བྱང་ཆུབ་ལམ་གྱི་སྒྲོན་མ་ཞེས་བྱ་བ་སློབ་དཔོན་ཆེན་པོ་དཔལ་མར་མེ་མཛད་

ཡེ་ཤེས་ཀྱིས་མཛད་པ་བཞུགས་སོ།

༄༅། །རྒྱ་གར་སྐད་དུ། བོདྷི་པ་ཐ་པ་དཱི་པཾ། བོད་སྐད་དུ། བྱང་ཆུབ་ལམ་གྱི་སྒྲོན་མ། 

བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །

༡༽

དུས་གསུམ་རྒྱལ་བ་ཐམས་ཅད་དག་དང་དེ་ཡི་ཆོས། །

དགེ་འདུན་རྣམས་ལ་གུས་པ་ཆེན་པོས་ཕྱག་བྱས་ཏེ། །

སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། །

བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །

༢༽

ཆུང་ངུ་འབྲིང་དང་མཆོག་གྱུར་པའི། །

སྐྱེས་བུ་གསུམ་དུ་ཤེས་པར་བྱ། །

དེ་དག་མཚན་ཉིད་རབ་གསལ་བའི། །

སོ་སོའི་དབྱེ་བ་བྲི་བར་བྱ། །

༣༽

གང་ཞིག་ཐབས་ནི་གང་དག་གིས། །

འཁོར་བའི་བདེ་བ་ཙམ་དག་ལ། །

རང་ཉིད་དོན་དུ་གཉེར་བྱེད་པ། །

དེ་ནི་སྐྱེས་བུ་ཐ་མར་ཤེས། །

༤༽

སྲིད་པའི་བདེ་ལ་རྒྱབ་ཕྱོགས་ཤིང༌། །

སྡིག་པའི་ལས་ལས་ལྡོག་བདག་ཉིད། །

གང་ཞིག་རང་ཞི་ཙམ་དོན་གཉེར། །

སྐྱེས་བུ་དེ་ནི་འབྲིང་ཞེས་བྱ། །

༥༽

རང་རྒྱུད་གཏོགས་པའི་སྡུག་བསྔལ་གྱིས། །

གང་ཞིག་གཞན་གྱི་སྡུག་བསྔལ་ཀུན། །

ཡང་དག་ཟད་པར་ཀུན་ནས་འདོད། །

སྐྱེས་བུ་དེ་ནི་མཆོག་ཡིན་ནོ། །

༦༽

སེམས་ཅན་དམ་པ་བྱང་ཆུབ་མཆོག །

འདོད་པར་གྱུར་པ་དེ་དག་ལ། །

བླ་མ་རྣམས་ཀྱིས་བསྟན་པ་ཡི། །

ཡང་དག་ཐབས་ནི་བཤད་པར་བྱ། །

༧༽

རྫོགས་སངས་བྲིས་སྐུ་ལ་སོགས་པ། །

མཆོད་རྟེན་དམ་ཆོས་མངོན་ཕྱོགས་ལ། །

མེ་ཏོག་བདུག་སྤོས་དངོས་པོ་དག །

ཅི་འབྱོར་བ་ཡིས་མཆོད་པར་བྱ། །

༨༽

ཀུན་བཟང་སྤྱོད་ལས་གསུངས་པ་ཡི། །

མཆོད་པ་རྣམ་པ་བདུན་དག་ཀྱང༌། །

བྱང་ཆུབ་སྙིང་པོའི་མཐར་ཐུག་བར། །

མི་ལོག་པ་ཡི་སེམས་དག་གིས། །

༩༽

དཀོན་མཆོག་གསུམ་ལ་རབ་དད་ཅིང༌། །

པུས་མོའི་ལྷ་ང་སར་བཙུགས་ནས། །

