དགེ་ལུགས་འཕྲུལ་དེབ་ཁང་།

རྣམ་ཐར་ཁག་བཞུགས་སོ།

  ༄༅། །གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས་སློབ་དཔོན་ མི་འཇིགས་པ་སྦྱིན་པ་དཔལ་ གྱིས་ མཛད་པ་བཞུགས་སོ།། ࿈ ༄༅། །རྒྱ་གར་སྐད་དུ། ཙཏུརཱ་སཱིཏཱིསིདྡཱ་པྲ་བྲྀཏྟེབྲྀཏཱཎཏ། བོད་སྐད་དུ་གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས། བླ་མ་དམ་པ་རྣམས་ལ་ཕྱག་འཚལ་ལོ།། དུས་གསུམ་སངས་རྒྱས་རྣམས་དང་བརྒྱུད་པའི་བླ་མ་མཁའ་སྤྱོད་གཤེགས་པ་རྣམས།། དངོས་ཀྱི་བླ་མ་མཆོག་གི་དངོས་གྲུབ་བརྙེས་པའི་མི་འཇིགས་པའི་དཔལ་ལ།། ལུས་ངག་ཡིད་གསུམ་དྭང་བས་ཞབས་ཀྱི་པདྨོ་དག་ལ་གུས་བཏུད་ནས།། ལཱུ་ཧི་པ་སོགས་གྲུབ་ཐོབ་བརྒྱད་ཅུ་རྩ་བཞིའི་ཡང་དག་ལོ་རྒྱུས་བྲི།། ༡༽ལཱུཧིཔཱའི་ལོ་རྒྱུས།   དེ་ལ་གུརུལཱུཧིཔཱའི་ལོ་རྒྱུས་ནི། འདིར་ལཱུཧི་ཞེས་བྱ་བ་ནི་ཉའི་རྒྱུ་ལྟོ་གསོལ་བ་ལས་མཚན་དུ་བཏགས་པ་སྟེ། དེ་ཡང་སིངྒ་ལཱའི་གླིང་གི་རྒྱལ་པོ་གཅིག་ལ་རྒྱལ་སྲིད་ཀྱང་རྣམ་ཐོས་ཀྱི་བུ་དང་མཉམ་པ། རྒྱལ་པོའི་ཁང་བཟང་ཐམས་ཅད་ནི་རིན་པོ་ཆེ་དང་། མུ་ཏིག་དང་། གསེར་དངུལ་ལ་སོགས་པས་བརྒྱན་པ་ཡོད་ལ། སྲས་ཀྱང་གསུམ་མངའ་བ་ལས། ཡབ་རྒྱལ་པོ་གྲོངས་ནས་དུས་རེ་ཞིག་གི་ཚེ། རྩིས་མཁན་རྣམས་ལ་སྲས་གང་གིས་རྒྱལ་སྲིད་ཟིན་པ་རྩིས་བྱས་པས། དེ་ན་རེ། སྲས་བར་པས་རྒྱལ་སྲིད་བཟུང་ན་ཆབ་སྲིད་བརྟན་པ་དང་། འཁོར་འབངས་སྐྱིད་པ་ལ་སོགས་པའི་ཡོན་ཏན་ཡོད་དོ་ཟེར་བ་ད...