལ་སོགས་པ་ཐམས་ཅད་དུ་བླ་མ་ཀུཀྐུརིཔཱ་ཞེས་བྱ་བར་གྲགས། འགྲོ་དོན་མང་དུ་མཛད། གྲོང་ཁྱེར་ཀཔིལཝསྟུའི་སྐྱེ་བོའི་ཚོགས་དང་བཅས་པ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀུཀྐུརིཔཱའི་ལོ་རྒྱུས་རྫོགས་སོ།། །།

༣༥༽གུརུཀུཙིཔཱ།

གུརུཀུཙིཔཱའི་ལོ་རྒྱུས་ནི། ཀུཙིཔཱ་བྱ་བ་ལྟག་ལྦ་ཅན་ཏེ། ཡུལ་ཀཧརིབྱ་བར་དམངས་རིགས་ཀྱི་གང་ཟག་ཅིག་ཞིང་ལས་ཀྱིས་འཚོ་བར་བྱེད་པ་ན། དུས་གཅིག་གི་ཚེ་དེ་ལ་སྔོན་ལས་ཀྱིས་ལྟག་པར་ལྦ་བ་ཞིག་སྐྱེས་ནས། དེ་རྗེས་ཆེར་སོང་ནས་འགྲོ་བ་ལ་སོགས་པའང་མི་ཤེས་པར་གྱུར་པས་དེ་སྡུག་བསྔལ་ནས་ཕྱོགས་དབེན་པ་ཞིག་ཏུ་ཉལ་ནས་བསྡད་པའི་ཚེ། དེར་འཕགས་པ་ཀླུ་སྒྲུབ་བྱོན་པས། དེ་ལ་དད་པ་སྐྱེས་ནས་ཐལ་མོ་སྦྱར་ཏེ།

ཨེ་མ་འཕགས་པ་གང་ནས་བྱོན།།

བདག་ནི་ལས་ངན་གྱིས་མནར་བས།།

སྡུག་བསྔལ་བཟོད་དཀའ་འདི་འདྲ་ན།།

ཐར་པའི་ཐབས་ཤིག་བདག་ལ་སྩོལ།།

ཞེས་ཞུས་པས། འཕགས་པས་དེ་ལས་ཐར་བའི་ཐབས་ཡོད་དེ་བརྩོན་པས་སྒྲུབ་ནུས་སམ། ནུས་ན་སྡུག་བསྔལ་ཀུན་དྲུང་ནས་འབྱིན་ཅིང་བདེ་བར་འགྲོ་བའི་ཐབས་ཡོད་དེ་གསུངས་པས། དེ་ན་རེ། འཕགས་པ་བརྩོན་པར་སྒྲུབ་ཅིས་ཏེ་མི་ནུས་ནུས་ལགས་ཟེར་བས། འཕགས་པས་དེ་ལ་གསང་བ་འདུས་པའི་དཀྱིལ་འཁོར་དུ་བཅུག་ནས་ལེགས་པར་དབང་བསྐུར་ནས། སྡུག་བསྔལ་ལམ་ཁྱེར་གྱི་ཆོས་བསྐྱེད་རྫོགས་ཀྱི་གདམས་པ་འདི་ལྟར་གནང་སྟེ། དེ་ཡང་བསྐྱེད་རིམ་གྱི་དམིགས་པ་ལྟག་པའི་ལྦ་བ་དེ་ཇེ་ཆེར་སྒོམས་ཤིག་གསུངས་ནས། དེས་ཀྱང་དེ་ལྟར་བསྒོམས་པས། ཝ་བ་དེ་སྔར་བས་ཇེ་ཆེར་སོང་ནས་སྡུག་བསྔལ་བ་ན། སླར་འཕགས་པ་བྱོན་ནས་བདེ་འམ་གསུངས་པས། ཤིན་ཏུ་སྡུག་བསྔལ་བར་གདའ་ཞུས་པས། དེ་ལ་འཕགས་པས་སླར་རྫོགས་རིམ་གྱི་དམིགས་པ་ལྟར་ཆོས་ཐམས་ཅད་དེར་འདུས་པར་བསྒོམས་ཤིག་གསུངས་པས། དེས་ཀྱང་དེ་ལྟར་བསྒོམས་པ་ན། ཝ་བ་མེད་པར་སོང་ནས་བདེ་བ་ན། ཡང་འཕགས་པ་བྱོན་ནས་བདེ་འམ། གསུངས་པས། བདེ་ལགས་ཞུས་པ་དེ་ལ་གདམས་པ། 

ཡོད་དང་མེད་ལས་བདེ་སྡུག་འབྱུང་།།

མཐའ་གཉིས་རྟོགས་པ་དང་བྲལ་ན།།

བདེ་དང་སྡུག་བསྔལ་ག་ལ་ཡོད།།

ཆོས་རྣམས་རང་རང་ངོ་བོས་སྟོང་།། 

ཞེས་གསུངས་པས་དེའི་དོན་དེས་ལེགས་པར་རྟོགས་ཏེ། དམིགས་མེད་ཕྱག་རྒྱ་ཆེན་པོའི་དངོས་གྲུབ་ཐོབ་ནས། དེས་ཀཧིརཱ་ལ་སོགས་པར་ལོ་བདུན་བརྒྱའི་བར་དུ་འགྲོ་དོན་མཛད་དེ། ཐམས་ཅད་དུ་ཀུ་ཙིཔཱ་ཞེས་གྲགས་ལ། མཐར་འཁོར་བདུན་བརྒྱ་དང་བཅས་པ་མཁའ་སྤྱོད་དུ་གཤེགས་སོ། །གུརུཀུཙིཔཱའི་ལོ་རྒྱུས་རྫོགས་སོ།། །།

༣༦༽གུརུདྷརྨཔཱ། 

གུརུདྷརྨཔཱའི་ལོ་རྒྱུས་ནི། དྷརྨཔཱ་སྟེ་ཐོས་པའི་ཤེས་རབ་བྱ་བ་ཡིན་ལ། ཝི་ཀྲམསུརན། བྲམ་ཟེ་ཞིག་རྟག་ཏུ་ཐོས་པ་ལ་བརྩོན་པར་གནས་ཀྱང་། བསམ་པ་དང་། སྒོམ་པའི་ཤེས་རབ་མེད་པ་ལ། དུས་གཅིག་གི་ཚེ་རྣལ་འབྱོར་པ་ཞིག་བྱོན་ནས། ཐོས་པ་མང་དུ་བྱས་པའི་བློ་ལ་ཆོས་མང་དུ་ཡོད་དམ། གསུངས་པས། དེ་ན་རེ། འཕགས་པ་བདག་གིས་ཆོས་མང་དུ་ཐོས་ཀྱང་ཐོས་མ་ཐག་ཏུ་བརྗེད་པས། མི་བརྗེད་པའི་གདམས་པ་ཞིག་ཞུ་འཚལ་ཞུ་བ་ལ། རྣལ་འབྱོར་པས་དེ་ལ་རུང་གསུངས་ཏེ། བྱིན་རླབས་འཕོ་བའི་དབང་སྐུར་ནས་དུ་མ་རོ་གཅིག་པའི་གདམས་པ་འདི་གནང་ངོ་། །

རིན་ཆེན་ཕྱེ་མ་དུ་མ་རྣམས།།

མགར་གྱིས་ལེགས་པར་གཅིག་ཏུ་བསྒྱུར།

དེ་བཞིན་ཐོས་པ་སྣ་ཚོགས་ཀྱང་།།

སེམས་ཉིད་དབྱིངས་སུ་བཞུ་བར་གྱིས།། 

ཞེས་གསུངས་པའི་དོན་དེས་གོ་ནས། ཐོས་པའི་ཆོས་ཐམས་ཅད་སེམས་ཉིད་དེ་དུ་མ་རོ་གཅིག་ཏུ་རྟོགས་ཏེ། ཕྱག་རྒྱ་ཆེན་པོའི་དངོས་གྲུབ་ཐོབ་ནས། དྷརྨ་པཱ་ཞེས་གྲགས། གདུལ་བྱ་མང་པོ་ཐར་ལམ་ལ་བཀོད་ནས། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུདྷརྨཔཱའི་ལོ་རྒྱུས་རྫོགས་སོ།། །།

༣༧༽གུརུམཧིཔཱ།

གུརུམཧིཔཱའི་ལོ་རྒྱུས་ནི། མཧིཔཱ་སྟེ་ང་རྒྱལ་ཅན་ནོ།། དེ་ཡང་ཡུལ་མགདྷན། དམངས་རིགས་ཀྱི་གང་ཟག་ལུས་སྟོབས་ཤེད་ཆེ་བ་ཞིག་གནས་པ་དེ། ངས་མི་ཐུབ་པའི་མིའམ་སྲོག་ཆགས་གང་ཡང་མེད་སྙམ་པའི་ང་རྒྱལ་གྱིས་དུས་རྟག་ཏུ་ནོན་ནས་འདུག་པའི་གམ་དུ་རྣལ་འབྱོར་པ་ཞིག་བྱོན་ནས་དེ་ལ་བལྟས་ཏེ། ཁྱོད་ཅི་སེམས་ཤིང་འདུག །གསུངས་པས། ཅི་ཡང་སེམས་པ་མེད། ཟེར་བས། འོ་ན་ངས་མི་ཐུབ་པ་ཅི་ཡང་མེད་སྙམ་པ་དེ་ཅི་ཡིན། གསུངས་པས། དེ་དད་ནས། ན་མོ་ཞེས་ཕྱག་བྱ་བའི་ཚེ། ང་རྒྱལ་གྱི་དྲི་མ་དག་པར་གྱུར་ཅིག་གསུངས་པས། དེ་ན་རེ། བདག་ལ་ཆོས་ཤིག་ཞུ་ཟེར་བས། རྣལ་འབྱོར་པས་རུང་གསུངས་ཏེ། བྱིན་རླབས་འཕོ་བའི་དབང་བསྐུར་མཛད། དེ་ནས། 

སྣང་བ་སེམས་སུ་ཤེས་བྱས་ན།།

སེམས་ཉིད་སྟོང་པ་སྐྱེ་འགག་མེད།།

དེ་ལ་མ་ཡེངས་སྒོམ་པ་ཡིན།།

ཀློང་དུ་གྱུར་ན་འབྲས་བུའོ།།

གསུངས་པ། དེས་མ་གོ་ལགས་ཞུས་པས། ཡང་། 

ཁྱོད་ནི་སྟོབས་ཅན་ཉིད་ཡིན་པས།།

ཁྱོད་ཀྱིས་མི་ཐུབ་གང་ཡང་མེད།།

སྣང་བ་རླུང་དང་ཤེས་པ་གསུམ།།

ནམ་མཁའི་དབྱིངས་སུ་གཟུང་བར་བྱའོ།། 

ཞེས་འགལ་བ་ལམ་ཁྱེར་གྱི་གདམས་པ་བསྟན་པས། དེས་ཀྱང་དེ་ཅི་དཀའ་སྙམ་ན་བཟུང་བས། གཟུང་བའི་ཡུལ་མ་རྙེད་ཅིང་། འཛིན་པའི་ཤེས་པ་སྟོར་ནས་ནམ་མཁའི་དབྱིངས་ལྟར་རྟོགས་པས་གྲུབ་པ་ཐོབ། ཡུལ་མགདྷལ་སོགས་པར་ལོ་སུམ་བརྒྱའི་བར་དུ་གདུལ་བྱ་དཔག་ཏུ་མེད་པ་ལ་གནས་ལུགས་དངོས་མེད་སྟོབས་ལྡན་གྱི་གདམས་པ་གནང་ནས། མཐར་འཁོར་ཉིས་བརྒྱ་ལྔ་བཅུ་རྩ་གཅིག་དང་བཅས་ཏེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུམཧི་པའི་ལོ་རྒྱུས་རྫོགས་སོ།། །།

༣༨༽གུརུཨཅིནྟཱ།

གུརུཨཅིནྟ་ནི། དྲན་པ་མེད་པ་བྱ་བ་ཡིན་ལ། འདིའི་ཡུལ་ནི་དྷ་ནི་པུར་ཡིན་ཞིང་། རིགས་ནི་ཤིང་འཚོང་རིགས་ཡིན་ནོ།། དེ་ཡང་ཤིན་ཏུ་དབུལ་ཞིང་ཕོངས་པ་ཡིན་པས་ཉིན་མཚན་དུ་ནོར་རྫས་ལ་སྲེད་པས། འཇིག་རྟེན་གྱི་རྣམ་རྟོག་གཞན་གང་ཡང་དྲན་པ་མེད་པར་ནོར་རྫས་འབའ་ཞིག་འདོད་པས་གདུངས་ཏེ། དབེན་པ་ཞིག་ན་འདུག་པ་དང་། དེའི་གམ་དུ་རྣལ་འབྱོར་པ་ཀམྦལ་སྟེ་ལྭ་ཝ་པཱ་བྱོན་ནས། ཁྱོད་དབེན་པ་ན། ལུས་ངག་དབེན་པར་འདུག་སྟེ་ཅི་སེམས་ཀྱིན་འདུག །གསུངས་པས། དེ་ན་རེ། རྣལ་འབྱོར་པ་བདག་ནི་འཇིག་རྟེན་གྱི་ནོར་རྫས་སེམས་པ་ལས་གཞན་ཅི་ཡང་མི་དྲན་ལ། ནོར་སེམས་ཀྱང་ཁུག་པ་ནི་ཅི་ཡང་མི་འདུག་ཞུས་པས། སློབ་དཔོན་གྱི་ང་ལ་ནོར་རྫས་ཁུག་པའི་གདམས་པ་ཡོད་དེ་ཁྱོད་ཀྱི་སྒྲུབ་ནུས་སམ་གསུངས་པས། དེ་ན་རེ། སྒྲུབ་མི་ནུས་པའི་ཐབས་མེད་པས་ཅིས་ཀྱང་ཞུ་ཟེར། དེ་ནས་སློབ་དཔོན་གྱིས་དེ་ལ་བདེ་མཆོག་ཏུ་དབང་བསྐུར། མི་ཟབ་པ་རྫོགས་པའི་རིམ་པ་འདི་གནང་སྟེ། 

འདོད་པས་རྙེད་པ་ག་ལ་ཡོད།། 

མོ་གཤམ་བུ་ནི་ཇི་བཞིན་ནོ།།

དེས་ན་འདོད་པའི་སེམས་སྤོངསལ།།

རང་ལུས་ནམ་མཁའི་ངང་ཉིད་དུ།། 

རང་སེམས་སྐར་མར་གསལ་བར་སྒོམས།།

དེ་ཡང་ནོར་ལྷ་ཉིད་ཡིན་པས།།

མངོན་དུ་གྱུར་པ་ཉིད་ཀྱི་ཚེ།།

འདོད་དགུ་མ་ལུས་འབྱུང་བར་འགྱུར།།

ཞེས་གསུངས་པས། དེས་ཀྱང་དེ་བཞིན་དུ་བསྒོམས་པས། ནོར་རྫས་ཀྱི་རྟོག་པ་དེ་སྐར་མའི་ངང་དུ་སྟོར། སྐར་མ་དེ་ཡང་ནམ་མཁའི་ངང་དུ་ནུབ་ནས་རྟོག་མེད་ཀྱི་ངང་དུ་སོང་བ་ན་སླར་བླ་མས་དེ་ལ། 

ནམ་མཁའི་རང་བཞིན་ཇི་ལྟ་བུ།།

ཁྱོད་ཀྱིས་ཡུལ་དུ་བྱས་སམ་ཅི།།

ཁ་དོག་དབྱིབས་སོགས་བྲལ་བ་ལ།།

ཅི་ལྟར་ཞེན་ཅིང་ཇི་ལྟར་བསྒོམས།།

གསུངས་པས། དེས་དེའི་དོན་རྟོགས་ནས་ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། བླ་མ་ཨཅིནྟར་གྲགས། གནས་ལུགས་ཀྱི་གདམས་པ་ལོ་སུམ་བརྒྱར་འགྲོ་དོན་མཛད་ནས། འཁོར་དཔག་ཏུ་མེད་པ་དང་བཅས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཨཅིནྟཱའི་ལོ་རྒྱུས་རྫོགས་སོ།། །།

༣༩༽གུརུབབྷཧི།

གུརུབབྷཧིའི་ལོ་རྒྱུས་ནི། བབྷཧིའི་དོན་ནི་ཆུ་ལས་འོ་མ་ལེན་པ་བྱ་བ་ཡིན་ལ། ཡུལ་དྷཉྫུར་བྱ་བ་ན་རྒྱལ་རིགས་ཀྱི་གང་ཟག་ཅིག་རྒྱལ་པོའི་འདོད་པའི་ཡོན་ཏན་གྱིས་མྱོས་ནས་འདུག་པ་ལ། དེའི་གམ་དུ་ལེགས་པར་སྦྱངས་པའི་རྣལ་འབྱོར་པ་ཞིག་བྱོན་ནས་ཟས་ཀྱི་བསོད་སྙོམས་བྱས་པས། བཟའ་བ་དང་བཅའ་བ་གྱ་ནོམ་པ་དྲངས་ཏེ། རྒྱལ་པོ་དེ་དད་ནས་ཆོས་ཤིག་ཞུ་ཟེར་བ་ལ། དེས་ཀྱང་ཆོས་ཐམས་ཅད་ཀྱི་རྩ་བ་དམ་ཚིག་ཡིན་པ་དང་། དངོས་གྲུབ་ཐམས་ཅད་ཀྱི་རྩ་བ་བླ་མ་ཡིན་ནོ།། ཞེས་གསུངས་ཏེ། བྱིན་རླབས་འཕོ་བའི་དབང་བསྐུར་ནས། རྩ་རླུང་ཐིག་ལེའི་གདམས་པ་འདི་ལྟ་སྟེ།

གཞན་ལུས་ཐབས་ལྡན་ཁྱད་པར་ཅན།།

བྷ་གའི་རྣམ་པའི་དཀྱིལ་འཁོར་དུ།།

རཀྟའི་རྒྱ་མཚོ་ཆེན་པོ་ལ།།

བྱང་སེམས་འོ་མ་བསྲེས་ཤིང་ལེན།།

གནས་སུ་འཁྱོལ་ནས་ཁོང་དུ་དྲངས།།

བདེ་བ་རྒྱུན་ཆད་དེ་ལྟ་མིན།།

བདེ་བས་བདེ་བ་འཇོམས་པ་ན།།

དེ་ཡང་སྟོང་དང་དབྱེར་མེད་སྒོམས།།

ཞེས་གསུངས་པས། དེས་ཀྱང་དེ་ལྟར་ཉམས་སུ་བླངས་པས། ལོ་བཅུ་གཉིས་ནས་མཐོང་སྤང་གི་དྲི་མ་དག་ནས་དངོས་གྲུབ་ཐོབ་སྟེ། གདུལ་བྱའི་དོན་ཡང་མང་དུ་མཛད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུབབྷཧའི་ལོ་རྒྱུས་རྫོགས་སོ།། །།

༤༠༽གུརུནལིན་པཱ།

གུརུནལིནཔཱའི་ལོ་རྒྱུས་ནི། ནལིན་སྟེ་པདྨའི་རྩ་བ་བྱ་བའོ།། དེ་ཡང་ཡུལ་ས་ལིཔུཏྲ་ན་རྒྱལ་རིགས་ཀྱི་གང་ཟག་ཅིག་ཤིན་ཏུ་ཕོངས་ནས་པདྨའི་རྩ་བ་མཚོ་ནས་བཏུས་ཏེ་འཚོ་བ་བྱེད་པ་ན། དུས་གཅིག་གི་ཚེ་རྣལ་འབྱོར་པ་ཞིག་དང་འཕྲད་ནས། དེ་ལ་པདྨའི་རྩ་བ་དེ་དྲངས་པས། དེས་ཀྱང་འཁོར་བའི་ཉེས་པ་དང་། མྱ་ངན་ལས་འདས་པའི་ཡོན་ཏན་བཤད་པས། དེ་འཁོར་བ་ལས་བློ་ལྡོག་སྟེ། བླ་མ། ཐར་པ་ཐོབ་པའི་ཐབས་ཤིག་ཞུ་ལགས་ཟེར་བ་ལ། རྣལ་འབྱོར་པ་དེས་རུང་གསུངས་ནས། གསང་བ་འདུས་པར་དབང་བསྐུར་ཏེ། རང་ལུས་ཐབས་ལྡན་ལ་བརྟེན་པའི་གདམས་པ་འདི་གནང་ངོ་།།

སྤྱི་བོར་བདེ་བ་ཆེན་པོའི་ནི།།

ཧྃ་ནི་དཀར་པོ་ཡང་དག་བསམ།།

ལྟེ་བར་སྤྲུལ་པའི་ཡི་གེ་ཝཾ།།

འོད་འབར་བས་ནི་ཧྃ་འཛག་སྟེ།།

དགའ་དང་དགའ་བྲལ་མཆོག་དགའ་དང་།།

ལྷན་སྐྱེས་དག་ནི་རིམ་པ་བཞིན།།

འབྱུང་བས་འཁོར་བའི་ཉེས་པ་དང་།།

ཐར་པའི་བདེ་ཆེན་འདོར་ཞིང་ལེན།། ཅེས་གསུངས་པས། དེས་ཀྱང་དེ་བཞིན་དུ་བསྒོམས་པ་ན། པདྨ་འདམ་ནས་སྐྱེས་ཀྱང་འདམ་གྱིས་མ་གོས་པ་བཞིན། སྒོམ་པ་དགའ་བཞིའི་འཁོར་ལོ་བཞི་ལ་བརྟེན་ནས་བསྒོམས་ཀྱང་། དམིགས་པ་དང་འཁོར་བའི་ཉེས་པ་མ་གོས་པ་ལོ་དགུ་ན་དོན་རྟོགས་ཤིང་འཁྲུལ་པའི་དྲི་མ་ཐམས་ཅད་དག་སྟེ། ཕྱག་རྒྱ་ཆེན་པོའི་དངོས་གྲུབ་ཐོབ། དེ་ནས་སཱལིཔུཏྲ་འགྲོ་དོན་མཛད་ནས། ལོ་བཞི་བརྒྱ་ན་འཁོར་ཕྱེད་དང་ལྔ་བརྒྱ་དང་བཅས་ཏེ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །གུརུནལིན་པའི་ལོ་རྒྱུས་རྫོགས་སོ།། །།

༤༡༽གུརུབྷུསུཀུ་པཱ།

གུརུབྷུསུཀུའི་ལོ་རྒྱུས་ནི། ཡུལ་ནཱལེནྡཱ་ན་རྒྱལ་རིགས་ཀྱི་གང་ཟག་ཅིག་རང་བཞིན་བཟང་ཞིང་རབ་ཏུ་བྱུང་ནས་དགེ་སློང་དུ་མཛད་ལ། དེ་ཡང་ནཱལེནྡཱའི་རྒྱལ་པོ་དེཝཔཱལ་བཞུགས་པའི་ཚེ། དེའི་ཆོས་སྐོར་ལ་དགེ་འདུན་བདུན་བརྒྱའི་སྐུ་འཚོ་བཟང་པོ་བཟའ་བཏུང་སོགས་ཅི་བཞེད་འབུལ་ཞིང་། སྡེ་པ་བཞི་ཡོད་པའི་ཕལ་ཆེར་སྡེ་པའི་མཁན་པོ་ལ་མཁན་བུ་སུམ་བརྒྱ་ཙམ་ཡོད་པ་ལ། གཞན་ཀུན་བརྩོན་པས་རིགས་པའི་གནས་ལྔ་ལ་བྱང་བར་ཡོད་པ་ལ། རྒྱལ་རིགས་ཀྱི་དགེ་སློང་དེ་ནི་རྟག་ཏུ་གཉིད་ལོག་པར་བྱེད་པ་ལ། ཕོ་བའི་མེ་དྲོད་ཀྱང་ཆེ་ནས། འབྲས་བྲེ་ལྔ་ལྔ་ནངས་རེ་བཞིན་ཟ་ཡིན་འདུག་པ་ལ། རྒྱལ་པོ་དེཝཔཱལ་ན་རེ་འདི་ནི་བྷུསུཀུ་ཞིག་འདུག་གོ །ཟེར་བས་མིང་ཡང་བྷུསུཀུ་ཞེས་གྲགས། དེ་ནི་ཟ་ཉལ་འཆག་གསུམ་པ་ཞེས་བྱའོ། ནཱལེནྡཱའི་ཆོས་སྐོར་དེ་ན་དུས་རྟག་ཏུ་མདོ་རེས་མོས་སུ་འདོན་པའི་ལུགས་ཡོད་པ་ལས། དེ་ན་གནས་པ་ཀུན་གྱིས་བྷུསུཀུ་པཱ་ལ་ཁ་ཟེར་ཞིང་མཁན་པོས་ཀྱང་། ཁྱོད་ཀྱིས་མདོ་འདོན་པ་ལ་སོགས་པ་མི་འོང་བས་གཞན་དུ་སོང་ཞིག་ཟེར་བ་ན། དེ་ན་རེ། ང་ཚུལ་ཁྲིམས་མ་ཉམས་པས་གནས་ནས་དབྱུང་བར་མི་རིགས་ཤིང་། རིག་པ་སློབ་པའི་སྐལ་པ་མེད་ཟེར་ནས་འདུག་པ་ལ། དུས་གཅིག་གི་ཚེ་མདོ་འདོན་པའི་རེས་བབས་པས། དགེ་འདུན་གྱིས་དེ་ལ་སང་ནི་ཁྱོད་ཀྱིས་མདོ་འདོན་པའི་རེས་མོས་ཡིན་པས་ཐོན་ཅིག །ཅེས་སྨྲས་པས། དེས་ཀྱང་འདོད་པར་ཁས་བླངས་པ་དང་། ནཱལེནྡའི་དགེ་འདུན་ཀུན་ནངས་པར་བྷུསུཀུ་མདོ་འདོན་པ་ལ་བལྟ་བ་ཡིན་ཟེར་བཞད་གད་བྱེད་པ་ལ། དེའི་མཁན་པོ་ན་རེ། ཁྱོད་ཀྱིས་རིག་པ་སློབ་པའི་ཚེ་ཟ་ཡིན་གཉིད་གཅིག་པུ་ལོག་ན། ད་ནཱལེནྡཱའི་མཁས་པ་རྣམས་ཀྱི་ནང་མདོ་མི་ཐོན་བྱས་པས། བྷུསུཀུ་ན་རེ་བདག་མདོ་འདོན་ཟེར་ཉན་མ་འདོད་པ་ལ། མཁན་པོས་སྨྲས་པ་ཁྱོད་ཀྱིས་མདོ་མ་ཐོན་ན་གནས་ནས་སྐྲོད་པས། དེ་བས་འདུག་ན་རུང་ཞེས་སྨྲས་པ་ལ། ང་རང་ཤེས་ཟེར་ནས་མ་ཉན་པ་དང་། མཁན་པོས་འཕགས་པ་འཇམ་དཔལ་གྱི་སྔགས་ཨརཔཙན་བསླབས་ནས། སྔགས་འདི་མཚན་ཉིད་མ་ལོག་པར་ཟློས་ཤིག་བྱས་ནས་སྔགས་ཀྱི་གདམས་པ་བྱིན། དེས་ཀྱང་མཚན་གཉིད་མ་ལོག་པར་རྐེ་ལ་ཐག་པ་བཏགས་ནས། སྔགས་བཟླས་པས། འཕགས་པ་འཇམ་དཔལ་དེར་དངོས་སུ་བྱོན་ནས། བྷུསུཀུཔཱ་ཁྱོད་ཅི་བྱེད་གསུངས་པ་ལ། བྷསུཀུས་བདག་ནངས་པར་མདོ་འདོན་པའི་རེས་མོས་བབ་ལགས་པས་འཕགས་པ་འཇམ་དཔལ་ལ་གསོལ་བ་འདེབས་པ་ཡིན་ཞུས་པས། འཕགས་པའི་ཞལ་ནས་ཁྱོད་ཀྱིས་ང་ངོ་ཤེས་སམ། གསུངས་པས། བདག་གིས་མ་འཚལ་ལགས། ཞུས་པ་ལ། ང་འཇམ་དཔལ་ཡིན་གསུངས་པས། འོ་ན་བདག་ལ་ཤེས་རབ་ཕུན་སུམ་ཚོགས་པའི་དངོས་གྲུབ་ཞུ་བྱས་པས། འཕགས་པའི་ཞལ་ནས་ཁྱོད་ལ་ངས་རིག་པ་སྦྱིན་གྱི། ནངས་པར་མདོ་ཐོན་ཅིག །གསུངས་ནས་མི་སྣང་བར་གྱུར་ཏོ།། དེ་ནས་ནངས་པར་མདོ་འདོན་པའི་དུས་སུ། དགེ་འདུན་གྱི་ཀུན་དགའ་རྭ་བར་རྒྱལ་པོ་ལ་སོགས་པའི་སྐྱེ་བོའི་ཚོགས་ཐམས་ཅད་བྷུསུཀུ་མདོ་འདོན་པ་ལ་བལྟའོ་ཞེས་གཅིག་ལ་གཅིག་སྦྲན་པ་དང་མེ་ཏོག་ལ་སོགས་པ་མཆོད་པའི་ཡོ་བྱད་ཀུན་ཁྱེར་ནས་སྐྱེ་བོའི་ཚོགས་ཐམས་ཅད་དང་བཞད་གད་ཀྱི་ཆེད་ནུ་དེར་ཕྱིན་པ་དང་། བྷུསུཀུ་པས་དགེ་འདུན་གྱི་གདུགས་ཚོད་གསོལ་ནས་ཞུམ་པ་མེད་པར་གཙུག་ལག་ཁང་གི་ཁྲིའི་སྟེང་དུ་བྱོན་ནས་བཞུགས་པའི་ཚེ། གཟི་བྱིན་ཁྱད་པར་འཕགས་པར་འདུག་པས་ཐམས་ཅད་རྟོག་པ་སྐྱེས་པ་ལ། མདུན་ཡོལ་བས་བཅད་དེ། བདག་གིས་མདོ་སྔར་བྱུང་བ་ཞིག་བཤད་དམ། མ་བྱུང་བ་ཞིག་བཤད། གསུངས་པས། པཎྜིཏ་ཀུན་གཅིག་ལ་གཅིག་ལྟ་ཞིང་། སྐྱེ་བོའི་ཚོགས་ཀུན་དང་རྒྱལ་པོ་བཞད་གད་བྱེད་ལ། རྒྱལ་པོ་ན་རེ། ཁྱོད་ཀྱིས་ཟ་ལུགས་ཀྱང་སྔར་མ་བྱུང་བ་ཞིག་ཡིན་ལ། ཉལ་བ་དང་འཆགས་པའི་སྤྱོད་ལམ་ཡང་སྔར་མ་བྱུང་བ་ཁོ་ན་བྱེད་པས། ཆོས་ཀྱང་སྔར་མ་བྱུང་བ་ཞིག་ཤོད་ཟེར་བ་ལ། དེས་སྤྱོད་འཇུག་ལེའུ་བཅུའི་བདག་ཉིད་བཤད་ནས་ནམ་མཁའ་ལ་འཕུར་བས། ནཱལེནྡཱའི་པཎྚིཏ་ལྔ་བརྒྱ་དང་། རྒྱལ་པོ་དེཝཔཱལ་ལ་སོགས་པ་སྐྱེ་བོའི་ཚོགས་ཐམས་ཅད་དད་ནས། མེ་ཏོག་གཏོར་ནས་པུས་ནུབ་ཙམ་དུ་ཆགས་ལ། འདི་ནི་བྷུསུཀུ་མ་ཡིན་ཏེ་མཁས་པ་འདུག་གོ། ཟེར་ནས་རྒྱལ་པོ་དང་། པཎྚིཏ་ཀུན་གྱིས་ཤཱནྟ་དེཝ་བྱ་བར་བཏགས། རྒྱལ་པོ་དང་པཎྚིཏ་ཀུན་ང་རྒྱལ་ཞི་བར་བྱས་པས་ཞི་བ་ལྷ་ཞེས་བྱ་བ་ཡིན་ནོ།།

དེ་ནས་པཎྚིཏ་སོགས་དེར་འདུས་པ་ཀུན་གྱིས་དེའི་འགྲེལ་པ་ཞིག་མཛད་པར་ཞུས་པས། ཕྱི་ནས་མཛད། དེ་དག་གིས་མཁན་པོར་ཞུས་པས་མ་གནང་བར། ཆོས་གོས་དང་ལྷུང་བཟེད་ལ་སོགས་པ་རབ་ཏུ་བྱུང་བའི་ཡོ་བྱད་དཀོན་མཆོག་དང་གཙུག་ལག་ཁང་དུ་ཕུལ་ནས། མཁན་པོ་དང་དགེ་འདུན་གྱིས་མ་ཚོར་བ་གྲོས་ཕྱིན་ཏེ། རིམ་གྱིས་དྷོ་གི་རི་བྱ་བའི་གྲོང་ཁྱེར་འབུམ་ཚོ་ཕྱེད་དང་གསུམ་ཡོད་པར་ཤིང་གི་རལ་གྲི་ཡུ་བ་གསེར་གྱིས་བསྐུས་པ་ཞིག་བསྣམས་ནས་བྱོན་ཏེ། དེའི་རྒྱལ་པོ་ལ་བདག་ཁྱེད་ཀྱི་རང་གྲི་པ་བགྱི་བྱས་པས་རུང་གསུངས་ཏེ། ཉི་མ་རེ་ལ་གསེར་ཏོ་ལ་བཅུ་བཅུ་སྦྱིན་པ་དེས་འཚོ་བ་མཛད་ལ། ལོ་བཅུ་གཉིས་སུ་རལ་གྲི་པ་བྱེད་ཀྱིན་སྙིང་པོའི་དོན་དང་མ་བྲལ་བར་མཛད་དོ། །དུས་གཅིག་སྟོན་ཀའི་ཚེ་རལ་གྲི་པ་ཀུན་ལྷ་མོ་ཨུ་མའི་རྟེན་ལ་མཆོད་པ་བྱེད་པས། ཁོང་གིས་ཀྱང་དེ་ཁོ་ན་ལྟར་མཛད། དུས་གཅིག་གི་ཚེ་རལ་གྲི་འཁྲུད་པ་ཡིན་པ་ལ། ཀུན་གྱིས་འཁྲུད་པའི་ཚེ་ཁོང་གི་རལ་གྲི་ཤིང་དུ་འདུག་པ་དེ་གྲོགས་གཅིག་གིས་མཐོང་ནས་རྒྱལ་པོ་ལ་སྨྲས་པ་དང་། རྒྱལ་པོ་ན་རེ་ཁྱོད་ཀྱི་རལ་གྲི་ང་ལ་སྟོན་ཅིག་ཟེར་བ་ལ། དེ་ན་རེ་བསྟན་ན་ཁྱེད་ཅག་ལ་གནོད་པར་འགྱུར་བས་མི་རུང་གསུངས་པས། གནོད་ཀྱང་སླའི་ངེས་པར་སྟོན་ཅིག་ཟེར་བས། འོ་ན་མིག་ལ་རེ་ཁོབ་ཅིག་གསུངས་ནས། རལ་གྲི་ཤུབས་ནས་ཕྱུང་པས་འོད་མ་མཟོད་པར་མ་བཀབ་པའི་མི་རྣམས་ཞར་བ་དང་། བཟོད་པར་གསོལ་ཞིང་གསོལ་བ་བཏབ་པས། དེ་དག་ལ་ཞལ་ཆབ་བྱུགས་པས་མིག་ཅན་དུ་སོང་ནས་ངོ་མཚར་སྐྱེས་ཏེ། མཆོད་གནས་སུ་ཞུས་པས་མ་བཞེད་དེ། དེ་རི་བྲག་ཅིག་ཏུ་བྱོན་ནས་སྤྲུལ་པའི་རི་དྭགས་བསད་ཅིང་། དེ་དག་གི་ཤ་ཟ་བ་མི་ཀུན་གྱིས་མཐོང་ནས་དེ་རྒྱལ་པོ་ལ་ཞུས་པ་དང་། རྒྱལ་པོ་འཁོར་བཅས་དེར་བྱོན།