ཐལ་མོ་སྦྱར་བར་བྱས་ནས་ནི། །

དང་པོ་སྐྱབས་འགྲོ་ལན་གསུམ་བྱ། །

༡༠༽

དེ་ནས་སེམས་ཅན་ཐམས་ཅད་ལ། །

བྱམས་པའི་སེམས་ནི་སྔོན་འགྲོ་བས། །

ངན་སོང་གསུམ་ལ་སྐྱེ་སོགས་དང༌། །

འཆི་འཕོ་སོགས་ཀྱིས་སྡུག་བསྔལ་བའི། །

འགྲོ་བ་མ་ལུས་ལ་བལྟས་ཏེ། །

༡༡༽

སྡུག་བསྔལ་གྱིས་ནི་སྡུག་བསྔལ་བ། །

སྡུག་བསྔལ་སྡུག་བསྔལ་རྒྱུ་མཚན་ལས། །

འགྲོ་བ་ཐར་པར་འདོད་པ་ཡིས། །

ལྡོག་པ་མེད་པར་དམ་བཅའ་བའི། །

བྱང་ཆུབ་སེམས་ནི་བསྐྱེད་པར་བྱ། །

༡༢༽

དེ་ལྟར་སྨོན་པའི་སེམས་དག་ནི། །

བསྐྱེད་པའི་ཡོན་ཏན་གང་ཡིན་པ། །

དེ་ནི་སྡོང་པོ་བཀོད་པ་ཡི། །

མདོ་ལས་བྱམས་པས་རབ་ཏུ་བཤད། །

༡༣༽

དེ་ཡིས་མདོ་ཀློག་པའམ་བླ་མ་ལས་མཉན་ཏེ། །

རྫོགས་པའི་བྱང་ཆུབ་སེམས་ཀྱི་ཡོན་ཏན་མཐའ་མེད་པ། །

རྣམ་པར་ཤེས་པར་བྱས་ལ་དེ་ནས་རྒྱུ་མཚན་དུ། །

དེ་ལྟར་ཡང་ནས་ཡང་དུ་སེམས་ནི་བསྐྱེད་པར་བྱ། །

༡༤༽

དཔལ་སྦྱིན་གྱིས་ཞུས་མདོ་དག་ལས། །

དེ་ཡི་བསོད་ནམས་རབ་བསྟན་པ། །

གང་ཚེ་ཚིགས་བཅད་གསུམ་ཙམ་དུ། །

མདོར་བསྡུས་པ་ནི་འདིར་བྲི་བྱ། །

༡༥༽

བྱང་ཆུབ་སེམས་ཀྱི་བསོད་ནམས་གང༌། །

དེ་ལ་གལ་ཏེ་གཟུགས་མཆིས་ན། །

ནམ་མཁའི་ཁམས་ནི་ཀུན་གང་སྟེ། །

དེ་ནི་དེ་བས་ལྷག་པར་འགྱུར། །

༡༦༽

གངྒཱའི་བྱེ་མའི་གྲངས་སྙེད་ཀྱི། །

སངས་རྒྱས་ཞིང་ཁམས་མི་གང་གིས། །

རིན་ཆེན་དག་གིས་ཀུན་བཀང་སྟེ། །

འཇིག་རྟེན་མགོན་ལ་ཕུལ་བ་བས། །

༡༧༽

གང་གིས་ཐལ་མོ་སྦྱོར་བགྱིས་ཏེ། །

བྱང་ཆུབ་ཏུ་ནི་སེམས་བཏུད་ན། །

མཆོད་པ་འདི་ནི་ཁྱད་པར་འཕགས། །

དེ་ལ་མཐའ་ནི་མ་མཆིས་སོ།  །

༡༨༽

བྱང་ཆུབ་སྨོན་པའི་སེམས་དག་བསྐྱེད་ནས་ནི། །

འབད་པ་མང་པོས་ཀུན་ཏུ་སྤེལ་བྱ་ཞིང༌། །

འདི་ནི་སྐྱེ་བ་གཞན་དུའང་དྲན་དོན་དུ། །

ཇི་སྐད་བཤད་པའི་བསླབ་པའང་ཡོངས་སུ་བསྲུང༌། །

༡༩༽

འཇུག་སེམས་བདག་ཉིད་སྡོམ་པ་མ་གཏོགས་པར། །

ཡང་དག་སྡོམ་པ་འཕེལ་བར་འགྱུར་མ་ཡིན། །

རྫོགས་པའི་བྱང་ཆུབ་སྡོམ་པ་སྤེལ་འདོད་པས། །

དེ་ཕྱིར་འབད་པས་འདི་ནི་ངེས་པར་བླང༌། །

༢༠༽

སོ་སོར་ཐར་པ་རིགས་བདུན་གྱི། །

རྟག་ཏུ་སྡོམ་གཞན་ལྡན་པ་ལ། །

བྱང་ཆུབ་སེམས་དཔའི་སྡོམ་པ་ཡི། །

སྐལ་བ་ཡོད་ཀྱི་གཞན་དུ་མིན། །

༢༡༽

སོ་སོར་ཐར་པ་རིགས་བདུན་དུ། །

དེ་བཞིན་གཤེགས་པས་བཤད་པ་ལས། །

ཚངས་སྤྱོད་པ་ནི་མཆོག་ཡིན་ཏེ། །

དགེ་སློང་སྡོམ་པ་དག་ཏུ་བཞེད། །

༢༢༽

བྱང་ཆུབ་སེམས་དཔའི་ས་དག་ནི། །

ཚུལ་ཁྲིམས་ལེའུ་གསུངས་ཆོ་ག་ཡིས། །

ཡང་དག་མཚན་ཉིད་ལྡན་པ་ཡི། །

བླ་མ་བཟང་ལས་སྡོམ་པ་བླང༌། །

༢༣༽

སྡོམ་པའི་ཆོ་ག་ལ་མཁས་དང༌། །

བདག་ཉིད་གང་ཞིག་སྡོམ་ལ་གནས། །

སྡོམ་པ་འབོགས་བཟོད་སྙིང་རྗེར་ལྡན། །

བླ་མ་བཟང་པོར་ཤེས་པར་བྱ།  །

༢༤༽

དེ་ལ་འབད་པས་འདི་འདྲ་བའི། །

གལ་ཏེ་བླ་མ་མ་རྙེད་ན། །

དེ་ལས་གཞན་སྡོམ་ནོད་པ་ཡི། །

ཆོ་ག་ཡང་དག་བཤད་པར་བྱ། །

༢༥༽

དེ་ལ་སྔོན་ཚེ་འཇམ་པའི་དཔལ། །

ཨཾ་བ་རཱ་ཛར་གྱུར་པ་ཡིས། །

ཇི་ལྟར་བྱང་ཆུབ་ཐུགས་བསྐྱེད་པ། །

འཇམ་དཔལ་གྱི་ནི་སངས་རྒྱས་ཞིང༌། །

རྒྱན་གྱི་མདོ་ལས་བཤད་པ་ལྟར། །

༢༦༽

དེ་བཞིན་འདིར་ནི་རབ་གསལ་བྲི། །

མགོན་པོ་རྣམས་ཀྱི་སྤྱན་སྔ་རུ། །

རྫོགས་པའི་བྱང་ཆུབ་སེམས་བསྐྱེད་ཅིང༌། །

འགྲོ་བ་ཐམས་ཅད་མགྲོན་དུ་གཉེར། །

དེ་དག་འཁོར་བ་ལས་སྒྲོལ་ལོ། །

༢༧༽

གནོད་སེམས་ཁྲོ་བའི་སེམས་ཉིད་དང༌། །

སེར་སྣ་དང་ནི་ཕྲག་དོག་ཉིད། །

དེང་ནས་བཟུང་སྟེ་བྱང་ཆུབ་དག །

ཐོབ་ཀྱི་བར་དུ་མི་བྱའོ། །

༢༨༽

ཚངས་པར་སྤྱོད་པ་སྤྱད་བྱ་ཞིང༌། །

སྡིག་དང་འདོད་པ་སྤང་བར་བྱ། །

ཚུལ་ཁྲིམས་སྡོམ་པ་ལ་དགའ་བས། །

སངས་རྒྱས་རྗེས་སུ་བསླབ་པར་བྱ། །

༢༩༽

བདག་ཉིད་མྱུར་བའི་ཚུལ་གྱིས་ནི། །