རྒྱལ་པོས་སྨྲས་པ་ཁྱེད་སྔར་ནཱལེནྡཱའི་རྒྱལ་པོ་ལ་སོགས་པ་བརྟུལ་ནས་ཆོས་ལ་བཀོད། འདིར་ཡང་མིག་ཞར་བ་གསོས་པ་ལ་སོགས་པ་བསྟན། དེ་འདྲའི་ནུས་པ་མངའ་བཞིན་དུ་སྲོག་ཆགས་ལ་གནོད་པ་མཛད་པའི་ལུགས་ཡོད་དམ། ཞུས་པས། ཞི་བ་ལྷས་བདག་གིས་གསད་པ་མ་ཡིན། གསོས་པ་ལགས། གསུངས་ནས། སྤྱིལ་པོའི་སྒོ་ཕྱེ་ནས་བལྟས་པ་ན། རི་དྭགས་རྣམས་གཉིས་འགྱུར་གྱིས་ཆེ་བར་འགྱུར་ཏེ། ཕྱིར་དོན་ནས་རི་དང་ལུང་པ་ཁྱབ་པར་གྱུར་པས། རྒྱལ་པོ་ལ་སོགས་པ་ཀུན་དད་པ་ན། མཐར་རི་དྭགས་དེ་དག་གར་སོང་ཆ་མེད་དུ་གྱུར་པས། རྒྱལ་པོ་ལ་སོགས་པ་སྐལ་པ་ཡོད་པ་དག་གིས་ནི་ཆོས་ཐམས་ཅད་རྨི་ལམ་སྒྱུ་མ་ཙམ་དང་། གདོད་ནས་མ་གྲུབ་པར་རྟོགས་པ་ཡང་སྐྱེས་ནས་ལམ་ལ་གནས་པར་གྱུར་ཏེ། དེའི་ཞལ་ནས། 

བདག་གིས་བསད་པའི་རི་དྭགས་རྣམས།།

དང་པོ་གང་ནས་ཀྱང་མ་འོངས།།

བར་དུ་གང་ལ་ཡང་མི་གནས།།

ཐ་མ་གང་དུའང་འགག་མི་འགྱུར།།

གདོད་ནས་མ་གྲུབ་ཆོས་རྣམས་ལ།།

བསད་དང་བསད་བྱ་ག་ལ་གྲུབ།།

ཀྱེ་མ་སེམས་ཅན་སྙིང་རེ་རྗེ།།

བྷུསུཀུ་ནི་སྨྲ་བར་བྱེད།། 

ཅེས་གསུངས་ནས། ཡུལ་དེའི་རཱཇཱ་ལ་སོགས་པ་ཀུན་བརྟུལ་ནས་ཆོས་ལ་བཀོད་དོ། །དེ་བས་ན་དད་གུས་ཆོས་བསྒྲུབས་ན། བྷུསུཀུཔས་མཚན་གཅིག་བསྒྲུབས་པས་ཕྱག་རྒྱ་ཆེན་པོའི་དངོས་གྲུབ་ཐོབ་ནས། ལུས་ངག་ཡིད་གསུམ་གཅིག་ཏུ་རྟོགས་ཏེ། ཡོན་ཏན་གྱི་ཆོས་སྐད་ཅིག་མ་ལ་བྱུང་ནས་མཐར་ལོ་བརྒྱ་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུབྷུསུཀུ་པཱའི་ལོ་རྒྱུས་རྫོགས་སོ།། །།

༤༢༽གུརུཨིནྡྲབྷཱུཏི།

གུརུཨིན་དྲ་བྷཱུ་ཏིའི་ལོ་རྒྱུས་ནི། ཡུལ་ཨུ་རྒྱན་ན་གྲོང་ཁྱེར་འབུམ་ཚོ་ལྔ་ཡོད་པ་ལ། རྒྱལ་པོ་གཉིས་ཀྱིས་དབང་བྱེད། སམ་བྷོ་ལ་གྲོང་ཁྱེར་འབུམ་ཚོ་ཕྱེད་དང་གསུམ་ལ་རྒྱལ་པོ་ཨིནྡྲ་བྷཱུ་ཏིས་དབང་བྱེད། ལངྐཔུརིའི་གྲོང་ཁྱེར་འབུམ་ཚོ་ཕྱེད་དང་གསུམ་ལ་རྒྱལ་པོ་ཛཱ་ལེནྡ་རས་དབང་དུ་བྱེད་པ་ན། སམ་བྷོལའི་རྒྱལ་པོ་ཨིན་དྲ་བྷཱུཏི་ལ་སྲིང་མོ་ལཀྵམིཀཱར་བྱ་བ་ལོ་བདུན་ལོན་པ་ཞིག་ཡོད་དེ། ལངྐ་པུ་རིའི་རྒྱལ་པོ་ཛཱ་ལེན་དྲའི་བུ་ལ་སློང་དུ་བཏང་བ་ལས། རྒྱལ་བུ་ཨིནདྲ་བྷཱུཏིས་བློན་པོ་ཀུན་བསྡུས་ནས་གྲོས་བྱས་པ་ལ། ཛལེན་དྲའི་རྒྱལ་པོ་ཆོས་མི་བྱེད་པ་ཙམ་མ་གཏོགས་གཞན་མཉམ་པ་ཡིན་ཟེར་ནས་བཏང་བར་ཆད་ནས། ཕོ་ཉ་ལ་ཆོས་བྱེད་པ་དང་། མི་བྱེད་པའི་ཁྱད་པར་ཡོད་དེ། གཉེན་བྱ་ཡིས་གསུངས་ནས་བཟློག། དེའི་ཕྱི་ལོ་དེའི་སྲས་སམབྷོལར་འོངས་ནས། ལཀྵིམཀཱར་དང་འཕྲད་ནས་རྒྱལ་བུ་རང་གི་ཡུལ་དུ་ཆས་པ་ལ། ཨིན་དྲབྷུ་ཏིས་རྟ་དང་གླང་པོ་དང་གསེར་དངུལ་ལ་སོགས་པའི་སྐྱེས་མང་པོ་བསྐུར་ནས་བཏང་ངོ་།།

དེ་རང་གི་ཡུལ་དུ་ཕྱིན་པ་དང་། ཕས་ཆུང་མ་ག་རེ། ཟེར་བ་ལ། བུ་མོ་ཆུང་བས་མ་བསྐུར་བྱས་པས། དེ་ལེགས་ཟེར། དེ་ཙ་ན་རྒྱལ་པོ་ཨིནྡྲ་བྷཱུཏི་ལ་བཙུན་མོ་མང་པོ་ཡོད་དེ་ཐམས་ཅད་ཆོས་ལ་དད་པ་ཤ་སྟག་ཡོད་པས། ལྕམ་དྲལ་བཙུན་མོ་དང་བཅས་པས་བླ་མ་ལྭ་ཝ་པཱ་ལ་དབང་དང་གདམས་པ་ཞུས་ནས་སྒྲུབ་པ་ལ་བརྩོན་པར་གནས་པ་ལ། ལྕམ་གྱིས་ལོ་བཅུ་དྲུག་ལོན་ནས། ཛཱ་ལེནདྲ་ཞེས་པའི་རྒྱལ་པོས་ཕོ་ཉ་བཏང་། དེ་ནས་ལྕམ་བྱིན་ཚུལ་དང་། ལྕམ་གྱིས་འཁོར་བ་ལ་ཡིད་འབྱུང་ནས་སྒྲུབ་པ་མཛད་དེ་གྲུབ་པ་ཐོབ་ནས་ཕྱག་དར་པ་རྗེས་སུ་གཟུང་ནས་མཁའ་སྤྱོད་དུ་གཤེགས་པ་སོགས་ལྕམ་རང་གི་རྣམ་ཐར་དུ་གསལ།

དེ་ནས་རྒྱལ་པོ་ཛཱ་ལེནྡྲས་རྒྱལ་པོ་ཨིནྡྲབྷཏི་ལ་ལྕམ་གྱིས་ཇི་ལྟར་མཛད་ཚུལ་གྱི་ཕྲིན་དང་ཕོ་ཉ་བཏང་། ཨིནདྲབྷཱུཏིས་ངའི་ལྕམ་མོས་གྲུབ་པའི་ས་བརྙེས་པ་ནི་ལེགས་ཏེ། རང་ཉིད་ཞི་བདེ་མཛད་པ་ནི་མ་ལེགས་གསུང་ངོ་། །དེ་ནས་ཨིན་དྲབྷུ་ཏིའི་བསམ་པ་ལ་ངའི་སྲིང་མོ་དེ་སྐྱེ་བ་དོན་ཡོད་པར་སོང་འདུག་ང་ཡང་རྒྱལ་སྲིད་དོན་ཆུང་ལ། ཉེས་དམིགས་ཆེ་བ་འདི་སྤངས་ལ་ཆོས་བྱེད་དགོས་སྙམ་ནས། རང་གི་སྲས་ལ་རྒྱལ་སྲིད་གཏད་དེ་ཁང་བཟང་ཞིག་ཏུ་སྒྲུབ་པ་མཛད། ལོ་བཅུ་གཉིས་ནས་ཕྱག་རྒྱ་ཆེན་པོའི་དངོས་གྲུབ་ཐོབ་པ་ལ། འཁོར་རྣམས་ཀྱིས་མ་ཤེས་ནས། སྲས་དང་འཁོར་འབངས་རྣམས་ཀྱིས་བལྟར་ཕྱིན་པ་ནས་དེའི་སྒོ་དབྱེ་བར་བརྩམས་པ་དང་། ནམ་མཁའ་ནས་སྒོ་མ་དབྱེ། ང་འདི་ན་ཡོད་ཟེར་བ་ཐོས་ནས་ནམ་མཁའ་ལ་བལྟས་པས། དེ་རྣམས་ཀྱིས་རྒྱལ་པོ་ནམ་མཁའ་ལ་བཞུགས་པར་མཐོང་ནས་ས་དང་པོ་ཐོབ་པ་ཙམ་གྱི་དགའ་བ་སྐྱེས་ཏེ། དད་བཞིན་དུ་ཕྱག་བྱས་ནས་ཕྱོགས་གཅིག་ཏུ་འདུག །ཡབ་རྒྱལ་པོ་ནམ་མཁའ་ལ་ཞག་བདུན་དུ་བཞུགས་ནས་སྲས་དང་འཁོར་འབངས་རྣམས་ལ་ཟབ་པ་དང་རྒྱ་ཆེ་བའི་ཆོས་བསམ་གྱིས་མི་ཁྱབ་པ་གསུངས་ནས་འཁོར་བདུན་བརྒྱ་དང་བཅས་པ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཨིནདྲབྷུ་ཏིའི་ལོ་རྒྱུས་རྫོགས་སོ།། །།

༤༣༽གུརུམེཀོཔཱ།

 གུརུམེཀོཔཱའི་ལོ་རྒྱུས་ནི། ཡུལ་བྷཾ་ག་ལར་ཁ་ཟས་འཚོང་པའི་རིགས་ཀྱི་གང་ཟག་ཅིག་གིས་དུས་རྟག་ཏུ་རྣལ་འབྱོར་པ་ཞིག་ལ་འཚོ་བ་དྲངས་པས། ལན་ཅིག་རྣལ་འབྱོར་པ་ན་རེ། ཁྱོད་ང་ལ་བསྙེན་བཀུར་བྱེད་པ་ཅི་ཡིན། གསུངས་པས། མི་དེས་ཕྱི་མའི་ལམ་རྒྱགས་དགོས་པ་ལགས་ཞུས་པས། རྣལ་འབྱོར་པས་འོ་ན་ཕྱི་མའི་ལམ་རྒྱགས་སྒྲུབ་ནུས་སམ། གསུངས་པས། ནུས་ལགས་ཟེར། དེ་ནས་དེས་བྱིན་རླབས་འཕོ་བའི་དབང་བསྐུར་མཛད་དེ། སེམས་ཉིད་ངོ་སྤྲོད་པའི་གདམས་པ་འདི་ལྟར་གནང་ངོ་།།

རང་སེམས་ཡིད་བཞིན་ནོར་བུ་ལས།།

འཁོར་འདས་བྱེ་བྲག་རྣམ་པར་འཆར།།

རྟོགས་དང་མ་རྟོགས་གཉིས་ཡིན་པས།།

འགྱུར་མེད་སེམས་ཉིད་ངང་ལ་ལྟོས།།

གཉིས་འཛིན་རྣམ་རྟོག་ག་ལ་འབྱུང་།།

རང་བཞིན་མེད་ཕྱིར་དེ་ཡི་ངང་།།

ཆོས་རྣམས་གང་ཡང་གྲུབ་པ་མེད།།

མ་རྟོགས་འཁྲུལ་པའི་འདོད་པས་བཅིངས།།

ཞེས་གསུངས་པས། དེས་ཀྱང་སྣང་བ་རང་གི་སེམས་སུ་གོ །སེམས་དེས་འགྲོ་འོང་མེད་པ་གནས་ལུགས་ཀྱི་ངང་དུ་གོ་ནས། རང་སེམས་འགྱུར་བ་མེད་པའི་དོན་ལ་གནས་པས། ཟླ་བ་དྲུག་ནས་འཁྲུལ་པའི་རྟོག་པ་འགགས་ནས་རང་སེམས་གཉུག་མའི་དོན་རྟོགས། དེ་ནས་དེ་གཅན་གཟན་ལྟར་དུར་ཁྲོད་འགྲིམ་པར་བྱེད་ཅིང་། རེས་སྨྱོན་པའི་སྤྱོད་པས་གྲོང་དང་གྲོང་ཁྱེར་དུ་འོངས་ནས། མིག་བགྲད་ནས་འཇིགས་འཇིགས་སུ་བལྟས་པས། སྐྱེ་བོ་དག་བླ་མ་འཇིགས་འཇིགས་སུ་ལྟ་བ་ཟེར། དེ་ནས་ཕྱོགས་ཐམས་ཅད་དུ་མེཀོཔཱ་ཞེས་གྲགས་སོ།།

དེས་ཟབ་མོའི་ཆོས་ཀྱིས་གདུལ་བྱ་མང་དུ་བཏུལ་ནས། མཐར་རྟོགས་པ་ལ་སོགས་པ་བརྗོད་ཏེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུམེཀོཔཱའི་ལོ་རྒྱུས་རྫོགས་སོ།། །།

༤༤༽གུརུཀོདལིཔཱ།

གུརུཀོདལིཔཱའི་ལོ་རྒྱུས་ནི། ཡུལ་རཱམེཤྭར་བྱ་བ་ནས་ཞག་བཞིར་ཕྱིན་པའི་ས་ན། གནས་དང་ཡུལ་གྱི་ཆེད་དུ། ཀོདལིཔཱ་སྟེ་ཏོག་ཙེ་པཱ། རི་བོ་ཞིག་བརྐོ་ཞིང་ཡོད་པའི་ཚེ། སློབ་དཔོན་ཤཱནྟིཔ་སིངྒལའི་རྒྱལ་པོས་གདན་དྲངས་ཏེ་སླར་ཡུལ་དབུས་སུ་ལོག་བྱོན་པ་དང་མཇལ། སློབ་དཔོན་གྱིས་ཁྱེད་ཅི་བྱེད། སྨྲས་པ་དང་། དེས་ཀྱང་སྐུ་ཁམས་ལ་སོགས་པ་ཞུས་ནས། དངོས་རི་བརྐོ་ཡིན་གདའ་ཞུས་པ་དང་། རི་བརྐོ་ནས་ཅི་བྱེད་གསུངས་པ་ན། རྒྱལ་པོ་ངན་པ་ཀུན་གྱིས་ཡུལ་བཤིག་ནས་མི་ཐམས་ཅད་སྡུག་བསྔལ་ཞིང་ཡིད་མི་བདེ་བས། ཡུལ་ཡང་མེད་པས་ས་འདིར་བདག་རི་འདི་བཤིག་ནས་འདིར་གནས་དང་ཡུལ་བྱེད་པ་ཡིན་ཞེས་ཞུས་པས། ཤཱནྟི་པས་སྨྲས་པ་རི་བོ་བརྐོ་བའི་སྔགས་དང་གདམས་ངག་ང་ལ་ཡོད་ན་དེ་ཁྱོད་ལ་མི་དགོས་སམ། གསུངས་པ་དང་། དགོས་ཞེས་ཞུས་པས། དེའི་ཞལ་ནས། 

ཁྱོད་ཀྱི་ལས་ནི་འདི་ལྟ་བུས།།

ལུས་ནི་ངལ་བར་གྱུར་པས་ན།།

ལས་ནི་ཤིན་ཏུ་ངན་པ་སྟེ།།

ཕྱིན་ཅི་ལོག་གི་ལས་དྲུག་ཡིན།།

ས་བསྐོ་བ་ནི་སྦྱིན་པ་དང་།།

གཞན་ལ་མི་གནོད་ཚུལ་ཁྲིམས་དང་།།

སྡུག་བསྔལ་བཟོད་པའི་བཟོད་པ་དང་།།

དེ་ལ་བརྩོན་པའི་བརྩོན་འགྲུས་དང་།།

དེ་ལ་མ་ཡེངས་བསམ་གཏན་དང་།།

དེ་ཤེས་པ་ཡི་ཤེས་རབ་སྟེ།།

ཕྱིན་ཅི་ལོག་གི་ལས་དྲུག་པོ།།

སོལ་ལ་ཡང་དག་ལས་དྲུག་གྱིས།།

བླ་མ་ལ་གུས་སྦྱིན་པ་དང་།།

རང་རྒྱུད་བསྲུང་བའི་ཚུལ་ཁྲིམས་དང་།།

སེམས་ཉིད་བཟོད་པའི་བཟོད་པ་དང་།།

དེ་བསྒོམས་པ་ཡི་བརྩོན་འགྲུས་དང་།།

དེ་ལ་མ་གཡེངས་བསམ་གཏན་དང་།།

དེ་ཉིད་ཤེས་པའི་ཤེས་རབ་སྟེ།།

དུས་རྣམས་རྟག་ཏུ་གོམས་པར་གྱིས།། 

ཞེས་གསུངས། ཀོདལིས་ཡང་དེའི་དོན་བསྡུས་པ་ཞིག་ཞུ་ལགས་ཟེར་བ་ལ། ཤཱནྟི་པས་དེ་ཡང་བླ་མ་ལ་གུས་པར་གྱིས། བདེ་སྡུག་ཐམས་ཅད་རང་གི་སེམས་ལས་བྱུང་བས་རང་སེམས་གཉུག་མའི་དོན་ལ་གོམས་པར་གྱིས། དེ་ཡང་རང་སེམས་གཉུག་མ་འགྱུར་བ་མེད་པ་ནི་རི་དང་འདྲ་ལ། རིག་པ་གསལ་ལ་མ་འགག་པ་དེ་ཏོག་ཙེ་དང་འདྲ་བས་རྐོས་ཤིག །བརྩོན་འགྲུས་གཉིས་པོ་ལག་པ་གཡས་གཡོན་དང་འདྲ་བས་མ་བྲལ་བར་བརྐོ་དགོས་པ་ཡིན་གསུངས་ནས། དེ་ཡང་ཚིགས་སུ་བཅད་ནས་གསུངས་པ། 

བདེ་སྡུག་ཐམས་ཅད་སེམས་ལས་བྱུང་།།

གདམས་པ་སེམས་ཀྱི་རི་བོ་རྐོས།།

ས་ཡི་རི་བོ་བརྐོས་གྱུར་ཀྱང་།།

གཉུག་མའི་བདེ་ཆེན་རྟོགས་མི་འགྱུར།།

ཞེས་གསུངས་པ་བཞིན་དུ་དེས་ཀྱང་བསྒོམས་པས། ལོ་བཅུ་གཉིས་ནས་དངོས་གྲུབ་ཐོབ། དེ་ནས་འགྲོ་དོན་མང་དུ་མཛད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུ་ཀོདལིཔཱའི་ལོ་རྒྱུས་རྫོགས་སོ།། །།

༤༥༽གུརུཀཾཔརིཔཱ།

 གུརུཀཾཔཱརིའི་ལོ་རྒྱུས་ནི། ཀཾཔརིཔཱ་སྟེ་མགར་བ། དེའི་ཡུལ་ནི་སཱལིཔུཏྲ། རིགས་མགར་བ། དེ་རིགས་རྒྱུད་ཀྱི་འཚོ་བ་དུས་རྟག་ཏུ་མགར་བ་བྱེད་ཅིང་འདུག་པ་དང་། དེ་ཡང་དུས་གཅིག་ན་དེ་མགར་བྱེད་པའི་སར་རྣལ་འབྱོར་པ་ཞིག་བྱོན་ནས། ཁྱོད་ཅི་བྱེད་ཀྱིན་འདུག། ཅེས་སྨྲས་པ་དང་། དེ་ན་རེ། བདག་རིགས་རྒྱུད་ཀྱི་ལས་མགར་བ་བྱེད་ཀྱིན་གདའ། ཟེར་རོ།། དེས་ཁྱོད་ཀྱི་ལས་འདི་བདེ་འམ། བྱས་པས། བདེ་བ་དག་ལྟ་ག་ལ་མཆི། མེ་མདག་དང་ཚྭ་ཚྭས་ལུས་རྟག་ཏུ་ཚིག་ཀྱང་། འཚོ་བའི་ཆེད་དུ་སྡུག་བསྔལ་དང་དུ་ལེན་ཅིང་གདའ་ཞུས་སོ།། རྣལ་འབྱོར་པས་དེ་ལས་ཟས་བླངས་པས། མགར་བ་བཟའ་མི་གཉིས་བདག་ཅག་བསོད་ནམས་ཆུང་བར་རིགས་དམན་པའི་ལག་ནས་ཟས་གསོལ་པ་ངོ་མཚར་ཆེ་སྙམ་ནས། དེ་གཉིས་མཆོག་ཏུ་དགའ་བ་དང་། རྣལ་འབྱོར་པས་ཁྱེད་ཅག་ཆོས་མི་བྱེད་དམ། བྱས་པས། བདག་ཅག་རིགས་ངན་ལ་གདམས་པ་སུས་སྟེར། ཟེར་བ་ལ། ཆོས་ལ་དད་ཅིང་སྒྲུབ་ནུས་ན་གདམས་པ་ངས་སྦྱིན་གྱིས་གསུངས་པས། དེ་དག་དགའ་ནས་ཕྱག་དང་མཆོད་པས་མཉེས་པར་བྱས་ནས། གདམས་པ་ཞུས་པས། བྱིན་རླབས་འཕོ་བའི་དབང་བསྐུར་ནས་དམིགས་པ་རྩ་གསུམ་གྱི་གདམས་པ་འདི་ལྟར་གནང་སྟེ། 

ཁྱོད་ཀྱི་ཕྱིའི་སྦུད་པ་དང་། སོལ་བ་དང་། མེ་དང་། ལྕགས་བཞུ་བའི་དམིགས་པ་འདི་ནང་དུ་སྒོམས་ཤིག །རྩ་རོ་མ་དང་རྐྱང་མ་གཉིས་སྦུད་པར་གྱིས། རྩ་ཨཝ་དྷུ་ཏི་སོལ་མལ་དུ་གྱིས། རྣམ་ཤེས་མགར་བར་གྱིས། ཡེ་ཤེས་ཀྱི་མེ་སྦོར། རྣམ་རྟོག་སོལ་བར་གྱིས། དུག་གསུམ་ལྕགས་སུ་གྱིས་ལ་རྡུང་དང་། ཆོས་སྐུ་གཉིས་མེད་བདེ་ཆེན་གྱི་བཟོའི་འབྲས་བུ་སྨིན་ནས་འོང་བ་ཡིན་གསུངས་ཏེ། དེའི་དོན་ཚིགས་སུ་བཅད་པ་དེ་གསུངས་པ།

ཁྱོད་ཀྱི་ཕྱིའི་ལས་དག་ལ།།

གོམས་པ་བཞིན་དུ་ནང་དུ་ཡང་།།

ལལནཱ་དང་རསནཱའི།།

གཡས་གཡོན་སྦུད་པ་གཉིས་ཡིན་ཏེ།།

ཨཝདྷུ་ཏིའི་སོལ་མལ་དུ།།

རྣམ་པར་ཤེས་པའི་མགར་བ་ཡིས།།

རྣམ་པར་རྟོག་པའི་སོལ་བ་ལ།།

རིག་པ་ཡེ་ཤེས་མེ་སྦར་ནས།།

དུག་གསུམ་ཉོན་མོངས་ལྕགས་བཞུ་སྟེ།།

ཆོས་སྐུ་ཟག་མེད་འབྲས་བུ་གྱིས།། ཞེས་གསུངས་པས། དེས་ཀྱང་རང་གི་ལས་དང་བསྟུན་ནས་བསྒོམས་པས། ལོ་དྲུག་ན་ཕྱག་རྒྱ་ཆེན་པོའི་དངོས་གྲུབ་ཐོབ་ལ། གཞན་གྱིས་མ་ཚོར་བ་ན། སོལ་མལ་དུ་འབད་པ་མེད་པར་བཟོ་སྣ་ཚོགས་གྲུབ་པ་དང་། སཱལིཔུཏྲའི་སྐྱེ་བོ་ཀུན་འོ་སྐོལ་གྱིས་མགར་བ་འདིས་ཡོན་ཏན་གྱི་ཆོས་ཐམས་ཅད་ཐོབ་ནས་འདུག་ཟེར་ནས། ངོ་མཚར་ཏེ། ཕྱོགས་ཐམས་ཅད་དུ་བླ་མ་ཀཾཔརི་པཱ་ཞེས་གྲགས། དེས་ཀྱང་འགྲོ་དོན་མང་དུ་བསྒྲུབས་ནས་མཐར་རང་གི་རྟོགས་པ་ལ་སོགས་པ་བརྗོད་ནས། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀཾཔརི་པཱའི་ལོ་རྒྱུས་རྫོགས་སོ།། །།

༤༦༽གུརུཇཱལནདྷར།

 གུརུཇཱལན་དྷརའི་ལོ་རྒྱུས་ནི། ཇཱལནདྷར་སྟེ་དྲྭ་བ་འཛིན་བྱ་བ་ཡིན། ཡུལ་ན་གར་ཐོད་ཐ་ཞེས་བྱ་བ་ཡིན་ལ། རིགས་བྲམ་ཟེ་ཡིན་པ་ལས། འཁོར་བའི་ཆོས་ལ་སྐྱོ་བ་སྐྱེས་ནས་དུར་ཁྲོད་དུ་ཕྱིན་ཏེ། ཤིང་གཅིག་གི་རྩར་བསྡད་པས་ཤེས་པ་བདེ་བ་སྙམ་བྱེད་པ་ན། ནམ་མཁའ་ནས་ཊཱཀི་མ་གཅིག་གིས་རིགས་ཀྱི་བུ་ཁྱོད་ཡང་དག་པའི་དོན་ཡིད་ལ་གྱིས་ཤིག །ཟེར་བའི་སྒྲ་བྱུང་བ་དང་། དེ་དགའ་ནས་ཡང་དང་ཡང་དུ་གསོལ་བ་བཏབ་པས། ཡེ་ཤེས་ཀྱི་ཌཱཀི་མས་ཞལ་དངོས་སུ་བསྟན་ནས་དགྱེས་རྡོར་དུ་དབང་བསྐུར་ཏེ། རྫོགས་པའི་རིམ་པའི་མན་ངག་འདི་ལྟར་བྱིན་ཏེ། ཕྱི་ནང་ཁམས་གསུམ་སྣོད་བཅུད་ཐམས་ཅད་རང་གི་ལུས་ངག་ཡིད་གསུམ་དུ་འདུས། དེ་གསུམ་གྱི་རྣམ་རྟོག་རྩ་གསུམ་དུ་འདུས། རྩ་གཉིས་དྷུ་ཏཱིར་འདུས་པ་ལ། དེ་རུ་དྲན་རིག་སྣ་ཚོགས་ཀྱི་རྟོག་པ་སྤྱི་བོ་ཚངས་པའི་བུ་ག་ནས་ཡར་ཐོན་ལ་སྣང་སྟོང་དབྱེར་མེད་དུ་སྒོམས་ཤིགས་པའི་གདམས་པ་བྱིན་ནས། 

ཕྱི་ནང་ཆོས་རྣམས་མ་ལུས་པ།།

ལུས་ངག་ཡིད་གསུམ་དག་ཏུ་འདུས།།

གཡས་གཡོན་ཨཝདྷུ་ཏཱིར་འདུས།།

དེ་ཡང་ཚངས་པའི་བུ་ག་སྟེ།།

སྟོང་པ་ཉིད་དེ་བདེ་ཆེན་མཆོག།

རྣལ་འབྱོར་དག་པའི་ངང་ལས་འབྱུང་།།

བདེ་སྟོང་ཟུང་འཇུག་བསྐྱིལ་བར་འཚལ།།

ཞེས་གསུངས། དེ་ལྟར་རྫོགས་པའི་རིམ་པ་གནང་བ་ན། དེས་ཀྱང་བསྒོམས་པས་ལོ་བདུན་ན་ཕྱག་རྒྱ་ཆེན་པོའི་དངོས་གྲུབ་ཐོབ། དེ་ནས་རྟོགས་པ་བརྗོད་དེ། འགྲོ་བ་དཔག་ཏུ་མེད་པའི་དོན་མཛད་ནས་འཁོར་གསུམ་བརྒྱ་དང་བཅས་པ་མཁའ་སྤྱོད་དུ་གཤེགས་སོ།། གུརུཇཱལནདྷརཔཱའི་ལོ་རྒྱུས་རྫོགས་སོ།། །།

༤༧༽གུརུརཱཧུལ།

གུརུརཱཧུལའི་ལོ་རྒྱུས་ནི། རཱཧུལ་སྟེ་སྒྲ་གཅན་འཛིན་བྱའོ། །དེ་ཡང་ཡུལ་ཀཱམརཱུཔ། རིགས་དམངས་རིགས་སོ། །དེ་རྒས་ནས་ལུས་པོ་སྦྱོར་མི་བཟོད་པ་དང་། གཉེན་དང་བུ་ཀུན་ཡང་གཤེ། བརྙེས་པ་བྱེད་ནས་དེ་མ་དགའ་སྟེ། སྐྱེ་བ་ཕྱི་མ་དྲན་ནས་དུར་ཁྲོད་དུ་ཕྱིན་པ་དང་། དེའི་གམ་དུ་རྣལ་འབྱོར་པ་ཞིག་བྱོན་ནས། ཁྱོད་དུར་ཁྲོད་ན་ཅི་བྱེད་ཅིང་འདུག་བྱས་པས། དེ་ན་རེ། 

བདག་གི་ལང་ཚོའི་ཟླ་བ་དེ།།

རྒས་པའི་སྒྲ་གཅན་གྱིས་བཅོམ་ནས།།

བུ་ཚ་ལ་སོགས་གཤེ་བར་བྱེད།།

ཤི་ན་དགའ་བས་གནས་ན་ཡོད།།

ཞུས་པས། རྣལ་འབྱོར་པ་དེས་དེ་ལ་སླར།།

ཁྱོད་ཀྱི་རྣམ་སྨིན་འབྱུང་བ་ལ།།

ཆུ་བོ་གསུམ་གྱིས་གཡེངས་ཟིན་ནས།།

ད་ནི་འཆི་བའི་ཆུ་བོ་འབྱུང་།།

འཆི་རྒྱགས་ཆོས་ཤིག་མི་བྱེད་དམ།། གསུངས་པས། བླ་མ་ལགས་ཆོས་བྱེད་ལགས་ཏེ། བདག་རྒས་ཤིང་ནོར་དང་བྲལ་བ་ལ་ཆོས་སུས་སྟེར། ཟེར་བ་ལ། ཡང་དེའི་ཞལ་ནས། 

གཉུག་མའི་སེམས་ལ་རྒས་པ་མེད།།

དད་སོགས་ནོར་ལ་འགྲིབ་པ་མེད།།

གུས་པས་དམ་ཆོས་སྒྲུབ་ནུས་ན།།

ཁྱོད་ནི་བདག་གིས་རྗེས་བཟུང་བྱ།།

ཞེས་གསུངས་ཏེ། བྱིན་རླབས་འཕོ་བའི་དབང་བསྐུར་བྱས་ནས་ཐིག་ལེའི་གདམས་པ་འདི་ལྟར་བྱིན་ཏེ། 

ཁྱོད་ཀྱི་སྤྱི་བོའི་སྟེང་དུ་ཨ་ལས་ཟླ་བའི་དཀྱིལ་འཁོར་བསྒོམས་ལ། དེའི་ནང་དུ་སྣང་སྲིད་ཐམས་ཅད་ཀྱི་རྟོག་པ་ཞུགས་པར་སྒོམས་ཤིག །ཅེས་དང་། ཡང་།

གཉིས་མེད་རྟོགས་པའི་སྒྲ་གཅན་གྱིས།།

གཟུང་འཛིན་རྟོག་པ་བཅོམ་ནས་ནི།།

སྤྱི་བོ་བདེ་བ་ཆེན་པོ་རུ།།

ཟབ་པའི་ཐིག་ལེའི་ངང་ཉིད་ལས།།

བདེ་སྟོང་ཟུང་འཇུག་རྒྱུན་དག་གིས།།

ཕུང་པོ་ལ་སོགས་དགྲ་བཅོམ་ནས།།

སངས་རྒྱས་རྣམས་ཀྱི་ཡོན་ཏན་འབྱུང་།།

ཨེ་མ་འགག་མེད་ངོ་མཚར་ཆེ།། 

ཞེས་གསུངས་པས། དེས་ཀྱང་དེ་ལྟར་བསྒོམས་པས། ཇི་ཞིག་ཙམ་ན་གཉིས་འཛིན་གྱི་ཟླ་བ་ཐམས་ཅད་གཉིས་མེད་སྒྲ་གཅན་གྱིས་ཟོས་ནས། གཉིས་མེད་ཀྱི་བདུད་རྩི་སྤྱི་བོའི་ཚངས་པའི་བུ་ག་ནས་མར་ཞུགས་པས། ལུས་ཐམས་ཅད་བདུད་རྩིས་གང་ཞིང་རྒྱས་ནས། ལོ་བཅུ་དྲུག་ལོན་པའི་ན་ཚོད་དུ་གྱུར་ནས། ཕྱག་རྒྱ་ཆེན་པོའི་དངོས་གྲུབ་ཐོབ་སྟེ། ཀཱམརཱུཔ་ལ་སོགས་པའི་སྐྱེ་བོ་མང་པོ་བཏུལ་ནས་མཐར་རྟོགས་པ་བརྗོད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུརཱཧུལ་པཱའི་ལོ་རྒྱུས་རྫོགས་སོ།། །།

༤༨༽གུརུདྷརྨ་པཱ།

གུརུདྷརྨ་པཱའི་ལོ་རྒྱུས་ནི། དྷརྨ་པཱ་སྟེ་ཆོས་པ་བྱ་བ་ཡིན་ལ། ཡུལ་བོ་དྷིནཱ་གར་བྱ་བ་ན། དེ་པཎྜིཏ་ཡིན་པ་ལ། སྨྲ་བ་གཙོ་བོར་བྱས་ནས་སྒྲུབ་པ་གཙོ་བོར་མ་བྱས་པས། ཕྱིས་བགྲེས་ནས་སྤྱན་ལོང་བ་དང་། དེ་ལ་འདི་ལྟ་བུའི་སེམས་པ་སྐྱེས་ཏེ། བདག་བླ་མ་ཞིག་དང་འཕྲད་ན་ཅི་མ་རུང་སྙམ་པ་དང་། རྨི་ལམ་དུ་ཌཱཀི་མས་ལུང་བསྟན་པ་ནི། ཁྱོད་ཀྱིས་དགེ་བའི་བཤེས་གཉེན་ང་ཡིན་ནོ། །ཞེས་ཟེར་བ་ལ། དེས་གསོལ་བ་བཏབ་པས། ཊཱཀི་མས་དེ་ལ་དངོས་སུ་ཞལ་བསྟན་ཏེ་དབང་བསྐུར་ནས། གདམས་ངག་གནང་བ་ནི། ཆོས་ཐམས་ཅད་སྣོད་དུ་སྒོམས། རྟོག་པ་ཐམས་ཅད་མར་དུ་སྒོམས། རང་གི་རྣམ་ཤེས་སྡོང་བུར་སྒོམས། དེ་ལ་ཡེ་ཤེས་ཀྱི་མེ་འབར་བར་སྒོམས་ཤིག་གསུངས་ཏེ། དེ་ཚིགས་སུ་བཅད་པར་གསུངས་པ། 

ཆོས་རྣམས་མ་ལུས་སྣོད་ནང་དུ།།

རྣམ་པར་རྟོག་པའི་མར་བླུགས་ནས།།

རིག་པའི་སྡོང་བུར་མེ་སྦར་བས།།

སེམས་ཉིད་ཡིད་བཞིན་ནོར་བུ་མཐོང་།།

ཞེས་གསུངས་པས། རྟོག་པ་ཡེ་ཤེས་སུ་སློང་བའི་མན་ངག་དེ་བསྒྲུབས་པས། ལོ་ལྔ་ནས་དུག་ལ་སྔགས་ཀྱི་བཏབ་པ་ལྟར་རྟོག་པ་ཡེ་ཤེས་སུ་གྱུར་ནས། ལུས་བྱིས་པ་ལོ་བརྒྱད་པ་ལྟར་སོང་སྟེ་སྐྱེ་བོ་དག་ངོ་མཚར་བར་གྱུར་ཏོ། །དེའི་ཞལ་ནས། 

ཇི་ལྟར་རྒྱུ་རྐྱེན་ཚོགས་པ་ན།།

འབྲས་བུ་སྟོང་པར་ག་ལ་འགྱུར།།

དེས་ན་བློ་གྲོས་གསལ་ལྡན་པས།།

དེ་ལ་རབ་ཏུ་འབད་པ་བྱ།། 

ཞེས་གསུངས་ཏེ། ཀློག་མཁན་གྱི་ཚུལ་གྱིས་འགྲོ་དོན་མང་དུ་མཛད་ནས། མཐར་རྟོགས་པ་བརྗོད་དེ་མཁའ་སྤྱོད་དུ་གཤེགས་སོ།། གུརུདྷརྨཔཱའི་ལོ་རྒྱུས་རྫོགས་སོ།། །།

༤༩༽གུརུདྷོཀརིཔཱ།

གུརུདྷོཀརིཔཱའི་ལོ་རྒྱུས་ནི། དྷོཀརི་སྟེ་སྣོད་ཁུར་བ་བྱ་བ་ཡིན་ནོ། །དེ་ཡང་ཡུལ་སཱལིཔུཏྲ་བྱ་བ་ན་དམངས་རིགས་ཤིག་དུས་རྟག་ཏུ་སྣོད་ཁུར་ནས་སློང་གིན་ཅི་རྙེད་སྣོད་དུ་འཇུག་པ་ལ། དུས་གཅིག་ན་འཇུག་རྒྱུའི་རྫས་ཅང་མ་ཁུག་ནས་ཤིང་དྲུང་གཅིག་གི་རྩར་འདུག་པ་དང་། དེར་རྣལ་འབྱོར་པ་ཞིག་བྱོན་ནས་དེ་ལ་བསླངས་པས་དེས་བདག་ལ་དེ་རིང་ཁྱོད་ལ་དྲང་རྒྱུའི་རྫས་ཅང་མ་མཆིས་ཟེར་བ་ལ། འོ་ན་ཁྱོད་ལ་ཆོས་མི་དགོས་སམ། གསུངས་པས། དེ་ན་རེ་དགོས་ལགས་ཏེ་དགེ་བའི་བཤེས་གཉེན་དང་མ་ཕྲད་པ་ལགས། ཟེར་བ་ལ། དེས་སྒྲུབ་ནུས་སམ་གསུངས་པས། ནུས་ལགས་ཞུས་པ་དང་། དེས་དགྱེས་རྡོར་དུ་དབང་བསྐུར་ནས་བསྐྱེད་རྫོགས་ཀྱི་གདམས་པ་འདི་ལྟར་གནང་སྟེ།

ཀྱེ་ཧོདྷཀ་རི་པ་ཁྱོད།།

ཆོས་ཀྱི་དབྱིངས་ཀྱི་སྣོད་ནང་དུ།།

རིག་པའི་རྫས་རྣམས་བཅུག་ནས་ནི།།

དེ་ནི་གཉིས་སུ་མེད་པར་སྒོམས།། 

ཞེས་གསུངས་ཏེ། དེས་ཀྱང་བསྒོམས་པས་དོན་རྟོགས་ཏེ། ལོ་གསུམ་ན་དངོས་གྲུབ་ཐོབ། དེ་ཡང་སྣོད་ཁུར་གྱིན་བསླང་པས། སྐྱེ་བོ་དག་བླ་མས་ཁུར་བ་འདི་ཅི་ཡིན། ཟེར་བ་ལ། 

སྟོང་ཉིད་ཆེན་པོ་སྣོད་ཁུར་ནས།།

བདེ་ཆེན་འབྲས་བུ་སློང་བ་ལགས།།

འདོད་པ་དང་བཅས་དྷོཀརི།།

སྐལ་ལྡན་ཀུན་གྱིས་མ་ཤེས་སམ།། 

ཞེས་གསུངས་ནས། འགྲོ་དོན་མང་དུ་མཛད་དེ། རྟོགས་པ་བརྗོད་པ་སོགས་མཛད་ནས་མཚན་དྷོཀརི་ཞེས་གྲགས།། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུདྷོཀརིཔཱའི་ལོ་རྒྱུས་རྫོགས་སོ།། །།

༥༠༽གུརུམེདྷིནི།

གུརུམེདྷིནིའི་ལོ་རྒྱུས་ནི། མེདྷིནི་སྟེ་ཞིང་པ་ཞེས་བྱ་ལ། དེ་རིགས་ཀྱི་དམངས་རིགས་དང་། ཡུལ་སཱལི་པུཏྲ་བྱ་བ་ན་ཡིན། དེ་ཡང་དུས་ལན་གཅིག་ཞིང་ལས་བྱས་པས་ཐང་ཆད་ནས་འདུག་པ་དང་། དེར་རྣལ་འབྱོར་པ་ཞིག་འོངས་ནས་ཁྱོད་ཅི་བྱེད་ཀྱིན་འདུག །ཅེས་སྨྲས་པས། དེ་ན་རེ། བདག་ཞིང་ལས་ཀྱིས་ཆད་ནས་འདུག་གིན་གདའ་བྱས་པས། རྣལ་འབྱོར་པ་དེ་ན་རེ། སྡུག་བསྔལ་འདི་འདྲ་བ་ལ་མི་སྐྱོ་འམ། ཆོས་གྱིས། བྱས་པས། དེ་ན་རེ། བདག་ལ་ཆོས་སུས་སྟེར་ཟེར་རོ།། སྒྲུབ་ནུས་ན་ཆོས་ངས་སྦྱིན་གྱིས། གསུངས་པས། ནུས་ལགས་ཟེར་ནས། དེ་ལ་རྣལ་འབྱོར་པས་དབང་བསྐུར། བསྐྱེད་རྫོགས་ཀྱི་གདམས་ངག་བྱིན་ནས་སྒོམ་དུ་བཅུག་པ་ལ། སྔར་གོམས་པའི་དབང་གི་ཞིང་ལས་ཀྱི་རྣམ་པར་རྟོག་པ་ལ་གཡེངས་ནས་སྒོམ་དུ་མ་འདོད་པ་ལ། དེ་བླ་མ་ལ་བསྙད་པས། དེས་དེ་ལ་རང་གི་རྣམ་རྟོག་གི་དམིགས་པ་དང་མཐུན་པའི་གདམས་ངག་ཕོག་སྟེ། ཁྱོད་རང་གི་ཤེས་པ་གཤོལ་དུ་གྱིས། ཚོར་བ་བདེ་སྡུག་མྱོང་བར་དེ་གླང་དུ་གྱིས། ལུས་ཞིང་དུ་བསྒོམས། ཉིན་མཚན་ཆོས་ཉིད་ཀྱི་བདེ་བའི་འབྲས་བུ་འབྱུང་བར་སྒོམས་ཤིག །ཅེས་དང་། འདི་ཉིད་ཚིགས་སུ་བཅད་དེ་གསུངས་པ་ནི། 

རང་གི་རྟོག་པ་ཐོང་གཤོལ་དང་།།

ཚོར་བ་བདེ་སྡུག་གླང་དོར་གྱིས།།

རྣམ་སྨིན་ཕུང་པོའི་ས་གཞི་ལ།།

ཁམས་ཀྱི་ས་བོན་ལེགས་བཏབ་པས།། 

བདེ་ཆེན་འབྲས་བུ་རྒྱུན་མི་ཆད།།

ཞིང་ལས་དེ་ལ་བརྩོན་པར་གྱིས།།

གསུངས། དེ་བཞིན་དུ་བསྒོམས་པས། ལོ་བཅུ་གཉིས་ན་འཁོར་བའི་རྣམ་རྟོག་སྣ་ཚོགས་པ་འགགས་ནས་གྲུབ་པ་ཐོབ་པ་དང་། ཤིང་ཏཱ་ལ་བདུན་ཙམ་གྱི་ནམ་མཁའ་ལ་འཕགས་ནས། རྟོགས་པ་བརྗོད་དེ། སཱ་ལི་པུ་ཏྲའི་གྲོང་ཁྱེར་དུ་འགྲོ་དོན་དཔག་ཏུ་མེད་པ་མཛད་ནས། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུམེདྷེནིའི་ལོ་རྒྱུས་རྫོགས་སོ།། །།

༥༡༽གུརུཔཾཀཇ།

གུརུཔཾཀཇའི་ལོ་རྒྱུས་ནི། རིགས་བྲམ་ཟེ། དངོས་གྲུབ་སྤྱན་རས་གཟིགས་ལས་སོ།། དེ་ཡང་པཾཀཇ་ཞེས་པ་བྲམ་ཟེའི་བུ་ཞིག་ས་ཕྱོགས་དབེན་པར་པདྨའི་འདབ་མའི་ཚལ་དུ་པདྨ་ལས་སྐྱེས་ཏེ། དེ་དང་མི་རིང་བ་ཞིག་ན་པདྨའི་རྫིང་བུའི་འགྲམ་ན་སྤྱན་རས་གཟིགས་ཀྱི་སྐུ་ཞིག་བཞུགས་པ་ལ། པཾཀཇ་དེ་རང་ཉིད་མཧཱ་དེཝ་ལ་མོས་པས་སྐུ་དེ་མཧཱདེཝ་ཡིན་པར་བསམ་ནས་ལོ་བཅུ་གཉིས་སུ་མཆོད་པ་བྱས། མེ་ཏོག་ཕུལ། ཡུལ་དེའི་ཆོས་ལུགས་ཀྱི་སྐུ་དེ་ལ་དུས་གསུམ་དུ་མཆོད་པ་བྱས་ནས། མེ་ཏོག་དེ་རང་གི་སྤྱི་བོར་ལེན་པ་ཡིན་པས། བར་དེར་སློབ་དཔོན་ཀླུ་སྒྲུབ་བྱོན་ནས་སྐུ་དེ་ལ་མེ་ཏོག་ཕུལ་བས། སྐུ་རང་གིས་བླངས་ནས་སྤྱི་བོར་བཞག་པས། པཾཀཇ་ཁྲོས་ནས་ངས་ལོ་བཅུ་གཉིས་སུ་མཆོད་པ་བྱས་པ་ལས་མི་ལེན། འདིས་ལན་གཅིག་བྱས་པ་ལས་ལེན་སྙམ་པ་དང་། སྐུ་གཟུགས་དེའི་ཞལ་ནས། ཁྱོད་རང་གི་བསམ་པ་མ་དག་པ་ཡིན། ངས་ཅི་ཡང་མ་ཉེས་ཞེས་པའི་སྒྲ་བྱུང་བ་དང་། དེར་དེ་འགྱོད་པ་སྐྱེས་ཏེ། སློབ་དཔོན་ཀླུ་སྒྲུབ་ཀྱི་ཞབས་སྤྱི་བོར་བླངས་ནས། བདག་རྗེས་སུ་གཟུང་དུ་གསོལ་ཟེར་བས། དེས་ཀྱང་དབང་བསྐུར་ནས་ལྟ་སྤྱོད་ཟུང་དུ་འཇུག་པའི་གདམས་པ་འདི་ལྟར་གནང་སྟེ། 

ཐུགས་རྗེ་ཆགས་པའི་བདེ་བ་དང་།།

གདོད་ནས་མ་གྲུབ་གཅིག་ཡིན་ཏེ།།

ཐ་དད་མེད་པར་ཡང་དག་ལྟ།།

འཕགས་པ་ཉིད་ཀྱི་དགོངས་པའོ།།

ཞེས་གསུངས་པས། དེས་གོ་ནས་བསྒྲུབས་པས་ཞག་བདུན་ནས་གྲུབ་པ་ཐོབ། འགྲོ་བ་ལ་ཐུགས་རྗེས་གཟིགས་ནས་སྤྱོད་པའི་གདམས་པས་ཕན་མང་དུ་བཏགས་ཏེ། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཔཾཀཇའི་ལོ་རྒྱུས་རྫོགས་སོ།། །།

༥༢༽གུརུགྷཎྚཔཱ།

 གུརུགྷཎྚ་པཱའི་ལོ་རྒྱུས་ནི། ཡུལ་ཤྲཱིནཱལནྡའི་སྡེ་པ། དགེ་སློང་གི་སྡོམ་པ་ཐོབ་པ་མ་ཉམས་པ། རིག་པའི་གནས་ལྔ་ལ་མཁས་པར་གྱུར་པས་ཕྱོགས་མཚམས་ཐམས་ཅད་དུ་སྙན་པའི་གྲགས་པས་ཁྱབ་པར་གྱུར་པ་དང་། སློབ་དཔོན་ཡུལ་ཐམས་ཅད་ལ་འགྲོ་དོན་ལ་གཤེགས་པར་གྱུར་པ་ན། རྒྱལ་པོ་དེཝཔཱལབྱ་བ་བསོད་ནམས་ཀྱི་མཐུ་ལས་གྲུབ་པའི་རྒྱལ་སྲིད་ཀྱི་འབྱོར་པ་དཔག་ཏུ་མེད་པ་མངའ་སྟེ། རང་གི་གྲོང་ཁྱེར་འབུམ་ཚོ་བཅོ་བརྒྱད་དང་། ཀཱམརཱུཔའི་གྲོང་ཁྱེར་འབུམ་ཚོ་དགུ་དང་། བངྒཱལའི་གྲོང་ཁྱེར་འབུམ་ཚོ་བཞི་སྟེ་བསྡོམ་པས་འབུམ་ཚོ་སུམ་ཅུ་རྩ་གཅིག་ལ་དབང་བྱེད་པའི་རྒྱལ་པོ་དེཝཔཱལི་ཡུལ་སཱལིཔུཏྲའི་གྲོང་ཁྱེར་དུ་སློབ་དཔོན་གཤེགས་ནས་བསོད་སྙོམས་མཛད་ཅིང་། ཤིང་དྲུང་གི་རྩར་གནས་བཅས་ནས་བཞུགས་པ་དང་། རྒྱལ་པོ་དེཝཔཱལ་ལ་མཆོད་གནས་དཔག་ཏུ་མེད་པ་མངའ་བ་ལ། རྒྱལ་པོས་བཙུན་མོ་ལ་མཚན་མོ་གྲོས་དྲིས་པ། འདུས་བྱས་ཐམས་ཅད་ནི་མི་རྟག་པ། སྲིད་པར་སོང་བ་ཐམས་ཅད་ནི་སྡུག་བསྔལ་བ། འཁོར་བའི་ཆོས་ལ་སྙིང་པོ་མེད་པར་འདུག་པས། ང་ནི་འདི་དང་ཕྱི་མ་གཉིས་ཀའི་རྒྱལ་སྲིད་བྱེད་པ་ཡིན་པས། འོ་སྐོལ་བཟའ་མི་གཉིས་ཚེ་ཕྱི་མའི་ཆེད་དུ་ལམ་རྒྱགས་མཆོད་གནས་དུམ་གཅིག་ལ་ཚོགས་གསོག་བྱས་ན་མི་རུང་ངམ། ཞེས་སྨྲས་པ་དང་། བཙུན་མོ་ན་རེ། ཉིད་ལ་སྔར་ཡང་མཆོད་གནས་དཔག་ཏུ་མེད་པ་མཆིས་ལ། ད་ཡང་མཆོད་གནས་གཞན་པས་ཁྱད་པར་འཕགས་པ་འདུལ་བ་འཛིན་པ་ཆེན་པོ་ཞིག་གྲོང་མཐའ་ཕ་གིའི་ཤིང་དྲུང་གི་རྩ་ན་ཟས་བསོད་སྙོམས་པ་ཆོས་གོས་དང་ཡོ་བྱད་ངན་ངོན་གྱིས་འཚོས་པ་ཞིག་ཡོད་པས། དེ་ལ་ཉིད་ཀྱིས་བཞེས་ཐང་ཚོད་སྣ་བརྒྱད་ཅུ་རྩ་བཞི་དང་། མུར་བའི་བཅའ་བ་བཅུ་བཞི་དང་། རྒུན་ཆང་ལ་སོགས་པའི་བཏུང་བ་ལྔ་དང་། མེ་མར་གྱི་སྣང་བ་མ་ཡིན་པ་རིན་པོ་ཆེའི་སྣང་བ་དང་། རྒྱལ་སྲས་ཀྱི་འདོད་པའི་ཡོན་ཏན་ཐམས་ཅད་དེ་ལ་སྦྱིན་པར་བྱའོ་ཞེས་སྨྲས་པ་དང་། རྒྱལ་པོས་ཀྱང་རུང་གསུངས། དེ་ནས་ནང་པར་འཁོར་དུམ་ཅིག་སློབ་དཔོན་སྤྱན་འདྲེན་དུ་བཏང་པས་མ་ཁུག་པ་དང་། རྒྱལ་པོ་འཁོར་མང་པོ་དང་བཅས་ཏེ་བྱོན་ནས་ཕྱག་བྱས་ཕེབས་དགོས་པའི་གཏམ་མང་པོ་སྨྲས་པས། སློབ་དཔོན་གྱིས་ཅི་ལ་འདིར་གཤེགས་གསུངས་པ་ལ། སློབ་དཔོན་ལ་བདག་དད་ནས་མཆོད་གནས་སུ་སྤྱན་འདྲེན་དུ་འོངས་པ་ལགས་ཞེས་ཞུས་པས། སློབ་དཔོན་ན་རེ། རྒྱལ་པོའི་རྒྱལ་སྲིད་ནི་སྡིག་པ་དང་བཅས་པ་ཡིན་པས་བདག་དེར་མི་འོངས་གསུངས་པས། འོ་ན་གཏན་དུ་མི་བཞུགས་ཀྱང་ལོ་གཅིག་ཙམ་བཞུགས་པར་ཞུས་པས་མ་བཞེད་པ་དང་། དེ་བཞིན་དུ་ཟླ་བ་དྲུག་དང་། གསུམ་དང་གཅིག་དང་ཕྱེད་དང་ཞག་གཅིག་གཤེགས་པར་ཞུས་པ་ལ་ཡང་། ཁྱོད་སྡིག་ཅན་སྤྱོད་ལམ་བཞི་ལ་སོགས་པ་གང་བྱེད་ཀྱང་ཐམས་ཅད་སྡིག་པའི་རང་བཞིན་ཡིན་པས་མི་འོངས་གསུངས་པས། རྒྱལ་པོ་ཞག་བཅུ་བཞིའི་བར་དུ་ཡང་ནས་ཡང་དུ་གལ་གྱིས་ཞུས་ཀྱང་མ་བཞེད་པ་དང་། རྒྱལ་པོ་འཁོར་དང་བཅས་པ་ཁྲོས་ཏེ་སྙིང་ལ་ཞེ་སྡང་གི་མེ་འབར་ཏེ། ཕྱིར་ལོག་སྟེ་རྒྱལ་པོས་སྨྲས་པ། དགེ་སྦྱོང་འདིའི་ཚངས་པ་སྤྱོད་པ་སུས་ལེན་ནུས་ན་རྒྱལ་སྲིད་ཕྱེད་དང་། གསེར་ཁལ་གཅིག་སྟེར་རོ།། ཞེས་ཡོངས་སུ་སྒྲོགས་མཁན་བཏང་བ་དང་། ཡུལ་དེ་ན་སྨད་འཚོང་མ་གཡོ་ཅན་མ་ཀུན་གྱི་གཙོ་མོ་ཞིག་ཡོད་པ་དེ་ན་རེ། ངས་ནུས་ཞེས་རྒྱལ་པོ་ལ་སྨྲས་པ་དང་། རྒྱལ་པོས་འོ་ན་ཁྱོད་ཀྱིས་བརྩོན་འགྲུས་དང་འབད་པས་སྒྲུབས་ཤིག་ཅེས་སྨྲས་སོ།།

སྨད་འཚོང་མ་དེ་ལ་བུ་མོ་ལོ་བཅུ་གཉིས་ལོན་པ་འཇིག་རྟེན་གྱི་ཆོས་ཀྱིས་མ་གོས་པ་བྱད་བཞིན་མཛེས་པ་འགྲོ་ན་སྟབས་སྡུག་པ་སྨྲས་ན་སྐད་སྙན་པ་ལུས་ཤ་རྒྱས་ཤིང་ནུ་འབུར་མཁྲེགས་པ་ཉི་མས་མཐོང་ཡང་ཉི་མ་འགུལ་མི་འདོད་པ་ཞིག་ཡོད་པ། བདག་གིས་དེ་བཏང་ན་འཁོར་བར་ལྡོག་སྟེ་ཚངས་པར་སྤྱོད་པ་དང་འབྲལ་ནུས་སོ་སྙམ་ནས། བུ་མོ་དེའི་མ་དེས་སློབ་དཔོན་གྱི་དྲུང་དུ་ཕྱིན་ནས་ཕྱག་དང་བསྐོར་བ་བྱེད་ཀྱིན་ལོག་སྟེ། དེ་ལྟར་ཞག་བཅུའི་བར་དུ་བྱས་ནས་སྨྲས་པ། བདག་དབྱར་ཟླ་བ་གསུམ་དབྱར་གནས་པའི༥འཚོ་བ་སྦྱོར་བའི་ཡོན་བདག་བགྱིད་དོ་སྨྲས་པས། དེ་མ་འདོད་པ་དང་། ཟླ་བ་གཅིག་གི་བར་དུ་ཡང་སྨྲས་པས། སློབ་དཔོན་གྱིས་ཞལ་གྱིས་བཞེས་པ་དང་། དཱ་ར་ིམཱ་དགའ་ནས་བཀྲ་ཤིས་རྒྱ་ཆེན་པོ་བྱས། ཚིག་ཏུ་ཡང་འདི་ལྟར་སྨྲས་ཏེ། 

བུད་མེད་གཡོ་ནི་བརྒྱད་ཅུ་གཅིག །

འདོད་པ་ཡང་ནི་བརྒྱ་འགྱུར་རོ།།

ཞེས་སྨྲས་ཤིང་ངས་གཡོས་ན་གླིང་བཞི་ཡང་གཡོ་ཞིང་བསླུ་བར་ནུས་ན་དགེ་སྦྱོང་འདི་ཅི་སྨོས་སྙམ་དུ་སེམས་ཤིང་། ངག་ཏུ་ཡང་འདོན་པར་བྱེད་དོ། །དེའི་སྐབས་སུ་སློབ་དཔོན་ན་རེ་ང་ལ་ཟས་སྐྱེལ་བ་ཀུན་སྐྱེས་པ་ཐོང་བུད་མེད་མ་གཏོང་ཞིག་བྱས་པས། དེ་བཞིན་དུ་བགྱིའོ་ཞེས་སྨྲས་ནས། ཀ་རའི་ཆུ་དང་འབྲས་ཆན་ཟླ་བ་ཕྱེད་གཉིས་ཀྱི་བར་དུ་སྐྱེས་པ་ཀུན་གྱིས་བསྐྱལ་ནས། དེ་ནས་སྨད་འཚོང་མ་གཡོ་ཅན་མ་དེས་བུ་མོ་རྒྱན་སྣ་ཚོགས་ཀྱིས་བརྒྱན་ནས་བཟའ་བ་དང་བཅའ་བ་སྣ་ཚོགས་གྱ་ནོམ་པ་མང་པོ་བསྐུར་ནས་གཡོག་ལྔ་བརྒྱ་དང་བཅས་ཏེ་བཏང་ནས། ནགས་ཀྱི་རྩ་ནས་འཁོར་ཀུན་ཕྱིར་ལོག་ཅིག་བྱས་ནས་བཏང་ངོ་།།

དེ་ནས་བུ་མོས་མས་བསླབས་པའི་གཡོ་རྣམས་དྲན་བཞིན་དུ་ནང་དུ་བཞུགས་པ་དང་། དགེ་སློང་སྔར་གྱི་ཟན་སྐྱེལ་མི་ཡིན་སེམས་ནས་ནང་དུ་འོངས་པ་དང་། བུ་མོ་གཞོན་ནུ་མ་རྒྱན་སྣ་ཚོགས་ཀྱིས་བརྒྱན་པ་ཞིག་མཐོང་ནས། སྐྱེས་པ་ཀུན་གར་སོང་། སྨྲས་པས། བུ་མོས་སྨྲས་པ། དེ་ཀུན་ལ་ལོང་མེད་ན་ངོས་ཅག་མཆིས་སོ་བྱས་ཏེ། དེ་ནས་བུ་མོ་ཡུན་རིང་དུ་འདུག་པ་དང་། ད་སོང་སྨྲས་པས། ད་རུང་ནམ་མཁའ་ལ་སྤྲིན་ཁ་དོག་རྣམ་པ་ལྔ་འདུས་ན་ཆར་འོང་བར་གདབ་བས། དེ་ཆད་པ་དང་མཆིས་སྨྲས་ནས་ཡུན་རིང་དུ་བསྡད་པ་དང་། ཉི་མ་ནུབ་པར་གྱུར་ནས་བུ་མོས་སྨྲས་པ། དངོས་ལ་ལམ་གྲོགས་མ་མཆིས་པས་གོས་དང་རྒྱན་ལ་བལྟས་ནས་སྲོག་དང་འབྲལ་བར་མཆི་ཞུས་པས། བདེན་ནམ་སྙམ་ནས་དེར་ཉལ་བ་དང་། བུ་མོས་མཚན་ལ་འཇིགས་པ་སྐད་སྨྲས་པས། དེར་བུ་མོ་རྩར་བསྙལ་བ་དང་། ཡུལ་དང་ཉེ་བའི་སྟོབས་ཀྱིས་དེ་གཉིས་ལུས་འདྲེས་པར་གྱུར་ནས། དེར་སྦྱོར་བ་བྱས་པས་དགའ་བཞི་སྐྱེས་ཏེ་ལམ་བགྲོད་པར་གྱུར་ཏོ།།

ནངས་པར་གྱི་དུས་སུ་ཡང་མའི་གམ་དུ་མ་ཕྱིན་པར་དེར་བསྡད་པས། དགེ་སློང་དང་གཉིས་ཀ་ལ་བཟའ་བཅའ་སྐྱེལ་གྱིན་བོར་རོ། །དེ་ལྟར་ལོ་གཅིག་ལོན་པ་དང་། བུ་ཁྱེའུ་ཞིག་བཙས་པར་གྱུར་ལ། འདིར་རྒྱལ་པོས་དུས་རྟག་ཏུ་སྨད་འཚོང་མ་ལ་དྲིས་པས། མོས་གསལ་པོ་མ་སྨྲས་ལ། དེ་ནས་ལོ་གསུམ་ལོན་པ་དང་སྨད་འཚོང་མས་རྒྱལ་པོ་ལ་སྨྲས་པ། རྒྱལ་པོ་ཆེན་པོ། ཉིད་ཀྱིས་བཀའ་གདམས་པའི་དོན་བསྒྲུབས་ཏེ་མཆིས། ཐུགས་དགྱེས་པར་མཛོད་ཅིག་ཞུས་པ་དང་། དེ་ལ་རྒྱལ་པོས་བཀའ་སྩལ་པ།། 

འོ་ན་ཞག་གསུམ་གྱི་དུས་སུ་དགེ་སློང་ངའི་གམ་དུ་འོང་བ་གྱིས། ཞེས་ཁྱོད་ཀྱི་བུ་མོ་ལ་སྨྲོས་ཤིག་ཟེར་རོ། །དེ་ནས་རྒྱལ་པོ་སཱ་ལི་པུ་ཏྲའི་མི་ཀུན་དང་བཅས་དགེ་སློང་གི་གམ་དུ་ཆས་སོ།། དེར་དེའི་ཚེ་དགེ་སློང་གིས་བུ་མོ་ལ་ད་འོ་སྐོལ་གནས་འདིར་འདུག་གམ་གཞན་ཞིག་ཏུ་འགྲོ་སྨྲས་པ་ལ། བུ་མོས་སྨྲས་པ། འོ་སྐོལ་གྱི་ལས་ངན་པ་འདི་ལ་མི་ཀུན་འཕྱ་ཡིན་འདུག་པས། མིའི་ཡུལ་དུ་འཁྱམས་ན་ཡང་དགའ་ཟེར་ནས། བུ་མོས་བུ་ཆུང་དང་ཆང་གི་ཀུ་བ་ཁུར་ནས། བཟའ་ཚོ་གཉིས་ཀྱིས་ཕྱིན་པ་དང་། ལམ་བར་དུ་རྒྱལ་པོ་དང་འཕྲད་ནས། དེ་གླང་པོ་ཆེའི་སྟེང་ནས་བབས་ཏེ་སྨྲས་པ། དགེ་སློང་གི་ཆོས་གོས་ནང་ན་ཅི་ཡོད། བུ་མོ་འདི་ཁྱོད་ཀྱི་ཅི་ཡིན། སྨྲས་པས། དགེ་སློང་ན་རེ། གོས་ཀྱི་ནང་བུ་ཆུང་དང་ཀུ་བ་ཡོད། བུ་མོ་འདི་ངའི་ཆུང་མ་ཡིན་སྨྲས་པས། རྒྱལ་པོ་ན་རེ་ངས་སྤྱན་དྲངས་པའི་དུས་སུ་ཁྱོད་སྡིག་ཅན་གྱི་གམ་དུ་མི་འོངས་ཟེར་བ་ལ། ད་ལྟ་ཁྱེད་རང་བུ་དང་ཆུང་མས་ཅི་བྱེད། སྡིག་ཅན་ཅིག་ཁྱེད་རང་འདུག་ཅེས་སྨྲས་པས། སློབ་དཔོན་གྱིས་ང་ལ་ཉེས་པ་མེད་པས་སྐུར་བ་མ་འདེབས་ཤིག་གསུངས་པས། སླར་ཡང་སྔར་བཞིན་བགྲངས་པས། སློབ་དཔོན་གྱིས་བུ་ཆུང་དང་ཀུ་བ་ས་ལ་བརྡབས་པས། སའི་ལྷ་མོ་འཇིགས་ཏེ། ས་གས་ནས་ཆུ་བརྡོལ་བ་དང་། ཆུའི་ནང་དུ་བུ་ཆུང་དང་ཀུ་བ་རྡོ་རྗེ་དྲིལ་བུར་སོང་ཁོ་རང་བདེ་མཆོག་དང་། བུ་མོ་ཡུམ་རྡོ་རྗེ་ཕག་མོར་སོང་ནས། རྒྱལ་པོ་འཁོར་དང་བཅས་པའི་ནམ་མཁའི་སྟེང་དུ་བདེ་མཆོག་ཡབ་ཡུམ་རྡོ་རྗེ་དྲིལ་བུ་དང་བཅས་པར་གྱུར་པ་དང་། རྒྱལ་པོ་ལ་སོགས་པས་མགྲིན་གཅིག་ཏུ་ནམ་མཁའ་ལ་བལྟས་ནས། སློབ་དཔོན་ལ་སྐྱབས་སུ་མཆིའོ་ཞེས་གསོལ་བ་འདེབས་ཀྱང་། རྡོ་རྗེ་ཁྲོས་པའི་ཏིང་ངེ་འཛིན་ལས་མ་བཞེངས་པ་དང་། སྐྱེ་བོའི་ཚོགས་ཐམས་ཅད་ས་གས་པའི་ཆུར་ནུབ་ནས་འཆི་བ་ལ་ཐུགས་པ་ན་འཕགས་པ་སྤྱན་རས་གཟིགས་སྐད་ཅིག་ལ་དེར་གཤེགས་ནས། ས་གས་པའི་ཆུ་ཞབས་ཀྱིས་བཀག་ནས་རྒྱལ་པོ་དེཝཔཱལ་འཁོར་དང་བཅས་པ་དབུགས་དབྱུང་བར་མཛད་དོ། །དེ་ནས་སླར་ཡང་བླ་མ་ལ་གསོལ་བ་བཏབ་པས། དེས་ཧཱུཾ་སྒྲ་གཅིག་བསྒྲགས་པས་ཆུ་ཐམས་ཅད་མི་སྣང་བར་གྱུར་ཏོ། །དེ་ནས་རྒྱལ་པོ་འཁོར་དང་བཅས་པས་བཟོད་པར་གསོལ་བས། འཕགས་པའི་སྐུ་ཡང་དེ་ཉིད་དུ་རྡོའི་རང་བྱུང་དུ་སོང་སྟེ། ད་དུང་ཡང་ཞབས་འོག་ནས་ཆུ་ཁྲུ་རེ་རེ་ཙམ་འབྲུབ་ཟེར་རོ།།