བྱང་ཆུབ་ཐོབ་པར་མི་སྤྲོ་ཞིང༌། །

སེམས་ཅན་གཅིག་གི་རྒྱུ་ཡིས་ནི། །

ཕྱི་མའི་མུ་མཐར་གནས་པར་བྱ། །

༣༠༽

ཚད་མེད་བསམ་གྱིས་མི་ཁྱབ་པའི། །

ཞིང་དག་རྣམ་པར་སྦྱང་བར་བྱ། །

མིང་ནས་བཟུང་བ་བྱས་པ་དང༌། །

ཕྱོགས་བཅུ་དག་ཏུ་རྣམ་པར་གནས། །

༣༡༽

བདག་གི་ལུས་དང་ངག་གི་ལས། །

ཐམས་ཅད་དུ་ནི་དག་པར་བྱ། །

ཡིད་ཀྱི་ལས་ཀྱང་དག་བྱ་སྟེ། །

མི་དགེའི་ལས་རྣམས་མི་བྱའོ། །

༣༢༽

རང་གི་ལུས་ངག་སེམས་ནི་རྣམ་དག་རྒྱུ། །

འཇུག་པའི་སེམས་ཀྱིས་བདག་ཉིད་སྡོམ་གནས་པས། །

ཚུལ་ཁྲིམས་བསླབ་པ་གསུམ་ལ་ལེགས་བསླབས་ན། །

ཚུལ་ཁྲིམས་བསླབ་པ་གསུམ་ལ་གུས་ཆེར་འགྱུར། །

༣༣༽

དེ་བས་རྣམ་དག་རྫོགས་བྱང་ཆུབ། །

སེམས་དཔའི་སྡོམ་པའི་སྡོམ་དག་ནི། །

འབད་པར་བྱས་པས་རྫོགས་བྱང་ཆུབ། །

ཚོགས་ནི་ཡོངས་སུ་རྫོགས་པར་འགྱུར། །

༣༤༽

བསོད་ནམས་ཡེ་ཤེས་རང་བཞིན་གྱི། །

ཚོགས་ནི་ཡོངས་སུ་རྫོགས་པ་ཡི། །

རྒྱུ་ནི་སངས་རྒྱས་ཐམས་ཅད་དག །

མངོན་ཤེས་བསྐྱེད་པ་ཉིད་དུ་བཞེད། །

༣༥༽

ཇི་ལྟར་འདབ་ཤོག་མ་རྒྱས་པའི། །

བྱ་ནི་མཁའ་ལ་འཕུར་མི་ནུས། །

དེ་བཞིན་མངོན་ཤེས་སྟོབས་བྲལ་བས། །

སེམས་ཅན་དོན་བྱེད་ནུས་མ་ཡིན། །

༣༦༽

མངོན་ཤེས་ལྡན་པས་ཉིན་མཚན་གྱི། །

བསོད་ནམས་དག་ནི་གང་ཡིན་དེ། །

མངོན་ཤེས་དག་དང་བྲལ་གྱུར་ལ། །

སྐྱེ་ན་བརྒྱ་ཡང་ཡོད་མ་ཡིན། །

༣༧༽

མྱུར་དུ་རྫོགས་པའི་བྱང་ཆུབ་ཚོགས། །

ཡོངས་སུ་རྫོགས་པར་འདོད་གྱུར་པ། །

དེས་ནི་འབད་བྱས་མངོན་ཤེས་དག །

འགྲུབ་པར་འགྱུར་གྱི་ལེ་ལོས་མིན། །

༣༨༽

ཞི་གནས་གྲུབ་པ་མ་ཡིན་པར། །

མངོན་ཤེས་འབྱུང་བར་མི་འགྱུར་ལ། །

དེ་ཕྱིར་ཞི་གནས་བསྒྲུབ་པའི་ཕྱིར། །

ཡང་ནས་ཡང་དུ་འབད་པར་བྱ། །

༣༩༽

ཞི་གནས་ཡན་ལག་རྣམས་ཉམས་པས། །

རབ་ཏུ་འབད་དེ་བསྒོམས་བྱས་ཀྱང༌། །