དེ་ནས་རྒྱལ་པོ་ལ་སོགས་པ་ལ་དེས་གདམས་པ་གསུངས་པ་ནི་

ཇི་ལྟར་སྨན་དང་དུག་ཉིད་ཀྱང་།།

རང་གི་ངོ་བོ་གཅིག་ཉིད་ལས།།

འབྲས་བུ་ཡང་ནི་གཉིས་སུ་འབྱུང་།།

དེ་བཞིན་སྤང་བྱ་གཉེན་པོ་གཉིས།།

ངོ་བོ་གཅིག་སྟེ་ཐ་དད་མིན།།

མཁས་པས་རྟོགས་ནས་སྤོང་མི་བྱེད།།

བྱིས་པ་མི་མཁས་པ་དག་གིས།།

མ་རྟོགས་དུག་ལྔས་འཁོར་བར་འཁྱམས།། 

ཞེས་གསུངས་པས། རྒྱལ་པོ་ལ་སོགས་པའི་སྐྱེ་བོའི་ཚོགས་ཐམས་ཅད་མི་མོས་པའི་སྒྲོ་བསྐུར་འགགས་ནས་གཅིག་ཏུ་མཐུན་པར་དད་པར་གྱུར་ནས། འགྲོ་བ་དཔག་ཏུ་མེད་པ་ལམ་ལ་གནས་པར་གྱུར་ཏེ། ཚིག་ཏུ་ཡང་དྲིལ་བུ་པ་ཞེས་བརྗོད་པས་དེ་ཕན་ཆད་སློབ་དཔོན་དྲིལ་བུ་པཱ་ཞེས་ཕྱོགས་མཚམས་ཐམས་ཅད་དུ་གྲགས་སོ།།

བུ་མོ་དེས་སློབ་དཔོན་ལ་སྐྱེ་བ་སྔ་མ་ལ་ལན་དྲུག་གི་བར་དུ་ཚུལ་ཁྲིམས་ལ་བར་ཆད་བྱས་པ་ཡིན་ལ། ད་རེས་ཀྱང་ཚུལ་ཁྲིམས་ལ་བར་ཆད་བྱས་པ་ལ་སློབ་དཔོན་ཆོས་ཉིད་ཀྱི་ངང་དུ་གཉིས་འཛིན་གྱི་རྣམ་རྟོག་ཐམས་ཅད་སྟོར་ནས་རྒྱུད་སྨིན་པའི་སྟོབས་ཀྱིས་ལམ་དུ་སོང་བ་ཡིན་ནོ།།

སྲས་ནི་ཕྱག་རྡོར་རོ། །བུ་མོ་དེས་ཀྱང་སྔར་ནས་བསྙེན་བཀུར་བྱས་པའི་ཕན་ཡོན་གྱིས་ད་རེས་དྲི་མ་དག་པ་ཡིན་གསུངས། དེ་ལྟ་བུའི་ཡོན་ཏན་དང་ལྡན་པའི་སློབ་དཔོན་དྲིལ་བུ་པ་ལུས་དེ་ཉིད་ཀྱིས་གཉིས་ཀ་མཁའ་སྤྱོད་དུ་གཤེགས་སོ།། གུརུགྷཎྚཔཱ་སྟེ་དྲིལ་བུ་པཱའི་ལོ་རྒྱུས་རྫོགས་སོ།། །།

༥༣༽གུརུཛོགིཔཱ།

 གུརུཛོཀིཔཱ། ༼ཡོགི་པ༽འི་ལོ་རྒྱུས་ནི། ཡུལ་ཨཽདཱནྟཔུརི། རིགས་གདོལ་པ། བླ་མ་ཤཝརིཔཱ། དེ་ཡང་བརྩོན་འགྲུས་ཆེ་ལ་ཤེས་རབ་ཆུང་བར་གྱུར་པ་དང་། དུས་གཅིག་ན་བླ་མ་ཤཝརིཔཱ་དེའི་གམ་དུ་གཤེགས་ནས། དགྱེས་རྡོར་དུ་དབང་བསྐུར་ཏེ། བསྐྱེད་རྫོགས་ཀྱི་གདམས་ངག་གནང་ནས་སྒོམ་དུ་བཅུག་པས། དེའི་དོན་མ་ཤེས་ནས་བླ་མ་ལ་དངོས་ཀྱིས་བསྒོམས་པའི་རྔོ་མི་ཐོགས་པས་ལུས་ངག་གི་དགེ་སྦྱོར་བགྱིད་པར་ཞུ་ཞུས་པས། བླ་མས་རྡོ་རྗེ་ཧེ་རུ་ཀའི་བཟླས་པ་བསླབས་ནས་གནས་ཆེན་ཉི་ཤུ་རྩ་བཞིར་སོང་ལ་སྒྲུབས་ཤིག །གསུངས་པས། དེས་ཀྱང་དེ་ལྟར་བྱས་པས། ལོ་བཅུ་གཉིས་ན་དྲི་མ་དག་སྟེ། མཧཱ་མུདྲའི་དངོས་གྲུབ་ཐོབ་སྟེ། དེས་རྟོགས་པ་བརྗོད་དེ། ལོ་ལྔའི་བར་དུ་འགྲོ་དོན་སྣ་ཚོགས་མཛད་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཛོགིཔཱའི་ལོ་རྒྱུས་རྫོགས་སོ།། །།

༥༤༽གུརུཅེལུཀཔཱ། 

གུརུཅེལུཀའི་ལོ་རྒྱུས་ནི། ཡུལ་བྷངྒཱལཔུར། རིགས་དམངས་རིགས། བླ་མ་མིཏྲཔཱ། དེ་ཡང་གཉིད་ཆེ་བས་དུས་རྟག་ཏུ་གཉིད་ཀྱིས་དབང་དུ་སོང་ནས་བརྩོན་འགྲུས་རྩོམ་མི་ནུས་པ་ལ། དུས་གཅིག་གི་ཚེ་འཁོར་བའི་ཉེས་དམིགས་ལ་སྐྱོ་ནས་ཤིང་རྩ་ཞིག་ཏུ་གནས་པ་དང་། དེར་རྣལ་འབྱོར་པ་ཞིག་འོངས་ནས་ཁྱེད་འདི་ན་ཅི་བྱེད་ཀྱིན་འདུག་ཅེས་གསུངས་པས། ཅེལུཀ་ན་རེ་བདག་འཁོར་བ་ལས་ཐར་བའི་ཐབས་ཆོས་སྒྲུབ་སྙམ་པ་ལ་ཆོས་སྟོན་པའི་སློབ་དཔོན་དང་མ་འཕྲད་ཅིང་། སྒྲིབ་པའི་རང་བཞིན་གྱིས་གཉིད་ཆེ་བས་བརྩོན་འགྲུས་རྩོམ་མི་ནུས་པས། ཉིད་ཀྱིས་བདག་ལ་ཆོས་ཀྱང་སྦྱིན་དགོས་ཤིང་། གཉིད་ཆུང་བའི་ཐབས་ཤིག་མ་བྱིན་ན་ཕན་པ་མེད་ཞུས་པས། རྣལ་འབྱོར་པ་མཻཏྲིཔཱ་ན་རེ། ཁྱོད་ལ་དབང་བསྐུར་ན་གཉིད་ཆུང་ལ་འཁོར་བ་ལས་ཀྱང་ཐར་བ་ཡིན་གསུངས་ནས། བདེ་མཆོག་ཏུ་དབང་བསྐུར་ཏེ། མི་ཟབ་པའི་རྫོགས་རིམ་རྩ་རླུང་གི་གདམས་ངག་འདི་ལྟར་བྱིན་ཏེ། སྣང་སྲིད་ཐམས་ཅད་རང་གི་ལུས་ངག་ཡིད་གསུམ་དུ་བསྡུས་ལ། ལལནཱ་དང་རསནཱ་དབུ་མ་ཨཝདྷཱུཏིར་ཆུག་ལ། ལུས་དང་དྷཱུཏཱི་མཚོར་བསྒོམས། ཤེས་པ་ངང་པར་བསྒོམས་ལ་མཚོ་ནང་དུ་ངང་པ་འཕྱོ་བར་སྒོམས་ཤིག་གཉིད་ཀྱང་ཆུང་ལ་རླུང་དྷཱུ་ཏཱིར་ཚུད་པས་མི་རྟོག་པ་ངང་གི་སྐྱེས་པ་ཡིན། གསུངས་ནས་གདམས་ངག་བྱིན། དེས་ཀྱང་བསྒོམས་པས་ལོ་དགུ་ན་དྲི་མ་དག་སྟེ་ཕྱག་རྒྱ་ཆེན་པོའི་དངོས་གྲུབ་ཐོབ།

སྣང་སྲིད་ཆོས་རྣམས་རང་གི་ལུས་ངག་ཡིད་ལ་འདུས།།

དེ་ཡང་གཟུང་འཛིན་མི་རྟོག་རྩ་ནི་གསུམ་དུ་འདུས།།

གཉིས་པོ་དབུ་མར་འདུས་ནས་རྒྱ་མཚོར་བསྒོམས་བྱས་ལ།།

རྣམ་པར་ཤེས་པའི་ངང་པ་དེ་ཡི་བཅུད་ཀྱིས་འཚོས།།

ཞེས་གསུངས་ནས། དེས་རྟོགས་པ་བརྗོད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཅེལུཀའི་ལོ་རྒྱུས་རྫོགས་སོ།། །།

༥༥༽གུརུགུཾཊརིཔཱ།

གུརུགུཾཊརིའི་ལོ་རྒྱུས་ནི། ཡུལ་ཊིས་སུནགར། རིགས་བྱ་པ། དེ་ཡང་རྟག་ཏུ་དོལ་ཁུར་ནས་བྱ་རྔོན་བྱེད་པ་ལ། དུས་གཅིག་གི་ཚེ་དེའི་གམ་དུ་རྣལ་འབྱོར་པ་ཞིག་བྱོན་ནས་རིགས་ཀྱི་བུ། ཁྱོད་ཅི་བྱེད། སྨྲས་པས། བྱ་པ་ན་རེ། འཕགས་པ་བདག་གི་སྔོན་ལས་ངན་པ་བསག་པས་བྱ་པའི་རིགས་སུ་སྐྱེས་ནས། འཚོ་བའི་ཆེད་དུ་སྲོག་ཆགས་ལ་དུས་རྟག་ཏུ་རྣམ་པར་འཚེ་བར་བགྱིད་པས་སྐྱོ་ཡིན་གདའ་འོ་ཞུས་པས། རྣལ་འབྱོར་པ་ན་རེ། 

ལས་དང་ལས་ཀྱིས་ཚེ་འདིར་སྡུག།

འདི་བས་ཕྱི་མར་ཆེར་སྡུག་ན།།

རྟག་ཏུ་བདེ་བ་དམ་པའི་ཆོས།།

སྒྲུབ་པར་མི་བྱེད་ཅིས་ཏེ་ཨང་།། 

ཞེས་གསུངས་པས། དེ་ན་རེ། བླ་མ་ལགས་བདག་འདྲ་བའི་སེམས་ཅན་སྡིག་ཅན་ལ་ཐུགས་རྗེ་འཁྲུངས་ནས་གདམས་པ་སྩལ་ན། ཅིས་དེ་མི་སྒྲུབ་ཟེར་བས། རྣལ་འབྱོར་པས་དེ་ལ་བྱིན་རླབས་འཕོ་བའི་དབང་བསྐུར་མཛད་ནས། དམིགས་པ་གཅིག་པའི་གདམས་ངག་རང་ཉིད་ཀྱི་དམིགས་པ་དང་མཐུན་པ་བྱིན་ཏེ། འཇིག་རྟེན་གྱི་སྒྲ་ཐམས་ཅད་བྱའི་སྒྲར་སྒོམས། བྱའི་སྒྲ་དང་རང་གི་ཤེས་པའི་དམིགས་པ་གཉིས་གཅིག་ཏུ་གྱིས་ལ་སྒོམས་ཤིག །གསུངས་ལ། དེ་ཉིད་ཚིགས་སུ་བཅད་དེ་གསུངས་པ།

དེ་སྒྲ་ལ་སེམས་ཤོར་ནས་སླར།།

ཁུ་བྱུག་སྒྲ་སྙན་སྒྲ་གྲགས་ཏེ།།

སྒྲ་རྣམས་སྒྲ་ཙམ་ཉིད་དུ་གཅིག། 

དེ་བཞིན་སྒྲ་དང་སྒྲར་འཛིན་པ།།

ཁྱབ་བྱེད་ཆོས་ཉིད་ངོ་བོ་སྒོམས།། 

ཞེས་གསུངས་པས། དེ་ལྟར་བསྒོམས་པ་ན་སྒྲ་གྲགས་སྟོང་དབྱེར་མེད་དུ་རྟོགས་ཏེ། ལོ་དགུ་ན་སེམས་ཀྱི་དྲི་མ་དག་ནས་ཕྱག་རྒྱ་ཆེན་པོའི་དངོས་གྲུབ་ཐོབ། རང་གི་རྟོགས་པ་བརྗོད་ནས་ལོ་བརྒྱའི་བར་དུ་འཇིག་རྟེན་དུ་བཞུགས། སེམས་ཅན་གྱི་དོན་དཔག་ཏུ་མེད་པ་མཛད་དེ། འཁོར་སུམ་བརྒྱ་དང་བཅས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུགུཾཊརའི་ལོ་རྒྱུས་རྫོགས་སོ།། །།

༥༦༽གུརུལུཅིཀ་པཱ།

 གུརུལུཅིཀའི་ལོ་རྒྱུས་ནི། ལུཅིཀ་ནི་ཙོག་འདུག་ཀོག་ལངས་མཁན་ནོ། །ཡུལ་ཤར་ཕྱོགས་བྷཾ་གཱལ་ན་བྲམ་ཟེ་ཞིག །མི་མང་པོ་ཤི་བས་ཤེས་པ་སྐྱོ་སྟེ། འཁོར་བ་ལས་བློ་ལོག་ནས་གནས་དབེན་པ་ཞིག་ཏུ་ཕྱིན་ཏེ་ཆོས་བྱེད་སྙམ་ནའང་གདམས་པ་མེད་པས། ད་ང་ལ་ཆོས་གསུང་བའི་བླ་མ་ཞིག་ནམ་འཕྲད་སྙམ་པ་ན། དུས་གཅིག་གི་ཚེ་རྣལ་འབྱོར་པ་ཞིག་དེར་བྱོན་པ་ན་དེ་དགའ་སྟེ་ཕྱག་འཚལ་བ་ན། རྣལ་འབྱོར་པ་ན་རེ། ང་ལ་ཕྱག་འཚལ་ནས་ཅི་དགོས། གསུངས་པ་ལ། དེ་ན་རེ། བདག་འཁོར་བ་ལས་བློ་ལོག་ནས་ཆོག་ཤིག་བྱེད་སྙམ་པ་ལ། གདམས་ངག་སྟོན་པའི་བླ་མ་མ་རྙེད་ནས། དེ་རིང་བླ་མ་དང་འཕྲད་པས་གདམས་པ་ཞུའོ་ཟེར་བས། རྣལ་འབྱོར་པ་དེས་དེ་ལ་བདེ་མཆོག་ཏུ་དབང་བསྐུར་ཏེ། བསྐྱེད་རྫོགས་ཀྱི་གདམས་པ་གནང་བས། དེས་འབད་ནས་བསྒོམས་པས་བཅུ་གཉིས་ན་བསྐྱེད་རྫོགས་ཟུང་དུ་ཆུག་སྟེ་གྲུབ་པ་ཐོབ་ནས། ལུཅིཀར་གྲགས་ཤིང་། ཞལ་ནས། 

འཁོར་བ་མྱ་ངན་འདས་པ་གཉིས།།

ཐ་དད་ཡོད་པར་མ་མཐོང་སྟེ།།

དེ་ཉིད་ཐར་པ་བདེ་ཆེན་པོ།།

དམན་པར་བཟུང་བས་བགྲོད་པར་དཀའ།།

ཞེས་གསུངས་ཏེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་པ་སྟེ། ནམ་མཁའ་ན་རྟོགས་པ་རྣམས་བརྗོད་དེ་མི་སྣང་བར་གྱུར་ཏོ།། གུརུལུཅིཀའི་ལོ་རྒྱུས་རྫོགས་སོ།། །།

༥༧༽གུརུནགུཎ། 

གུརུནགུཎའི་ལོ་རྒྱུས་ནི། ནགུཎ་སྟེ་ཡོན་ཏན་མེད་པར་བྱ་བ་ཡིན་ལ། ཡུལ་པཱུརྦ་དེ་ཤ་བྱ་བའི་དམངས་རིགས་ཤིག་གི་ཁྱིམ་ཐབ་ལས་བུ་བཙས་ཏེ། བཙས་སྟོན་རྒྱ་ཆེན་པོ་བྱས་ནས་སྐྱེད་བསྲིངས་པ་ན། དེ་གཉིད་དང་ལེ་ལོ་ཆེ་བས་འཇིག་རྟེན་གྱི་བྱ་བ་གང་ཡང་མ་དྲན་པས། འདི་འདྲ་བའི་ལེ་ལོ་ཅན་གྱི་མི་བྱ་བ་བཟང་ངན་གང་ཡང་མི་འོང་བ་འདི་སྐྱེས་པ་བས་ཤིང་ཐོག་ཅིག་ཡིན་ན་བཟའ་རུ་ཡོད་པ་ལ་ཟེར་ནས་མཐུན་པར་དམོད་པའི་ཚེ། དེ་ཡིད་བྱུང་ནས་ཕྱོགས་དབེན་པ་ཞིག་ཏུ་སོང་ནས་བསྡད་པ་ཡོད་པ་ལ། རྣལ་འབྱོར་པ་ཞིག་བྱོན་ནས་དེ་ལ་གྲོང་ཁྱེར་ནས་བསོད་སྙོམས་ལོངས་ལ་དྲོངས་ཤིག །གསུངས་པས། དེ་ན་རེ། བདག་གིས་མི་ལོངས་པར་འདུག་ན་ཟེར་ནས་ས་ལ་འགོག་ཀྱང་མ་ནུས་པ་ལ། དེའི་ཐུགས་རྗེས་བཟའ་བ་བྱིན་ནས་ཁྱོད་ལ་ཡོན་ཏན་ཅི་ཡོད། གསུངས་པས། འཕགས་པ་བདག་ནི་ནགུཎ་ཞེས་བཏགས་པ་ལགས་ན་ཡོན་ཏན་ཅི་ཡང་མེད་དོ། །ཞེས་ཟེར་ནས། ཁ་ཟས་སོགས་ཉལ་གྱིན་བཟའ་བཏུང་བྱེད་པ་ན། དེ་ལ་རྣལ་འབྱོར་པ་དེས་ཤི་བས་མི་འཇིགས་སམ། བྱས་པས། འཇིགས་ཏེ་ཐབས་མེད་ཟེར། སྒྲུབ་པར་ནུས་ན་ཐབས་སྦྱིན་གྱི་གསུངས་པས། ཉལ་གྱིན་བྱར་ཡོད་ན་ནུས་ལགས་ཟེར་བས། དེ་དབང་བསྐུར་ནས་སྣང་སྟོང་ཟུང་འཇུག་གི་གདམས་པ་འདི་ལྟར་གནང་སྟེ། 

གཟུང་འཛིན་གང་ཡང་མ་གྲུབ་པར།།

མ་རྟོགས་སེམས་ཅན་ཐམས་ཅད་ནི།།

སྡུག་བསྔལ་གྱིས་མནར་སྙིང་རེ་རྗེ།།

དེ་ཡང་གདོད་ནས་མ་གྲུབ་སྟེ།། 

སྣང་དང་སྟོང་པ་དབྱེར་མེད་པའི།།

འོད་གསལ་རྒྱུད་ལ་སྐྱེས་ནས་ཀྱང་།།

སྨྱོན་པ་ལྟ་བུའི་སྤྱོད་པ་ཡིས།།

གྲོང་ཁྱེར་དག་ཏུ་རྒྱུག་པར་བྱ།།

ཞེས་གསུངས་པ་ལྟར་དེས་ཀྱང་བསོད་སྙོམས་བྱེད་ཅིང་བསྒྲུབས་པས། འོད་གསལ་ཟུང་འཇུག་གི་རྟོག་པ་སྐྱེས་ནས། གྲུབ་པ་ཐོབ་སྟེ། ཕྱོགས་ཐམས་ཅད་དུ་ཕྱིན་ནས་མི་རྣམས་སུ་ཡིན་ཟེར་བ་ལ། དེས་མི་ཀུན་ལ་བལྟས་ཀྱིན་ངུས་པས། མི་རྣམས་ཀྱང་འདི་འདྲ་བ་སྙིང་རེ་རྗེ་ཟེར་ནས་ངུ་བར་བྱེད། གདུལ་བྱ་སྣོད་དང་ལྡན་པ་ལ་སྣང་སྟོང་དབྱེར་མེད་ཀྱི་ལམ་སྟོན་པར་བྱེད་དོ།། དེ་ནས་རྒྱ་མཚོར་གྲུ་ཞིག་པ་བཞིན་འཁྲུལ་པའི་རྒྱ་ཐམས་ཅད་ཞིག་ནས། ཕྱག་རྒྱ་ཆེན་པོའི་དངོས་གྲུབ་ཐོབ་ཅིང་། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུནགུཎཔཱའི་ལོ་རྒྱུས་རྫོགས་སོ།། །།

༥༨༽གུརུཇཡཱནྡ།

གུརུཇཡཱནནྡའི་ལོ་རྒྱུས་ནི། ཡུལ་བྷཾ་ག་ལར་རྒྱལ་པོ་ཞིག་ལ་བྲམ་ཟེའི་བློན་པོ་ཞིག་ཡོད་པ་ལ། དུས་གཅིག་གི་ཚེ་བྲམ་ཟེ་དེ་ཆོས་སྒོར་ཞུགས་ནས། བཀའ་གསང་སྔགས་ཀྱི་ཆོས་གསང་གིན་བསྒྲུབས་པས། བྱིན་རླབས་བྱུང་བ་སུས་ཀྱང་མ་ཚོར་བ་དང་། དུས་རྒྱུན་དུ་གཏོར་མ་མང་དུ་བཏང་བས། བློན་པོ་གཞན་གྱིས་མ་ཐེག་ནས་རྒྱལ་པོ་ལ་ཞུས་པས། རྒྱལ་པོས་ཀྱང་དེ་བཙོན་དུ་བཟུང་སྟེ། ལྕགས་སུ་བཅུག་པ་ན། དེས་རྒྱལ་པོ་ལ་ལྷའི་རྫས་ཕུལ་ཕྱེད་ལོངས་པ་ཆུད་ཟོས་སུ་བཅུག་པ་མེད་པས་བདག་ལྕགས་ལས་ཐོང་ཞིག་བྱས་ཀྱང་རྒྱལ་པོས་མ་ཉན་པ་ན། དེའི་ཕྱི་དེར་གཏོར་མའི་དུས་སུ་བྱ་དག་འོངས་པས། དེ་མེད་པར་རྒྱལ་པོའི་ཁང་པར་བྱ་རོག་དག་འདུས་ནས་དམག་དྲངས་ཏེ། མི་ཐམས་ཅད་ཀྱི་མགོ་བཏོགས་འཚོགས་པར་བྱེད་པས། དེ་ན་བྱ་སྐད་ཉན་ཤེས་པ་ཞིག་གིས་ཉན་པས། ངེད་ཀྱི་ཕ་མར་གྱུར་པའི་བྲམ་ཟེར་རྒྱལ་པོས་བསྡམས་པ་ཡིན་ནོ་ཟེར་ནས། དེ་རྒྱལ་པོ་ལ་སྨྲས་པ་དང་། རྒྱལ་པོ་ན་རེ། དེ་ལྟ་ན་ཁོ་བདེན་ཟེར་ནས། བཟོད་པར་ཕུལ་ཏེ་བྱ་དག་ལོག་ཏུ་ཆུག་ཅིག་ཟེར་བས། དེས་བྱ་དག་ལ་སྨྲས་ནས་བྱ་ལོག་པས་རྒྱལ་པོ་ཆེར་དད་དེ། ཉི་མ་རེ་ལ་འབྲས་ཁལ་ཉི་ཤུ་གཏོར་རྐྱེན་ལ་སོགས་པ་ཕུལ་ལོ།། དེ་མན་ཆད་བླ་མ་ཇཡཱནནྡ་ཞེས་གྲགས་ལ། དེའི་ཞལ་ནས། 

ལྷན་ཅིག་སྐྱེས་པའི་ཡེ་ཤེས་དེ།།

བླ་མའི་དྲིན་གྱིས་ཡང་དག་རྟོགས།།

བདེ་ཆེན་མཆོག་གི་བློན་པོ་བྱེད།།

འཁོར་བའི་འཁོར་དུ་ང་མི་གནས།།

གནས་ལུགས་རང་གསལ་རྒྱལ་པོ་དེས།།

གཟུང་འཛིན་གཉིས་ཀྱི་དགྲ་ཡང་བཅོམ།།

འཁོར་བའི་བདེ་ལ་ཆགས་པ་མེད།།

ཀྱེ་ཧོ་མ་རྟོགས་སེམས་ཅན་རྣམས།། 

ཀྱེ་མ་ཞེས་ནི་ཇཡཱསྨྲ།།

ཞེས་གསུངས་ཏེ།། འགྲོ་དོན་མང་དུ་མཛད་དེ། ལོ་བདུན་བརྒྱ་ན་མཁའ་སྤྱོད་དུ་གཤེགས་སོ།། གུརུཇཡཱནནྡའི་ལོ་རྒྱུས་རྫོགས་སོ།། །།

༥༩༽གུརུཅཔརིཔཱ། 

གུརུཅཔརི་པའི་ལོ་རྒྱུས་ནི། ཡུལ་ཅམཔཱཀ་ཡིན། རིགས་ཁུར་བ་འཚོང་པའོ། །དེ་ཕོངས་ནས་གོས་ཀྱང་ཀཊུལ་ལས་གོན་རྒྱུ་མེད་པ་ཞིག་ཁྱིམ་བདག་ཕྱུག་པོ་ཞིག་ནས་ཁུར་བ་བླངས་ཤིང་། བཙོངས་ནས་དེའི་ཁེས་འཚོ་བར་བྱེད་པའི་ཚེ། དེ་ཁུར་བ་མར་ཁུར་ཚོས། བཙོས་པ་མ་གཙོངས་པར་རང་ཉིད་ཀྱིས་ཟོས་པས། ཕྱེད་ཙམ་ཟོས་ཟིན་པ་ན། འཕགས་པ་སྤྱན་རས་གཟིགས་དབང་ཕྱུག་དགེ་སློང་ཞིག་ཏུ་སྤྲུལ་ནས་དེའི་གམ་དུ་བྱོན་པ་ན། དེ་དད་པ་སྐྱེས་ནས་ཕྱག་བྱས་ཏེ་ཁུར་བ་ཕྱེད་པོ་དེ་དགེ་སློང་དེ་ལ་དྲངས་པས། དེ་ན་རེ། ཁྱོད་ཀྱིས་འདི་གང་ནས་ཁུགས་པ་ཡིན་གསུངས་པས། དེས་ཀྱང་བདེན་པར་སྨྲས་པ་དང་། འཕགས་པས་འོ་ན་འོ་སྐོལ་གཉིས་ཡོད་མཆོད་དུ་འདུག་པས་ངས་ཡོན་བདག་ལ་ཆོས་ཤིག་བྱ་གསུངས་པས། དེས་ཀྱང་མཎྜལ་བྱས་ཏེ་མེ་ཏོག་ལ་སོགས་པ་ཕུལ་བས། སྤྲུལ་པས་ཀྱང་སྐྱབས་འགྲོ་སེམས་བསྐྱེད་བྱིན་རླབས་བྱས་ནས། ཡི་གེ་དྲུག་མའི་གདམས་པ་གནང་བས། དེས་ཀྱང་གུས་པས་བསོད་སྙོམས་ཀྱིས་འཚོ་བ་བྱས་ཏེ་སྒྲུབ་པའི་དུས་སུ།། སྔར་གྱི་ཁུར་བའི་བདག་པོ་དེ་འོངས་ནས། དེའི་རིན་བྱིན་ཟེར་བ་ལ། དེས་ང་ལ་ཅང་མེད་ན་བྱས་པས། དེ་བཟུང་ནས་བརྡུངས་པས། དེའི་ཁ་ནས་ང་གཅིག་པུས་མ་ཟོས་སློབ་དཔོན་དང་ངེད་གཉིས་ཀས་ཟོས་ནས་ང་གཅིག་པོ་བརྡུང་ངམ། བྱས་པས། དེ་བཞིན་དུ་སྒྲ་དེ་རྩིག་པ་ལ་སོགས་པ་ནས་ཀྱང་བྱུང་བས་ངོ་མཚར་ནས། བདག་གི་ཁུར་བ་ཁྱེད་ཀྱིས་ཁྱེར་ཏེ་སོང་ཟེར་ནས་བཏང་ངོ་། །དེས་ཀྱང་ལྷ་ཁང་ཞིག་ཏུ་ཕྱིན་ནས་རང་གི་ཡིད་དམ་ཀྱི་རྟེན་ཞིག་ཡོད་པ་ལས་ཁུར་བའི་རིན་བླངས་པས། དེས་དེ་ལ་གསེར་ཏོ་ལ་བརྒྱ་བཏད་པ་ན། དེ་ཁུར་ནས་སྔར་གྱི་ཁྱིམ་བདག་ལ་ཁུར་བའི་རིན་དུ་གཏད།

སྔར་གྱི་སྒྲིབ་པ་བག་ཅིག་ཡོད་པ་དེས་དག་ནས། ངའི་བླ་མ་འཕགས་པ་ཡིན་པར་འདུག་སྟེ། རི་པོ་ཏ་ལར་འགྲོ་བར་ཆས་ཏེ་ཕྱིན་པ་ན། བར་དུ་ཚེར་མའི་ནགས་ཤིག་ནས་རྐང་པ་ལ་ཚེར་མ་ཟུག་ནས་སྡུག་བསྔལ་ཆེན་པོ་བྱུང་སྟེ། འཕགས་པ་ལ་སྨྲེ་སྔགས་ཆེན་པོ་ཡང་ཡང་བཏང་པས། འཕགས་པ་ཀྱང་ཞལ་དངོས་སུ་བསྟན་ཏེ། ཁྱོད་ཀྱི་བླ་མ་ང་ཡིན་པས། ད་ཁྱོད་རང་དོན་གཉེར་བར་མ་བྱེད་པར་ཕྱིར་ལོག་ལ་གདུལ་བྱ་རྣམས་དྲང་བར་བྱོས་ཤིག །གསུངས་པས། དེ་དགའ་ནས་ནམ་མཁའ་ལ་འཕགས་ཏེ་ཅམཔཱཀར་ཡང་བྱོན་ནས། ཐམས་ཅད་ཀྱིས་མཐོང་བས་ངོ་མཚར་སྐྱེས་ཏེ། གདམས་པ་ཞུས་པས། སྣང་སྟོང་དབྱེར་མེད་ཀྱི་གདམས་པ་ཡང་གསུངས། དེ་མན་ཆད་བླ་མ་ཅཔཱརིཔ་ཞེས་བྱ་བར་གྲགས་ཏེ། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཅཔརིཔཱའི་ལོ་རྒྱུས་རྫོགས་སོ།། །།