ལོ་ནི་སྟོང་ཕྲག་དག་གིས་ཀྱང༌། །

ཏིང་འཛིན་འགྲུབ་པར་མི་འགྱུར་རོ། །

༤༠༽

དེ་ཕྱིར་ཏིང་འཛིན་ཚོགས་ལེའུ་ལས། །

གསུངས་པའི་ཡན་ལག་ལ་ལེགས་གནས། །

དམིགས་པ་གང་རུང་གཅིག་དག་ལ། །

ཡིད་ནི་དགེ་ལ་བཞག་པར་བྱ། །

༤༡༽

རྣལ་འབྱོར་ཞི་གནས་གྲུབ་གྱུར་ན། །

མངོན་ཤེས་དག་ཀྱང་འགྲུབ་པར་འགྱུར། །

ཤེས་རབ་ཕ་རོལ་ཕྱིན་སྦྱོར་དང༌། །

བྲལ་བས་སྒྲིབ་པ་ཟད་མི་འགྱུར། །

༤༢༽

དེ་ཕྱིར་ཉོན་མོངས་ཤེས་བྱ་ཡི། །

སྒྲིབ་པ་མ་ལུས་སྤང་བའི་ཕྱིར། །

ཤེས་རབ་ཕ་རོལ་ཕྱིན་རྣལ་འབྱོར། །

རྟག་ཏུ་ཐབས་བཅས་བསྒོམ་པར་བྱ། །

༤༣༽

ཐབས་དང་བྲལ་བའི་ཤེས་རབ་དང། །

ཤེས་རབ་བྲལ་བའི་ཐབས་དག་ཀྱང༌། །

གང་ཕྱིར་འཆིང་བ་ཞེས་གསུངས་པ། །

དེ་བས་གཉིས་ཀ་སྤང་མི་བྱ། །

༤༤༽

ཤེས་རབ་གང་དང་ཐབས་གང་ཞེས། །

ཐེ་ཚོམ་དག་ནི་སྤང་བའི་ཕྱིར། །

ཐབས་རྣམས་དང་ནི་ཤེས་རབ་ཀྱི། །

ཡང་དག་དབྱེ་བ་གསལ་བར་བྱ། །

༤༥༽

ཤེས་རབ་ཕ་རོལ་ཕྱིན་སྤངས་པའི། །

སྦྱིན་པའི་ཕ་རོལ་ཕྱིན་ལ་སོགས། །

དགེ་བའི་ཆོས་རྣམས་ཐམས་ཅད་དག །

རྒྱལ་བ་རྣམས་ཀྱིས་ཐབས་སུ་བཤད། །

༤༦༽

ཐབས་གོམས་དབང་གིས་བདག་ཉིད་ཀྱིས། །

གང་ཞིག་ཤེས་རབ་རྣམས་བསྒོམ་པ། །

དེས་ནི་བྱང་ཆུབ་མྱུར་དུ་ཐོབ། །

བདག་མེད་གཅིག་པུ་བསྒོམས་པས་མིན། །

༤༧༽

ཕུང་པོ་ཁམས་དང་སྐྱེ་མཆེད་རྣམས། །

སྐྱེ་བ་མེད་པར་རྟོགས་གྱུར་པའི། །

རང་བཞིན་སྟོང་ཉིད་ཤེས་པ་ནི། །

ཤེས་རབ་ཅེས་ནི་ཡོངས་སུ་བཤད། །

༤༨༽

ཡོད་པ་སྐྱེ་བར་རིགས་མིན་ཏེ། །

མེད་པའང་ནམ་མཁའི་མེ་ཏོག་བཞིན། །

ཉེས་པ་གཉིས་ཀར་ཐལ་འགྱུར་ཕྱིར། །

གཉིས་ཀ་དག་ཀྱང་འབྱུང་བ་མིན། །

༤༩༽

དངོས་པོ་རང་ལས་མི་སྐྱེ་ཞིང༌། །

གཞན་དང་གཉིས་ཀ་ལས་ཀྱང་མིན། །

རྒྱུ་མེད་ལས་མིན་དེ་ཡི་ཕྱིར། །

ངོ་བོ་ཉིད་ཀྱི་རང་བཞིན་མེད། །

༥༠༽

ཡང་ན་ཆོས་རྣམས་ཐམས་ཅད་དག །

གཅིག་དང་དུ་མས་རྣམ་དཔྱད་ན། །

ངོ་བོ་ཉིད་ནི་མི་དམིགས་པས། །

རང་བཞིན་མེད་པ་ཉིད་དུ་ངེས། །

༥༡༽

སྟོང་ཉིད་བདུན་ཅུའི་རིགས་པ་དང༌། །

དབུ་མ་རྩ་བ་སོགས་ལས་ཀྱང༌། །

དངོས་པོ་རྣམས་ཀྱི་རང་བཞིན་ནི། །

སྟོང་པ་ཉིད་དུ་གྲུབ་བཤད་པ། །

༥༢༽

གང་ཕྱིར་གཞུང་ནི་མང་གྱུར་བས། །

དེ་ཕྱིར་འདིར་ནི་མ་སྤྲོས་ལ། །

གྲུབ་པའི་གྲུབ་མཐའ་ཙམ་ཞིག་ཏུ། །

བསྒོམ་པའི་དོན་དུ་རབ་ཏུ་བཤད། །

༥༣༽

དེ་བས་ཆོས་རྣམས་མ་ལུས་པའི། །

རང་བཞིན་དག་ནི་མི་དམིགས་པས། །

བདག་མེད་པ་ནི་བསྒོམ་གང་ཉིད། །

འདི་ནི་ཤེས་རབ་སྒོམ་པ་ཡིན། །

༥༤༽

ཤེས་རབ་ཀྱིས་ནི་ཆོས་རྣམས་ཀུན། །

གང་གི་རང་བཞིན་མ་མཐོང་བཞིན། །

ཤེས་རབ་དེ་ཉིད་རིག་དཔྱད་པ། །

རྣམ་རྟོག་མེད་པར་དེ་བསྒོམ་བྱ། །

༥༥༽

རྣམ་རྟོག་ལས་བྱུང་སྲིད་པ་ནི། །

རྣམ་པར་རྟོག་པའི་བདག་ཉིད་དེ། །

དེ་ཕྱིར་མ་ལུས་རྟོག་སྤངས་པ། །

མྱ་ངན་འདས་པས་མཆོག་ཡིན་ནོ། །

༥༦༽

དེ་ལྟར་ཡང་ནི་བཅོམ་ལྡན་གྱིས། །

རྣམ་རྟོག་མ་རིག་ཆེན་པོ་སྟེ། །

འཁོར་བའི་རྒྱ་མཚོར་ལྟུང་བར་བྱེད། །

རྟོག་མེད་ཏིང་འཛིན་ལ་གནས་པ། །

ནམ་མཁའ་བཞིན་དུ་རྟོག་མེད་གསལ། །ཞེས་གསུངས་སོ། །

༥༧༽

རྣམ་པར་མི་རྟོག་པ་ལ་འཇུག་པའི་གཟུངས་ལས་ཀྱང༌། །

དམ་ཆོས་འདི་ལ་རྒྱལ་བའི་སྲས། །

རྣམ་པར་མི་རྟོག་བསམ་གྱུར་ན། །

རྣམ་རྟོག་བགྲོད་དཀའ་རྣམ་འདས་ཏེ། །

རིམ་གྱིས་མི་རྟོག་ཐོབ་པར་འགྱུར། ། ཞེས་གསུངས་སོ།།

༥༨༽

ལུང་དང་རིགས་པ་དག་གིས་ནི། ། 

ཆོས་རྣམས་ཐམས་ཅད་སྐྱེ་མེད་པའི། །

རང་བཞིན་མེད་པ་ངེས་བྱས་ནས། ། 

རྣམ་པར་རྟོག་མེད་བསྒོམ་པར་བྱ། །

༥༩༽

དེ་ལྟར་དེ་ཉིད་བསྒོམ་བྱས་ནས། །

རིམ་གྱིས་དྲོད་སོགས་ཐོབ་བྱས་ནས། །

རབ་དགའ་ལ་སོགས་ཐོབ་འགྱུར་ཏེ། །

སངས་རྒྱས་བྱང་ཆུབ་ཡུན་མི་རིང༌། །

༦༠༽