༦༠༽གུརུཅམཔཱཀ

གུརུཅམཔཀའི་ལོ་རྒྱུས་ནི། ཡུལ་ཅམཔཱཀ་ཡིན་ཞིང་། མེ་ཏོག་གི་མིང་ལ་བཏགས་པ་ཡིན་ནོ། དེར་རྒྱལ་པོ་ཞིག་ལ་རྒྱལ་སྲིད་ཀྱི་འབྱོར་པ་ཕུན་སུམ་ཚོགས་ཤིང་ལོངས་སྤྱོད་ཀྱིས་བྲེལ་པ་མེད་པ་ཞིག་ཡོད་ལ། དེ་ལང་ཚོས་དྲེགས་རྒྱལ་སྲིད་ཀྱི་བདེ་བས་མྱོས་ནས་ཕྱི་མ་མི་དྲན་པར་གནས། དུས་གཅིག་གི་ཚེ་རྒྱལ་པོ་དེ་མེ་ཏོག་ཅམ་པཱ་ཀའི་སྐྱེད་མོས་ཚལ་གྱིས་ནང་དུ་མེ་ཏོག་གི་ཁང་པ་ལེགས་པར་བྱས། འདུག་པའི་སྟན་དང་། སྔས་ཀྱང་མེ་ཏོག་ཅམཔཱཀ་ཁ་དོག་སེར་པོ་དྲི་ཞིམ་པོ་ལས་བྱས་ཏེ། དེ་ལྟ་བུའི་ནང་ན་གནས་པ་ན། རྣལ་འབྱོར་པ་ཞིག་གིས་དེ་ལ་བསོད་སྙོམས་བསླངས་པས། རྒྱལ་པོས་ཀྱང་ཞབས་བཀྲུས་སྟན་བསྟབ་པ་ལ་སོགས་པ་བྱས་ནས། བཞེས་ཆབ་དྲངས། དེས་ཆོས་གསུངས་པས། རྒྱལ་པོ་འཁོར་དང་བཅས་པ་ཐམས་ཅད་ཀྱིས་དེ་མཆོད་གནས་སུ་ཞུས་ཏེ་བཞུགས་པ་ན། རྒྱལ་པོ་ན་རེ། རྣལ་འབྱོར་པ་ཡུལ་མང་པོར་བྱོན་ན། མེ་ཏོག་འདི་འདྲ་བ་དང་བདག་འདྲ་བའི་རྒྱལ་པོ་གཞན་ན་གཟིགས་སམ། ཞུས་པས། རྣལ་འབྱོར་པ་དེ་ན་རེ། 

མེ་ཏོག་ཙམཔཱཀ་ནི་དྲི་མཆོག་ལྡན་གྱུར་ཀྱང་།།

རང་གི་ལུས་ལས་དྲི་མ་སྣ་ཚོགས་དེ་མ་ཡིན།།

རྒྱལ་པོ་རྒྱལ་སྲིད་གཞན་ལས་ཁྱད་པར་འཕགས་གྱུར་ཀྱང་།།

འཆི་བར་གྱུར་པའི་ཚེ་ན་གང་ཡང་མེད་པར་འགྲོ།།

ཞེས་གསུངས་པས། རྒྱལ་པོས་བརྟགས་པས་ལུས་ལ་ཞེན་པ་རང་ལོག་སུ་སོང་ནས། སླར་དེ་ལ་གདམས་པ་ཞུས་པས། རྣལ་འབྱོར་པ་དེས་དང་པོར་ལས་རྒྱུ་འབྲས་བསྟན། དེ་ནས་དབང་བསྐུར་ཏེ་གདམས་པ་ལམ་བསྐྱེད་རྫོགས་གནང་བས། དེའི་རྣམ་རྟོག་མེ་ཏོག་ལ་སོགས་པ་ལ་སོང་ནས་སྒོམ་དུ་མ་འདོད་པ་ལ། དེ་རྟོག་པ་ལམ་ཁྱེར་གྱི་གདམས་པ་འདི་ལྟར་གནང་ངོ་། །

སྣང་ཙམ་ཉིད་ནས་སྟོང་པ་ན།།

བླ་མའི་མན་ངག་མེ་ཏོག་ལ།།

རང་སེམས་བུང་བ་གནས་པར་བྱེད།།

ཟག་མེད་བདུད་རྩིའི་སྦྲང་རྩི་གསུམ།། 

ངོ་བོ་གཅིག་ཏུ་བསྒོམ་པ་ན།།

འབྲས་བུ་བདེ་ཆེན་འབྱུང་བར་འགྱུར།།

དྲུག་པ་རྡོ་རྗེ་འཆང་ཆེན་གྱི།།

བཀའ་ཡིན་ཐེ་ཚོམ་མེད་པར་སྒོམས།།

ཞེས་གསུངས་པ། དེས་ཀྱང་ལོ་བཅུ་གཉིས་སུ་བསྒོམས་པས། གདམས་ངག་དང་རང་སེམས་ཀྱི་གནས་ལུགས་ཉམས་མྱོང་གསུམ་དབྱེར་མེད་དུ་རྟོགས་པས་གྲུབ་པ་ཐོབ། དེ་མན་ཆད་མཚན་ལ་ཅམཔཱཀཔཱ་བྱ་བར་གྲགས། བཙུན་མོ་ལ་སོགས་པ་འཁོར་དཔག་ཏུ་མེད་པ་ལ་ཆོས་བཤད་ནས། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཅམཔཱཀའི་ལོ་རྒྱུས་རྫོགས་སོ།། །།

༦༡༽གུརུབྷིཀྵནནཔཱ།

གུརུབྷིཀྵནཔཱའི་ལོ་རྒྱུས་ནི། བྷིཀྵནཔཱསྟེ་བསོད་སྙོམས་པ་བྱ་བ་ཡིན་ལ། ཡུལ་སཱའིཔུཏྲར་ན་དམངས་རིགས་ཤིག་ནོར་རྫས་དང་འབྱོར་བ་ཐམས་ཅད་ཉམས་ནས་གྲོང་དང་གྲོང་ཁྱེར་དུ་བསོད་སྙོམས་བྱེད་པ་ལས། དུས་གཅིག་ནས་བསོད་སྙོམས་མ་རྙེད་ནས། སེམས་ཁོང་དུ་ཆུད་ཅིང་། དབེན་པ་ཞིག་དུ་བསྡད་པའི་དུས་སུ་ཊཱཀི་མ་ཞིག་བྱོན་ནས། ཁྱོད་འདི་ན་ཅི་བྱེད་ཅིང་འདུག་གསུངས་པས། དེས་ཀྱང་བདེན་པར་སྨྲས་པ་ན། དེས་ང་ལ་འདོད་པ་རྙེད་པའི་ཐབས་ཡོད་ན་གསུངས་པས། དེ་ན་རེ། བདག་ལ་ཞུ་ཟེར། འོ་ན་ཡོན་ཅི་ཡོད། གསུངས་པས། དེས་སྟེང་འོག་གི་སོ་རེ་རེ་བཞག་ནས་གཞན་རྣམས་བཏོན་ཏེ་ཕུལ་བས། ལྷག་པའི་བསམ་པ་གཡོ་སྒྱུ་མེད་པར་མཁྱེན་ནས་དེ་ཉིད་དུ་དབང་བསྐུར། ཐབས་དང་ཤེས་རབ་ཟུང་འཇུག་གི་གདམས་པ་གནང་། དེ་ནས་དེས་ཀྱང་བསྒོམས་པས་ལོ་བདུན་ན་བདེན་པ་མཐོང་། ཟག་མེད་ཀྱི་ཡོན་ཏན་རྒྱུད་ལ་སྐྱེས་ནས་རང་གི་རྟོགས་པ་བརྗོད། གདུལ་བྱའི་དོན་དུ་གྲོང་དང་གྲོང་ཁྱེར་དུ་བྱོན་ནས་བྷིཀྵནཔཱ་ཞེས་བྱ་བར་གྲགས། ལོ་མང་པོ་ན་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུབྷིཀྵན་པཱའི་ལོ་རྒྱུས་རྫོགས་སོ།། །།

༦༢༽གུརུདྷིལི་པཱ།

གུརུདྷིལིཔཱའི་ལོ་རྒྱུས་ནི། ཡུལ་སཏཔུརི་ན་མར་ནག་འཚོང་བས་འཚོ་བ་ཞིག་ཡོད་པ་ལ། དེར་མར་ནག་བཙོངས་པས་གར་བྱ་བར་འཚོང་ལེགས་ཏེ། འབྱོར་པས་རྒྱས་ནས་རྣམ་ཐོས་ཀྱི་བུ་དང་མཉམ་པའི་འབྱོར་པ་ཐོབ་ནས་འདོད་པའི་ཡོན་ཏན་ལ་ལོངས་སྤྱོད་པར་བྱེད། དེ་ཡང་ཚོད་སྣ་བརྒྱད་ཅུ་རྩ་བཞི་དང་། བཟའ་བ་བཅུ་གཉིས་དང་། བཏུང་བ་ལྔ་ལ་སོགས་པ་རྣམས་རྒྱལ་པོས་མ་ཚོར་བར་ལོངས་སྤྱོད་ཅིང་འདུག་པའི་དུས་གཅིག་ན། པཎྜིཏ་བྷཧན་བྱ་བ་དེར་བྱོན་ནས་དེ་ལ་འཁོར་བའི་ཉེས་པ་དང་། ཐར་པའི་སྔགས་པ་བརྗོད་པས། དེ་དད་པ་སྐྱེས་ཏེ། ཆོས་ཞུས་ནས་མཆོད་གནས་སུ་བྱས་པ་ན། དུས་གཅིག་དེ་མར་ཁུའི་སྦྱོར་བ་བྱེད་པ་པཎྜིཏ་དེས་གཟིགས་པས། དེ་ལ་ཁྱོད་ཀྱིས་བསྐལ་བ་ནས་བསྐལ་བར་དེ་བཙིར་བས་ཐར་པ་མི་འབྱུང་གསུངས་པས། དེ་ན་རེ་བླ་མ་ལགས་དེ་ལྟར་ན་ཐར་པ་འབྱུང་བའི་ཐབས་ཞུ་ཟེར་བས། དེས་དབང་བསྐུར་ནས་མཚན་མ་རང་གསལ་གྱི་གདམས་པ་འདི་གནང་སྟེ། 

རང་ལུས་ཏིལ་གྱི་གོང་ཉིད་ལས།།

རྣམ་རྟོག་མར་ཁུ་བཙིར་ནས་ཀྱང་།།

སེམས་ཉིད་སྣོད་དུ་བླུགས་བྱས་ཏེ།།

སྣང་སྟོང་དབྱེར་མེད་སྡོང་བུ་ལ།།

རིག་པ་ཡེ་ཤེས་མེ་སྦར་ནས།།

མ་རིག་མུན་པ་སྤངས་གྱུར་ཏེ།།

ཐར་པའི་བདེ་བ་བླ་ན་མེད།།

ཟག་མེད་བདེ་ལ་གནས་པར་འགྱུར།།

ཞེས་གསུངས་ནས། དེས་ཀྱང་གུས་པར་བསྒོམས་པས། ལོ་དྲུག་ན་བསྐྱེད་རྫོགས་ཟུང་དུ་ཚུད་དེ་གྲུབ་པ་ཐོབ་ནས་རང་ལུས་ལས་འོད་འཕྲོས་པས་ཕྱོགས་ཐམས་ཅད་དུ་གང་བར་བྱས་པ་ན། དེ་གཞན་གྱིས་མཐོང་ནས་རྒྱལ་པོ་ལ་བསྙད་པ་ན། རྒྱལ་པོས་བལྟར་བཏང་བས་དེ་ལྟར་འདུག་པ་དང་། དེས་ཀྱང་ཟག་པ་མེད་པའི་བདེ་བ་ལ་ལོངས་སྤྱོད་པའི་རྒྱལ་པོ་ང་དང་མཉམ་པ་འགའ་ཡང་མེད་དོ་ཞེས་པ་ལ་སོགས་པ་གསུངས་ཤིང་། ཐམས་ཅད་དད་པ་ལ། དེ་དག་གི་ཁམས་དང་བག་ལ་ཉལ་དང་མཐུན་པའི་གདམས་ངག་གསུངས་ནས་ལོ་དུ་མ་ནས་འཁོར་མང་པོ་དང་བཅས་མཁའ་སྤྱོད་དུ་གཤེགས་སོ།། གུརུདྷིལིཔཱའི་ལོ་རྒྱུས་རྫོགས་སོ།། །།

༦༣༽གུརུཀུམྦརིཔཱ།

གུརུཀུམྦརིཔཱའི་ལོ་རྒྱུས་ནི། ཀུམྦཀཱརི་བྱ་བ་བོད་སྐད་ལ་རྫ་མཁན་བྱ་བ་ཡིན། ཡུལ་ཛོམན་ཤྲཱི་བྱ་བ་ན་གང་ཟག་རྫ་མཁན་ཞིག་དུས་རྟག་པར་རྫའི་ལས་ཀྱིས་འཚོ་བའི་ཚེ། དེ་ལ་དེ་སེམས་སྐྱོ་ནས་ཡོད་པ་ལ། དེའི་གམ་དུ་རྣལ་འབྱོར་པ་ཞིག་འོང་ནས་བསོད་སྙོམས་བསླངས་པས། དེས་ཀྱང་བསོད་སྙོམས་དྲངས་ནས། བླ་མ་ལགས། བདག་གིས་འདི་འདྲ་བའི་ལས་རིམ་གཅིག་བྱས་པ་ལས། ཕན་པ་ཆེན་པོ་མ་བྱུང་ཞིང་། ལས་འདི་ཟད་པའམ་ཟིན་པའི་མཐའ་ལར་མ་བྱུང་བས། སྐྱོ་བ་སྐྱེས་པར་གདའོ།། ཞེས་ཟེར་བ་ལ། དེས་སྦྱིན་བདག་ཁྱོད་ཀྱིས་མ་གོའམ། འཁོར་བའི་སེམས་ཅན་འདི་རྣམས་སྡུག་བསྔལ་བ་ལས་བདེ་བ་ནི་འགའ་ཙམ་ཡང་ཡོད་པ་མ་ཡིན་ཏེ། དེ་ཡང་དུས་ཐོག་མ་མེད་པ་ནས་ཐ་མ་མེད་པར་སྡུག་བསྔལ་གཅིག་པུ་ལས་མེད་དེ། སྐྱོ་བ་མ་སྐྱེས་པར་གདའ་ན་གསུངས་པས་དེ་དད་ནས་བླ་མ་དེ་ལས་ཐར་པའི་ཐབས་ཤིག་ཞུ་ལགས་ཟེར་བས། དེས་དབང་བསྐུར་ནས་བསྐྱེད་རྫོགས་གཉིས་ཀྱི་གདམས་པ་འདི་ལྟར་གནང་སྟེ། 

མ་རིག་པ་ཡི་རྫ་ས་ལས།།

ཉོན་མོངས་རྣམ་རྟོག་འདམ་བྱང་སྟེ།།

སྲེད་ལེན་འཁོར་ལོས་རིགས་དྲུག་གི།

རྫ་བྱས་ཡེ་ཤེས་མེ་ཡིས་སྲེགས།།

ཞེས་གསུངས་པས། དེས་རྣམ་རྟོག་ངོ་སྤྲོད་ཀྱི་གདམས་པ་དེ་གོ་ནས། ཟླ་བ་དྲུག་བསྒོམས་པས་འཁོར་བར་འཁྲུལ་པའི་དྲི་མ་དག་ནས་གྲུབ་པ་ཐོབ་སྟེ། མཉམ་པར་བཞག་པས། རྫ་མའི་འཁོར་ལོ་རང་འཁོར་ནས་རྫ་མ་ཡིད་ལ་འཐད་པ་ལྟར་བྱུང་བས། དེའི་གྲོང་ཁྱེར་པས་རིགས་ཀྱི་ཡོན་ཏན་དང་ལྡན་པར་གོ་ནས། བླ་མ་ཀུམྦརིཔཱ་ཞེས་བྱ་བར་གྲགས། དེས་རྟོགས་པ་བརྗོད་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། །།གུརུཀུམྦརིཔའི་ལོ་རྒྱུས་རྫོགས་སོ།། །།

༦༤༽གུརུཛཝརིཔཱ།

གུརུཛཝརིཔཱའི་ལོ་རྒྱུས་ནི། གྲོང་ཁྱེར་མགངྷའི་བྱེ་བྲག་ཅིག་ན་འབྲོག་པའི་རིགས་ཤིག་ལ་འབྱོར་པ་དཔག་ཏུ་མེད་པ་ཡོད་ལ། མཧེ་སྟོང་ལ་སོགས་པ་དང་། རྟ་དང་ལུག་ལ་སོགས་པ་དཔག་ཏུ་མེད་པ་ཡོད་པ་ཞིག་གིས་རང་གི་ཕ་རྒན་ཤི་ནས་འདུ་བ་རྒྱ་ཆེན་པོ་བྱས་པ། གཞན་དུ་ནའང་ཤི་བའི་དུས་འདུ་བ་རྒྱ་ཆེན་པོ་བྱེད་པའི་ཚེ་ཡུལ་དེའི་མི་རྣམས་བོས་ནས་ཞག་མང་དུ་བཟའ་བ་དང་བཅའ་བ་མང་པོ་སྟེར་སྦྱིན་བགོས་ཏེ། མི་རྣམས་ཆུ་བོ་གངྒཱའི་འགྲམ་དུ་ཁྲུས་ལ་ཕྱིན་ནས། དེའི་ཆུང་མ་ཁྱིམ་སོ་སྲུང་བར་བཞག་པའི་ཚེ། དེ་ལ་བུ་ལོ་གསུམ་པ་ཞིག་ཀྱང་ཡོད་ལ། མ་སྨད་གཉིས་ཀྱི་བསྡད་པ་ན། དེའི་ཚེ་བླ་མ་ཇཝརིཔཱ༼ཙརྦརིཔཱ༽གང་ནས་བྱོན་ཆ་མེད་པར་དེར་བྱོན་ནས། དེ་ལ་བཟའ་བ་བསླངས་པས། བུ་མོ་དེས་གཡོ་ཆུང་བས་གཏམ་དྲང་པོར་སྨྲས་པ་ན། ཇཝརི་པཱས་ཁྱོ་ལ་སོགས་པ་ཀུན་ཁྲོ་ན་ང་ཅན་དུ་ཤོག་ཅིག།

ང་ནགས་ཡ་གིར་མེ་གཏོང་གིན་འདུག་པ་ཡིན་ནོ། །

མི་ཁྲོ་ན་ལེགས་པར་སྡོད་ལ་ང་ལ་བཟའ་བ་དང་བཅའ་བ་སྦྱིན་དགོས་གསུངས་པས། དེས་ཀྱང་བླ་མའི་གཏམ་ལ་ཉན། དེ་གནས་སུ་ལོག། བུ་མོ་སེམས་བདེ་བར་བསྡད། དེར་མི་འགའ་འོངས་པ་ན་སྒྱུག་མོ་འོངས་ནས། ཟ་མ་ལུས་འཕྲོ་ཅན་དུ་བྱས་པ་མཐོང་ནས། དེ་ལ་འབར་བས་དེ་བུ་ཁུར་ནས་རྣལ་འབྱོར་ཅན་དུ་བྲོས་ནས་ཕྱིན་ཏེ་དེ་དེར་སླེབས་པ་ན། ཇཝརི་༼ཙརྦརི༽པས། ལེགས་སོ་གསུངས་ནས་སྔགས་ཆུ་གཏོར་བས་མ་སྨད་གཉིས་རང་འབྱུང་རྡོ་རྗེའི་སྐུར་སོང་སྟེ། ཟས་ལ་སོགས་པ་གང་ཡང་མི་དགོས་པར་གྱུར་ཏོ། །དུས་དེར་ཁྱིམ་དུ་དེའི་ཁྱོ་ཡོང་ནས་དྲིས་པས་གར་སོང་ཆ་མེད་པར་སོང་ངོ་ཟེར་རོ།། དེས་ཀུན་ལ་དྲིས་པས་ཐོས་ཏེ་བསྙེགས་ནས་འོངས་པས། སྔར་གྱིས་གཏམ་བཤད་དོ། །དེ་ལ་ཡང་སྔགས་ཆུ་བཏབ་པས་སྔར་བཞིན་སོང་སྟེ། དེ་གསུམ་སྟན་གཅིག་ལ་གནས་པར་བྱེད་དོ།། 

ཡང་དེའི་ཕྱི་ནས་གཉེན་འདུན་གཅིག་ནས་གཉིས་སུ་འོངས་པ་དེ་དག་ཐམས་ཅད་དེ་བཞིན་དུ་བྱས་ཏེ། སུམ་བརྒྱ་ཙམ་དེར་མཧེ་བེའུ་སྟོར་བ་ལྟར་འོངས་པས་ཐམས་ཅད་དོན་དང་འཕྲད་དོ།། བུ་མོའི་བུ་ལ་ནི་ཡོན་ཏན་འདི་ལྟ་བུ་ཡོད་དེ། འབྲས་བུ་ནས་ནི་མཁའ་སྤྱོད་ཀྱི་དངོས་གྲུབ་འོངས་ལ། རྡོ་རྗེ་ནས་གསེར་འགྱུར་གྱི་རྩི་འོང་ཞིང་། འོག་སྒོ་ནས་བཅུད་ལེན་དང་། མིག་ནས་མཁའ་ལ་འགྲོ་བ་སོགས་གྲུབ་ཆེན་བརྒྱད་འབྱུང་ངོ་།།

ཚུལ་དེ་ཕྱོགས་མཚམས་ཐམས་ཅད་དུ་གྲགས་པས། ཅམཔཱཀའི་རྒྱལ་པོ་མ་ཧི་ལ་སོགས་པའི་སྐྱེ་བོ་རྣམས་བལྟར་འོངས་པས། རྒྱལ་པོ་དད་ནས་ཡབ་ཡུམ་གསུམ་ལ་ལྷ་ཁང་གཅིག་དང་། དེའི་ཕྱིར་གཞན་སུམ་བརྒྱ་ལ་ལྷ་ཁང་གཅིག་བྱས་ལ། མིང་དཱུམཔ་ཞེས་བྱ་བ་གྲགས་སོ།།

དེའི་ནང་དུ་རྣམ་རྟོག་ངན་པ་ཡོད་པ་འགྲོར་མི་འདོད་དེ་རྡོ་སྐུ་དེས་རྡུང་བ་ལ་སོགས་པ་བྱེད་དོ། །དེར་སྒྲུབ་གནས་ཆགས་ནས་དུས་ད་ལྟ་ཡང་། ༼ཨབྷཡདཏྟའི་དུས་༽རྣལ་འབྱོར་པ་མང་དུ་ཡོད་དོ་གསུང་ངོ་། །དེ་སྒྲུབ་ཐག་ཤིན་ཏུ་ཉེ་སྟེ། འདི་ནི་འཇིག་རྟེན་པའི་དངོས་གྲུབ་ཡིན་ལ། རྒྱལ་བ་བྱམས་པའི་བསྟན་པའི་བར་དུ་འདུག་ཅིང་དེ་ནས་སེམས་ཅན་གྱི་དོན་བྱེད་དོ།། གུརུཅརྦརིཔཱའི་ལོ་རྒྱུས་རྫོགས་སོ།། །།

༦༥༽གུརུམཎིབྷདྲཱ།

གུརུམནིབྷདྲའམ་རྣལ་འབྱོར་མ་བྷཧུརི་ཞེས་པའི་ལོ་རྒྱུས་ནི། གྲོང་ཁྱེར་ཨགརྩེ་བྱ་བ་ན་ཁྱིམ་བདག་འབྱོར་པ་ཅན་ཞིག་ལ། བུ་མོ་ལོ་བཅུ་གསུམ་མ་གཅིག་ཡོད་པ་དེ་རང་གི་རིགས་དང་འཚམས་པའི་བག་མར་བཏང་ནས། སླར་ཕ་མའི་གམ་དུ་འོངས་ནས་དེ་ན་ཡོད་པ་ན། བླ་མ་ཀུཀུརིཔཱ་བྱོན་ནས་བུ་མོ་ལ་བཟའ་བ་བསླངས་པས། བུ་མོ་ན་རེ། ཉིད་གཟུགས་བྱད་ཕུན་སུམ་ཚོགས་པ་འདི་འདྲ་བ་ཟས་བསོད་སྙོམས་ཀྱིས་འཚོ་ཞིང་། གོས་ཚེམ་བུ་ཅན་གྱིས་ཅི་བྱེད། རང་གི་རིགས་དང་འཚམས་པའི་ཁྱིམ་ཐབ་ཅིག་ལེན་མོད་ཟེར་བས། དེའི་ཞལ་ནས། 

བདག་གི་འཁོར་བས་འཇིགས་ཤིང་སྐྲག་པས་ན།།

ཐར་པ་བདེ་ཆེན་མཆོག་ནི་སྒྲུབ་པར་བྱེད།།

དེ་ཡང་རྟེན་བཟང་འདི་ལ་མ་བསྒྲུབས་ན།།

ཕྱི་ནས་འདི་འདྲ་རྙེད་པར་ག་ལ་འགྱུར།།

དེས་ན་རྟེན་བཟང་ནོར་བུ་རིན་ཆེན་འདི།།

ཁྱིམ་ཐབ་མི་གཙང་ནང་དུ་སྦས་པ་ན།།

དགོས་འདོད་རེ་འཇོམས་སྡུག་བསྔལ་སྣ་ཚོགས་འབྱུང་།།

དེ་ལྟར་རྟོགས་ནས་བདག་གིས་ཁྱིམ་ཐབ་སྤངས།། 

ཞེས་གསུངས་པས། དེ་དད་ནས་བསོད་སྙོམས་གྱ་ནོམ་པ་དྲངས་ནས། །ང་ལ་ཐར་པ་ཐོབ་པའི་ཐབས་ཤིག་ཞུ་ཟེར་བ་ལ། དེས་ངའི་ཁྱིམ་དུར་ཁྲོད་ཡིན་པས་དགོས་ན་དེར་ཤོག་གསུངས་པས། དེ་བྱ་བ་གང་ཡང་མ་དྲན་ཏེ་དགོངས་ཀ་བྲོས་ནས་དེར་སོང་བ་ལ། བླ་མས་བུ་མོ་དེའི་རྒྱུད་སྨིན་པར་མཐོང་ནས་བདེ་མཆོག་དུ་དབང་བསྐུར། བསྐྱེད་རྫོགས་ཟུང་འཇུག་གི་གདམས་པ་གནང་ནས། ཞག་བདུན་དུ་དགོན་པ་དེ་ཉིད་དུ་སྒྲུབ་པ་བྱས། དེ་ནས་ཕ་མ་ཅན་དུ་ཕྱིན་པས། དེ་དག་བརྡེག་པ་དང་། ངན་སྨྲས་ལ་སོགས་པ་བྱེད་པས། བུ་མོས་ཁམས་གསུམ་པོ་དག་ན་ཕ་མར་མ་གྱུར་པ་ནི་མེད་ལ། རིགས་དང་རུས་ཆེ་བས་ཀྱང་འཁོར་བའི་གཏིང་ལས་བཟློག་པ་མེད་པས་ན། བདག་ནི་བླ་མ་བསྟེན་ནས་ཐར་པ་སྒྲུབ་པར་བྱེད་པས་རྒྱོབ་ཅིག་ངས་ལམ་དུ་ཁྱེར་རོ་ཟེར་བས། དེ་རྣམས་བག་ཅིག་དད་ནས་ཅང་མི་ཟེར་བ་ན། དེས་ཀྱང་བླ་མའི་གདམས་ངག་བསྒོམ་ཞིང་། ལས་དང་བྱ་བ་ཐམས་ཅད་བློས་བཏང་ནས་ལོ་གཅིག་ཏུ་བསྡད་པ་ན། སྔར་གྱི་ཁྱོ་དེ་འོངས་ནས་ཁྱེར་བས། 

དེའི་ཁྱིམ་དུ་ཕྱིན་པ་དང་། འཇིག་རྟེན་གྱི་ལས་དང་བྱ་བ་ཐམས་ཅད་ཇི་ལྟ་བར་བྱེད་ཅིང་ཁ་དང་ལུས་ཀྱང་ཐུབ། ངག་སྙན་པ་ལ་སོགས་པ་ཟེར་ཞིང་ཡོད་པ་ན། བུ་ཚ་ཡང་རིམ་པར་བུ་དང་བུ་མོ་གཉིས་སྐྱེས་སོ། །

དེ་ཚོ་ཡང་དེ་ཁོ་ན་འདྲ་བར་ཡོད་པས་རིགས་ཀྱི་བུ་ཚ་འདི་འདྲ་ཟེར་ནས་ཀུན་གྱིས་སྨོན་པར་བྱེད་པའི་ཚེ། བླ་མ་དང་འཕྲད་ནས་ལོ་བཅུ་གཉིས་ལོན་དེ་ནས་ཉིན་གཅིག་ཆུ་འཆུར་ཕྱིན་ནས་ཁྱིམ་དུ་འོངས་པའི་ལམ་དུ་ཤིང་ཞིག་ལ་རྐང་པ་འཐོགས་ནས་རྫ་མ་ཆག་པས། དེ་གར་འདུག་ནས་ཁྱིམ་དུ་ཉི་མ་ཕྱེད་ཀྱི་བར་དུ་མ་འོངས་པ་དང་། ལྟར་ཕྱིན་པ་ན་རྫ་མ་ཆག་པོ་ལ་ལྟས་ནས་འདུག་པས། དེ་ལ་གཏམ་ཅི་སྨྲས་ཀྱང་མི་ཉན་པ་ལྟ་བ་ལ། ཐམས་ཅད་འདི་འདྲེས་གཟུང་ངམ་ཅི། ཟེར་ཞིང་ཉི་མ་རྒས་ལ་ཁད་པ་ན། 

ཐོག་མ་མེད་པའི་སེམས་ཅན་རྣམས།།

ལུས་ཀྱི་རྫ་མ་ཆག་པ་ལ།།

ཁྱིམ་དུ་ལོག་པ་ག་ལ་ཡོད།།

བདག་གི་རྫ་མ་དེ་རིང་ཆག།

ད་ནི་འཁོར་བའི་ཁྱིམ་དུ་ནི།།

མི་ལྡོག་བདེ་བ་ཆེན་པོར་འགྲོ།།

ཨེ་མ་བླ་མ་ངོ་མཚར་ཆེ།།

བདེ་བ་ཐོབ་འདོད་དེ་ལ་བསྟེན།།

ཅེས་གསུངས་ནས་ནམ་མཁའ་ལ་འཕགས་ཏེ། ཞལ་ཉི་ཤུ་རྩ་གཅིག་ན་ཨགརྩེ་ཞེས་པ་རང་གི་ཡུལ་པ་རྣམས་ལ་གདམས་པ་གསུངས་ནས་མཁའ་སྤྱོད་དུ་གཤེགས་སོ།། གུརུམཎིབྷ་དྲཱའི་ལོ་རྒྱུས་རྫོགས་སོ།། །།

༦༦༽གུརུམེཁལཱ།

གུརུམེཁལཱའི་ལོ་རྒྱུས་ནི། ཡུལ་དེཝཱིཀོཊ་ན་ཁྱིམ་བདག་ཅིག་ལ་བུ་མོ་གཉིས་ཡོད་པ་ལ། དེད་དཔོན་ཞིག་ལ་ཡང་བུ་གཉིས་ཡོད་པ་གཉེན་དུ་བྱས་པ་དང་། བུ་མོ་དེ་གཉིས་ལ་ཐམས་ཅད་ཁ་ཟེར་བར་བྱེད་པ་ལ། དེ་གཉིས་ཀྱིས་ངན་པ་བྱས་པ་ནི་ཅི་ཡང་མེད་དོ།། 

དེའི་ཚེ་ནུ་མོ་ན་རེ། རྒྱུ་མཚན་མེད་པ་ལ་ཁ་ཟེར་བ་འདི་འདྲ་ལས་གཞན་དུ་འཁྱམས་དགོས་ཟེར། ཕུ་མོ་ན་རེ། གང་དུ་ཕྱིན་ཀྱང་ཚོགས་མ་བསགས་པས་འདི་དང་ཁྱད་མི་འོང་བས་འདི་རང་དུ་བསྡད་དགོས་ཟེར་བའི་ཚེ་བླ་མ་ཀཧྣཔཱ་བྱ་བ་དེར་བྱོན། དེ་ནི་རྣལ་འབྱོར་ཕོ་མོ་བདུན་བརྒྱས་བསྐོར་བ། མ་རེག་པའི་གདུགས་དབུ་ལ་འཁོར་བ། ཌཱམརུའི་སྒྲ་མ་དཀྲོལ་བར་འཁྲོལ་བ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པར་གྲགས་པས། སྤུན་གཉིས་ཀྱིས་འོ་སྐོལ་གཉིས་ལ་ཡུལ་མི་དང་ཁྱོས་ཀྱང་ཁ་ཟེར་བས། བླ་མ་འདི་ལ་གདམས་པ་ཞུས་ནས་སྒྲུབ་པ་བྱེད་དགོས་བྱས་ནས་དེའི་ཅན་དུ་ཕྱིན་ནས། སྔར་གྱི་ལོ་རྒྱུས་བསྙད་ཅིང་གདམས་པ་ཞུས་པས། དེས་ཀྱང་གནང་སྟེ། དབང་བསྐུར་ནས་ལྟ་བ་སྒོམ་པ་སྤྱོད་པ་འབྲས་བུ་ཟུང་འཇུག་ཕག་མོའི་གདམས་པ་གནང་ངོ་།།

དེ་གཉིས་ཀྱིས་ཀྱང་བརྩོན་པས་བསྒྲུབས་པས་ལོ་བཅུ་གཉིས་ནས་གྲུབ་པ་ཐོབ་སྟེ། བླ་མ་ཅན་དུ་ཕྱིན་ནས་ཕྱག་དང་མཆོད་པ་བྱས། བཀའ་དྲིན་གྱིས་ཁྱབ་པའི་གཏམ་བཏང་བས། བླ་མས་ཁྱེད་གང་པ་ཡིན། ངས་མ་ཤེས་གསུངས་པས། སྔར་གྱི་ལོ་རྒྱུས་བསྙད་དོ། །འོ་ན་ང་ལ་ཡོན་འབུལ་དགོས་གསུངས་པས། དེ་གཉིས་ཀྱིས་བླ་མ་ཅི་བཞེད་པ་འབུལ་ཞུས་པས། འོ་ན་ང་ལ་ཁྱེད་གཉིས་ཀྱི་མགོ་བོ་བྱིན་ཅིག །གསུངས་པས་དེས་ཀྱང་བླ་མ་བཞེད་ན་འབུལ་ཟེར་ནས། དེ་གཉིས་ཀྱི་རང་རང་གི་ཁ་ནས་ཡེ་ཤེས་ཀྱི་རང་གྲི་རྣོ་ངར་དང་ལྡན་པ་རེ་ཕྱུང་ནས་ཡན་ལག་གི་དམ་པ་མགོ་བཅད་ནས་ཕུལ་ཏེ། 