སྔགས་མཐུ་ཉིད་ལས་གྲུབ་པ་ཡི། །

ཞི་དང་རྒྱས་སོགས་ལས་རྣམས་ཀྱིས། །

བུམ་པ་བཟང་གྲུབ་ལ་སོགས་པའི། །

གྲུབ་ཆེན་བརྒྱད་སོགས་སྟོབས་ཀྱིས་ཀྱང༌། །

༦༡༽

བདེ་བ་ཡིས་ནི་བྱང་ཆུབ་ཚོགས། །

ཡོངས་སུ་རྫོགས་པར་འདོད་པ་དང༌། །

བྱ་བ་སྤྱོད་སོགས་རྒྱུད་གསུངས་པའི། །

གལ་ཏེ་གསང་སྔགས་སྤྱོད་འདོད་ན། །

༦༢༽

དེ་ཚེ་སློབ་དཔོན་དབང་བསྐུར་ཕྱིར། །

བསྙེན་བཀུར་རིན་ཆེན་སོགས་སྦྱིན་དང༌། །

བཀའ་སྒྲུབ་ལ་སོགས་ཐམས་ཅད་ཀྱིས། །

བླ་མ་དམ་པ་མཉེས་པར་བྱ། །

༦༣༽

བླ་མ་མཉེས་པར་གྱུར་པ་ཡིས། །

ཡོངས་རྫོགས་སློབ་དཔོན་དབང་བསྐུར་བས། །

སྡིག་ཀུན་རྣམ་དག་བདག་ཉིད་ནི། །

དངོས་གྲུབ་སྒྲུབ་པའི་སྐལ་ལྡན་འགྱུར། །

༦༤༽

དང་པོའི་སངས་རྒྱས་རྒྱུད་ཆེན་ལས། །

རབ་ཏུ་འབད་པས་བཀག་པའི་ཕྱིར། །

གསང་བ་ཤེས་རབ་དབང་བསྐུར་ནི། །

ཚངས་པར་སྤྱོད་པས་བླང་མི་བྱ། །

༦༥༽

གལ་ཏེ་དབང་བསྐུར་དེ་འཛིན་ན། །

ཚངས་སྤྱོད་དཀའ་ཐུབ་ལ་གནས་པས། །

བཀག་པ་སྤྱད་པར་གྱུར་པའི་ཕྱིར། །

དཀའ་ཐུབ་སྡོམ་པ་དེ་ཉམས་ཏེ། །

བརྟུལ་ཞུགས་ཅན་དེ་ཕམ་པ་ཡི། །

༦༦༽

ལྟུང་བ་དག་ནི་འབྱུང་འགྱུར་ཞིང༌། །

དེས་ནི་ངན་སོང་ངེས་ལྟུང་ནས། །

གྲུབ་པ་ནམ་ཡང་ཡོད་མ་ཡིན།  །

༦༧༽

རྒྱུད་ཀུན་ཉན་དང་འཆད་པ་དང༌། །

སྦྱིན་སྲེག་མཆོད་སྦྱིན་སོགས་བྱེད་པ། །

སློབ་དཔོན་དབང་བསྐུར་བརྙེས་གྱུར་ཅིང༌། །

དེ་ཉིད་རིག་ལ་ཉེས་པ་མེད། །

གནས་བརྟན་མར་མེ་མཛད་དཔལ་གྱིས། །

མདོ་སོགས་ཆོས་ལས་བཤད་མཐོང་བ། །

བྱང་ཆུབ་འོད་ཀྱིས་གསོལ་བཏབ་ནས། །

བྱང་ཆུབ་ལམ་བཤད་མདོར་བསྡུས་བྱས། །

བྱང་ཆུབ་ལམ་གྱི་སྒྲོན་མ་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༈ །།རྒྱ་གར་གྱི་མཁན་པོ་དཱི་པཾ་ཀ་ར་ཤྲི་ཛྙ་ན་དང༌། །བོད་ཀྱི་ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།