བདག་ཅག་གཉིས་པོ་བླ་མའི་བཀའ་དྲིན་གྱིས།།

བསྐྱེད་རྫོགས་ཟུང་འཇུག་འཁོར་འདས་སྤྲོས་པ་བཅད།།

ལྟ་སྤྱོད་ཟུང་འཇུག་སྤང་བླང་སྤྲོས་པ་བཅད།།

དབྱིངས་རིག་ཟུང་འཇུག་བདག་གཞན་སྤྲོས་པ་བཅད།།

སྤྲོས་མེད་བརྡ་ཡི་ཚུལ་དུ་འདི་འབུལ་ལོ།། 

ཞེས་གསུངས་བཞིན་དབུ་བཅད་དེ་གར་མཛད་པས། ཀཧྣ་་པའི་ཞལ་ནས། 

ཨེ་མ་རྣལ་འབྱོར་ཆེན་མོ་གཉིས།།

ཡོན་ཏན་མཆོག་ཐོབ་དགེ་བ་སྟེ།།

རང་ཉིད་ཞི་བདེ་དམན་པས་ན།།

འགྲོ་བའི་དོན་ཕྱིར་གནས་པར་མཛོད།། 

ཅེས་གསུངས་པས། མགོ་བོ་སླར་གསོས་ཏེ་རྨ་མེད་པར་གྱུར་པས། ཐམས་ཅད་ངོ་མཚར་སྐྱེས་ནས་དབུ་བཅད་མ་སྤུན་གཉིས་སུ་གྲགས།

ཀནྷཔཱའི་ཞབས་འབྲིང་བྱས་ནས་ཕྱག་རྒྱ་ཆེན་པོའི་དངོས་གྲུབ་ཐོབ། ལོ་མང་དུ་འགྲོ་དོན་མཛད་ནས་རྟོགས་པ་བརྗོད་པ་ལ་སོགས་པ་མཛད། དེ་ནས་མཁའ་སྤྱོད་དུ་གཤེགས་སོ།། ཕུ་མོ་སྟེ་གུརུམེཁལའི་ལོ་རྫོགས་སོ།། །།

༦༧༽གུརུཀནཁལཱ།

 གུརུཀནཁལའི་ལོ་རྒྱུས་ནི། གྲུབ་ཆེན་ཀནྷ་པཱ་སྟེ་ནག་པོ་སྤྱོད་པའི་ཞབས་ཀྱིས་རྗེས་སུ་བཟུང་བ་བརྗོད་མ་ཐག་པའི་དབུ་བཅད་མ་སྤུན་གཉིས་ཀྱི་ནུ་མོ་དེ་ཡིན་ལ། རྣམ་ཐར་གོང་གི་རྟོགས་ཤིང་། མཚན་རྣལ་འབྱོར་མ་ཀནཁལ་ཞེས་གྲགས་སོ།། གུརུཀནཁལའི་ལོ་རྒྱུས་རྫོགས་སོ།། །།

༦༨༽གུརུ་ཀལཀལ། 

གུརུཀལཀལའི་ལོ་རྒྱུས་ནི། དེ་ཡང་ཀུ་ཅོ་ཅན་ཏེ། གྲོང་ཁྱེར་བྷརལེར་ན་གང་ཟག་དམངས་རིགས་ཤིག་སྔོན་ལས་ཀྱི་དབང་གིས་ཤིན་ཏུ་ཡང་ཀུ་ཅོ་ཆེ་ནས་གྲོང་ཁྱེར་གྱི་མི་ཀུན་སུན་ཏེ། བསྐྲད་ནས་བཏང་བ་དང་། དེ་སྐྱོ་བ་སྐྱེས་ནས་མཐར་གྱིས་དུར་ཁྲོད་དུ་ཕྱིན་ནས་སེམས་ཁོང་དུ་ཆུད་ཅིང་འདུག་པའི་ཚེ། རྣལ་འབྱོར་པ་ཞིག་དེར་བྱོན་ནས། ཁྱོད་དུར་ཁྲོད་དུ་ཅིའི་ཆེད་དུ་འདུག། ཅེས་དྲིས་པས། དེས་སྔར་གྱི་ལོ་རྒྱུས་བདེན་པར་སྨྲས་པ་དང་། རྣལ་འབྱོར་པས་དེ་ལ་ཁྱོད་མི་སྐྱོ་བ་དང་། འཁོར་བའི་སྡུག་བསྔལ་ལས་ཐར་བའི་ཐབས་མི་དགོས་སམ་བྱས་པས། དེས་ཅིས་ཀྱང་དགོས་ཞུས་པས། དེ་ལ་ཕྱག་དང་མཆོད་པ་བྱེད་དུ་བཅུག་ནས། གསང་བ་འདུས་པ་དབང་བསྐུར་ཏེ་སྣང་བ་རང་གྲོལ་གྱི་གདམས་པ་འདི་གནང་ངོ་།།

སྒྲ་ཙམ་ཉིད་དུ་རང་དང་གཞན་གྱི་སྒྲ།།

ངོ་བོ་གཅིག་ལ་ཐ་དད་མེད་པར་སྒོམས།།

དེ་ནས་རང་སྒྲ་ནམ་མཁའི་དབྱིངས་ནས་ནི།།

འབྲུག་སྒྲ་ལྟར་གྲགས་མེ་ཏོག་ཆར་འབབ་སྒོམས།།

ཞེས་གསུངས་པས། དེས་ཀྱང་འབད་ནས་བསྒོམས་པས། གཞན་ཁྲོ་བ་ལ་སོགས་པའི་སྒྲ་སྒྲ་རང་གིས་རང་སྒྲའི་ནང་དུ་སྟོར་ལ། རང་སྒྲ་དེ་ཡང་མེ་ཏོག་ཆར་འབབ་པའི་ནང་དུ་སྟོར། མེ་ཏོག་གི་རྟོག་པ་ནམ་མཁའི་དབྱིངས་སུ་སྟོར་ནས། སྣང་བ་ཐམས་ཅད་ཕྱག་རྒྱ་ཆེན་པོར་ཤར་ཏེ། སྣང་བ་རང་གྲོལ་དུ་སོང་ནས་གྲུབ་པ་ཐོབ། ཕྱོགས་ཐམས་ཅད་དུ་བླ་མ་ཀུ་ཅོ་ཅན་བྱ་བར་གྲགས།

མཐར་གདུལ་བྱའི་དོན་མང་དུ་བྱས་ནས་རྟོགས་པ་བརྗོད་པ་ལ་སོགས་པ་གསུངས་ཏེ། འཁོར་སུམ་བརྒྱ་དང་བཅས་པ་མཁའ་སྤྱོད་དུ་གཤེགས་སོ།། གུརུཀལཀལའི་ལོ་རྒྱུས་རྫོགས་སོ།། །།

༦༩༽གུརུཀནྟལི།

གུརུཀནྟལིའི་ལོ་རྒྱུས་ནི། ཀནྟལི་སྟེ་ཚེམ་བུ་པ་བྱ་བ་ཡིན་ལ། ཡུལ་མ་ཎི་དྷར་ཞེས་བྱ་བར་ཕྱག་དར་བའི་གང་ཟག་ཅིག་འབྱོར་པ་དང་ལོངས་སྤྱོད་ཀྱིས་ཕོངས་ནས་གོས་ཚེམ་བུ་བྱེད་ཅིང་སྦྱངས་པ་ན། དུས་གཅིག་གི་ཚེ་ཚེམ་བུ་བྱེད་པའི་ཁབ་ལག་པ་ལ་ཟུག་སྟེ་ཁྲག་བྱུང་ནས་ཟུག་ཀྱང་ཆེ་བས་མ་བཟོད་ནས་ཕྱོགས་གཅིག་ཏུ་འདྲེ་ལྡོག་བྱེད་པ་ན། མཁའ་འགྲོ་མ་བཻཏལཱི་བུད་མེད་ཅིག་ཏུ་སྤྲུལ་ཏེ་དེའི་གམ་དུ་བྱོན་ནས། ཁྱོད་ཅི་བྱེད་ཅིང་འདུག་གསུངས་པས། དེར་སྔར་གྱི་གཏམ་ལེགས་པར་བཏང་བས། དེས་གསུངས་པས། འདི་བས་སྐྱེ་བ་སྔ་མར་ཡང་སྡུག་བསྔལ་བ་ཆེན་པོ་མྱོང་ལ། ད་དུང་སྐྱེ་བ་ཕྱི་མར་ཡང་དང་ཡང་དུ་འདི་བས་ལྷག་པའི་སྡུག་བསྔལ་ཉམས་སུ་མྱོང་བས་འཁོར་བ་འདི་སྡུག་བསྔལ་གྱི་རང་བཞིན་ལས་མ་འདས་པ་ཡིན་ནོ།། 

ཞེས་གསུངས་པས། དེ་ན་རེ། དེ་ལས་ཐར་པའི་ཐབས་ཤིག་ཞུ་ཟེར་བ་ལ། མཁའ་འགྲོ་མ་དེས་ཀྱང་ཁྱོད་ཀྱིས་སྒྲུབ་ནུས་སམ། གསུངས་པས། དེས་ཅིས་ཏེ་མི་ནུས་ཟེར། དེ་ནས་དེར་དགྱེས་པ་རྡོ་རྗེར་དབང་བསྐུར། ཚད་མེད་པ་དང་། བླ་མའི་རྣལ་འབྱོར་དང་། བསྐྱེད་རིམ་གྱི་རྣལ་འབྱོར་གནང་སྟེ། བསྒོམས་པས། དེ་ཚེམ་བུ་ལ་རྟོག་པ་སོང་བ་ན་རྟོག་པ་ལམ་ཁྱེར་གྱི་གདམས་པ་འདི་གནང་ངོ་།། 

སྟོང་ཉིད་བར་སྣང་ཕྱག་དར་ཁྲོད།།

དྲན་དང་རིག་པའི་ཁབ་སྐུད་ཀྱིས།།

གོས་དག་བཙེམས་པ་སྙིང་རྗེའི་ཁབ།།

སྲིད་གསུམ་སེམས་ཅན་ཁྱབ་པར་སྒོམས།། 

ཞེས་གསུངས་པས། དེས་ཀྱང་དེ་བཞིན་དུ་བསྒོམས་པས་ཆོས་ཐམས་ཅད་སྟོང་པར་རྟོགས་ནས་དེ་ལྟར་མ་རྟོགས་པའི་སེམས་ཅན་ལ་ཐུགས་རྗེ་ཆེན་པོ་སྐྱེས་ནས། དེ་གཉིས་ཟུང་དུ་འཇུག་པའི་མཧཱམུདྲའི་དངོས་གྲུབ་ཐོབ། ཕྱོགས་ཐམས་ཅད་དུ་བླ་མ་ཀནྟལིཔཱ་ཞེས་གྲགས། འགྲོ་བའི་དོན་མང་དུ་མཛད། རྟོགས་པ་བརྗོད་པ་ལ་སོགས་པ་གསུངས་ནས་མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀནྟལིའི་ལོ་རྒྱུས་རྫོགས་སོ།། །།

༧༠༽གུརུདྷཧུལི།

གུརུདྷཧུལིའི་ལོ་རྒྱུས་ནི། ཡུལ་དྷོཀར་བྱ་བར་དམངས་རིགས་ཀྱི་གང་ཟག་ཅིག་རྩྭའི་ཐག་པ་བྱས་ནས་འཚོ་བའི་ཆེད་དུ་བཙོངས་པ་ན། དུས་གཅིག་གི་ཚེ་དེས་ཐག་པ་བསྒྲིལ་དྲག་པས་ལག་པ་ལ་ཆུ་འབུར་དྲག་པོ་བྱུང་སྟེ། ཟུག་རྔུ་ཆེན་པོ་བྱུང་བས། དེ་ངུ་ཡིན་ཕྱོགས་གཅིག་ཏུ་བསྡད་པ་ན། རྣལ་འབྱོར་པ་ཞིག་བྱོན་ནས་དེ་ལ་ཅི་ཉེས། གསུངས་པས། དེས་ཀྱང་གཏམ་དྲང་པོར་བཏང་བས། སླར་རྣལ་འབྱོར་པ་དེས་གསུངས་པ་ཁྱོད་ད་ལྟ་སྡུག་བསྔལ་འདི་ཙམ་ཡང་མི་བཟོད་པར་འདུག་ན། ཕྱི་མ་ངན་སོང་དུ་སྐྱེས་ཙ་ན་ཙི་ཙུག་བྱེད་པ་ཡིན་གསུངས་པས། དེ་ན་རེ། བླ་མ་དེ་ལས་ཐར་བའི་ཐབས་ཤིག་ཞུ་ཟེར་བས། རྣལ་འབྱོར་པས་དེ་ལ་དང་པོ་བྱིན་རླབས་འཕོ་བའི་དབང་བསྐུར་བྱས་ནས། རྟོག་པ་ལམ་ཁྱེར་གྱི་གདམས་པ་འདི་གསུངས་སོ།། 

སྣང་བ་གོམས་པའི་ཀུ་ཤ་དང་།།

ཀུན་བཏགས་ཕར་སྣང་ཉིད་གནས་གཉིས།།

གདོད་ནས་མ་གྲུབ་ངོ་བོར་ནི།།

ནུས་པ་རྒྱུན་མི་ཆད་པར་སྒོམས།།

ཞེས་གསུངས། དེས་ཀྱང་དེ་ལྟར་གསུངས་པའི་དོན་བརྩོན་འགྲུས་ཀྱི་ལོ་བཅུ་གཉིས་སུ་བསྒོམས་པས། ཀུན་བཏགས་གཞི་མེད། གཞན་དབང་རྟེན་འབྲེལ། ཡོངས་གྲུབ་ཆོས་ཀྱི་དབྱིངས་ཀྱི་ངོ་བོར་རོ་གཅིག་ཏུ་རྟོགས་ནས་གྲུབ་པ་ཐོབ། ཕྱོགས་ཐམས་ཅད་དུ་རྣལ་འབྱོར་པ་དྷཧུལིཔཱ་ཞེས་གྲགས་ཤིང་། ལོ་བདུན་བརྒྱའི་བར་དུ་རྒྱ་གར་མཐའ་དབུས་རྣམས་སུ་འགྲོ་དོན་མང་དུ་མཛད་ནས་རྟོགས་པ་བརྗོད་པ་ཡང་གསུངས་ཏེ། འཁོར་ལྔ་བརྒྱ་དང་བཅས་པ་མཁའ་སྤྱོད་དུ་གཤེགས་སོ།། གུརུདྷཧུལིའི་ལོ་རྒྱུས་རྫོགས་སོ།། །།

༧༡༽གུརུཨུདྷིལི་པཱ།

 གུརུཨུདྷིལི་པཱའི་ལོ་རྒྱུས་ནི། ཨུདྷིལི་སྟེ་འཕུར་བ་བྱ་བ་ཡིན་ལ། དེ་ཡང་ཡུལ་དེཝཱིཀོཊབྱ་བ་ན་རྗེའུ་རིགས་ཀྱི་གང་ཟག་ཅིག་སྔར་གྱི་སྦྱིན་པའི་འབྲས་བུས་འབྱོར་པ་རྒྱ་ཆེ་ཞིང་། རང་ཉིད་ཁང་བཟང་གི་ནང་ན་འདོད་པའི་ཡོན་ཏན་ལྔ་ལ་ལོངས་སྤྱོད་ཅིང་གནས་པའི་ཚེ། ནམ་མཁའ་ལ་སྤྲིན་ཁ་དོག་ལྔ་འདུས་ཏེ་སྤྲིན་ལས་སྲོག་ཆགས་སྣ་ཚོགས་ཀྱི་གཟུགས་འདྲ་བ་མཐོང་ནས་དེ་ལ་བལྟས་པས། བྱ་ངང་པ་ནམ་མཁའ་ལ་འཕུར་བ་མཐོང་ནས། དེའི་བསམ་པ་ལ་ང་ཡང་འཕུར་ནུས་ན་རེ་དགའ་སྙམ་ནས་བྱ་བ་གང་ཡང་མ་དྲན་པའི་དུས་སུ་བླ་མ་ཀཎརི་པཱ་དེར་བྱོན་ནས་བསོད་སྙོམས་མཛད་པས། དེ་ན་རེ། རྣལ་འབྱོར་པ་བསོད་སྙོམས་འདྲེན་ལགས་ཀྱི་ཉིད་ལ་ནམ་མཁའ་ལ་འཕུར་བའི་ཐབས་མངའ་ན་ཞུ་ཟེར་ནས། བཞེས་ཆབ་གྱ་ནོམ་པ་དྲངས་ནས་ཕྱག་བཙལ་ཡོན་ཕུལ་བས། དེས་དེ་ང་ལ་ཡོད་ཀྱི་གསུངས་པས། རྡོ་རྗེ་གདན་བཞིར་དབང་བསྐུར་ནས། གདམས་ངག་ཏུ་གནས་ཆེན་ཉི་ཤུ་རྩ་བཞི་ན་སྨན་ཉི་ཤུ་རྩ་བཞི་ཡོད་པ་དེར་སོང་ལ་ཊཱཀི་མ་རེ་རེའི་བཟླས་པ་ཁྲི་ཚོ་རེ་ཟློ་ཡིན་སྨན་རེ་འཁྱེར་ཤོག་གསུངས་ནས་བཏང་བས། དེ་ན་རེ། དེ་དག་ཚང་བ་དང་ཇི་ལྟར་བྱེད་པ་ཡིན། ཟེར་བ་ལ། དེ་དང་པོར་ཟངས་ཀྱི་སྣོད་དུ་ཆུག། དེ་ནས་དངུལ། དེ་ནས་གསེར་གྱི་སྣོད་དུ་ཆུག་ཅིག་ནམ་མཁའ་ལ་འགྲོ་བར་ནུས་སོ་གསུངས་པས། དེས་ཀྱང་ལོ་བཅུ་གཉིས་ནས་སྨན་ཚང་བ་དང་། དེ་ལྟར་བྱས་པས་ནམ་མཁའ་ལ་འཕུར་བས་མིང་ཡང་ཨུདྷལི་ཞེས་བྱ་བར་ཕྱོགས་ཐམས་ཅད་དུ་གྲགས་ཤིང་། རྟོགས་པ་བརྗོད་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། །།གུརུཨཊིལིའི་༼ཨུདྷི་ལིའི་༽ལོ་རྒྱུས་རྫོགས་སོ།། །།

༧༢༽གུརུཀཔཱལ།

གུརུཀཔཱལའི་ལོ་རྒྱུས་ནི། ཀཔཱལ་སྟེ་ཐོད་པ་ཅན་ནོ། །དེ་ཡང་ཡུལ་རཱཇཔུརི་བྱ་བར་དམངས་རིགས་ལས་ཀྱི་འཚོ་བ་ཞིག་ལ་བུ་ཚ་ལྔ་ཡོད་པ་ལ། སྔོན་ལས་ཀྱི་དེའི་ཆུང་མ་ཤི་ནས་རོ་དུར་ཁྲོད་དུ་བསྐྱལ་པ། དེས་དེ་ཉིད་དུ་ངུ་ཡིན་བསྡད་པ་ན། ཡང་བུ་ཚ་ཀུན་ཀྱང་ཤི་ནས་མིས་དེ་ལ་སྐད་བཏང་བས། དེ་ཀུན་གྱི་རོ་དེར་བསྐྱེལ་ནས་ཡང་ངུ་ཡིན་བསྡད་པ་ན། རྣལ་འབྱོར་པ་ནག་པོ་སྤྱོད་པ་དེར་བྱོན་ནས། ཁྱོད་འདི་ན་ཅི་བྱེད་ཅིང་འདུག་གསུངས་པས། དེ་ན་རེ། རྣལ་འབྱོར་པ། བདག་ཁྱིམ་ཐབ་དང་བུ་ཚ་ཀུན་བྲལ་བའི་མྱ་ངན་གྱིས་ཡིད་གདུངས་ནས་རོ་འདི་རྣམས་བློས་གཏོང་མ་ནུས་ཏེ་འདིར་འདུག་གི་གདའ། ཞུས་པས། སློབ་དཔོན་ནག་པོ་སྤྱོད་པས་གསུངས་པ། ཁམས་གསུམ་གྱི་སེམས་ཅན་ཐམས་ཅད་འདིའི་རང་བཞིན་ཡིན་ཞིང་། ཁྱོད་གཅིག་པུའི་མ་ཡིན། དེ་ལ་མྱ་ངན་བྱར་མེད་ཅིང་བྱས་ཀྱང་མི་ཕན་པས་དེ་བས་ཆོས་གྱིས། ཁྱོད་འཁོར་བའི་སྐྱེ་འཆི་ལ་མི་འཇིགས་སམ། གསུངས་པས་དེ་ན་རེ། སྐྱེ་འཆི་ལ་འཇིགས་ཏེ། དེ་ལས་ཐར་བའི་ཐབས་མངའ་ན་བདག་ལ་རྩོལ་ཅིག་ཞུས་པས། དེས་དེ་དགྱེས་པ་རྡོ་རྗེའི་དཀྱིལ་འཁོར་དུ་དབང་བསྐུར་ནས། བསྐྱེད་རྫོགས་ཀྱི་གདམས་པ་བྱིན་ཏེ་སྤྱོད་པ་བྱེད་དུ་བཅུག་བུ་ཚའི་རུས་པས་རྒྱན་དྲུག་བྱེད་དུ་བཅུག་ནས་གྱོན། ཆུང་མའི་མགོ་བོ་བཅད་ནས་ཁ་ཕོར་བྱས་ཏེ། ཐོད་པ་ནི་བསྐྱེད་རིམ། ཐོད་པའི་ནང་སྟོང་པར་ཡོད་པ་ནི་རྫོགས་རིམ་ཡིན་པར་བསྟན་པས། དེས་ཀྱང་སྤྱོད་པ་བྱེད་ཅིང་བསྒོམས་པས། ལོ་དགུ་ན་ཟུང་འཇུག་ཏུ་སོང་སྟེ་གྲུབ་པ་ཐོབ། །དེ་ནས་གདུལ་བྱ་རྣམས་ལ། 

ང་ནི་རྣལ་འབྱོར་ཐོད་པ་ཅན།།

ཆོས་རྣམས་རང་བཞིན་བདག་གིས་ནི། །

ཐོད་པ་ལྟ་བུར་རྟོགས་པ་ན།།

ཤུགས་ལས་བྱུང་བའི་སྤྱོད་པར་གནས།།

ཞེས་གསུངས་ནས་ནམ་མཁའ་ལ་གར་བྱས་པས། མི་ཐམས་ཅད་དད་ནས་བླ་མ་ཀཔཱལ་པཱ་ཞེས་གྲགས། རང་གི་རྟོགས་པ་ཡང་བརྗོད། དེ་ནས་ལོ་ལྔ་བརྒྱར་དོན་མཛད། མཐར་འཁོར་དྲུག་བརྒྱ་དང་བཅས་ནས་མཁའ་སྤྱོད་དུ་གཤེགས་སོ།། གུརུཀཔཱལའི་ལོ་རྒྱུས་རྫོགས་སོ།། །།

༧༣༽གུརུཀིརཔཱལ། 

གུརུཀིརཔཱལའི་ལོས་རྒྱུས་ནི། ཀིརཔཱལ་སྟེ་སྣ་ཚོགས་སྤངས་པ་བྱ་བ་ཡིན་ནོ། །གྲོང་ཁྱེར་གྲཧར་ཞེས་བྱ་བར་རྒྱལ་པོའི་གང་ཟག་ཅིག་རྒྱལ་སྲིད་རྒྱས་པ་ལ་ལོངས་སྤྱོད་ཅིང་རྣམ་ཐོས་ཀྱི་སྲས་ལྟ་བུར་ཡོད་པ་ལ། དེས་ཀྱང་མ་ངོམས་ཏེ། ཕྱོགས་གཞན་ན་ཡོད་པའི་རྒྱལ་པོའི་སྲིད་ཀུན་ཀྱང་ཕྲོགས་ནས་ལོངས་སྤྱོད་པར་བྱེད་པ་ན། ཡང་ཡུལ་ཁམས་གཞན་དུ་དམག་དྲངས་པས། དེ་ན་ཡོད་པའི་སྐྱེས་པ་འབྲོས་ནུས་པ་རྣམས་བྲོས་ནས་མེད་པ་ལ། བུད་མེད་ལ་སོགས་པ་རྣམས་བྲོས་མ་ནུས་པས་བརྒྱལ་བ་དང་། ངུ་བ་ལ་སོགས་པ་དཔག་ཏུ་མེད་པ་རྒྱལ་པོས་མཐོང་ནས། དེས་བློན་པོ་ཞིག་ལ་དྲིས་པས་དེས་གཏམ་དྲང་པོར་སྨྲས་པ་ན། རྒྱལ་པོ་སྐྱོ་བ་ཆེན་པོ་སྐྱེས་ཏེ། འདི་འདྲ་བ་སྙིང་རྗེ་བར་འདུག་པས་འདི་རྣམས་ཀྱི་ཕ་ལ་སོགས་པ་ཁུག་ལ་རང་རང་གི་སྲིད་ལ་གནས་པར་གྱིས་ཤིག་གསུངས་པས། བློན་པོས་ཀྱང་དེ་བཞིན་བྱས་ཏེ། སླར་རང་གི་གནས་སུ་བྱོན་ནས། སྦྱིན་གཏོང་གི་དྲིལ་ཆེན་པོ་བསྒྲགས་ཏེ། ཟད་པ་མེད་པའི་སྦྱིན་པ་ཆེན་པོ་བཏང་ནས། ད་ནི་ཆོས་ཤིག་བྱ་དགོས་དགོངས་ནས་ཡོད་པའི་དུས་སུ། རྣལ་འབྱོར་པ་ཞིག་དེར་བྱོན་ནས་བཟའ་བཅའ་བསླངས་པས་དེས་ཀྱང་གྱ་ནོམ་པ་དྲངས། དེས་རྒྱལ་པོ་ལ་ཚད་མེད་པ་བཞི་ལ་སོགས་པའི་ཆོས་བཤད་པས། རྒྱལ་པོ་ན་རེ། ཚེ་འདི་ཉིད་ལ་འཚང་རྒྱ་བའི་ཆོས་ཤིག་ཞུ་ཟེར་བས། དེས་བདེ་མཆོག་ཏུ་དབང་བསྐུར། བསྐྱེད་རྫོགས་གཉིས་ཀྱི་རིམ་པ་བསྒོམ་དུ་བཅུག་པས། སྔར་གྱི་བག་ཆགས་ཀྱི་དབང་དུ་སོང་སྟེ། རྒྱལ་སྲིད་དང་དམག་གི་རྟོག་པས་ལམ་བསྒྲིབས་པ་ན། དེ་རྟོག་པ་རང་གྲོལ་གྱི་གདམས་པ་འདི་གནང་ངོ་། །

ཁམས་གསུམ་པ་ཡི་སེམས་ཅན་རྣམས།།

དམག་ཚོགས་དཔའ་བོས་ཁེངས་པར་སྒོམས།།

མཁའ་དབྱིངས་མ་ལུས་རང་སེམས་ལས།།

བྱུང་བའི་དཔའ་བོ་དཔག་མེད་གཉིས།།

དབྱེར་མེད་གྱུར་ནས་དགྲ་རྣམས་བཅོམ།།

རང་ཉིད་རྒྱལ་པོ་ཆེན་པོ་ཉིད།།

རྒྱལ་ལ་སོགས་པའི་བདེ་ཐོབ་ནས།།

སྲིད་པའི་རྩེ་མོ་བསྒོམ་པར་བྱ།།

ཞེས་གསུངས་དེ་ནས་དེས་ཀྱང་ལོ་བཅུ་གཉིས་སུ་བསྒོམས་པས་ལྟ་བ་རྟོགས་ཏེ་གྲུབ་པ་ཐོབ་ནས་རྒྱལ་པོ་རང་གི་ཕོ་བྲང་འོད་ཀྱིས་ཁྱབ་པས། བཙུན་མོ་ལ་སོགས་པས་གྲུབ་པ་ཐོབ་པར་གོ་ནས་མཆོད་པ་བྱེད་པ་ན། དེས། 

ཚད་མེད་བཞི་ཡི་སེམས་ཅན་ལ།།

ཆགས་པས་འདོད་པ་སྤྱད་པར་བྱ།།

དཔའ་བོ་ཞེ་སྡང་ཆེན་པོ་ཡིས།།

དགྲ་རྣམས་མ་ལུས་བརླག་པར་བྱ།།

ཞེས་གསུངས་པས། བླ་མ་ཀིརཔཱལ་བྱ་བར་གྲགས་ཤིང་། རྟོགས་པ་བརྗོད། དེ་ནས་ལོ་བདུན་བརྒྱར་འགྲོ་དོན་མཛད་དེ། འཁོར་དྲུག་བརྒྱ་དང་བཅས་མཁའ་སྤྱོད་དུ་གཤེགས་སོ། །གུརུཀིརཔཱལའི་ལོ་རྒྱུས་རྫོགས་སོ།། །།

༧༤༽གུརུསཱགར།

 གུརུསཱགརའི་ལོ་རྒྱུས་ནི། ཡུལ་ཀཱཉྩི་ན་རྒྱལ་པོ་ཨིནྡྲ་བྷཱུ་ཏི་ཞེས་བྱ་བ་ཡོད་ལ། དེ་གྲོང་ཁྱེར་འབུམ་ཚོ་བཅུ་བཞི་ལ་དབང་བྱེད་པ་སྟེ། རྒྱལ་པོ་ཆེན་པོ་ཡིན་པ་ལ་སྲས་མེད་ནས་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ལ་གསོལ་བ་བཏབ་པས། དུས་གཅིག་ན་དེའི་ཆུང་མའི་མངལ་དུ་སེམས་ཅན་ཞུགས་པས། བསམ་པ་ཡང་དགེ་བ་ལ་སོགས་པ་བྱུང་ལ། ཟླ་བ་དྲུག་ན་ཉི་ཟླ་ཕྲག་པར་འཆར་བ་དང་། རྒྱ་མཚོ་འཐུང་བ་དང་། རི་རབ་ཟོས་པ་དང་། ཁམས་གསུམ་རྐང་མཐིལ་དུ་མནན་པའི་རྨི་ལམ་བྱུང་བས། དེ་རྒྱལ་པོ་ལ་ཞུས་པས། ངས་མི་ཤེས་པས་མཆོད་གནས་པཎྜིཏ་དང་བྲམ་ཟེ་ལ་དྲི་བར་བྱ་གསུངས་ནས། དེ་དག་ལ་ཆོས་སྟོན་ཡོན་དང་བཅས་པ་ཕུལ་ནས་ཞུས་པས། དེ་དག་གི་བརྟགས་པ་ན་ཆོས་ཀྱི་རྒྱལ་སྲིད་འཛིན་པའི་རྒྱལ་པོ་བྱང་ཆུབ་སེམས་དཔའ་ཞིག་བལྟམ་པར་འདུག་པ་ལ། དེ་ལ་འཇིག་རྟེན་པ་མི་དགའ་བས། དེ་དགའ་བའི་ཕྱིར་འཇིག་རྟེན་གྱི་ཕུན་སུམ་ཚོགས་པའི་འབྱུང་གནས་ཤིག་འཁྲུང་ངོ་བྱས་པས། ཐམས་ཅད་དགའ་བར་གྱུར་ཏོ། །

དེ་ནས་ཟླ་དགུ་ངོ་བཅུ་ཚང་བ་དང་། བལྟམས་པ་ཡང་མཚན་ཕྱེད་ན་བསོད་ནམས་དང་ལས་ལས་གྲུབ་པའི་མཚོ་ཆེན་པོ་ཞིག་གི་པདྨའི་སྟེང་དུ་བཙས་ཏེ། ཡུལ་ཕྱོགས་དེར་འདོད་པའི་ཡོ་བྱད་ཀྱི་ཆར་བབས་པས། སྐྱེ་བོ་དག་ངོ་མཚར་ནས་སུའི་མཐུ་སྙམ་པ་དང་། ཉིན་ཕྱེད་ཙམ་ནས་དེའི་མཐུ་ཡིན་པར་ཤེས་ནས། མཚན་ཡང་མཚོ་སྐྱེས་གཞོན་ནུ་ཞེས་བཏགས། 

དེའི་མཐུས་སྐྱེ་བོ་ཐམས་ཅད་འདོད་པའི་ཡོན་ཏན་དང་ལོངས་སྤྱོད་ལ་སྤྱོད་པ་ན། ཡང་སྲས་གཅིག་བལྟམས་ནས་མཆེད་གཉིས་སུ་སོང་བ་དང་། ཡབ་ཡུམ་གྲོངས་ནས་རྒྱལ་སྲིད་གཅེན་ལ་ཕུལ་བས། ཁོང་གི་གཅུང་ལ་གཏད་དེ། དགེ་སློང་མཛད་ནས། ཤྲཱིདྷཱནར་བྱོན་པའི་ཚེ། ལམ་ཁར་འཕགས་པ་སྤྱན་རས་གཟིགས་ཀྱིས་དགེ་སློང་ཞིག་ཏུ་སྤྲུལ་ཏེ་མཇལ་བས་ངོ་མ་ཤེས་པ་ལ། སྤྲུལ་པ་དེས་དགེ་སློང་༼མཚོ་སྐྱེས་༽ལ་གཏམ་དྲིས་པར་བདེན་པར་གསུངས་པས། སླར་དེ་ལ་ལོངས་སྐུ་དང་འཕྲད་པར་འདོད་དམ། གསུངས་པས། དགེ་སློང་གིས་༼མཚོ་སྐྱེས་༽ང་ལ་ཐབས་མེད་ན་འདོད་པ་དེ་ཀ་འདོད་དེ་གསུངས་པས། དེས་འོ་ན་ང་ལ་བླ་མར་འཛིན་ཅིང་གུས་ན་ཐབས་ཡོད་དོ། །གསུངས་པས། དེས་ཕྱག་ལ་སོགས་པ་བྱས་ཏེ་ཞུས་པས། དེས་དགྱེས་རྡོར་གྱི་ལྷ་ཚོགས་སུ་དངོས་སུ་སྤྲུལ་ནས་ཞལ་བསྟན་ཏེ་དབང་བསྐུར་གདམས་པ་གནང་ནས་འཕགས་པ་དེ་ཉིད་དུ་མི་སྣང་བར་གྱུར་ཏོ། །

དེས་ཀྱང་ཤྲཱིདྷཱནར་བྱོན་ནས་སྒྲུབ་པ་བྱེད་པའི་ཚེ། རྣལ་འབྱོར་པ་འདྲ་བ་ཞིག་བྱོན་ནས་དེ་ལ་ཁྱོད་འདིར་ཅི་བྱེད་པ་ཡིན་ཟེར་བས། དེས་ཀྱང་དྲང་པོར་གསུངས་པ་དང་། འོ་ན་ང་ཡིས་བསྙེན་བཀུར་བྱ་ཡི། གྲུབ་པ་ཐོབ་པའི་དུས་སུ་བདག་ལ་གདམས་པ་གནང་དགོས་ཟེར་བས། རུང་གསུངས་ནས་ཕུག་པ་སྟོང་པ་ཞིག་ཏུ་བཞུགས་པ་ན། མི་དེས་གཡོག་བྱས་ནས་ལོ་བཅུ་གཉིས་བསྒྲུབས། དེའི་བར་དུ་མུ་གེ་ཆེན་པོ་བྱུང་ནས་མི་མང་དུ་ཤི་བ་ལ། དེ་བླ་མའི་བར་ཆད་དུ་སོང་དོགས་ནས་གསང་གིན་བླ་མའི་ཟས་ཀྱི་ལྷག་རོ་ཉུང་ངན་གྱིས་འཚོ་བ་ན། ཞལ་གཅིག་ཟས་བསླངས་པས་མ་ཁུགས་ནས་རྒྱལ་པོ་ཞིག་གི་ཁང་པར་ཕྱིན་པས་འབྲས་ཆན་ལྷུང་བཟེད་གང་རྙེད་ནས་དེ་ཁྱེར་ཏེ་འོངས་པ་ན། བཟའ་བ་མ་ཟོས་པས་ཕུག་དེར་འོངས་པས་རླུང་ལངས་ཏེ་ས་ལ་འགྱེལ་ནས་འབྲས་ཆན་ཡང་བོ་ནས་སོང་བས། དགེ་སློང་དེས་དེ་ལ་ཆང་འཐུངས་སམ་ཅི། གསུངས་པས། ཆང་གང་ན་འཐུང་། ལྟོགས་ནས་ཤེད་ཆུང་སྟེ་འགྱེལ་བ་ཡིན་སྨྲས་པས། ཟས་མི་ཁུག་པ་ཅི་ཡིན། གསུངས་པ་ལ། བདག་གིས་བླ་མ་ལ་བར་ཆད་དུ་སོང་དོགས་མ་ཞུས་ཏེ། ལོ་བཅུ་གཉིས་སུ་མུ་གེ་ཆེན་པོ་བྱུང་ནས་སྲོག་ཆགས་མང་པོ་ཡང་ཤི། སེམས་ཅན་རྣམས་སྡུག་བསྔལ་བར་གདའ་ཞུས་པས། སློབ་དཔོན་མཚོ་སྐྱེས་ཀྱིས་གསུངས་ནས་དེ་ཙ་ན་ང་ལ་མི་སྨྲ་བར་གསང་བའི་ལུགས་ཡོད་དམ། མུ་གེ་མི་འོང་བའི་ཐབས་ང་ལ་ཡོད་པ་ལ་ད་འདོངས་ཤིག་གསུངས་ནས། འབྲན་ཆན་རྣམས་བསྡུས་ཏེ་ཆུ་ཁར་བྱོན་ནས་གཏོར་མ་བཏང་། ཀླུ་ཆེན་པོ་བརྒྱད་སྔགས་དང་ཕྱག་རྒྱ་དང་ཏིང་ངེ་འཛིན་གྱིས་གཟིར་བས། དེ་རྣམས་ཀླད་པ་འགེམས་པ་སྙམ་བྱེད་ནས། དེར་འོངས་ཏེ་ལས་ཅི་བགྱི། ཟེར་བ་ལ། འཛམ་བུའི་གླིང་དུ་ཆར་མེད་ནས་སེམས་ཅན་རྣམས་ཤི་བ་ཁྱེད་ཀྱིས་ཉེས་པས། ད་ཡང་ཞག་དང་པོ་ལ་བཟའ་བའི་ཆར་ཕོབ་ཅིག །དེ་བཞིན་དུ་གཉིས་པ་ལ་འབྲུ་དང་། གསུམ་པ་ལ་གནས་མལ་དང་། དེ་ནས་ཞག་གསུམ་དུ་རིན་པོ་ཆེའི་ཆར་ཕོབ་ཅིག །དེ་ལྟར་བྱས་པ་དང་ཆུའི་ཆར་ཕོབ་ཅིག །གསུངས་པས། ཀླུ་རྣམས་ཀྱིས་དེ་བཞིན་དུ་བཀའ་བསྒྲུབས་པས་སེམས་ཅན་རྣམས་སྡུག་བསྔལ་ལས་ཐར་བ་དང་། དེའི་སྙན་པ་ཕྱོགས་ཐམས་ཅད་དུ་ཁྱབ་པར་གྱུར་ཅིང་། འདི་ནི་སློབ་དཔོན་ཆེན་པོ་མཚོ་སྐྱེས་ཀྱི་མཐུ་ཡིན་ནོ། །ཟེར་ཞིང་ཐམས་ཅད་དད་པར་གྱུར་ཏོ། །

དེ་ནས་སྔར་གྱི་གཡོག་ར་མ་༼རཱམ༽ཞེས་པ་ལ་དབང་བསྐུར་ཏེ་གདམས་པ་གནང་བས་འཇིག་རྟེན་པའི་དངོས་གྲུབ་ཐོབ། གདམས་པ་ནི་དགྱེས་རྡོར་གྱི་བསྐྱེད་རྫོགས་ཀྱི་གདམས་པ་གནང་ནས་འགྲོ་བ་སེམས་ཅན་གྱི་དོན་མ་བྱས་པར་མཁའ་སྤྱོད་ལ་མ་འགྲོ་ཞིག །ད་དཔལ་གྱི་རི་ལ་སོང་ལ་འདི་ལྟར་གྱིས། འགྲུབ་པར་འགྱུར་རོ་གསུངས་ནས། བླ་མ་མཁའ་སྤྱོད་ལ་གཤེགས་སོ།།

ར་མས་༼རཱམས་༽ཀྱང་དཔལ་གྱི་རི་ལ་ཉེ་བ་ན་རྒྱལ་པོའི་བུ་མོ་དབང་དུ་བསྡུས་ནས་གཉིས་ཀས་ར་མར་༼རཱམར་༽གཙུག་ལག་ཁང་བཞེངས་པ་ལ་སོགས་པ་བྱས་ཏེ། མཐར་མཁའ་སྤྱོད་དུ་གཤེགས་སོ།། གུརུསཱགརའི་ལོ་རྒྱུས་རྫོགས་སོ།། །།

༧༥༽གུརུསརྦབྷཀྴ།

གུརུསརྦབྷཀྴའི་ལོ་རྒྱུས་ནི། སརྦབྷཀྴསྟེ་ཐམས་ཅད་ཟ་བ་བྱ་བ་ཡིན་ལ། དེ་ཡང་གྲོང་ཁྱེར་ཨབྷིར་བྱ་བ་རྒྱལ་པོ་སེངྒེ་ཟླ་བའི་མངའ་རིས་ཡིན་ལ། དེ་ན་དམངས་རིགས་ཀྱི་གང་ཟག་ཅིག་ཤིན་ཏུ་གྲོད་པ་ཆེ་ནས་ཟས་ཅི་ཐོབ་ཟ་བ་ན། དུས་གཅིག་གི་ཚེ་བཟའ་བ་ཅི་ཡང་མ་རྙེད་ནས་ཕྱོགས་གཅིག་ཏུ་ལྟོ་ཡིད་ལ་བྱེད་ཅིང་གནས་པ་ན། དཔལ་སརཧཔཱ་དེར་བྱོན་ནས་ཁྱོད་འདི་ན་ཅི་བྱེད་ཅིང་འདུག་གསུངས་པས། དེ་ན་རེ། བདག་ཕོ་བའི་མེ་དྲོད་ཆེ་བས་བཟའ་བ་ཅི་ཟོས་ཀྱང་འགྲང་བ་མི་འོང་ལ། ཁྱད་པར་དེ་རིང་བཟའ་བ་ཅི་ཡང་མ་རྙེད་ནས་སྡུག་བསྔལ་བར་གདའ་ཟེར་བས། སརཧས་ཁྱོད་དེ་རིང་གི་ལྟོགས་པ་ཙམ་ཡང་མི་བཟོད་ན་ཡི་དྭགས་སུ་སྐྱེས་ན་ཅི་ཙུག་བྱེད། གསུངས་པས། དེ་ན་རེ། དེ་འདྲ་བ་གང་ན་ཡོད། ཟེར་བས། དེར་ལྟོས་དང་། གསུངས་ནས་ཡི་དྭགས་བསྟན་པས། འདི་འདྲ་བར་སྐྱེ་བའི་རྒྱུ་གང་ལགས། དེའི་རྒྱུ་བསྟན་པས་བླ་མ་འདི་འདྲ་བ་ལས་ཐར་བའི་ཐབས་ཤིག་ཞུ་ཟེར་བས། རྣལ་འབྱོར་པས་དེ་ལ་དང་པོ་དབང་བསྐུར་ནས་བྷུསུཀུའི་འཇུག་པ་བསྟན་པ་ནི། 

གྲོད་པ་ནམ་མཁའ་སྟོང་པ་ལ།།

ཕོ་བའི་མེ་དྲོད་དུས་མེ་འབར།།

སྣང་སྲིད་བཟའ་བཏུང་གཉིས་ཡིན་ཏེ།།

ཟོས་པས་ཐམས་ཅད་ཟད་པར་སྒོམས།།

ཞེས་གསུངས་ཏེ། དེས་ཀྱང་གུས་པས་བསྒོམས་པས། ཉི་ཟླ་གཉིས་ཀྱང་འཇིགས་ནས་རི་རབ་ཀྱི་ཁོང་སེང་དུ་ཡིབ་པས། མི་རྣམས་མགྲིན་གཅིག་ཏུ། སྣང་བ་ནུབ་པར་གྱུར་ཀྱེ་མ་ཟེར་བས། བྲམ་ཟེ་ཆེན་པོ་ལ་ཊཱཀིམཱ་ཀུན་གྱིས་བསྐུལ་བས་དེ་དེར་བྱོན་ཏེ། དེ་ལ་ད་ཐམས་ཅད་ཟོས་ཟིན་པས་མེད་པར་སྒོམས་ཤིག་གསུངས་པས། དེ་བཞིན་དུ་བྱས་པས་སྣང་སྟོང་ཟུང་འཇུག་ཏུ་རྟོགས་ཏེ། གྲུབ་པ་ཐོབ་ནས་ཉི་ཟླ་ཡང་བྱུང་བས་ཐམས་ཅད་དགའ་བར་གྱུར་ཏོ། །དེར་ལོ་བཅོ་ལྔ་ནས་གྲུབ་པ་བརྙེས་ཤིང་། རྟོགས་པར་བརྗོད་དེ་འགྲོ་དོན་ལོ་དྲུག་བརྒྱར་མཛད། མཐར་འཁོར་སྟོང་དང་བཅས་ཏེ་མཁའ་སྤྱོད་དུ་གཤེགས་སོ།། གུརུསརྦབྷཀྵའི་ལོ་རྒྱུས་རྫོགས་སོ།། །།

༧༦༽གུརུནཱགབོདྷི།

གུརུནཱགབོདྷིའི་ལོ་རྒྱུས་ནི། འཕགས་པ་ཀླུ་སྒྲུབ་སུཝརྣའི་དགོན་པ་ན་བཞུགས་པའི་ཚེ། རྒྱ་གར་ནུབ་ཕྱོགས་ནས་བྲམ་ཟེ་ཞིག་རྐུ་ཡིན་མཐར་གྱིས་ཡོང་སྟེ། བླ་མ་དེའི་སྒོ་ནས་བལྟས་པས། གསེར་གྱི་སྣོད་ཀྱི་ནང་དུ་བཟའ་བ་གྱ་ནོམ་པ་གསོལ་བ་མཐོང་སྟེ། དེ་ལ་བརྐུ་བའི་བསམ་པ་ཤར་བ་བླ་མས་ཐུགས་ཀྱིས་མཁྱེན་ཏེ། གསེར་གྱི་སྣོད་དེ་ཐང་ལ་བསྐྱུར་བས་འདི་ལྟར་མཛད་པ་ཅི་སྙམ་པ་ན། དེས་དེའི་ནང་དུ་ཕྱིན་ནས་བདག་བརྐུ་སྙམ་པ་ལ། བརྐུ་མི་དགོས་པར་བདག་ཅན་དུ་བསྐྱུར་བ་འདི་ཅི་ལགས། ཞུས་པས། བླ་མས་ང་ནི་འཕགས་པ་ཀླུ་སྒྲུབ་བྱ་བ་ཡིན། ངའི་ནོར་ལ་སོགས་པ་ནི་གཞན་དོན་ཡིན་པས། ཁྱོད་རྐུ་མི་དགོས་ཀྱི་བཟའ་བ་དང་བཅའ་བ་འདི་དག་ཟོ་ལ་སྡོད་ཅིག །འགྲོ་བའི་དུས་སུ་ནོར་ཅི་དགོས་པ་བསྐུར་ལ་བཏང་གི་གསུངས་པས་དེས་དེའི་མཛད་སྤྱོད་ལ་དད་དེ་ཆོས་ཞུས་པས། དེ་གསང་བ་འདུས་པར་དབང་བསྐུར་ནས་མངོན་ཞེན་རང་གྲོལ་གྱི་གདམས་པ་འདི་གནང་ངོ་། །

བྱ་བ་ཐམས་ཅད་བློས་ཐོང་ལ།།

སྤྱི་བོར་ཀུན་བརྟགས་རྭ་མཆོག་ནི།།

རིན་ཆེན་མར་གད་རང་བཞིན་ཅན།།

གསལ་འོད་འཕྲོ་བ་བསྒོམས་པར་བྱ།།

ཞེས་གསུངས། དེ་ནས་གནས་ཁང་གི་མཐའ་མར་རིན་པོ་ཆེས་གང་བར་བྱས་ནས་བཞག་པས་དེ་དགའ་སྟེ་གདམས་པ་དེ་བསྒོམས་པས། ལོ་བཅུ་གཉིས་ནས་རྭ་དེ་ཆེར་སོང་ནས་གཡོ་འགུལ་དུ་བྱེད་པའི་ཚེ་དེ་ཐུག་ན་སྡུག་བསྔལ་བ་ན། བླ་མ་དེ། དེར་བྱོན་ནས། ཁམས་བདེའམ། གསུངས་པས། དེས་མ་བདེ་བའི་གཏམ་ཞུས་པས་དེ་མཁྱེན་ནས་ཡང་གདམས་པ་གསུངས་པ་ནི། 

ཀུན་བརྟགས་བསྒོམས་པའི་རྭ་ཆེན་གྱིས།།

བདེ་བ་ཐམས་ཅད་འཇོམས་པ་ལྟར།།

དེ་བཞིན་དངོས་པོར་མངོན་ཞེན་པས།།

སེམས་ཅན་ཐམས་ཅད་སྡུག་བསྔལ་ལོ།།

ཆོས་རྣམས་ཡང་དག་ཡོད་མིན་ཏེ།།

མཁའ་ལ་སྤྲིན་ནི་འཁྲིག་པ་བཞིན།།

སྐྱེ་བ་གནས་པ་འགག་པ་གསུམ།།

གང་ལ་གང་གི་ཕན་གནོད་འབྱུང་།།

དེ་བཞིན་སེམས་ཉིད་དག་པ་ལ།།

ཅི་ཞིག་ཕན་ཞིང་ཅི་ཞིག་གནོད།།

གདོད་ནས་མ་གྲུབ་གཟུང་འཛིན་ཏེ།།

རང་རང་ངོ་བོ་ཉིད་ཀྱིས་སྟོང་།།

ཞེས་གསུངས་པས། དེས་གནས་ལུགས་སྟོང་པ་ཉིད་རྟོགས་ཏེ། དེ་ལ་ཟླ་དྲུག་མཉམ་པར་བཞག་པས་འཁོར་འདས་དབྱེར་མེད་དུ་རྟོགས་ནས་གྲུབ་པ་ཐོབ་སྟེ། མཚན་ཡང་ནཱ་ག་བོ་དྷི་ཞེས་བྱ་བར་གྲགས། བླ་མའི་གདུང་འཚོབ་ཏུ་བསྐོས་ནས་སེམས་ཅན་ལ་གྲུབ་པ་ཆེན་པོ་བརྒྱད་དེ། 

ས་འོག་འགྲོ་དང་རལ་གྲི་དང་།།

ཚར་བཅད་ཕན་འདོགས་གཉིས་ཀ་དང་།།

རིལ་བུ་མིག་སྨན་གཏེར་རྣམས་དང་།།

རྐང་མགྱོགས་དག་དང་བཅུད་ཀྱིས་ལེན།།

བརྒྱད་པོ་གང་འདོད་བྱིན་ཅིག་གསུངས།། 

དེ་ལྟར་བྱམས་པའི་བསྟན་པའི་བར་དཔལ་གྱི་རི་དེ་ཉིད་དུ་གནས་ནས་འགྲོ་དོན་གྱིས་ཤིག་གསུངས་ནས་བཞག་པ་ཡིན་ནོ། །ལོ་ཉི་ཁྲིར་བཞུགས་སྐད་དོ། །གུརུནཱགབོདྷིའི་ལོ་རྒྱུས་རྫོགས་སོ།། །།

༧༧༽གུརུདཱརིཀཱཔཱ།

གུརུདཱརིཀཱཔའི་ལོ་རྒྱུས་ནི། ཡུལ་སཱལིཔུཏྲབྱ་བ་ན་རྒྱལ་པོ་ཨིན་དྲ་པཱ་ལ་བྱ་བ་གནས་པ་ལ། དེ་ལིངས་ལ་སོང་ནས་ཉི་མ་དྲོས་པ་ན་ཚོང་འདུས་སུ་འོངས་པ་ལ་མི་ཀུན་གྱིས་ཕྱག་བྱེད་པའི་ཚེ་ལཱུཧིཔཱ་དེ་ན་འདུག་པ་རྒྱལ་པོས་མཐོང་བ་དང་རྒྱལ་པོས་སྨྲས་པ། ཁྱོད་འདྲ་བའི་སྐྱེས་བུ་བྱད་བཞིན་བཟང་ཞིང་ལྟ་ན་སྡུག་པ་ལ། འདི་འདྲ་བའི་ཉའི་རྒྱུ་ལྟོ་མི་གཙང་བ་མ་ཟོ་ཞིག །ཁྱོད་ལ་བཟའ་བ་ཅི་དགོས་བདག་གིས་སྟེར་ཞིང་། གཞན་གང་དགོས་པ་ཡང་སྟེར། རྒྱལ་སྲིད་དགོས་ཀྱང་སྟེར་རོ། །ཟེར་བས། དེས་སྨྲས་པ་མི་འཆི་མི་རྒས་པའི་ཐབས་ཡོད་ན་དེ་ཀུན་བདག་ལ་དགོས་སུ་རུང་ཟེར་རོ།།

རྒྱལ་པོས་འོ་ན་བདག་གིས་རྒྱལ་སྲིད་དང་སྲས་མོ་སྦྱིན་བྱས་པས། ལཱུཧིཔས་བདག་མི་དགོས་ཟེར་རོ། །ཅིའི་ཕྱིར་མི་དགོས་བྱས་པས། དེ་ན་རེ། རྒྱལ་སྲིད་ནི་མནོག་ཆུང་ལ་ཉེས་དམིགས་ཆེ་བར་འདུག་པས་ངས་ཀྱང་སྤངས་པ་ཡིན་ཞེས་སྨྲས་པ་དང་། རྒྱལ་པོ་ཨིནདྲཔཱལ་ཡང་རྒྱལ་སྲིད་ལ་སྐྱོ་བ་སྐྱེས་ནས་བྲམ་ཟེའི་རིགས་ཀྱི་བློན་པོ་ལ་སྨྲས་པ། ང་ཡང་འཇིག་རྟེན་འདི་གཙུག་བྱས་ཀྱང་ཚེ་ཕྱིད་པས། ཟོས་པ་དང་གྱོན་པ་ནི་བྱེད་མ་ཡོགས་པར་འདུག་པས་ཆོས་ལ་འགྲོ །རྒྱལ་སྲིད་བུ་ལ་གཏད་པ་མི་ལེགས་སམ། སྨྲས་པས། བློན་པོས་རུང་ཞུས་ནས་སྲས་ལ་རྒྱལ་སྲིད་གཏད་ཏེ། རྒྱལ་བློན་གཉིས་ཀྱིས་དུར་ཁྲོད་དུ་ལཱུཧིཔཱའི་གམ་དུ་ཕྱིན་ནས་སྒོ་བརྡུངས་པ་དང་། སློབ་དཔོན་གྱིས་སུ་ཡིན་སྨྲས་པས། བདག་ཅག་རྒྱལ་བློན་ལགས་སོ་སྨྲས་པ་ན། འོ་ན་ནང་ཤོག་གསུངས་ནས། དེ་གཉིས་ལ་སློབ་དཔོན་གྱིས་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར་ནས། དེ་གཉིས་ཀྱི་ཡོན་དུ་ཁོ་རང་གཉིས་ཕུལ་ལོ། །དེ་ནས་དཔོན་སློབ་གསུམ་ག་གཞན་གྱི་ཡུལ་ཨོ་དེ་ཤར་ཕྱིན་པ་དང་། དེར་དཔོན་སློབ་གསུམ་བསོད་སྙོམས་མཛད་ཅིང་བཞུགས་ལ། དེ་ནས་ཡུལ་བྷིར་པུར་བྱོན་ནས་ཛིནྟ་པུར་གྱིས་གྲོང་ཞེས་ཀྱང་ཟེར་ལ། དེ་ན་གྲོང་ཁྱེར་འབུམ་ཚོ་གསུམ་ཡོད་དེ། དེ་ན་ལྷ་ཁང་ཞིག་ཡོད་ལ་དེའི་མཆོད་པ་བྱེད་པའི་གར་མཁན་མོ་བདུན་བརྒྱ་ཡོད་པའི་གཙོ་མོའི་གམ་དུ་ཕྱིན་ནས། དེའི་སྒོ་རྩ་པ་སུམ་བརྒྱ་ཙམ་ཡོད་པ་ལ་སྨྲས་པ། ཁྱེད་ཅག་གི་ཇོ་མོ་མི་མི་ཉོ་འམ། དེ་དག་གི་ནང་དུ་སྨྲས་པས་བཙུན་པོ་ན་རེ། ཉོ་ལྟར་འདོང་ཟེར་ནས་སྒོར་བྱུང་སྟེ་བལྟས་པས། ཁྱེའུ་ལྟ་ན་སྡུག་པ་ཞིག་མཐོང་ནས། རིན་ཅི་དགོས། ཟེར་རོ། །གསེར་ཏོ་ལ་བརྒྱ་དགོས་བྱས་ཏེ། རྒྱལ་བུ་དེ་ལ་བཙོངས། དེ་ནས་གཙིགས་སུ་མཚན་ལ་མི་དང་ལྷན་ཅིག་ཏུ་ཉལ་དུ་མ་གཞུག་པར་གཅིག་པོར་གཞོག་ལ། ཁོའི་རིན་འཁོར་བ་དང་ཐོང་ཞིག་ཞེས་ཟེར་ནས་སློབ་དཔོན་དང་བྲམ་ཟེའི་བུ་གཉིས་སོང་ངོ་། །དེ་ནས་རྒྱལ་བུ་དེས་དཱརི་མོའི་ཁྱིམ་དུ་ལོ་བཅུ་གཉིས་ཀྱི་བར་དུ་རྐང་པ་བཀྲུས་པ་དང་། བསྐུ་བྱུག་ལ་སོགས་པ་བྱས། དེ་ཀུན་ཏུ་བླ་མའི་མན་ངག་མ་བརྗེད་པར་བྱས། དེས་ལས་ཀུན་གྱི་ཐོག་མར་འདྲིལ་བའི་ལས་བྱེད་དུ་བཅུག་པས། ལས་ཀྱིས་འཚོས་པའི་གཡོག་པོ་ཐམས་ཅད་ཀྱི་སྙིང་དུ་སྡུག་པ་དང་། དེའི་དུས་སུ་དཱ་རི་མོའི་གམ་དུ་རྒྱལ་པོ་ཛིན་པ་ཞེས་ཀྱང་། བྱ་ཀུཉྫི་ཞེས་བྱ་སྟེ། རྒྱལ་པོ་གཞན་ཞིག་གསེར་ཏོ་ལ་ལྔ་བརྒྱ་ཙམ་ཁུར་ནས་འཇིག་རྟེན་ཀྱི་ཆོས་དོན་དུ་གཉེར་ནས་འོངས་སོ། །སློབ་དཔོན་གྱིས་བར་བྱས་ནས་གསེར་ཏོ་ལ་བདུན་བདུན་འཇལ་གྱིན་འདུག་པ་དང་། དེ་ནས་ཞག་འགའ་ཙམ་ནས་ཀུཉྫི་ཕོ་བའི་མེ་དྲོད་ཤོར་བ་དང་། ཁ་ཟས་དྲགས་པའི་རྐྱེན་གྱིས་ཕོ་བ་ན་བས། དེས་མཚན་ཕྱེད་ན་ཕྱི་རོལ་དུ་ཕྱིན་པ་ན། ལྡུམ་རའི་ནང་ནས་ཤིན་ཏུ་དྲི་ཞིམ་པ་དང་འོད་ཅིག་འོང་བ་དེས་མཐོང་ནས་དེར་ཕྱིན་པས་དཱརིམོའི་ཁོལ་དེ་བུ་མོ་བཅོ་ལྔ་ཙམ་གྱིས་ནི་བསྙེན་བཀུར་བྱེད། ཁོ་རང་ཁྲིའི་སྟེང་ན་འདུག་པ་མཐོང་ནས་ངོ་མཚར་སྐྱེས་ཏེ། རིངས་པར་ཁྱིམ་དུ་ཕྱིན་ནས། སྨད་འཚོང་མ་ལ་སྨྲས་པ་དང་། སླར་དེ་ལྟར་གཉིས་ཀ་ཕྱིན་པས། སྔ་མ་བཞིན་མཐོང་ནས་སྨད་འཚོང་མ་འགྱོད་པ་སྐྱེས་ཏེ། དེའི་ཞབས་ལ་ཕྱག་བྱས། བསྐོར་བ་བྱེད་ཅིང་བདག་ཅག་སེམས་ཅན་ལགས་པས། འཁྲུལ་སྟེ་ཡོན་ཏན་ཅན་དུ་མ་ཤེས་ནས་ཉིད་བཀོལ་བས། བདག་ལ་སྡིག་པ་བྱུང་བ་བཟོད་པ་གསོལ། ལོ་བཅུ་གཉིས་ཀྱི་བར་མཆོད་གནས་མཛད་པར་ཞུ་ཞུས་པས། དེ་མ་བཞེད། དེ་ནས་སྨད་འཚོང་མ་དང་ཛིན་པས་བདག་ཅག་ཀྱང་རྗེས་སུ་གཟུང་དུ་གསོལ་བྱས་པས། བར་སྣང་ནས་གྲོང་ཁྱེར་སྟོང་བར་འབེབས་པ་ཞེས་བྱ་བའི་མན་ངག་གསུངས་པ།

འཇིག་རྟེན་ཕལ་བའི་རྒྱལ་པོ་ཡི།།

གདུགས་དང་གླང་པོ་ཁྲི་དག་ལས།།

ང་ཡི་རྒྱལ་སྲིད་ཁྱད་པར་འཕགས།།

ཐར་པའི་གདུགས་དང་ཐེག་ཆེན་ཞོན།།

སྲིད་པ་གསུམ་གྱི་གདན་ཁྲི་ལ།།

དཱརིཀཔཱ་ལོངས་སྤྱོད་བྱེད།།

ཅེས་གསུངས། སློབ་དཔོན་འདི་དཱརིམོའི་ཁོལ་པོ་བྱས་པས་མཚན་དཱརིཀཔཱ་བྱ་བར་གྲགས། མཐར་འཁོར་བདུན་བརྒྱ་དང་བཅས་ཏེ་མཁའ་སྤྱོད་དུ་གཤེགས་སོ།། གུརུདཱརིཀཔའི་ལོ་རྒྱུས་རྫོགས་སོ།། །།

༧༨༽གུརུཔུཏལི་པཱ།

གུརུཔུཏལི་པཱའི་ལོ་རྒྱུས་ནི། བྷཾགཱལ་ན་དམངས་རིགས་གྱི་གང་ཟག་ཅིག་གིས་ཁྱིམ་ཐབ་བླངས་ནས་ཡོད་པའི་དུས་སུ། བླ་མ་རྣལ་འབྱོར་པ་ཞིག་དེར་བྱོན་ནས་བསོད་སྙོམས་མཛད་པས། དེས་བཟའ་བ་དང་བཅའ་ལ་གྱ་ནོམ་པ་དྲངས་ཤིང་། ཡང་དག་པར་དད་དེ་བླ་མར་བཟུང་བ་ན། རྣལ་འབྱོར་པ་དེས་དེ་ལ་དགྱེས་རྡོར་གྱི་དབང་དང་གདམས་པ་གནང་། དགྱེས་རྡོར་གྱི་ཐང་ཀ་ཞིག་ཀྱང་གནང་ནས། འདི་ཐོགས་ལ་གྲོང་དང་གྲོང་ཁྱེར་དུ་བསོད་སྙོམས་གྱིས་སྒྲུབས་ཤིག །གསུངས་པས། དེས་ཀྱང་དེ་བཞིན་དུ་ལོ་བཅུ་གཉིས་སུ་བསྒྲུབས་པས་གྲུབ་པ་ཐོབ་ནས་ཡོད་པ་སུས་ཀྱང་མ་རྟོགས་པ་ན། ཞག་གཅིག་རྒྱལ་པོའི་ཁང་པར་སློང་དུ་ཕྱིན་པས། དེའི་ཐང་སྐུ་ལ་ཁོའི་ལྷ་གདན་དུ་བྱས་ནས་འདུག་པ་མཐོང་བས། རྒྱལ་པོས་དེ་ལ་གཤེ་རུ་བྱུང་བས། དེ་ན་རེ། འདི་བདག་གིས་བྲིས་པ་མ་ཡིན། ལྷ་བཟོ་བས་བྲིས་པ་ལགས་པས། ཉེས་པ་ཡང་བདག་གི་ལྷ་ཁྱེད་རང་གི་ལྷའི་གདན་དུ་བྱས་པ་བྲིས་པས་ཆོག་མོད་བྱས་པས། དེ་བདེན་སྙམ་སྟེ། དེས་ལྷ་བཟོ་བ་བཀུག་ནས་བྲིས་པས། རྣལ་འབྱོར་པ་དེ་ན་རེ། ངའི་ལྷའི་གདན་དུ་ཁྱོད་ཀྱི་ལྷ་འོང་བ་ལ་འདི་ལྟར་བྲིས་ཀྱང་ཅི་བཏུབ། བྱས་པས། རྒྱལ་པོས་དེ་ཅིས་ཏེ་ཟེར་བས། རྣལ་འབྱོར་པས་ངའི་ལྷ་ནི་ལྷའི་ལྷར་གྱུར་བས་སོ་བྱས་པས། རྒྱལ་པོས་དེའི་རྟགས་ཅི་ཡོད་ཟེར། རྣལ་འབྱོར་པས་རྒྱལ་པོའི་ལྷ་སྟེང་དུ་བྲིས་ཀྱང་ནངས་པར་འོག་ཏུ་བབས་ནས་སྡོད་པ་ཡིན་ནོ་བྱས་པས། རྒྱལ་པོ་ན་རེ། དེ་ལྟར་བྱུང་ན་ང་ཡང་ཁྱེད་ཀྱིས་བསྟན་པ་ལ་འཇུག་པ་ལགས་ཟེར་ཆད་བྱས། དེའི་དགོངས་ཀ་རྣལ་འབྱོར་པས་དེ་ལྟར་བསྒོམས་པས་ཕྱི་དེ་བལྟས་པ་ན། རྒྱལ་པོའི་ལྷ་གདན་དུ་སོང་ནས། འདུག་པ་དང་། རྒྱལ་པོ་ངོ་མཚར་སྐྱེས་ཏེ་བླ་མར་གཟུང་ནས་ཆོས་ཞུས་སོ། །དེའི་རྒྱལ་ཁམས་ཐམས་ཅད་ཀྱང་ཆོས་ལ་ཞུགས་པས། བླ་མ་པུཏལིཔཱ་བྱ་བར་གྲགས་ཤིང་། ལོ་ལྔ་བརྒྱར་འགྲོ་དོན་མཛད་ནས་རྟོགས་པ་བརྗོད་དེ། མཐར་འཁོར་དྲུག་བརྒྱ་དང་བཅས་མཁའ་སྤྱོད་དུ་གཤེགས་སོ།། གུརུཔུཏལིཔཱའི་ལོ་རྒྱུས་རྫོགས་སོ།། །།

༧༩༽གུརུཔནཧཔཱ།

གུརུཔནཧའི་ལོ་རྒྱུས་ནི། པནཧསྟེ་མཆིལ་ལྷམ་ཅན་ནོ། །དེ་ནི་ཡུལ་སཻནདྷོནགར་བྱ་བ་ན་དམངས་རིགས་ཀྱི་གང་ཟག་ཅིག་མཆིལ་ལྷམ་ལ་བརྟེན་ནས་ཡོད་པ་ལ། དུས་གཅིག་གི་ཚེ་རྣལ་འབྱོར་པ་མཐུ་སྟོབས་ཅན་ཅེས་པ་བསོད་སྙོམས་བསླངས་ནས། མཐར་གྱིས་དུར་ཁྲོད་དགོན་པ་བྱོན་པས་མཐོང་པས། དེ་ལ་དད་པ་སྙམ་སེམས་ནས་དེས་དེར་ཕྱིན་པས། རྣལ་འབྱོར་པས་ཁྱོད་ཅི་ལ་འོངས། གསུངས་པས། དེས་ཆོས་ཞུ་རུ་འོངས་ཟེར། དེ་ནས་རྣལ་འབྱོར་པས་དེ་ལ་འཁོར་བའི་ཉེས་པ་དང་། ཐར་པའི་ཕན་ཡོན་གསུངས་པས། དེ་འཁོར་བ་ལ་སྐྱོ་བ་སྐྱེས་ཏེ། བླ་མ་འཁོར་བ་ལས་ཐར་བའི་ཐབས་ཤིག་ཞུ། ཟེར་བས། རྣལ་འབྱོར་པས་དེ་ལ་བྱིན་རླབས་འཕོ་བའི་དབང་བསྐུར་ནས་མངོན་ཞེན་ལམ་ཁྱེར་ཀྱི་གདམས་པ་འདི་གནང་ངོ་།།

མཆིལ་ལྷམ་རྒྱན་ཅན་གྱོན་ནས་འགྲོ་བ་སོགས།།

རྒྱུགས་པའི་སྒྲ་ནི་སྙན་པ་བྱུང་བ་དེར།།

སྒྲ་ཙམ་དག་ཀྱང་དེ་རུ་འདུས་པ་ན།།

དེ་ཡང་གྲགས་སྟོང་དབྱེར་མེད་བསྒོམ་པར་བྱ།། 

ཞེས་གསུངས་པས། དེས་ཀྱང་དེའི་དོན་གོ་ནས་བསྒོམས་པས། ལོ་དགུ་ན་མཐོང་སྤང་གི་དྲི་མ་དག་ནས་གྲུབ་པ་ཐོབ་སྟེ། བླ་མ་པནཧ་བྱ་བར་གྲགས་ཤིང་། རྟོགས་པ་བརྗོད་དེ་ལོ་བརྒྱད་བརྒྱར་འགྲོ་དོན་མཛད་ནས། འཁོར་བརྒྱད་བརྒྱ་དང་བཅས་པ་མཁའ་སྤྱོད་དུ་གཤེགས་སོ།། གུརུཔནཧཔཱའི་ལོ་རྒྱུས་རྫོགས་སོ།། །།

༨༠༽གུརུཀོཀིལཔཱ།

གུརུཀོཀིལ་པཱའི་ལོ་རྒྱུས་ནི། གྲོང་ཁྱེར་ཅམཔཱརྣ་༼ཅམཔརྞབ༽ན་རྒྱལ་པོ་ཞིག་ཡོད་པ་ལ། སོས་ཀའི་དུས་སུ་རྒྱལ་སར་ཚ་བས་མ་ཚུགས་ནས། ཤིང་ཨམྲའི་སྐྱེད་མོས་ཚལ་གྱིས་གྲིབ་མ་དང་། ཆུ་གྲང་མོ་དང་མེ་ཏོག་ཤིང་ཐོག་སྣ་ཚོགས་པ་དྲི་ཞིམ་པ་ཁ་དོག་ལེགས་པ་ལ་སོགས་པས་དགྱེས་ནས། ཨ་མྲའི་སྐྱེད་མོས་ཚལ་དུ་དར་ཟབ་ལ་སོགས་པའི་སྟན་དང་སྔས་ལ་ནི་འདུག །རྒྱལ་བུ་ལ་སོགས་པས་བསྙེན་བཀུར་བ་དང་། བུ་མོ་གཞོན་ནུ་མ་མང་པོ་ལ་ལས་དྲིལ་ཕྱིས་བྱེད། ལ་ལས་རླུང་གཡབ་གཡོབ། ལ་ལས་གླུ་དང་ལ་ལས་གར་བྱེད། ལ་ལས་མེ་ཏོག་འཐོར་ཞིང་། རྒྱལ་སྲིད་ཀྱི་འདོད་ཡོན་ལ་ཆགས་པས། མི་ལུས་ཆུད་ཟོས་པའི་ཚེ། ཡང་དག་པའི་དགེ་སློང་ཞིག་དེར་བྱོན་པ་ན། སྒོ་རྩ་པ་སུམ་བརྒྱ་ཙམ་ཡོད་པ་དེས་དེ་དག་གིས་ནང་དུ་མ་བཏང་བ་ན། རྒྱལ་པོས་དེ་ཐོས་ཏེ་དེ་ནང་དུ་ཐོང་ཞིག་གསུངས་ནས་ནང་དུ་བྱོན་པས། རྒྱལ་པོས་དེ་ལ་བཟའ་བ་ལ་སོགས་པ་དྲངས་ནས། རྒྱལ་པོས་དགེ་སློང་ལ་ཁྱོད་ཀྱི་ཆོས་དང་ངའི་ཆོས་གང་དགའ། བྱས་པས། དགེ་སློང་གིས་སྨྲས་པ། བྱིས་པས་བལྟས་ན་ཁྱེད་ཀྱི་བཟང་། །མཁས་པས་བལྟས་ན་དུག་དང་བཅས། །གསུངས་པས། རྒྱལ་པོས་དུག་ཅེས་བྱ་བ་ཅི་ལ་ཟེར་བ་ལགས། བྱས་པས། དེས་དུག་གསུམ་རྒྱས་པར་གསུངས་ཏེ། དུག་དེ་དང་རྒྱལ་སྲིད་བསྲེས་ན་ཐ་མ་ངན་སོང་དུ་འགྲོ་ཞིང་སྡུག་བསྔལ་ཏེ། དཔེར་ན་དུག་དང་འདྲེས་པའི་བཟའ་བཏུང་བཟང་པོ་ཟོས་པ་དང་འདྲའོ། །བྱས་པས། རྒྱལ་པོ་དེ་རིགས་སད་ཀྱི་གང་ཟག་ཡིན་པས་དེ་བླ་མར་བཟུང་། གདམས་ངག་ཞུས་པས་དགེ་སློང་དེས་དེ་ལ་བདེ་མཆོག་ཏུ་དབང་བསྐུར་ནས་ལམ་བསྟན་ནོ། །དེས་རྒྱལ་སྲིད་བུ་ལ་གཏད་དེ་རྩ་བ་ནས་སྤང་ནུས་ཀྱང་། ཨམྲའི་ཚལ་གྱི་ཀོཀིལའི་སྒྲ་ལ་ཡིད་ཆགས་ནས་ལམ་སྒོམ་དུ་མ་བཏུབ་པ་ལ། དགེ་སློང་དེས་དེ་ལ་རྟོག་པ་གང་སྐྱེས་གཅིག་ཅར་གྲོལ་བའི་གདམས་པ་འདི་ལྟར་གནང་ངོ་། །

དཔེར་ན་ནམ་མཁའ་སྟོང་པ་ལ།།

འབྲུག་སྒྲ་སྤྲིན་རྣམས་འདུ་བར་བྱེད།།

དེ་ལས་ཆར་རྒྱུན་འབྱུང་བ་ཡིས།།

རྩི་ཤིང་ལོ་ཏོག་རྒྱས་པ་ལྟར།།

དེ་བཞིན་རྣ་བ་སྟོང་བར་ནི།།

ཀོ་ཀི་ལ་ཡི་འབྲུག་སྒྲ་ཡིས།།

ཉོན་མོངས་དུག་གི་ཆར་རྒྱུན་གྱིས།།

ཆགས་སྡང་ལོ་འདབ་རྒྱས་པར་བྱེད།།

མི་མཁས་བྱིས་པའི་རང་བཞིན་ཅན།།

སེམས་ཉིད་སྟོང་པའི་ངང་ལས་ནི།།

གྲགས་སྟོང་དབྱེར་མེད་འབྲུག་སྒྲ་ཡིས།།

བདེ་ཆེན་ཟག་མེད་སྤྲིན་བཞིན་བསྡུད།།

གནས་ལུགས་རང་གསལ་ཆར་རྒྱུན་ཀྱིས།།

ཡེ་ཤེས་ལྔ་ཡི་ལོ་ཏོག་རྒྱས།།

ཨེ་མ་བློ་ལྡན་ངོ་མཚར་ཆེ།།

ཞེས་གསུངས་པས། དེས་ཀྱང་བསྒོམས་པས་ཟླ་བ་དྲུག་ན་གྲུབ་པ་ཐོབ་སྟེ་མཚན་ཡང་ཀོཀིལཔཱ་ཞེས་གྲགས་ནས། འགྲོ་དོན་མང་དུ་མཛད་དེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཀོཀིལཔཱི་ལོ་རྒྱུས་རྫོགས་སོ།། །།

༨༡༽གུརུཨནཾགཔཱ།

གུརུཨནཾགའི་ལོ་རྒྱུས་ནི། ཡུལ་གྷཧུར་༼གཽཊ༽བྱ་བ་ན་དམངས་རིགས་ཀྱི་གང་ཟག་ཅིག་སྐྱེ་བ་སྔ་མ་ལ་བཟོད་པ་བསྒོམས་པས་གཟུགས་བྱད་ཤིན་ཏུ་མཛེས་པ་ཞིག་ཡོད་པ་དེས་གཞན་ལ་བལྟས་པས་ང་རྒྱལ་སྐྱེས་པ་ན། དེའི་གམ་དུ་དགེ་སློང་ཞི་བ་དུལ་བ་སྤྱོད་ལམ་མཛེས་པ་ཞིག་བྱོན་ནས་བསོད་སྙོམས་མཛད་པས། དེ་ན་རེ། ནང་དུ་གཤེགས། བདག་གིས་ཉིན་ཞག་གཅིག་གི་འཚོ་བ་འདྲེན་པ་ཡིན། ཟེར་ནས་སྤྱན་དྲངས་ཏེ། ཞབས་བཀྲུས་སྟན་བསྟབ་པ་ལ་སོགས་པ་བྱས་ནས་བཞེས་ཆབ་གྱ་ནོམ་པ་དྲངས། དེ་ནས་དེ་ན་རེ་འཕགས་པ་ཉིད་ཟས་བསོད་སྙོམས་དང་དཀའ་ཐུབ་འདི་ལྟར་མཛད་པའི་ཆེད་དུ་བྱ་བ་ཅི་ལགས། ཟེར་བ་ལ། དགེ་སློང་གིས་དེ་ལ་བདག་འཁོར་བ་ལ་འཇིགས་ནས་ཐར་པ་ཐོབ་པར་འདོད་པས་དེའི་ཕྱིར་ཡིན་གསུངས། 

ཡང་དེས་འཕགས་པ་འོ་སྐོལ་གཉིས་ཀྱི་རྟེན་ལ་ཁྱད་པར་ཅི་ཙམ་བདོག་བྱས་པས། དེས། ཁྱད་ཆེ་སྟེ། ཁྱོད་ཀྱི་རྟེན་ང་རྒྱལ་ལ་ཡོན་ཏན་གྱི་ཆོས་མི་འབྱུང་ལ། བདག་གི་དད་པའི་རྟེན་ལ་ཡོན་ཏན་དཔག་ཏུ་མེད་པ་འབྱུང་ངོ་། །གསུངས་པས། ཡང་དེས། འཕགས་པ། ཡོན་ཏན་བྱ་བ་ཅི་ལ་ཟེར། ཞུས་པས། དེས། ཚེ་འདིར་ཆོས་བྱེད་པའི་རྟེན་ལ་མི་དང་མི་མ་ཡིན་གྱི་བར་ཆད་མི་འབྱུང་ཞིང་། མཐར་ཐུག་སངས་རྒྱས་ཀྱི་སྐུ་ཐོབ་པ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་བཤད་པས། དེས་དེ་འདྲ་བ་ཐོབ་པའི་ཐབས་ཤིག་ཞུ། ཟེར་བ་ལ། དེས་དེ་ལ་ས་བརྐོ་བ་དང་འཚོང་པ་ལ་སོགས་པའི་འཇིག་རྟེན་པའི་ལས་ནུས་སམ། གསུངས་པས། དེ་འདྲ་བ་གང་ཡང་མི་ནུས་ཟེར་བ། འོ་ན་སྟན་ཐོག་གཅིག་ཏུ་བསྡད་ནས་སྒོམས་ནུས་སམ་གསུངས་པས། ནུས་ཟེར་ནས། དེས་དེ་བདེ་མཆོག་ཏུ་དབང་བསྐུར་ནས། ཚོགས་དྲུག་རང་གསལ་གྱི་གདམས་པ་འདི་གནང་ངོ་། །

སྣ་ཚོགས་སྣང་བ་སེམས་ཀྱི་རང་བཞིན་ལས།།

འགའ་ཡང་གུད་ན་ཡོད་པ་མ་ཡིན་པས།།

ཚོགས་དྲུག་ཡུལ་ལ་རང་སར་བཞག་པར་བྱ།།

མ་ཞེན་མི་འགེགས་དེ་ཡི་ངང་ལ་གཞོག། ཅེས་གསུངས་པས། དེས་ཀྱང་དེ་ལྟར་བསྒོམས་པས་ཟླ་བ་དྲུག་ན་གྲུབ་པ་ཐོབ་སྟེ། བླ་མ་ཨནཾག་པར་གྲགས་ཤིང་། འགྲོ་དོན་མང་དུ་མཛད་ནས། མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུཨནཾགཔཱའི་ལོ་རྒྱུས་རྫོགས་སོ།། །།

༨༢༽གུརུལཀྵིཀཱར།

གུརུལཀྵིཀཱརའི་ལོ་རྒྱུས་ནི། ཡུལ་ཨུརྒྱན་གྱི་སམབྷོལནགར་ཞེས་པ་གྲོང་ཁྱེར་འབུམ་ཚོ་ཕྱེད་དང་གསུམ་གྱི་རྒྱལ་པོ་ཨིནདྲབྷཱུཏིའི་ལྕམ་སྲིང་མོ་ཡིན་ལ། དེ་ལ་གཞོན་ནུ་ནས་རིགས་སད་པའི་ཡོན་ཏན་དུ་མ་མངའ་ཞིང་། གྲུབ་ཆེན་ལྭ་ཝ་པཱ་ལ་སོགས་པ་ལས་ཆོས་ཀྱང་མང་དུ་གསན་ཞིང་རྒྱུད་སྡེ་མང་པོ་ཡང་མཁྱེན་པ་ལ། དེ་ལངྐའི་རྒྱལ་པོ་ཇཱལེནདྲའི་བུ་སམ་བོལ་བྱ་བའི་ཆུང་མར་བླངས་པས། རང་གི་མིང་པོ་རྒྱལ་པོ་ཨིནདྲབྷཱུཏིས་ཀྱང་བྱིན་པར་བྱས་ཏེ། ལེན་པའི་ཕོ་ཉ་པ་བྱུང་བ་ན། འཁོར་ཆོས་ཤེས་པ་མང་པོ་དང་བཅས་ཏེ། ནོར་རྫས་ཟད་པ་མེད་པར་བསྐུར་ནས་གྲོང་ཁྱེར་ལངྐཔུརིར་བྱོན། 

གཟའ་སྐར་ངན་ཟེར་ནས་རྒྱལ་སར་སྤྱན་མ་དྲངས་པའི་དུས་སུ། ལྕམ་གྱིས་སྐྱེ་བོ་དག་གཟིགས་པས། ཐམས་ཅད་ཕྱི་པར་འདུག་པས་ཐུགས་སྐྱོ་བའི་ཚེ། རྒྱལ་བུ་དེའི་འཁོར་རྣམས་ཀྱིས་ཤ་མང་པོ་ཁྱེར་ཏེ་ལིངས་ལས་ལོག་ནས་དེའི་མདུན་ནས་མར་འོངས་པས། ལྕམ་ན་རེ། འདི་ཀུན་སུ་ཡིན། ཅི་བསད། གང་ནས་འོངས། གང་པ་ཡིན། གསུངས་པས། འཁོར་རྣམས་ཀྱིས། ཁྱོད་ཀྱི་ཁྱོ་རྒྱལ་པོས་རི་དཱགས་གསོད་དུ་བཏང་བ་ཡིན། བྱས་པས། གཏམ་དེ་ལྟོ་འགྲངས་པ་ལ་ཁ་ཟས་ཀྱི་གཏམ་བཏང་བ་ལྟར་ཤིན་ཏུ་ཡང་ཐུགས་ལོག་སྟེ། ངའི་མིང་པོ་དེ་ཆོས་སྐྱོང་བའི་རྒྱལ་པོ་ཡིན་པ་ལ། མུ་སྟེགས་འདི་འདྲ་བ་ལ་ང་བཏང་སྙམ་ནས་དེ་ཉིད་དུ་བརྒྱལ་ལོ། །དེ་ནས་བརྒྱལ་བ་སངས་པ་དང་། གྲོང་ཁྱེར་བ་དེ་རྣམས་ལ་ནོར་རྣམས་བྱིན། འཁོར་ཀུན་ལ་རྒྱན་ཆ་བསྐུར་ནས་ཡུལ་དུ་བཟློག །དེ་ནས་དེ་མན་ཆད་ཞག་བཅུ་རུ་སུ་ཡང་མ་གཏང་ཞིག་ཟེར་ནས། ཁང་པ་གཅིག་ཏུ་བཞུགས་ཏེ། ལུས་ལ་མར་ནག་དང་སོལ་བ་བྱུགས། སྐྲ་བཤིག། གཅེར་བུར་ཕྱུང་ནས་སྨྱོ་རྫུན་བྱེད་ཅིང་། སྙིང་པོའི་དོན་ལས་མ་གཡོས་པར་བཞུགས་པས། དེས་རྒྱལ་པོ་ལ་སོགས་པ་མྱ་ངན་གྱིས་ནོན་ནས་སྨན་པ་ལ་སོགས་པས་སྨན་གྱི་སྦྱོར་བ་བྱེད་པར་བྱས་པས། དེར་སུ་འོངས་པ་ལ་རྡེག་འཚོགས་ཁྲོ་ཕྱང་འཕག་པ་ན། དེ་རྣམས་ཀྱིས་མིང་པོ་ཅན་དུ་ཕོ་ཉ་བཏང་བས། དེ་ཐུགས་བདེ་བར་གནས་ཏེ། འཁོར་བ་ལ་ཐུགས་ལོག་པ་ཡིན་ཏེ་འོང་སྙམ་དུ་དགོངས་སོ།། ལྕམ་གྱིས་དེ་མན་ཆད་སྨྱོན་མའི་བརྟུལ་ཞུགས་ཀྱིས་གནས་ནས། ལངྐཔུརིར་ཟས་ཀྱི་ལྷག་མ་ཟ་ཞིང་། དུར་ཁྲོད་དུ་ཉལ་ནས་སྙིང་པོའི་ཆོས་ཉམས་སུ་བླངས་པས། ལོ་བདུན་ནས་གྲུབ་པ་ཐོབ། རྒྱལ་པོ་དེའི་ཕྱག་དར་བ་ཞིག་གིས་ལྕམ་ལ་བསྙེན་བཀུར་བྱས་པས། དེ་ལ་ཡང་གདམས་པ་གནང་ནས་ཡོན་ཏན་ཐོབ་པས། དེས་ཡོན་ཏན་རྟོགས་པ་གཞན་གྱིས་མ་ཚོར་བའི་དུས་སུ་རྒྱལ་པོ་ཇཱལེནདྲ་འཁོར་དང་བཅས་པ་ལིངས་ལ་བྱོན་པ་ན་ནམ་ཚོད་མ་རིག་སྟེ། དེ་ཉིད་ལ་རྒྱལ་པོ་གཉིད་དུ་སོང་། དེ་ནས་ཕྱིན་པས་ལམ་ལོག་པར་འཁྱམས་ཏེ། དེ་དགོངས་ཡུལ་དུ་ལོག་མ་ནུས་པས་ཉལ་ས་མེད་དེ་ལཀྵིཀཱར་ཉལ་བའི་ཕུག་ཏུ་ཕྱིན་ནས། སྨྱོན་མ་འདི་ཅི་རང་བྱེད་དམ་སྙམ་བལྟས་པས། དེ་ནི་རང་ལུས་ལས་འོད་འཕྲོ་བས་གནས་པ་ལ། ཕྱོགས་ཐམས་ཅད་ནས་ལྷའི་བུ་མོ་དཔག་ཏུ་མེད་པས་བསྐོར་ནས་མཆོད་པ་བྱེད་པར་མཐོང་བས། དད་པ་ཡང་དག་པར་སྐྱེས་ཏེ། དགོངས་ཀ་དེར་བསྡད་ནས་ཕྱི་དེ་ཡུལ་དུ་ཕྱིན། སླར་ལོག་སྟེ་ཕྱག་བྱས་པས། ང་འདྲ་བའི་བུད་མེད་ལ་ཕྱག་བྱེད་པ་ཅིག་སྟེ། བྱས་པས། ཡོན་ཏན་ཡོད་པས་ན་གདམས་པ་ཞུ་བྱས་པས། དེས་དེ་ལ། 

འཁོར་བའི་སེམས་ཅན་ཐམས་ཅད་སྡུག་བསྔལ་བཅས།།

བདེ་བ་འགའ་ཡང་ཡོད་པ་མ་ཡིན་ཏེ།།

དེ་ཡང་སྐྱེ་རྒ་ན་འཆི་ལ་སོགས་པས།།

འགྲོ་བའི་གཙོ་བོ་ལྷ་མི་དག་ཀྱང་གདུངས།།

ངན་སོང་གསུམ་ནི་སྡུག་བསྔལ་ཉིད་ཡིན་ཏེ།།

ཕན་ཚུན་ཟ་ཞིང་བཀྲེས་པས་རྟག་ཏུ་ཉེན།།

ཚ་ཞིང་གྲངས་པས་ཉེན་པ་དཔག་ཏུ་མེད།།

དེས་ན་རྒྱལ་པོ་ཐར་པའི་བདེ་ཆེན་ཚོལ།།

ཞེས་གསུངས་པའི་མཐར། ཁྱོད་ངའི་གདུལ་བྱ་མ་ཡིན་གྱི། ཁྱེད་རང་གི་ཕྱག་དར་བ་ངའི་སློབ་མ་ཞིག་གྲུབ་པ་ཐོབ་ནས་ཡོད་པས། དེ་ཁྱོད་ཀྱི་དགེ་བའི་བཤེས་གཉེན་ཡིན་ནོ། །གསུངས་པས། རྒྱལ་པོ་ན་རེ་དེ་མང་དུ་ཡོད་པས་ཇི་ལྟར་ཤེས་པ་ཡིན། ཟེར་བས། དེ་ནི་ཕྱག་དར་བྱས་ནས་བཟའ་བ་སེམས་ཅན་ལ་སྟེར་བ་ཡིན་པས་དེ་ལ་མཚན་པར་གཟུང་ཞིག་གསུངས་པས། དེས་ཀྱང་ལེགས་པར་ཕྱག་དར་བ་ལ་བལྟས་པས་གཅིག་དེ་ལྟར་བྱེད་པས། དེ་སྤྱན་དྲངས་ཏེ་ཁྲི་ལ་བཞག་ནས་ཕྱག་བྱས་གདམས་པ་ཞུས་པས། དེས་དེ་ལ་བྱིན་རླབས་འཕོ་བའི་དབང་བསྐུར་ཏེ། རྡོ་རྗེ་ཕག་མོའི་བསྐྱེད་རྫོགས་གཉིས་བསྟན་ནས། མཐར་ཕྱག་དར་པ་དང་ལྕམ་གཉིས་ཀྱིས་ལངྐཔུརིར་རྫུ་འཕྲུལ་བསྟན་ཏེ། ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ།། གུརུལཀྵིཀཱརའི་ལོ་རྒྱུས་རྫོགས་སོ།། །།

༨༣༽གུརུསམུདྲ།

གུརུསམུདྲའི་༢ལོ་རྒྱུས་ནི། ཡུལ་སརྦཊིར་བྱ་བ་ན་རིགས་ངན་ཞིག་རྒྱ་མཚོ་ནས་ནོར་བུ་བླངས་ཀྱིན་བཙོངས་ནས་འཚོ་བ་ལ། དུས་གཅིག་ན་དེ་ཡང་མ་རྙེད་ནས་འཚོ་བ་ཆད་པས་སྐྱོ་བ་སྐྱེས་ཏེ་དུར་ཁྲོད་དུ་བསྡད་པས། རྣལ་འབྱོར་པ་ཨཅིནྟ་དེར་བྱོན་ནས་དེ་ལ་དྲིས་པ། ཁྱོད་འདི་ན་ཅི་བྱེད་ཅིང་འདུག །གསུངས་པས། དེས་སྔར་གྱི་གཏམ་དེ་བདེན་པར་སྨྲས་པ་ལ། དེས་འཁོར་བའི་སེམས་ཅན་ལ་སྡུག་བསྔལ་དཔག་ཏུ་མེད་པ་ཡོད་ཅིང་། ཁྱོད་ཀྱིས་སྔ་མ་ཡན་ཆད་ཀྱང་སྡུག་བསྔལ་མི་བཟོད་པ་དྲག་པོ་དག་མྱོང་ལ། ད་དུང་སྡུག་བསྔལ་མ་ཡིན་པ་བདེ་བ་སྐད་ཅིག་ཀྱང་མི་འོང་། གསུངས་པས། དེ་ན་རེ་རྣལ་འབྱོར་པ་སྡུག་བསྔལ་ལས་ཐར་བའི་ཐབས་ཤིག་ཅིས་ཀྱང་ཞུ་ཟེར་བས། རྣལ་འབྱོར་པ་དེས་ཀྱང་དེ་ལ་དབང་བསྐུར་ཏེ། ཕྱི་ཚད་མེད་བཞི་ནང་དགའ་བཞིའི་གདམས་པ་གནང་སྟེ། 

བྱམས་པ་སྙིང་རྗེ་དགའ་བ་དང་།།

བཏང་སྙོམས་ཚད་མེད་བཞི་པོ་ཡིས།།

འཇིག་རྟེན་ཆོས་བརྒྱད་ཆ་སྙོམས་ནས།།

དབུས་ནས་བདེ་རྒྱུན་དབབ་བྱས་ཏེ།།

འཁོར་ལོ་བཞི་ལ་དགའ་བ་བཞི།།

བདེ་སྟོང་དབྱེར་མེད་རྣམ་པ་ཅན།།

ཡང་དག་པར་ནི་སྒོམ་བྱས་ན།།

བདེ་བ་ཟག་མེད་འབའ་ཞིག་ལས།།

སྡུག་བསྔལ་སྐད་ཅིག་ཙམ་མི་སྲིད།།

ཅེས་གསུངས་པ་གོ་ནས་བསྒོམས་པས། ལོ་གསུམ་ན་གྲུབ་པ་ཐོབ་སྟེ། ཕྱོགས་ཐམས་ཅད་དུ་བླ་མ་སམུདྲ་བྱ་བར་གྲགས་ཤིང་། དེས་རྟོགས་པ་བརྗོད་ཅིང་འགྲོ་དོན་བྱས་ནས། འཁོར་བརྒྱད་བརྒྱ་དང་བཅས་མཁའ་སྤྱོད་དུ་གཤེགས་སོ།། གུརུསམུདྲའི་ལོ་རྒྱུས་རྫོགས་སོ།། །།

༨༤༽གུརུབྱཱལིཔཱ།

གུརུབྱཱལི་པཱའི་ལོ་རྒྱུས་ནི། ཡུལ་ཨཔཏྲ་ཞེས་པར་བྱཱལི་བྱ་བའི་བྲམ་ཟེ་ཞིག་ལ་ནོར་མང་དུ་ཡོད་ལ། བདུད་རྩིའི་ཉམས་ལེན་བྱེད་ཅིང་། དངུལ་ཆུ་མང་དུ་ཉོས་ནས་བཏུལ་ནས་སྨན་རྣམས་འཇུག་པ་ཡིན་པ་ལ། སྨན་གཅིག་མ་ཤེས་ནས་གྲུབ་རྟགས་འབྱུང་དུ་མ་འདོད་པ་དང་། དེ་ཁྲོས་ནས་བེ་བུམ་དེ་གངྒཱ་ལ་བསྐྱུར་ནས་བཏང་ངོ་། །དེའི་ནོར་ཡང་ལོ་བཅུ་གསུམ་དུ་བསྒྲུབས་པས་ཟད་དེ། གྲོང་ཁྱེར་ནས་མར་བསོད་སྙོམས་ལ་བྱོན་ནས། རྒྱལ་པོ་རཱ་མའི་གཙུག་ལག་ཁང་ཡོད་པའི་གྲོང་ཁྱེར་ལ་ཕྱིན་པས། དེ་ན་དཱ་རི་མོ་ཞིག་གིས་གངྒའི་འགྲམ་དུ་ཁྲུས་ལ་ཕྱིན་པས་དེས་བེ་བུམ་དེ་རྙེད་ནས། བྲམ་ཟེ་དེ་ལ་བསྟན་པས། ཁོའི་སྔར་གྱི་སྨན་ཡིག་ཏུ་འདུག་ནས་བགད་པས། ཅི་ཟེར་བ་ལ། སྔར་གྱི་ལོ་རྒྱུས་བསྙད་པས། དཱ་རི་མོ་ན་རེ་ད་དུང་ང་ལ་གསེར་ཁལ་གཅིག་ལ་སོགས་པ་ཡོད་པས་བསྒྲུབ་པར་བྱ་དགོས་ཟེར། དེས་སྔར་ཡང་འདིས་བསླུས་ནས་འདི་ལ་ཐུག་པ་ཡིན། ད་ཅང་ཡོད་དེ། བྱས་པས། བྲམ་ཟེ་ལ་རང་དབང་མེད་པ་གྱིས་ཟེར་ནས་དངུལ་ཆུ་མང་དུ་ཉོས་ཏེ། ལོ་གཅིག་ཏུ་བསྒྲུབས་པས། སྐྱུ་རུ་ར་དམར་པོ་བྱ་བ་མ་ཤེས་ནས་རྟགས་འབྱུང་དུ་མ་འདོད་པ་ན། ཉིན་གཅིག་དཱ་རི་མོ་དེས་ཁྲུས་བྱས་པས་རང་བྱུང་གི་མེ་ཏོག་སེན་མོ་ལ་འབྱར་བ་དང་། དེས་སྤྲུགས་པ་ན། དེའི་ཟེགས་མ་སྨན་ནང་དུ་ལྷུངས་པས་དེ་མ་ཐག་རྟགས་རྣམས་བྱུང་བ་དང་། བྲམ་ཟེས་མོ་ལ་དྲིས་པས་འདི་འདྲ་བའི་ཟེར་མ་སོང་བ་ཡིན་ནམ། གཞན་བཅུག་པ་མེད། བྱས་པས་དགའ། དཱ་རི་མོ་དེས་བྲམ་ཟེའི་བཟའ་བཏུང་ལ་ཏིག་ཏ་བཏབ་ནས་བྱིན་པས། སྔར་གྱི་དུས་སུ་མ་ཚོར་བ་ལ། དེའི་ཞག་གཅིག་ཚོར་བས། དཱ་རི་མོས་གྲུབ་བམ། བྱས་པས། རྒྱུ་མཚན་ཅི། ཟེར་རོ། །སྔར་བཟའ་བཏུང་ལ་ཏིག་ཏ་བཏབ་པ་མི་ཚོར་བ་ལ་དེ་རིང་ཚོར་བས་སོ་བྱས་པས། དེ་ན་རེ། དེ་ཡང་གྲུབ་པའི་རྟགས་ནི་འདི་ཡིན་ཏེ། གཡས་སུ་འཁོར་བ་དང་། བཀྲ་ཤིས་པའི་རྟགས་བརྒྱད་ལ་སོགས་པ་འབྱུང་བའོ་བྱས་པས། དེས་བཀྲ་ཤིས་རྒྱ་ཆེན་པོ་བྱས་ཏེ། བྲམ་ཟེ་དཱ་རི་མོ་རྟ་རྒོད་མ་ཞིག་དང་གསུམ་གྱིས་ཟོས་པས་དེ་གསུམ་གྱིས་འཆི་བ་མེད་པའི་ཚེའི་དངོས་གྲུབ་ཐོབ་བོ།། གདམས་པ་ལ་ཕྲག་དོག་བྱས་ནས་སུ་ལ་ཡང་མི་སྟེར་བའི་ཕྱིར་ལྷ་ཡུལ་དུ་ཕྱིན་པས། ལྷ་རྣམས་ཀྱིས་མ་བསྙེན་ནས། དེས་རྒྱལ་པོ་ཀིལམ་བར་བྱ་བའི་ཡུལ་དུ་ཕྱིན་ནས་གནས་ཏེ། དེ་ན་བྲག་དཔངས་སུ་དཔག་ཚད་དང་། རྒྱར་རྒྱང་གྲགས་བཅུ་ཡོད་ལ། མཐའ་འདམ་གྱིས་བསྐོར་བ་དེའི་སྟེང་ན་ཤིང་དྲུང་གཅིག་ཡོད་པས་དེའི་གྲིབ་མ་ལ་གནས་པར་བྱེད་དོ།།

དེ་ནས་སྨན་དེའི་མན་ངག་རྒྱུན་ཆད་ནས་མེད་པ་ན། འཕགས་པ་ཀླུ་སྒྲུབ་ཀྱིས་མཁའ་སྤྱོད་བསྒྲུབས་ནས་དེར་བྱོན་ཏེ། ལྷམ་ཡ་གཅིག་སྦས་ཡ་གཅིག་བསྣམས་ནས་ཕྱག་བྱས་ཏེ་གདམས་པ་ཞུས་པས། འདིར་ག་ཙུག་བྱས་ནས་འོངས་ཟེར། མཆིལ་ལྷམ་འདིའི་མཐུ་ལ་བརྟེན་ནས་འདིར་འོངས་པ་ལགས། གསུངས་པས། དེས་གདམས་ངག་བྱིན་ཏེ། ང་ལ་ཡོན་དུ་ལྷམ་འདི་ཕུལ་ཅིག་ཟེར་བས། དེ་ཕུལ་ནས་ཡ་གཅིག་སྦས་པ་དེ་བསྣམས་ནས་སླར་འཛམ་བུའི་གླིང་དུ་བྱོན་ནས། དཔལ་གྱི་རིར་སྒྲུབ་པ་མཛད་དེ། འགྲོ་བ་ལ་ཕན་བཏགས་སོ།། དེས་ན་སེར་སྣ་ལ་སོགས་པ་ཉོན་མོངས་པ་གང་གི་རྒྱུད་ལ་ཡོད་པ་དེ་ལས་ཡོན་ཏན་བླང་ནི་ནུས་ཤིང་། ཡོན་ཏན་ཡང་དག་པ་རྒྱུད་ལ་མི་སྐྱེ་བས་ན། བླ་མའི་མན་ངག་དང་ལྡན་པ་གལ་ཆེ་བ་ཡིན། གསུང་ངོ་།། གུརུབྱལིཔའི་ལོ་རྒྱུས་རྫོགས་སོ།། །།

ཇི་ལྟར་འཇིག་རྟེན་གྲགས་པ་ལཱུཧིཔ་སོགས་གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས་གང་། །རིགས་མཆོག་རྨད་བྱུང་མགདྷར་འཁྲུངས་ཡང་དག་ཡོན་ཏན་གྱིས་བརྒྱན་མི་འཇིགས་པ་དཔལ་གྱིས། །མགུར་གྱི་བུམ་པ་ལས་བྱུང་བཞིན་དུ་བདག་གི་དེ་རྣམས་ལེགས་བསྒྱུར་བསོད་ནམས་གང་། །དུག་གིས་མནར་རྣམས་འཚོ་བྱེད་བླ་མས་ཟིན་ནས་དུག་ཉིད་སྨན་གྱི་ངོ་བོར་རྟོགས་པར་ཤོག།

གྲུབ་ཐོབ་བརྒྱད་བཅུ་རྩ་བཞིའི་ལོ་རྒྱུས་རྒྱ་གར་ཅམཔཱརྣའི་བླ་མ་མི་འཇིགས་པ་སྦྱིན་པ་དཔལ་གྱི་ཞལ་ནས་གསུངས་པ་ལྟར། དགེ་སློང་སྨོན་གྲུབ་ཤེས་རབ་ཀྱིས་ལེགས་པར་བསྒྱུར་བའོ། །དགེའོ།། །།